«BIBIGUET né xfamilo, né góoch layibu guirá ni ma buny Jehová por looy, né ximod binladxbu looy», ndeʼ góoch Jesús a toib buñguieeu ni goniiny ñac xpiimbu. Sigory goyoʼyibu gaxca gudx ni laa Gadara, ni riaʼan niis lad sureste de nisdaʼ Galilea. Diitz ni goniʼ Jesús raslooyni que biembu mod nac buñgudxlio: buñ raniiny gaiby xfamil cós ni rasac par layibu (Mar. 5:19).

Guirá ndeʼ riendxichni guirá lagary, ná ló tipnés lagary riendxichni más que ló stipnés lagary. Por ngú, órni toib buñ radxin rac xpiin Jehová, raniiny layibu gaibyibu xfamilbu ni ronybu crer. Per ¿ximod labúu gonyibu láani? ¿Ximod labúu guidxinbu lainy xcalnabany xfamilbu ni nap stoib religión o nili rony crer lóo Dios? La Biblia radudy consej ni labúu gacné buñ.

Ló siglo primero, Andrés góc toibtica ni gon que Jesús ngú Mesías. ¿Chú láabu nimaca gochbu láani? «Láabu primerdiguieʼ bidzelbu buchbu Simón né goniʼbu: Ma bidzeldo Mesías (ni radudy diitz, Cristo)». De ngú goynébu Pedro ronoʼ Jesús, né modreʼ bidudybu oportunida Pedro par ñac xpiin Jesús (Juan 1:​35-42).

Xhoop íz después, Pedro ni goyoʼ gudx Jope cuábu invitación par tzeebu gudx Cesarea, lidx toib oficial ni laa Cornelio. ¿Chú bidzelbu lagarycu? Historia cu náni: Cornelio, golésbu Pedro né stipnés buñ ni buny compañer láabu, né bitopbu xfamilbu né ximigdxinbu. Modcu, Cornelio bidudy oportunida xfamil par nacadiagyibu Pedro né ma layibu ñanyibu xi láani ñonyibu (Hech. 10:​22-33).

¿Xí rasuidyno mod godabioo Andrés né Cornelio xfamil?

Guiropcayibu gocnéyibu xfamilyibu. Andrés biyopybu mod que buchbu nimbu Jesús, Cornelio bitop xfamil par nacadiagyibu Pedro. Per ni toibyibu buny lafuersyibu xfamilyibu par ñacyibu cristianos. ¿Xí rasuidy ndeʼ lóono? ¿Ximod labúu guisuʼno layibu? Labúu gaibyno xfamilno ni casuidyno, guiyopyno mod par guisuidyibu galnigolú né láaca guiyopyno mod par guimbuyibu stipnés Testigos. Guirá ór gapno respet ni ronyibu pensary né dipa gony lafuersno layibu guisuidyibu ni ná la Biblia. Par ganno ximod gacnéno layibu guisuidyno toib ejemplo: de Jürgen né Petra, toib galtzeʼel de Alemania.

Petra bisuidy la Biblia né testigos xtuny Jehová né goyonisbu. Láabu gócbu toib oficial, primer la diti bioladxbu ni buny Petra. Per bidxin midid bidudybu cuent que Testigos rasuidyibu galnigolú ni sieed ló la Biblia. Por ngú, góc dedicarbu a Jehová, né nigoreʼ nacbu anciano de congregación. ¿Xí nábu gonyno par labúu guidxinno lainy xcalnabany xfamilno ni noʼ ló stoib religión?

Jürgen ná: «Diti gony lafuerslo láabu par gonybu crer ni ronylo crer, né diti de láasini guininélo láabu. Ngú labúu ñony que ma diti guiniiny láabu guisuidybu más. Más galán diti guirá ór gaibylo láabu ni ronylo crer. Ni láaca láabu gacné láabu ngú guimbubu herman ni nap toibsi íz que láabu né ni rony ni ronybu. Ndeʼ láaca labúu gacné láabu».

Apóstol Pedro né xfamil Cornelio nimaca cuacuentyibu galnigolú. Per stipnés buñ goclayibu más.

Xidal xfamil Jesús bunyibu crer ló Jesús laʼga goyoʼbu ló Gudxlio. Por ejemplo, sigory apóstoles xtuny Jesús ni góc laa Santiago né Juan gocyibu xprim Jesús, né xinaʼ biinreʼ ni góc laa Salomé góc soisbu. Sigory láabu gócbu toibtica buñgonaʼ ni bidudy ni gop par gocnébu Jesús né xpiin (Luc. 8:​1-3).

Per stipnés xfamil Jesús diti gopyibu fe ló Jesús primer. Toibtica buelt, más de tobiz de goloʼ goyonis Jesús xidalguixo buñ bidop lainy toib yoʼ par nacadiag láabu. «Órni xfamilbu gon ndeʼ, goyeeyibu biyopyibu Jesús par nanásyibu né nabeʼyibu Jesús lagarycu, portín goniʼyibu: Ma binit xcalrriembu». Diti xidzú después órni buch Jesús gonabdiitz pu lagary tzeebu, Jesús diti góoch layibu. ¿Xigony yaca? Portín «buchbu diti gopyibu fe lóbu» (Mar. 3:21; Juan 7:5).

¿Xí rasuidyno mod godabioo Jesús xfamil? Diti bidzuitzbu órni tipnés goniʼ que ma binit xcalrriembu. Ná ma goitybu né ma biásbu lad gueʼet buny animarbu xfamilbu, bireʼbu nisló buchbu Santiago. Ralooypani ndeʼ gocné tanli Santiago né stipnés buchbu par ñonyibu crer que Jesús ngú Mesías. Layibu láaca goyoʼyibu lad stipnés apóstoles né stipnés xpiin Jesús ni diti bisian láabu, ro cuaʼyibu espíritu santo lainy toib yoʼ ni noʼ lainy gudx Jerusalén. Después tanli Santiago né Judas, buch Jesús, cuaʼyibu stipnés privilegios (Hech. 1:​12-14; 2:​1-4; 1 Cor. 15:7).

Xomodca ló siglo primero, tipnés xfamilno raquiin más tiemp par coʼyibu guicyibu pal gonyibu ni ná Dios. Por ejemplo, Roswitha ni góc católica órni tzeelbu ni bidxin góc testigo xtuny Jehová, íz 1978. Par láabu mod rony adorarbu Dios ngú xinésni. Por ngú, diti bioladxbu ni casuidy tzeelbu, per bidxin midid bitzaʼbu mod góc xpensarybu. Bidudybu cuent que Testigos rasuidyibu galnigolú, né ló íz 2003 goyonisbu. ¿Xí láani gocné láabu par bitzaʼbu mod góc xpensarybu? Ni gocné láabu ngú mod góc tzeelbu: xalagary nadzuitzbu por mod buny tzeelbu, biyopybu mod nacadiagbu né ñacnébu tzeelbu. ¿Xí consej radudy Roswitha lóono? Láabu nábu «Labúu gacnéno xfamilno pal napno xiroʼ paseins».

Monika goyonis ló íz 1974, né chii íz después chop xiimbu bidxin góc Testigos. Tzeelbu ni laa Hans, dipa bitzuitz ni ma nacbu de toib religión, per goyonisbu dada íz 2006. ¿Xí consej radudyibu lóono? «Dipa guisianlo Jehová né dipa guireʼganlo». Ni láaca gocné Hans láani ngú que xfamilbu guirá ór bislooy láabu que ronladx láabu. Né dipa bisnitbu esperanza que nadxin dzú tzeelbu nasuidy ni ná la Biblia.

Toibtica buelt, Jesús buny comparar mensaj de galnigolú xomod niʼs ni rony que buñ labúu guibany tipzó (Juan 4:​13, 14). Nainy lóono que xfamilno gueʼyibu nís reʼ. Per diti nainy lóono gony lafuersno layibu gueʼyibu nís reʼ. Mod guisuidyno layibu ni ronyno crer labúu gonyni que guibaladxyibu o guireʼganyibu. La Biblia ná: «Xcalnabany buñtzay rony pensary antes de guiniʼ, per roʼ buñ mal raniʼ cós mal». ¿Ximod labúu guisobno diitzreʼ? (Prov. 15:28; 16:23.)

Buñgonaʼ ni raniiny que tzeelbu guimbu ni ronybu crer, non gonybu pensary antes de guiniʼbu, ndeʼ radudy diitz que rabútzaybu ni guiniʼbu, né diti nimaca raniʼbu. Dipa non guiniʼbu que más nanbu o que nacbu más buñtzay que tzeelbu modcu sacnéni layibu guiguaʼyibu sacró. Né par guislooybu que «naniʼ xcalrriembu», non gonybu galrranabdiitz reʼ láacabu: «¿Pu ór noʼ nalat tzeʼela par gooydo diitz? ¿Né de xí cós rioladxbu gooybu diitz? ¿Xí láani rioladxbu goʼolbu? ¿Rioladxbu ciencia, política o deportes la? ¿Xí labúu goni par guioladxbu ganbu ni ná la Biblia, né láaca gapa respet ni ronybu pensary?»

Par guidxinno lainy xcalnabany xfamilno ni diti nac Testigos diti nosi raquiin cuéxano layibu dxoga dxoga. Ni guinino non guislooyno láani por mod ronyno.

Jürgen ni ma bisetlano ná: «Guirá ór bisob consej ni sieed ló la Biblia. Modcu xfamilno ni diti nac Testigo sadudy cuent que ronyno ni rasuidyno, ná diti guiniʼyibu que scú nacni». Hans, ni goyonis treint íz que tzeelbu scú rabiʼ láani: «Non gacno buñtzay. Modcu xfamilno ni diti nac Testigo sadudyibu cuent mod racné galnigolú lóono». Xfamilno ni diti nac Testigo non guidudyibu cuent que fe racnéni lóono gacno buñtzay.

Apóstol Pedro bidudy consej reʼ a cristianas ni gop tzeʼel ni diti góc xpiin Jesús: Colguisob tzeelto, pal tzeelto diti rasob xtiitz Dios, por mod ni nacto labúu sascochto tzeelto, sin guiniʼto xitcal, portín sabiʼyibu que mod nacto nayaani né que napto xiroʼ respet layibu. Diti guidudyto lagary que ni más guisac par lóoto ngú mod gactzayto xomod buñ ni ragoʼny guic nayatz o ni raquiin bisaʼ clas ór o roc lairy ni rasacgoluʼ. Xalagary ngú, par que toib buñ guieen móz raquiin gactzaybu desde lainy xcalnabanybu, portín ni gacbu buñ dzú, buñ nadaʼa, diti raxinni né ndeʼ nigolú rasac nisló Dios (1 Ped. 3:​1-4).

Pedro goniʼ que toib buñgonaʼ ni ma noʼ tzeʼel por mod ronybu labúu guiscochbu xcalnabany tzeelbu. Toib hermana ni laa Christa ronybu por guisobbu consej reʼ né ronybu rutirigaʼlni láabu par guiscochbu xcalnabany tzeelbu desde dzú goyonisbu íz 1972. Láabu ma bisuidybu né testigos xtuny Jehová, per diti goloʼbu guicbu gonybu xchiin Jehová. Ma goyeebu tipnés reunión né radzaktzaybu herman ni noʼ lainy congregación, né layibu napyibu respet ni ma goloʼbu guicbu gonybu. ¿Xí láani rony Christa par labúu guidxinbu lainy xcalnabany tzeelbu?

Láabu nábu: «Ma goloʼya guica guisoba ni raiby Jehová naʼ. Né láaca rayobi mod guidxina lainy xcalnabany tzeʼela sin guiniya xitcal. Órni noʼni de acuerdo né ni ná Xtiitz Dios, roni por coʼ nakita xcalnabanybu. Né ni máspa la, rapa respet ni nábu gonybu né rasiana láani ladxña Jehová».

Mod rasetlaa Christa raslooyni lóono que non guiyopyno mod guinino. Ná nodieʼbu ló xchiin Jehová, xomod rieebu reunión o rony predicarbu, ragoʼbu cuent ni ná tzeelbu. Nanbu que non gonladxbu tzeelbu né guidudybu ni caquiin tzeelbu. Guirácano non guiyopyno mod guininéno xfamilno ni diti nac Testigos né guienno layibu. La Biblia ná: «Par guirá cós noʼ toib tiemp», ndeʼ radudy diitz que raquiin tudyno tiemp né xfamilno ni diti rony crer ni ronyno crer, né máspa la pal nacbu tzeelno. Órni guirá ór dxeedo né saʼdo ngú rony que labúu rooyno diitz, né órni ronyno ndeʼ diti sasacbu que noʼbu toibbu (Ecl. 3:1).

Holger ná: «Nigolú rasac que xfamilno guidudy cuent que rasacbu par lóono né gonyno oración por láabu», bixiosbu goyonis treint íz después que stipnés xfamilbu. Christa ná: «Dipa cueʼya ló xpensari que tzeʼela sadxin dzú sasuidybu ni ná la Biblia né tzoʼbu xilad Jehová». Guirá ór gonyno pensary que xfamilno labúu guidxin gac Testigos dipa guireʼganno.

Nigolú rasac guidzaktzayno xfamilno, guidudyno oportunida layibu guimbuyibu ni ná la Biblia, né guidxinno dada lainy xcalnabanyibu né ni ná la Biblia. Né par labúu gonyno láani, guirá ór gonyno láani né mod né xiroʼ respet (1 Ped. 3:15).