La Biblia bitzaʼ mod bibanyibu

¿XIGONY toib buñgonaʼ ni gop más 60 íz ma diti biembu dioxh? ¿Xí buny que toib sacerdote sintoísta nasiambu santuario né nadxiimbu ñacbu toib testigo xtuny Jehová? ¿Ximod toib buñgonaʼ goyoʼ gan xcalnabanybu ná stoib buñ bisniʼs láabu? Guidudyno lagary que láacayibu guiniʼyibu.

«Ma diti noʼya xan xomandary dioxh» (ABA DANSOU)

ÍZ NI GOLBU: 1938

GUDX: BENÍN

TIPNÉS CÓS NI BUNYBU: NIGOLÚ BIQUIIMBU DIOXH

NI BUNI LÓ DZÚ NI SEE: Goniʼsa lainy toib gudx ni góc laa Tchahoué, ni noʼ gaxca toib lagon. Diti goyoʼ carreter, órni buñ ná ñee stoib lagary biquiin bark né lanch. Buñ de lagary reʼ ranás beel, nap yós, chiv, xiʼil né manybiguin, né órni rasaʼyibu yoʼ raquiinyibu yac né rioʼ ór raquiinyibu basoyáay. Ná guirá buñcu nac buñ pobre, diti tampa noʼ cós mal xomod lainy stipnés gudxrop.

Órni góca toib mbioxien, bixiosa bixel naʼ né beela ló toib convento, né lagarycu gosalódo biendo dioxh. Después bienna toib dioxh ni laa Dudua, ni láaca laa Oduduwa de gudx yoruba. Buni toib santuario par láani né gosalóya bienna láani guirá dzú: biquiinna aceity de palma, ñames, mainyguxbee, guit, palom né stipnés nimal. Casi guirá bidxiich ni buny ganar buny gaxt láani ló dioxh reʼ.

¿XIMOD BITZAʼ LA BIBLIA MOD BIBANI?: Órni gosaló bisudi la Biblia, bienna que noʼ toib Dios ni nigolú, né laabu Jehová, né diti rioladxbu guienno stipnés dioxh (Éxodo 20:​4, 5; 1 Corintios 10:14). Órcuca bidudy cuent xi raquiin goni. Binitlóya guirá dioxhcu né guirá ni radzak né láani. Láaca ma diti gonaba xcalrracné buñ chiser né ma diti gopa tipnés costumbres ni rony buñ órni noʼ ni raity

Moda nagan gocni par naʼ. Más de sesent íz bienna dioxh falz. Ximiga, xfamila né vecin ni gopa cualóyibu né bixiichyibu naʼ. Gonaba Jehová nadudy fuers naʼ par ñoni xinésni. ¡Proverbios 18:10 nigolú buny animarni naʼ! Cú náni: «Laa Jehová nacni toib torre ni sagaʼdxich. Buñ ni rony xinésni raxony riee ronoʼni né ralaa».

Láaca gocnéni naʼ bidopa né testigos xtuny Jehová, cú bibiʼya ximod nadxiʼyibu né ragobioyibu saʼyibu. Nigolú bidziguiaʼya portín ronyibu xtem par guisobyibu ni ná la Biblia. Gondxichi que testigos xtuny Jehová nap religión ni rasuidy xinésni.

¿XÍ GALNASÁC MA CUAʼYA?: Guirá textos ni sieed ló la Biblia ma gocnéni naʼ par guidzaʼga ximbioxa sacró. Gosaca suusi nabeʼyibu toib guix ni nanaʼ ladi. Antes nigolú buni gaxt par guirá dioxh ni diti buny xitcal por naʼ. Nigoreʼ la roni ni ná Jehová, láabu sanitlóbu por tipzó guirá galnagan ni cacalóno (Apocalipsis 21:​3, 4). Ma diti noʼya xan xomandary guirá dioxh falz, xalagary ngú rony adorar Jehová né guidopy xcalnabani. Láabu ranbu naʼ, diti noʼya ló riesga né nakit noʼ xcalnabani.

«Biyobi Dios desde dzú góca mbioxien» (SHINJI SATO)

ÍZ NI GOLBU: 1951

GUDX: JAPÓN

TIPNÉS CÓS NI BUNYBU: GÓCBU SACERDOTE SINTOÍSTA

NI BUNI LÓ DZÚ NI SEE: Goniʼsa lainy toib lagary ni laa Fukuoka. Bixiosa né xinaʼya bienyibu dioxh, por ngú bisuidyibu naʼ guienna dioxh sintoístas órni góca mbioxien. Desde dzúcu buni pensary ximod labúu nalaaya né ximod labúu ñacnéya buñ ni cacaló galnagan. Rasetnaladxi órni toib mextra gonabdiitzbu lóodo xi láani gonydo órni ma nacdo buñgox. Guirá xcompañera bisetlayibu xi dxiin ñony, tipnés bisetlaa gacyibu científico. Per órni naʼ goniya que nainy naʼ goni xchiin Dios, guiráyibu bixiichyibu.

Órni bireʼya scuel secundaria, bisudi par gaca mextra de religión. Cú bimbuya toib sacerdote ni guirá ór bíil toib libro color niyaʼas. Bibiʼya guiichlaidy librocu, por ngú órni gonabdiitzbu naʼ pal naana xi libro cayoʼolbu, cuabi láabu: «La Biblia». «Órcu gochbu naʼ guirá ni ná gac sacerdote sintoísta non goʼol libro reʼ».

Órcuca goyaʼya gosiiya toib libro né godixi láani toib lagary ro labúu nabiʼya láani. Per goyoʼ xchiina, por ngú diti labúu biila láani. Bidxin dzú, bireʼya scuel né ma gosalóya buni dxiin de sacerdote sintoísta lainy toib santuario. ¡Ma buni ni goniiny naʼ ñoni!

Nimaca bidudy cuent que diti cayoʼni xinésni. Xidal sacerdotes diti goyoʼyibu galrrasaʼ por buñ. Xidalyibu láaca diti gop fe. Toib ni gosanir laddo gochbu naʼ: «Pal nainy looy tzeeni galán looy, goniʼ stipnés cós per diti guiniʼlo de fe xtunylo».

Guirá ndeʼ goleʼgan naʼ. Ná diti bisiana santuario, bisudi xi rony stipnés religión. Per ná scú, guirá ndeʼ láaca goleʼganni naʼ. Buni pensary que diti noʼ toib religión ni rasuidy xinésni.

¿XIMOD BITZAʼ LA BIBLIA MOD BIBANI?: Íz 1988 bimbuya toib budista ni góoch naʼ goola la Biblia. Órcu bisetnaladxi sacerdote sintoísta ni góoch naʼ que láaca goola la Biblia. Por ngú, gosaloya bisudi la Biblia stoib. Nigolú bioladxi láani. Rioʼ ór biila láani guidopy gueel dada bioní.

Ni biila ló la Biblia, ngú bichiin naʼ nanaba xcalrracné Dios xomod sieed ló Mateo 6:​9-13. Cada chop ór bisetlaaya oración reʼ, laʼga cayoni dxiin lainy santuario.

Rasetnaladxi laʼga cayoola la Biblia, gopa stipnés galrranabdiitz. Par ló dzúcu ma noʼ tzeʼela né ma goona que testigos xtuny Jehová rasuidyibu buñ ni ná la Biblia, portín antes ma goyguenyibu tzeʼela. Órcu biyobi toib hermana Testigo, gosaló gonabdiidza láabu xidal cós. Ni más bidziguiaʼya que guirá ni gonabdiidza láabu cuapybu láani né la Biblia né biyopybu tipnés Testigos par nasuidy naʼ.

Diti xidzú gosalóya goyaʼya reunión lainy Salón del Reino. Primer diti bidudi cuent ladyibu goyoʼ tipnés Testigos ni buni tipnés cós mal. Per ndeʼ diti bicaa layibu par naniʼyibu dioxh naʼ né cuacuentyibu naʼ sacró.

Ló reunión bisudi que Dios raniiny que buñguieeu gonladx né gap respet xfamil. Par ló dzúcu más goyoʼya galrrasaʼ ñoni dxiin de sacerdote né ma diti goona tzeʼela né guiropca xiinna. Bidudi cuent que ná bicadiaga buñ ni radxin lainy santuario, diti bicadiaga tzeʼela nipa tip buelt.

Órni más bisudi de Jehová más bibigaxa láabu. Xidal versículos nigolú bidxinni lainy xcalnabani, xomod Romanos 10:​13, ni ná: «Guirá ni rasetlaa laa Jehová salaa». Biyobi Dios desde dzú góca mbioxien, né bidxin midid bidzela láabu.

Ma diti gosaca sacró ñoni dxiin lainy santuario. Primer goyoʼya galrrasaʼ xi naniʼ stipnés buñ pal nasiana sintoísmo, per guirá ór goodxi naʼ que pal nadzela stoib lad Dios ni nigolú, nasiana láani. Órcu bisoba ni ná xcalrriena, bireʼya santuario íz 1989 né gopa más confianz lóo Jehová.

Ni buni nigolú góc naganni par naʼ. Buñ ni gosanir nislóya goniʼyibu mal de naʼ né gochyibu naʼ que diti nasiana santuario. Per ni más gosac nagana láani ngú, ñaabi láani bixiosa né xinaʼya. Laʼga saaya ló néz, moda gonás toib yoʼob lachdaʼya, né nigolú bidzubi. Guirá ór gosagadzuya par buni oración né gonaba xcalrracné Jehová.

Órni bidxina ronoʼ bixiosa né xinaʼya diti goodxi layibu nimaca. Godudy xidal ór, xidal buelt goninéya Jehová né órcu ma labúu goodxi láani bixiosa. Goodxi láabu que ma bidzela Dios ni nigolú ló stoib religión, né par labúu goni xinésni non nasiana sintoísmo. Diti bidzelbu ni goniʼbu né gosac nabambu. Láaca bidxin stipnés xfamila né gochyibu naʼ que diti nasiana sintoismo. Diti goniiny naʼ nasac malyibu, per goniiny naʼ ñoni xinésni: ñoni xchiin Jehová. Después, xfamila buny respetar ni goloʼya guica goni.

Per diti nosi biquiin nasiana santuario; non nasiana mod buni pensary. Dxiin sacerdote nigolú bitzaʼni mod buni pensary. Ná biyobi mod ñaladxi guiráni, guirá ni bibiʼya buny que nasetnaladxi láani stoib.

¿Xí gocné naʼ par labúu nacalóya galnagan reʼ? Chop cós. Primer bitopa né bisaʼij guirá ni goyoʼ lainy lidxi ni bidzak né sintoísmo. Bisaʼij libros, cuadros né stipnés cós ni nigolú car. Né ni rarop ni gocné naʼ ngú ni bidzaga más Testigos. Dxoga dxoga, layibu gocnéyibu naʼ par nasiana guirá costumbres ni gopa.

¿XÍ GALNASÁC MA CUAʼYA?: Antes diti binladxi tzeʼela né xiina, né por ngú gosacyibu que noʼyibu toibyibu. Per órni bisoba ni ná la Biblia órcu ma godudi más tiemp né layibu, né ma más bidzakdo saʼdo sacró. Después tzeʼela láaca góc testigos xtuny Jehová. Nigoreʼ guirá xfamila, guiropcado, xiingaʼndo, xiindzapdo né tzeʼel, cayony adorardo Dios ni rony xinésni.

Órni roni pensary dzú góca mbiox né ni goniiny naʼ ñoni xchiin Dios né gacnéya, radudi cuent que ma cayoʼni láani nigoreʼ. Diti radzela ximod guidudi guixquix Jehová por guirá ni ma bunybu por naʼ.

«Goona que noʼ ni cayatz naʼ» (LYNETTE HOUGHTING)

ÍZ NI GOLBU: 1958

GUDX: SUDÁFRICA

TIPNÉS CÓS NI BUNYBU: BUNI PENSARY QUE DITI NOʼ BUÑ NI RONLADX NAʼ

NI BUNI LÓ DZÚ NI SEE: Goola lainy toib gudx ni góc laa Germiston, lagarycu diti tampa goyoʼ buñ mal. Bixiosa né xinaʼya biscadyibu naʼ stoib buñ órni gopa 14 dzú de goloʼ goola, portín bunyibu pensary que diti labúu sanyibu naʼ. Buni pensary que galtzeʼel ni casniʼs naʼ nacyibu bixiosa né xinaʼya. Per órni goona que diti scú nacni, buni pensary que diti noʼ ni toib buñ ni ronladx naʼ. Gosaca que ma diti labúu nadzaʼga layibu, né diti labúu sienyibu naʼ.

Órni gopa 16 íz goyaʼya cantin né ximiga par nayaʼdo né par guicadiagdo canción. Órni ma gopa 17 íz ma godóba gues. Goniiny naʼ ñaca xomod guirá buñgonaʼ ni rarecaa ló anunys de gues. Né órni gopa 19 íz, goyaʼya Johannesburgo par ñoni dxiin. Né diti xidzú ma bidzaga buñ ni goniʼ por diitz yox, ni godob gues, ni gosoch guirá guic xomal.

Per buni ejersis. Láaca godxita pelot, né squash. Goyodieʼya ló carrera xtuni de industria informática. Né buñ bimbu naʼ. Sacró bibani, gopa bidxiich né xidal buñ goniʼ que galán cayoni láani. Per diti scú gocni: bidopy xcalnabani. Diti goyoʼya nakit. Gosaca que noʼ ni cayatz naʼ.

¿XIMOD BITZAʼ LA BIBLIA MOD BIBANI?: Órni gosalóya bisudi la Biblia bienna que Dios nac toib Dios ni ronladx lóono, né por ngú biscadbu la Biblia lóono. La Biblia nacni xomod toib libro ni bicaʼbu par guisanésbu lóono laʼga nabanyno (Isaías 48:​17, 18). Bienna que par labúu guisanés Dios naʼ, non guitzaʼya mod nabani.

Ni buni primer láani ngú, bisiana ximiga ni gopa antes. Xomod ná Proverbios 13:​20, «buñ ni rasané buñ ni noʼ xcalrrien sadxin sac buñ ni noʼ xcalrrien, per ni radzak buñ ngaʼal sarecaa mal». Bisoba texto reʼ, né bisiana guirá buñ ni góc ximiga antes, né bidzaga testigos xtuny Jehová.

Per ni más gosac nagana ngú nasiana de nagoba gues. Ro cayobi mod nasiana vis reʼ xtolni góc nanaʼya midid 14 kil, mal gosaca, né gocla chii íz par labúu gopa kil ni gopa primer. Ná cualóya galnagan, goona que non guisiana vis reʼ. Goninéya Jehová guirá ór né láabu bidudybu galnadip naʼ par labúu nasiana láani.

¿XÍ GALNASÁC MA CUAʼYA?: Ma naca buñ nasac. Láaca rioʼya conforme né ni napa. Ma bidudi cuent que dxiin, bidxiich o stipnés cós diti ngú rony que buñ tzoʼ nakit. Noʼya né tzeʼela né rasuidydo tipnés buñ ni ná la Biblia, né ma gocnéya tzón ni góc xcompañera par gony ni ná Dios ni rony xinésni. Láaca antes ni ñaity ni góc bixiosa né xinaʼya ni bisniʼs naʼ, labúu goodxi layibu que Dios salís gueʼet né sabanyibu ló Gudxlio reʼ ni gac toib lagary sacróyen.

Ni radzaʼga Dios sacró, ngú racné naʼ par guidudi cuent que noʼ ni ronladx naʼ. Nigoreʼ ma rasaca que noʼya lad famil de testigos xtuny Jehová ni noʼ ló guidopynac Gudxlio, ro napa bixiosa, xinaʼya, bisana né beela (Marcos 10:​29, 30).

[Dibuj]

Lad testigos xtuny Jehová bibiʼya ximod raslooybu galnadxiʼ saʼyibu.

[Dibuj]

Santuario ro bienna sintoísmo.