Goola lainy toib gudx ni laa Sajonia, par ló dzúcu gocni República Democrática Alemana (RDA). Xfamildo nigolú godabioo saʼ, bixiosa né xinaʼya bisuidy lóodo gapdo respet buñ. República Democrática Alemana gocni toib gudx comunista, por ngú buñ de gudx Sajonia diti gosac religión par layibu. Naʼ la diti biluladxi lóo Dios. Goyoʼ chop cós ni bitzaʼ mod bibani: ateísmo né comunismo.

¿Xigony bioladxi comunismo? Portín comunismo buny pensary que diti sacró tzoʼ buñ ric né buñ pobre. Buni crer que diti non tzoʼ buñ ric né pobre por ngú non natzoyibu xpidxiichyibu. Por ngú góca toibsi né organización comunista. Órni gopa 14 íz, bunygoluʼya dxiin ro rony reciclaryibu guiich. Buñchiin de lagary Aue bidudyibu guixquix naʼ dada bidudyibu toib premio naʼ. Ná góca toib mbioxhlasien bimbuya tipnés buñnan de gudxcú. Gosaca que galán cayeeni naʼ né guirá ni goni ló dzú ni sietra sarebuʼni.

Per noʼ xi góc. Íz 1989 biab muro de Berlín, né láaca biab bloque comunista de Europa del Este. Nigolú bireʼgana né bidudy cuent que diti cayac xinésni. Por ejemplo, guirá buñ ni diti buny apoyar comunismo goleʼ buñ layibu tiplad. Per ¿xigony gocni scú? ¿Xí diti comunismo rasuidy que nacno toibsi midid la? ¿Guirá pensary de política reʼ diti nigolúni la? Guirá ndeʼ goleʼgan naʼ.

Xpensari bidzaʼni, órcu gosaló bioladxi música né natiéya. Gosalóya bisudi música lainy toib yolayscuel par labúu ñaʼya scuel xirop; nigolú bioladxi que xchiina ñac música né natiéya. Ma diti gosac par naʼ ñapa respet buñ xomod ni bisudi órni góca mbioxien. Ni más bioladxi ngú nasadxeya dada gosanéya tipnés mbioxhlas gonaʼ. Per nili música nili ni natiéya diti goleʼni naʼ ló galrrasaʼ ni goyoʼya lóo, dada ro bitiéya bicaʼya láani. ¿Xí gac ló dzú ni sietra? ¿Xigony noʼno ló Gudxlio?

Órni bidzela ni cayobi nigolú bidziguiaʼya. Toibtica godzu órni noʼya lainy yolayscuel, sooba né tipnés mbioxhlas ni caniʼ xi gac ló dzú ni sietra. Ladyibu goyoʼ toib buñgonaʼ testigo xtuny Jehová ni laa Mandy, * láabu bidudybu toib consej galán naʼ. Gochbu naʼ: «Andreas, pal nainy looy ganlo xi gac né vida né xi gac ló dzú ni sietra bisuidy ni ná la Biblia».

Diti biluladxi, per gosaló bisudi láani. Mandy bislooy naʼ capítulo 2 de libro de Daniel, né órni biila láani nigolú bidziguiaʼya. Profecía reʼ rasetlani de xidal potencias mundiales, ndeʼ radudy diitz gobiernos, ni buny mandary ló dzúcu dada ló naareʼ. Ndeʼ ngú, Mandy bislooy naʼ stipnés profecías ni gac cumplir ló dzú ni sietra. Órcu bidudi cuent que bidzela galrracapy. Per ¿chú bicaʼ guirá profecías cú? Per ¿chú raniʼ xí gac ló dzú ni sietra né diti raché? ¿Profecías reʼ radudyni diitz que noʼ toib Dios la?

Né xcalrracné Mandy bimbuya Horst né Angelika ni nac Testigos. Layibu gocnéyibu naʼ par bientzaaya ni ná la Biblia. Nimaca bidudi cuent que testigos xtuny Jehová nac toib religión ni nosi raquiin laa Dios guirá ór né rasuidyibu láani buñ (Salmo 83:18; Mateo 6:9). Bisudi que Jehová radudy a guirá buñ toib esperanza par labúu guibany ló Gudxlio, toib lagary sacróyen. Salmo 37:9 ná: «Portín buñ mal sanitló, per ni nap confianz lóo Jehová sabany ló gudxlio». Nigolú bioladxi que oportunida reʼ nacni par guirá buñ ni rony xtem guisob ni ná Jehová.

Moda gosac nagana natzaʼya mod bibani né nasoba ni ná la Biblia. Guirá cós ni gopa por ni góca músico né ni bitiéya bunyni que góca buñ farmay, por ngú buni rutigoygaʼlni naʼ par ñaca buñdxo. Gosac nagana nasiana galyoxh. Radudi guixquix Jehová por ni napbu paseins, riembu né ragobiobu buñ ni rony xtem par guisob ni rasuidy la Biblia.

Ló dieciocho íz goyoʼya ladxña comunismo né ateísmo, per la Biblia bitzaʼ mod bibani. Ni bisudi de vida gocnéni naʼ par diti ñoni pensary xi gac ló dzú ni sietra. Íz 1993 goyonisa né góca testigo xtuny Jehová, né íz 2000 bitzñaya né Tabitha, toib hermana ni raniʼ xtiitz Dios né gan. Guiropcado ronydo rutirigaʼlni lóodo par guisuidydo buñ ni ná la Biblia. Xomod gosacloya, xidal buñ noʼ ló xan xomandary comunismo né ateísmo. Nigolú rasaca sacró ni cayacnéya buñ guimbu ni ná Jehová.

Órni gosaló bimbuya testigos xtuny Jehová, bixiosa né xinaʼya nigolú bidzuiby. Per después bibiʼyibu ximod ni casudi la Biblia ma gocnéni naʼ. Nigoreʼ nigolú rabaladxi portín layibu ma casuidyibu ni ná la Biblia né ma rieeyibu reunión de testigos xtuny Jehová.

Tabitha né naʼ ronydo rutirigaʼlni lóodo par guisuidydo buñ ni ná la Biblia mod non guibany buñ ni ma noʼ tzeʼel, né ngú rony que guibanydo nakit. Por ejemplo, consej ni ná diti guisiando saʼdo ndeʼ racné lóodo lainy xcaltzeeldo par gacni más nadip (Hebreos 13:4).

Ma diti noʼya galrrasaʼ por vida né xi gac ló dzú ni sietra. Noʼya lad toib famil de Testigos xtuny Jehová ni noʼ ló guidopynac Gudxlio ni rabés goxtiguie né toibsi. Lainy famil reʼ guirácado ragobiodo saʼdo, ngú ni guirási ór buni crer né ni biyobi.