Goniʼsa lainy Warialda (Nueva Gales del Sur). Lainy gudxyen reʼ radalgoluʼ xiil né yós, né radxiʼp buñ ni ro. Láaca nigolú nayaani né diti tampa noʼ buñ mal.

Naʼ lagol de 10 mbiox ni gop xinaʼya né bixiosa, por ngú gosaló buni dxiin dzú gopa 13 íz par labúu ñacnéya xfamila. Gosaló buni dxiin lainy ranch, portín diti tampa goyaʼya scuel. Dzú gopa 15 íz góca móz xtuny buñ né buny nadaʼaya mainy narís.

Guirá ranch gop cós mal né cós tzaay.Nigolú bioladxi xchiina né ro buni dxiin. Goxin gorúya cueʼ guii bibiʼya beʼo né vitzón ni noʼ guibá, cuaʼya xpuu guieʼyen órni ma cayaʼisy govitz. Buni pensary que goyoʼ toib ni bisaʼ guirá cós sacróyencu. Per láaca goyoʼ buñ ni buny cós mal. Stipnés buñ ni buny dxiincu goniʼ diitznaa né nigolú godobyibu gues, né buni xomod layibu.

Dzú gopa 18 íz goyaʼya Sydney. Biyobi mod ñoʼya ló galsoldad, per diti cuacuentyibu naʼ portín diti tampa goyaʼya scuel. Labúu bidzela toib dxiin né biaʼanna lainy gudxcu tobiz. Lagarycu góc primerdiguieʼ buelt ni bimbuya testigo xtuny Jehová. Cuacuenta invitación ni bunyibu naʼ par ñaʼya toibtica xireuniónyibu né nimaca bidudi cuent que rasuidyibu galnigolú.

Per diti xidzú después bibigueta ranch. Biaʼanna lainy Goondiwindi (Queensland). Bidzela dxiin, buni galtzeʼel né gosaló gosodxi.

Tzeʼela né naʼ goyoʼ chop xiindo. Diti xidzú de goló gool xiindo gosaló buni pensary xi cayoni né xcalnabani. Órcu bisetnaladxi ni bicadiaga ló reunión ni goyaʼya lainy Sydney né goloʼya guica ñoni alga

Bidzela toib revista golien de Guiich ni caniʼ. Cu birecaa dirección de sucursal de testigos xtuny Jehová de gudx Australia, por ngú bicaʼya guiich lóoyibu ro gonaba galrracné. Cuapyibu né bidguen toib Testigo ni nap galrronladx naʼ, né gosaló bisudi la Biblia né láabu.

Conforma casudi más, bidudi cuent que non natzaʼya mod góca. Goyoʼ toib versículo ni nigolú bidxin lainy xcalnabani: 2 Corintios 7:​1, ro rony animarni lóono «guisiaano guirá cós ni rony buidy laidyno».

Goloʼya guica ma diti nasodxi nili nagoba gues. Góc naganni, portín nigolú buni láani. Per ma goloʼya guica naquiinna galnabany xtuni par ñoni ni raniiny Dios. Ni más gocné naʼ la, ngú ni bisoba consej ni sieed ló Romanos 12:​2, ro ná: «Ma diti guibanyto mod nabany buñ ló naareʼ; xalagary ngú, colguitzaʼ mod ronyto pensary». Bidudi cuent que, par labúu nasiana vis xtuni, non natzaʼya mod roni pensary né nabiʼya cós xomod rabiʼ Dios láani: xomod cós ni rony mal buñ. Né xcalrracnébu, labúu buni gan láani.

Per ni más gosac nagana láani ngú nasiana naniya diitznaa. Maca naana consej ni radudy la Biblia ló Efesios 4:29: «Diti guireʼ roʼto ni toib diitz nayotz», per ná scú nagan gócni par naʼ nasiana láani. Toib cós ni gocné naʼ láani ngú ni buni pensary ló ni ná Isaías 40:26 ro ritlaa de vitzón, versículocu ná: «Colguiliskiaʼ lóto né colguibiʼ guibá. ¿Chú bisaʼ guirá cós reʼ? Láabu rabeʼbu vitzón xomod xidalguixo soldad, ragabbu tigaagani; nanbu ximod laa guiráni. Portín napbu xiroʼgolu galnadip, radziguiaʼ buñ xcalnadipbu né ni toib vitzón riatz». Pal Dios nap galnadip par guisaʼ beʼo ni bioladxgoluʼya nabiʼya, labúu nadudybu fuers naʼ par natzaʼya né ñoni cós ni rioladxbu. Né oración né xtem ni buni láani gocnéni naʼ nagaʼla metas xtuni né nasiana naniya diitznaa.

Dzú góca mós xtuny buñ, diti gopa oportunida de naninéya buñ, portín diti goyogoluʼ buñ ranch ro buni dxiin. Per né scuel ni cuaʼya ló reunión de testigos xtuny Jehová, bisudi biiy diitz né buñ. Láaca bisudi guininéya buñ de diitz sacró de Gobierno xtuny Dios (Mateo 6:​9, 10; 24:14).

Ma de goló chop tzón íz naʼca anciano de congregación. Toib privilegio rodann ngú ni racnéya xhermana. Per toib galnasác ni más rasac ni cuaʼya láani ngú ni roni xchiin Jehová né tzeʼela né xiindo.

Nigolú radudi guixquix Jehová ni bidudybu lagary que toib buñ xomod naʼ ni diti tampa goyee scuel bisuidy de láabu (Isaías 54:13). Roni crer né guidopy xcalnabani ni ná ló Proverbios 10:22: «Xcalnasác Jehová ngú rony que gacno buñ ric». Xfamila né naʼ nainyrado guisuidydo de Jehová né gonyrado xchiimbu por tipzó.