GALAʼ íz 1970 goota lainy hospital. Dzú gopa 20 íz, góca soldad né mersi ñati. Goyoʼya lainy Hospital General Valley Forge de Phoenixville, ni noʼ Pensilvania (Estados Unidos) xtol toib galguitz ni gopa. Cada 30 minut, toib enfermero goyoʼ né naʼ par gon ximod see presión xtuni, portín nigolú guirá ór bietj loni. Mbioxhlas reʼ sanirbu lóoya chop tzón íz, né bibiʼya que nigolú bidzuibybu. Gonabdiidza láabu: «Dipa ma bibiʼlo toib buñ goity ¿ja?» Nigolú niquiichbee gócbu né cuapybu naʼ: «Yaca, dipa ma bibiʼya».

Ralooypani dipa cayaala. ¿Ximod bidxina lainy hospital ro mersi ñati? Guiniya ximod gosacloya.

Golainyguidza ló guerr ni goyoʼ gudx Vietnam laʼga cayacnéya doctor ni rony dxiin lainy quirófano. Nigolú bioladxi ñacnéya buñ ni bireʼ herid né buñ ni caxoʼ. Goniiny naʼ ñaca cirujano. Bidxina gudx Vietnam ló beʼo july íz 1969. Dzú bidxina lagarycu, bidudyibu tixomal naʼ par ñaʼya né galnalaʼ né ór de lagarycu.

Después, goyaʼya par ñoni dxiin lainy toib hospital quirúrgico ni noʼ Dong Tam, roloo toib guʼuc ni laa Mekong. Diti xidzú después bidxin helicópteros xitzca saʼ ni sitné buñ ni ma bireʼ herid né ni ma goity. Binladxgoluʼya xcudxi né bioladxi ñoni dxiin, por ngú nimaca gosalóya. Gonásdo buñ ni ma bireʼ herid né nimaca goloʼdo layibu lainy toib lagary ro naguelió ni biquiindo xomod quirófanos. Nigolú mit góc lagarycu, por ngú tanli cirujano né buñ ni racaʼ anestesy né guiropca enfermeros biyopyibu mod par labúu ñonyibu dxiin lagarycu; guiráyibu bunyibu rutigoygaʼlni layibu par nalaayibu guirá buñcu. Bibiʼya lainy helicópterocu noʼ tipnés boxh yaʼas ni diti noʼ chú bilit. Gochyibu naʼ que ni noʼ lainy boxhcu nac soldad ni ma goity ló guerr. Guirá ndeʼ bibiʼya ló guerr.

Chop tzón íz antes ni ñaʼya ló guerr bimbuya tipnés testigos xtuny Jehová. Xinaʼya bisuidy, per diti goyonisbu. Nigolú bioladxi nabúya né nacadiaga ni rasuidyibu. Toibtica buelt godudi nisló toib Salón del Reino né tzeʼel xinaʼya, gonabdiidza láabu: «¿Xí lainy nga?». Láabu cuapybu naʼ: «¡Diti gonylo pensary tzoʼlo lad buñca!». Nigolú binladxi láabu né gopa confianz lóbu, por ngú goloʼya cuent ni goniʼbu né ma diti biyobi testigos xtuny Jehová.

Órni bibigueta de gudx Vietnam bidxinni naʼ nayobi Dios. Nigolú goloʼ nabanni naʼ. Gocni suusi diti noʼ ni cadudy cuent ni cayac lainy gudxcu. Buñ gosaló goni’ que guirá soldad estadounidenses cagaityibu mbioxien ni diti nap dool lainy gudx Vietnam, né rasetnaladxi que guirá buñ bireʼ né gosaló goni’ que guirá soldad ragaityibu badaʼ.

Par labúu ñabloo ló galrralán espiritual ni gopa, gosaló goyaʼya lainy xidal iglesias. Guirá ór gosaca que binladxi Dios, per diti bioladxi ni bibiʼya guirá lagarycu. Después de ngú goyaʼya lainy toib Salón del Reino de testigos xtuny Jehová ni goyoʼ Delray Beach (Florida). Rasetnaladxi goyaʼya toib doming beʼo febrero íz 1971.

Órni bidxina cu, ma yaca guilox discurso público, ná scú biaʼana par estudio de Guiich ni caniʼ. Diti rasetnaladxi de xi goniʼni, per dipa rialadxi guirá mbioxien ni biyopy guirá versículos ló Biblia xtuny. Nigolú bidziguiaʼya. Diti buni stoib cós, nosi bicadiaga né bibiʼya. Órni ma yaca guireʼya toib hermano de 80 íz bibigax ronoʼya. Láabu Jim Gardner. Né caʼbu libro ni laa, La verdad que lleva a vida eterna né gochbu naʼ: «¿Ñoladxlo ñanélo libro reʼ la?». Órcuca biaʼando que guisuidydo stoib juevy rosil.

Par dzúcu cayoni dxiin lainy toib clínica de Boca Ratón (Florida), né doming cu ni goyaʼya reunión buni dxiin goxincu. Gosaloya buni dxiin las once né bireʼya las siete rosil. Diti tampa goyoʼ dxiin goxincu, por ngú nimaca gosalóya biila librocu. Toib enfermera bibigax ronoʼya né golexcobu librocu ladxñaya; bibiʼbu laidy librocu né goniʼbu: «Diti sadxin saclo de religiónca ¿ja?». Golexcoya librocu ladxñabu né goodxi láabu: «Laʼra galaʼ libre reʼ ma biila per sigory saca de religióncu». Né órcu bireʼca gonaʼcu see, né goxincu bidopy librocu biila.

Nigolú bidziguiaʼya ni bisudi ló capítulocu. Gonabbu naʼ nayobi xidal textos ló Biblia xtuni, naʼ gopa Versión del Rey Jacobo. Órcu ma bienna chú láabu Dios ni nigolú, Jehová. Rosil cu bisudi tzón capítulos né Jim (modreʼ goniya laabu). Guirá juevy bisuidydo tzón capítulos. ¡Nigolú bioladxi bisudi! Toib privilegio rodann gocni ni bisuidy toib hermano ungido naʼ ni bimbu hermano Russell!

Diti xidzú gosaloya goniya xtiitz Dios né congregación. Jim nigolú gocné naʼ, portín bidzubi né máspa la, órni goyoʼdo yoʼ por yoʼ (Hech. 20:20). Per guirási ór bireʼya né láabu né nigolú bioladxi predicación. Dada nigoreʼ roni pensary que predicación nacni toib privilegio rodann ni napa. ¡Diti noʼ stoib privilegio rodann ni cayonyno dxiin né Dios! (1 Cor. 3:⁠9).

Nigoreʼ gaiby lóoto ni noʼ lainy xcalnabani: primer galnadxiʼ ni gopa por Jehová (Apoc. 2:⁠4). Galnadxiʼ reʼ ma gocnéni naʼ par guialadxi guirá ni góc ló guerr né guirá galnagan ni cualóya (Is. 65:17).

Noʼ toib dzú ni nigolú rasetnaladxi. Íz 1971. Diti xidzú órni tzeʼel xinaʼya bilaʼk naʼ. Diti gosaguelbu que toib testigo xtuny Jehová nabés lidxbu. Diti gopa xiroʼ bidxiich. Ló xchiina cada chop xomal godiʼxyibu naʼ né casi guirá bidxiichcu buny gaxt láani loguiaʼ xhaba né ló predicación. Goniiny naʼ ñony representar a Jehová né respet. Ná gopa bidxiich lainy bank gudx Michigan, gudx ro goniʼsa. Lainy camión golésa portín diti goyoʼ stoib lagary ro ñaʼana. Lainy baño xtuny gasolineracu bigaa roʼya né goosa.

Toibtica dzú ni goyoʼya cu bidxina lainy Salón del Reino antes de nadxin herman par guiniʼ xtiitz Dios. Ló xchiina bireʼya par bidxina cu. Nixitz Salón del Reino cu gosagaʼya camión, ro diti noʼ chú nabiʼ naʼ. Cu gosaló bisetnaladxi ni góc Vietnam: xpuu beel buñ ni ma goyaʼij, mod bixú runy rolooya. Cu bicadiaga né bibiʼya guirá soldad ni cayaiby naʼ: «¿Sabani la? ¡Gocné naʼ!». Goona que saityibu, per biyobi mod par bisialdóya xcalnabanyibu, né par diti ñanyibu ximod noʼyibu. Bidopy xcalnabani.

Gosaló buni oración né nigolú gorudxaʼya (Sal. 56:⁠8). Né buni pensary órni salís Jehová guirá buñ ni ma goity. Né tiptisi bioní xcalrriena, bienna xi ni gony Jehová: saquiimbu resurrección par guinitlóbu guirá galrrioʼob né nitisi cós ni ma godudy buñ lóo. Dios salís a guirá mbioxhlas cu né sapyibu oportunida par guimbuyibu Jehová (Hech. 24:15). Gosaca que xcalnadxiʼya por Jehová nigolú nirodanni. Ni gosaca bidxinni lainy xcalnabani. Guirá ór rasetnaladxi ndeʼ. Desde dzúcu roni rutirigaʼlni naʼ par diti guisnita primer galnadxiʼ ni gopa por Jehová, máspa órni cacalóya prueby né tipnés galnagan.

Órni cayac guerr buñ rony cós nadzuiby, né naʼ láaca buni ngú. Ni ma gocné naʼ par diti guigotza dool naʼ láani ngú chop textos ni rioladxi. Primer texto láani ngú Apocalipsis 12:​10, 11, ro rasetlaa que ma góc gan Buñdzab diti nosi por testimonio ni radudyno, láaca por xiruny Jesús ni goity por lóono. Ni rarop texto ni rioladxi láani ngú Gálatas 2:20. Texto reʼ ma bisuidyni naʼ que Jesús «goity por naʼ». Jehová rabiʼ naʼ por xiruny Xiimbu né ma buny perdonarbu naʼ por guirá ni ma buni. Ni ma bienna ngú ma gocnéni naʼ par gapa toib galrrien nayaa; ma bichiinni naʼ par goni rutirigaʼlni naʼ par gacnéya buñ guimbu Dios xtunyno ni nap galrronladx (Heb. 9:14).

Órni roni pensary ni buni ló dzú ni see, radudi cuent que Jehová guirási ór ma gon naʼ. Por ejemplo, dzúca gon Jim que lainy xcamionga riaʼana, gochbu naʼ que noʼ toib hermana ni nap toib yoʼ ro riaʼan buñ. Nandxichi que Jehová biquiimbu Jim né a hermana cu par ñapa toib lagary ro ñaʼana. ¡Jehová natzaaybu né ranbu xpiimbu!

Beʼo may íz 1971 goyaʼya gudx Michigan. Antes de nasiana congregación de Delray Beach, bistzaaya xcamionga de libros né revistas. Bireʼya de Florida né gonása nís lad norte carretera interestatal 75. Nili ma bidxina galaʼ néz né ma biraa libros né revistas ni sanéya. Rotísi lagary gosagaʼya goniya de Gobierno xtuny Dios né gan. Goniya xtiitz Dios lainy xidal lachquiip né dada bisiana tipnés tratados ladxña buñ ni cayan baño. Rioʼ ór ranabdidza naʼca pal tipnés buñcu góc Testigo (1 Cor. 3:​6, 7).

Per órni gosalóya bisudi galnigolú diti biyobi mod ñaabi láani xfamila. Primer galnadxiʼ ni gopa por Jehová nigolú bichiinni naʼ naniya né balory, per láaca nachóng góc xtiidza. Nigolú binladxi John né Ron, por ngú biyobi mod ñony convencer layibu lafuers. Después gonaba perdón layibu. Guirá ór ranaba lóo Jehová guidxin dzú guicacuentyibu galnigolú. Desde dzúcu Jehová ma bisuidy naʼ né ma bienna gapa cuidad órni gony predicar né guisudi buñ (Col. 4:⁠6).

Guirá ór roni pensary xcalnadxiʼya ni napa por Jehová, per diti rialadxi stipnés galnadxiʼ ni napa. Ni rarop galnadxiʼ ni napa láani ngú tzeʼela ni ronladxi ni laa Susan. Guirási ór goniiny naʼ ñapa toib xcompañera ni ñacné naʼ ñoni xchiin Dios, né láabu ngú Susan. Nadipbu né nacbu toib gonaʼ espiritual. Diti rialadxi órni goyguenna láabu órni gócbu xinobi. Bibiʼya láabu cayoʼolbu Guiich ni caniʼ guic riolidxbu, gudx Cranston (Rhode Island). Ni bidziguiaʼya láani ngú que cayoʼolbu toib artículo secundario né cayopybu guirá textos ni napni. Órcu goniya: «¡Ndeʼ nac toib mbioxhlas espiritual!». Bunydo galtzeʼel beʼo diciembre íz 1971 desde dzúcu noʼbu né racnébu naʼ né radudi guixquix láabu. Ni más rioladxi de láabu láani ngú que nigolú ronladxbu naʼ, per más ronladxbu Jehová.

Susan né naʼ gopdo chop xiindo ni laa Jesse né Paul. Jehová guirá ór noʼ né layibu (1 Sam. 3:19). Nigolú nadxiʼyibu Jehová, por ngú ronydo pensary que guiropcado bisuidytzaydo layibu. Dada nigoreʼ cayonyibu ni ná Jehová né diti ma bialadxyibu primer galnadxiʼ ni gopyibu por Jehová. Guiropcayibu ma sanéyibu más de gál íz ni nodieʼyibu cayonyibu xchiin Jehová. Né noʼ chop xolidxi ni laa, Stephanie né Racquel ni nadxiʼ a Jehová, né ni nac xomod xiindzapa. Jesse né Paul golúyibu buñgonaʼ ni nac espiritual ni nadxiʼ a Jehová né guidopy xcalnabany (Efes. 6:⁠6).

Después ni goyonisa buni xchiin Jehová lainy gudx Rhode Island por dieciséis íz. Lagarycu goyoʼ ximigdxina. Rasetnaladxi guirá ancianos ni bunynéya dxiin. Nigolú radudi guixquix guirá circuit ni goyguen lóodo portín nigolú gocnéyibu naʼ. Gocni toib privilegio ni buni dxiin né tipnés herman ni diti rialadx primer galnadxiʼ ni gopyibu por Jehová. Íz 1987 goyoʼdo gudx Carolina del Norte par gocnédo herman guiniʼ xtiitz Dios, né cu láaca goyoʼ ximigdxindo. *

Beʼo agost íz 2002, biruʼyibu guiropcado Betel de Patterson (Estados Unidos). Buni dxiin ló Departamento de Servicio, né Susan la, buny dxiin ló lavandería. Nigolú bioladxbu bunybu dxiin lagarycu. Después beʼo agost íz 2005, gopa toib privilegio goyoʼya lad Tidxó buñ ni nap xiroʼ Galnan. Gosaca que diti saquiinna par privilegio reʼ. Tzeliena nigolú goyoʼ ló galrrasaʼ por privilegio reʼ, dxiin né viaj ni raguiñani. Dipa rioladxbu tzoʼbu lainy roplan, né nigoreʼ dipa rietjdo lainy roplan. Susan ná que ni raniʼ stipnés hermanas racnéni láabu. Ma gocnébu naʼ né por ngú nigolú ronladxi láabu.

Lainy oficina napa xidal retrat ni racné naʼ. Ronyni que guisetnaladxi guirá privilegios ni napa. Scú láani, ma cuaʼya xidal galnasác portín diti rialadxi primer galnadxiʼ ni gopa por Jehová.