ISIHLOKO ESIYINHLOKO | BANGOBANI OFAKAZI BAKAJEHOVA?
Yini OFakazi BakaJehova Abayikholelwayo?
OFakazi BakaJehova bakholelwa ukuthi “yonke imiBhalo iphefumulelwe uNkulunkulu futhi inenzuzo.” (2 Thimothewu 3:16) Sisebenzisa iBhayibheli njengesiqondiso esiwusizo ukuze sifunde ngoMdali futhi siphile ukuphila okunenjongo.
IBhayibheli lithi: “Ukuze abantu bazi ukuthi wena, ogama lakho linguJehova, Wena wedwa ungoPhezukonke emhlabeni wonke.” (IHubo 83:18) Ngakho, sikhulekela uJehova uNkulunkulu kuphela futhi njengofakazi bakhe silwela ukwenza igama lakhe laziwe.—Isaya 43:10-12.
NjengamaKristu, sikholelwa ukuthi uJesu, “iNdodana kaNkulunkulu,” * weza emhlabeni futhi waba uMesiya. (Johane 1:34, 41; 4:25, 26) Ngemva kokufa kwakhe, uJesu wavuselwa ezulwini. (1 Korinte 15:3, 4) Kamuva waba iNkosi yoMbuso kaNkulunkulu. (IsAmbulo 11:15) Lowo Mbuso unguhulumeni ongokoqobo oyobuyisela iPharadesi emhlabeni. (Daniyeli 2:44) IBhayibheli lithi: “Abamnene bayodla ifa lomhlaba, futhi ngempela bayothola injabulo enkulu ngokuchichima kokuthula.”—IHubo 37:11, 29.
“Lapho befunda iBhayibheli, bakholelwa ukuthi uNkulunkulu ukhuluma nabo. Noma nini lapho kuvela izinkinga ekuphileni kwabo, bathatha iZwi likaNkulunkulu bacwaninge ukuze bathole izixazululo. . . . Kubo iZwi likaNkulunkulu lisaphila.”—Umfundisi wamaKatolika uBenjamin Cherayath, ephephandabeni laseJalimane i-Münsterländische Volkszeitung
OFakazi BakaJehova bakholelwa ukuthi izimiso zeBhayibheli zingabazuzisa abantu ngisho nanamuhla. (Isaya 48:17, 18) Ngakho, senza konke okusemandleni ukuze siphile ngalezo zimiso. Ngokwesibonelo, ngenxa yokuthi iBhayibheli lisixwayisa ukuba sigweme izinto ezingcolisa imizimba nezingqondo zethu, asibhemi noma sisebenzise kabi izidakamizwa. (2 Korinte 7:1) Sigwema nezenzo ezenqatshwa iBhayibheli ngokuqondile njengokudakwa, ukuziphatha kabi ngokobulili nokweba.—1 Korinte 6:9-11.
^ isig. 5 IBhayibheli libuye libize uJesu ngokuthi ‘iNdodana kaNkulunkulu ezelwe yodwa’ ngoba uyizibulo lendalo futhi uwukuphela kwendalo uNkulunkulu ayidala ngokuqondile.—Johane 3:18; Kolose 1:13-15.