Kulinganiselwa ukuthi angaba ngama-cubic kilometer angu-500 000 amanzi anosawoti omncane atholakala ngaphansi kwesihlabathi solwandle. UVincent Post waseFlinders University e-Adelaide uthi, “Izinga lokuphakama kwamanzi olwandle [lake] laba phansi kakhulu kunalokho eliyikho namuhla,” ngakho ugu seluvuleke kakhulu kunalokho olwaluyikho. Ngaleso sikhathi amanzi emvula “ayengena ngaphansi kwesihlabathi ezindaweni manje esezaba ngaphansi kolwandle.” Ososayensi bethemba ukuthi le mithombo yamanzi engaphansi kwezilwandle ngesinye isikhathi ingase isize abantu abangaphezu kwezigidi ezingu-700 abangenawo amanzi ahlanzekile anele.

Zingaphezu kwesigamu izinhlobo zezilwane ezinkulu ezazitholakala eSahara kodwa esezinyamalele noma esezihlala endaweni eyiphesenti elilodwa lendawo ezazihlala kuyo. Izinkinga zezombangazwe nokuzingelwa okudlangile kumane kuyingxenye yembangela yale nkinga. Nakuba izinhlobo zezinto eziphilayo ezitholakala ezingwadule zithi azilingane nalezo ezitholakala emahlathini, abacwaningi bathi “ukunganakwa kangako kwemvelo yasezingwadule kubonisa ukuntuleka kwezimali ezikhishelwa ukuxhasa ucwaningo olwenziwa kuzo.” Umphumela ube ukuthi kuba nzima ngabavikeli bezemvelo ukuba banake izimiso zezinto eziphilayo ezisengozini yokunyamalala ezingwadule.

Kulinganiselwa ukuthi oyedwa kubantu abangu-8 abafa ngo-2012 wabulawa ukungcola komoya. Ngokwe-World Health Organization, “ukungcola komoya sekuyingozi ehamba phambili empilweni yabantu ebangelwa yimvelo.”