5 YACHACHIKUY
Tayta-mamaykichiswan sumaqta kawsaychis
“P’achawan hina p’achakuychis [...] sumaq sonqo-kaywan, huch’uyyaykukuywan, llamp’u sonqo-kaywan, pacienciawan ima” (Colosenses 3:12)
Warmipas qharipas casarakusqankumantapachan huk familiayoqña kapunku. Chay p’unchaymantan esposayki, qosayki aswan importante kanan. Chaywanpas tayta-mamaykitaqa respetowan, munakuywanmi qhawarishanallayki. Ichaqa, ¿imatan ruwawaq tayta-mamayki kawsayniykichisman chapukuyta munaqtin? Bibliapin yanapaykuna kashan tayta-mamaykichiswan thakpi kawsanaykichispaq.
1 AMA QONQARPARIYCHU NITAQ NISHUTAQA K’ASKAKUYCHU
BIBLIAN NIN: “Taytaykitapas mamaykitapas respetankin”, nispa (Efesios 6:2). Familiayoqña kanki chaypas, tayta-mamaykitaqa respetashanallaykin. Chaymi sapankaykichis tiempota t’aqanaykichis paykunapaq. Manan phiñakunaykichu nitaq mana allinpaqchu qhawarinayki esposayki, qosayki tayta-mamanwan kaqtin. Biblian nin: “Munakuqqa manan envidiakunchu”, nispa (1 Corintios 13:4; Gálatas 5:26).
¿IMATAN RUWAWAQ?
-
Ama niychu: “Mamaykiqa tukuy ruwasqaytan qhawashallan”, otaq “Manan ima ruwasqaytapas allinpaqchu qhawarin”, nispa.
-
Entiendey esposayki otaq qosayki imayna sientekusqanta.
2 SUT’ILLANTA PAYKUNAWAN PARLARIY
BIBLIAN NIN: “Runaqa taytantapas mamantapas saqepunqa, hinaspan warminman hukllachaykakapunqa, huk aychallataq kapunqaku”, nispa (Génesis 2:24). Tayta-mamakunaqa wawanku casarakapuqtinpas interesakushallankun paykunapi. Chaymi wakinqa nishutañataq wawankuq kawsayninman chapukunku.
¿Imatan ruwawaqchis chaykuna kaqtin? Sut’illantan paykunawan parlarinaykichis, ichaqa manan k’iriq simiwanchu imatapas ninaykichis (Proverbios 15:1). Sichus huch’uyyaykukuq, llamp’u sonqo, pacienciayoq kankichis chayqa, sumaqtan tayta-mamaykichiswan kawsankichis, ‘munakuypi muchunakuspataq [otaq aguantanakuspa] kawsankichis’ (Efesios 4:2).
¿IMATAN RUWAWAQ?
-
Sichus tayta-mamaykichis kawsayniykichisman nishuta chapukushan chayqa, sumaqllata chaymanta parlariychis.
-
Iskayniykichis qhawariychis imatan ruwawaqchis chayta.
