1. Избан Иегова аҭаацәара заԥиҵаз? Иаажәга мзызк.

 ИЕГОВА — «насыԥ змоу Анцәа» иоуп (1 Тим. 1:11). Иара иҭахуп ҳаргьы насыԥ ҳамазарц. Убри аҟынтә ирацәаны аҳамҭақәа ҳаиҭеит (Иак. 1:17). Аҳамҭақәа руак — аҭаацәара ауп. Ахаҵеи аԥҳәыси аҭаацәара ианалало, бзиа ишеибабало, патугьы шеиқәырҵало ажәа рибаҭоит. Хаҵеи-ԥҳәыси аизыҟазаашьа бзиақәа анрыбжьоу, рҭаацәараҿы агәырӷьара рымазаауеит (Ажәам. 5:18).

 2. Иарбан уадаҩрақәоу иахьа аҭаацәарақәа рҿы иҟоу?

² Иахьа ирацәаҩны аҭаацәарақәа ианеибагоз бзиа ишеибабало ала ирибаҭаз ажәа рхашҭуеит. Уи аҭаацәарақәа ауадаҩра рызцәырнагоит. Уи даараӡа угәы унархьуеит. Уажәааигәа аекспертцәа имҩаԥыргаз ҭҵаарак инақәыршәаны, ахацәа аӡәырҩы рыҳәса рыпҟоит, ихжәаны ирацәажәоит, иҽеимкәа ирызныҟәоит, мамзаргьы даҽакала ирықәымчуеит. Ахацәа шьоукы ауаа ианырбо рыҳәса пату рықәҵаны ирацәажәоит, аҩны ианыҟоу пату рықәырҵаӡом. Иҟоуп адунеи иалаҵәаз даҽа уадаҩрак: ахацәа апорнографиа иахәаԥшуеит, уи аҭаацәараҿы ауадаҩра цәырнагоит, аҳәса схаҵа сиҭахӡам, бзиа сибаӡом ҳәа ихәыцуа иалагоит.

 3. Избан ахацәа шьоукы рыҳәса иҽеимкәа изрызныҟәо?

³ Избан ахацәа шьоукы рыҳәса иҽеимкәа изрызныҟәо? Уи зыхҟьо рацәоуп. Шьоукы рҭаацәа иҟарҵоз ҟарҵоит: раб ран ихжәаны длацәажәозҭгьы, уи цәгьарак аҵаӡам ҳәа ирыԥхьаӡоит. Даҽа шьоукы ркультураҿы ишаԥу еиԥш рхы мҩаԥыргоит: аԥҳәыс лҭыԥ лдыруазароуп ҳәа ахацәа рыҳәса иџьбараны ирызныҟәоит. Шьоукы ремоциақәа рзынкылаӡом, рыԥсахы еибакуеит. Иҟоуп апорнографиа иахәаԥшуагьы. Уи иахҟьаны аҳәсеи асекси рганахь ала рхәыцшьа бжьысуеит. Аорганизациақәак имҩаԥыргаз аҭҵаарақәа инарықәыршәаны, апандемиа COVID-19 аан ахацәа еиҳа лассы-лассы аҳәса ирықәымчуа иалагеит. Ишыҟазаалакгьы, ахацәа рыҳәса иҽеимкәа ирзымныҟәалароуп.

 4. Рҽызцәырыхьчалар акәзеи Анцәа имаҵ зуа ахацәа, насгьы избан уи рҽацәырыхьчалар захәҭоу?

 ⁴ Ари адунеи аҿы лассы-лассы аҳәса пату рықәырҵаӡом. Анцәа имаҵ зуа ахацәа ари адунеи аҿы ауаа шхәыцуа еиԥш имхәыцларц азы ргәырҽанызароуп a. Избан? Избанзар ушхәыцуа еиԥш ауп ухгьы шымҩаԥуго. Апостол Павел Рим инхоз иԥшьоу адоуҳала иалхыз ақьырсианцәа ргәырҽаниҵеит: «Ари адунеи иатәу ауаа иҟарҵо аҟаҵара шәаҟәыҵ» (Рим. 12:1, 2). Павел ари асаламшәҟәы аниҩуаз, Римтәи аизарақәа ыҟоижьҭеи шықәсқәак ҵуазар ҟаларын. Аха уеизгьы Павел иажәақәа излаҳдырбо ала, аишьцәа шьоукы уатәи ақьабзқәеи иаарыкәыршаны иҟаз ауаа рхәыцшьеи рныруан. Убри азоуп Павел рхәыцшьеи рхымҩаԥгашьеи рыԥсахырц ргәы зазҭеиҵаз. Ари алабжьара Анцәа имаҵ зуа ахацәа рзы иахьагьы ихәарҭоуп. Угәы унархьуеит шьоукы ари адунеи шхәыцуа еиԥш иахьхәыцуа, насгьы рыҳәса иҽеимкәа иахьрызныҟәо b. Дыззыԥшузеи Иегова ахацәа рҟынтә рыҳәса ишырзыҟоу аганахь ала? Уи азҵаара аҭак астатиа иазалху ажәеинраалаҿы иҳауеит.

 5. 1 Пиотр 3:7 иану инақәыршәаны, дышԥалзыҟазар акәу ахаҵа иԥҳәыс?

⁵ Шәаԥхьа 1 Пиотр 3:7. Иегова ахацәа дҵас ириҭеит рыҳәса ҳаҭыр рықәырҵаларц. Ари адҵа назыгӡо ахаҵа иԥҳәыс бзиа дшибо, патугьы шлықәиҵо усла илирбалоит. Ари астатиаҿы ҳалацәажәоит ахаҵа уи шыҟаиҵалаша. Аха раԥхьа еилаҳкаауеит ахаҵа иҟаимҵалаша.

ШӘЫԤҲӘЫС ЛГӘЫ ЛЗЫРХЬУА ҞАШӘЫМҴАЛАН

 6. Дышԥарзыҟоу Иегова зыҳәса зыпҟо ахацәа? (Колоссаа 3:19).

⁶ Ахаҵа иԥҳәыс димпҟалароуп. Иегова егьырҭ ирықәымчуа ауаа ицәымӷуп (Аԥсал. 11:5). Еиҳараӡак ицәымӷуп ахаҵа иԥҳәыс данипҟо (Мал. 2:16; шәаԥхьа Колоссаа 3:19). 1 Пиотр 3:7 иану инақәыршәаны, ахаҵа иԥҳәыс иҽеимкәа длызныҟәозар, уи Анцәеи иареи реиҩызара бжьнахуеит. Иегова уи ауаҩ иҳәарақәа рзыӡырҩра даҟәыҵыргьы алшоит.

 7. Дышԥалмацәажәалар акәу ахаҵа иԥҳәыс, Ефесаа 4:31, 32 иану инақәыршәаны? (Шәахәаԥш иара убас «Жәақәак рҵакы».)

⁷ Ахаҵа иԥҳәыс дылмықәҟаалароуп, ихжәангьы дылмацәажәалароуп. Ахацәа шьоукы рыҳәса ладырҟәуеит, ихжәангьы ирацәажәоит. Аха Иегова «агәыԥжәара, аԥсахеибакра, аҳәҳәара, улазырҟәуа ажәақәа c» ицәымӷуп. (Шәаԥхьа Ефесаа 4:31, 32.) Иара зегь ибоит. Анцәа хьаас имоуп ахаҵа иԥҳәыс дышлацәажәо, урҭ рхала иҟазаргьы. Ахаҵа иԥҳәыс лганахь ала дыхжәазар, иареи лареи реизыҟазаашьақәа рыдагьы, Анцәеи иареи реизыҟазаашьақәагьы бжьихуеит (Иак. 1:26).

 8. Дышԥазыҟоу Иегова апорнографиа, насгьы избан ус дзазыҟоу?

⁸ Ахаҵа апорнографиа дамыхәаԥшлароуп. Дышԥазыҟоу Иегова апорнографиа? Иара уи ицәымӷуп! Убри аҟынтә ахаҵа апорнографиа дахәаԥшуазар, Иеговеи иареи реиҩызара бжьихуеит, уи адагьы, уи иԥҳәыс пату шлықәимҵо аанарԥшуеит d. Иегова иҭахуп ахаҵа ихәыцрақәа  рҿгьы иԥҳәыс димԥсахларц. Иисус иҳәеит абри аԥҳәыс дсымандаз ҳәа аԥҳәыс илыхәаԥшуа ахаҵа «игәаҿы» ихатә ҩыза дшиԥсахуа (Матф. 5:28, 29) e.

 9. Избан Иегова изицәымӷу ахаҵа иԥҳәыс цәеижьла данылзааигәахо, аԥҳәыс лыпату лазырҟәуа ак лирҟаҵарц даналаго?

⁹ Ахаҵа иԥҳәыс цәеижьла данылзааигәахо, лыпату лазырҟәуа акгьы лимырҟаҵалароуп. Ахацәа шьоукы рыҳәсеи дареи цәеижьла ианеизааигәахо, рыпату лазырҟәуа ддырҟаҵоит, уи иахҟьаны аԥҳәыс лыламыс даргәаҟуа далагоит, схаҵа бзиа сибаӡом ҳәагьы ахәыцрақәа лызцәырҵуеит. Иегова ицәымӷуп ахаҵа иԥҳәыс хьаас дымкӡакәа ихы мацара даназхәыцуа. Иегова иҭахуп ахаҵа иԥҳәыс бзиа дибаларц, ахаара аарԥшны длеиҷаҳаларц, насгьы лцәаныррақәа хьаас имазарц (Еф. 5:28, 29). Аха ахаҵа иԥҳәыс лгәы лзырхьуа ҟаиҵозар, иаҳҳәап, дипҟозар, ихжәаны длацәажәозар, лыпату лаирҟәуазар, мамзаргьы апорнографиа дахәаԥшуазар? Иҟаиҵар илшозеи ихәыцшьеи ихымҩаԥгашьеи иԥсахырц азы?

АХАҴА ИԤҲӘЫС ЛГӘЫ ЛИМЫРХЬЛАРЦ АЗЫ ИҞАИҴАР ИЛШО

10. Ишԥарылшо ахацәа Иисус иҿыԥшлар?

¹⁰ Ахаҵа иԥҳәыс дипҟозар, ихжәаны длацәажәозар, мамзаргьы лыпату лазырҟәуа ак лирҟаҵозар, ицхраар алшозеи аҽыԥсахра? Иара Иисус диҿыԥшлароуп. Ҳәарада, Иисус аҭаацәара далаӡамызт. Аха иҵаҩцәа дышрызныҟәоз ахацәа иднарҵо рацәоуп, даргьы рыҳәса убас еиԥшҵәҟьа ирызныҟәалароуп (Еф. 5:25). Шәааи еилҳаргап Иисус иапостолцәа дышрызныҟәоз, насгьы дышрацәажәоз.

11. Дышԥарзыҟаз Иисус иапостолцәа?

¹¹ Иисус иапостолцәа пату рықәиҵон, ақьиарагьы ааирԥшуан. Иара ахаан дыхжәаӡамызт. Амчра шимазгьы, иапостолцәа ршәаны имаӡамызт. Уи аҭыԥан ахынраалара аарԥшны рымаҵ иуан (Иоанн 13:12—17). Иара иҵаҩцәа иреиҳәеит: «Сара шәысҿыԥшла, избанзар сара сҟәымшәышәуп, аԥагьара сылам, шәымч шҭалогьы жәбап» (Матф. 11:28—30). Иазгәашәҭ Иисус аҟәымшәышәра шилаз. Ауаҩы дҟәымшәышәзар, уи дыԥсыҽуп ҳәа аанагаӡом. Ус еиԥш иҟоу ауаҩы еиҳагьы дыӷәӷәоуп, аҽынкыларагьы имоуп. Иара данҵәылырхуа иԥсахы еибакӡом.

12. Дышԥарацәажәоз Иисус егьырҭ ауаа?

¹² Иисус иажәақәа ауаа ргәы шьҭнахуан, амчгьы рнаҭон. Иара ахаан иҵаҩцәа ихжәаны драцәажәаӡомызт (Лука 8:47, 48). Иаӷацәа игәы ԥыржәарц азы иҟоу зегьы анизырҳәоз, «аҭак ҟаиҵаӡомызт» (1 Пиотр 2:21—23). Зны-зынла ихжәаны ак раҳәара аҭыԥан, ирҳәоз зынӡа ақәҿиҭӡомызт (Матф. 27:12—14). Закә ҿырԥш бзиоузеи уи ахацәа рзы!

13. Дынхалар шԥаилшо ахаҵа Матфеи 19:4—6 иану инақәыршәаны? (Шәахәаԥш иара убас асахьа.)

¹³ Иисус ахацәа иреиҳәеит рыҳәса рымԥсахларц. Иара Иаб иажәақәа ааганы, ахаҵа «еснагь иԥҳәыс длыцынхалоит» ҳәа иҳәеит. (Шәаԥхьа Матфеи 19:4—6.) «Еснагь длыцынхалоит» ҳәа еиҭагоу абырзен ҟаҵарба ишыҟаҵәҟьоу еиҭоугозар, «длыдҷаблоит» аанагоит. Убри аҟынтә хаҵеи-ԥҳәыси еидҷаблеит ҳәа уҳәаратәы рыбзиабара ӷәӷәазароуп. Ас еиԥш иҟоу аизыҟазаашьақәа ак аԥырхагахар, рҩыџьагьы ааха рнаҭоит. Зыԥҳәыс бзиа дызбо ахаҵа апорнографиа зеиԥшразаалакгьы дахәаԥшлаӡом. Иара иаразнак илаԥш «иаԥсам аҟынтә» иаҟәигоит (Аԥсал. 119:37). Иов егьырҭ аҳәса ԥҳәысс дсымандаз ҳәа дрыхәаԥшӡомызт. Зыԥҳәыс бзиа дызбо ахаҵа Иов иеиԥш ихы мҩаԥигаларц иӡбоит (Иов 31:1).

14. Иарбан шьаҿақәоу иҟаиҵар акәу зыԥҳәыс лгәы лзырхьуа ахаҵа, иареи лареи, насгьы Иеговеи иареи реизыҟазаашьақәа еиҭашьақәиргыларц азы?

 ¹⁴ Зыԥҳәыс дзыпҟо, ма длазырҟәуа ажәақәа зҳәо ахаҵа, иԥҳәыси иареи, насгьы Иеговеи иареи реизыҟазаашьақәа еиҭашьақәиргыларц азы иаҭаху ашьаҿақәа ҟаиҵароуп. Иарбан шьаҿақәоу иҟаиҵар ихәҭоу? Актәи ашьаҿа: иҟаиҵо шҽеим дақәшаҳаҭхароуп. Иегова уи ииҳәо-ииуа зегь ибоит (Аԥсал. 44:21; Еккл. 12:14; Аур. 4:13). Аҩбатәи ашьаҿа: иԥҳәыс лгәы лзырхьуа уаҳа иҟаиҵалаӡом, ихымҩаԥгашьагьы иԥсахуеит (Ажәам. 28:13). Ахԥатәи ашьаҿа: иԥҳәыси Иеговеи ргәы ахьыдирхьыз игәы ишалоу реиҳәоит, аҭамзаарагьы шьҭеиҵоит (Аус. 3:19). Иара убас Иегова дӷьаҵәыӷьаҵәуа диҳәалароуп, аҽыԥсахра игәаирԥхарц, насгьы ихәыцрақәеи, иажәақәеи, ихымҩаԥгашьеи аконтроль рыҭара дицхраарц (Аԥсал. 51:10—12; 2 Кор. 10:5; Флп. 2:13). Аԥшьбатәи ашьаҿа: иҳәарақәа инарықәыршәаны ихы мҩаԥигалароуп, ақәымчра зыдҳәалазаалакгьы — анапы ашьҭыхроума, ажәала ауаҩы иларҟәроума — урҭқәа зегьы ицәымыӷхароуп (Аԥсал. 97:10). Ахәбатәи ашьаҿа: аамҭа мгаӡакәа аизара ахылаԥшыҩцәа ацхырааразы дрыҳәоит (Иак. 5:14—16). Афбатәи ашьаҿа: уаанӡа ихы шымҩаԥигоз еиԥш уаҳа ахаан ихы мҩаԥимгаларц ицхраауа аплан шьақәиргылоит. Апорнографиа иахәаԥшуа ахаҵагьы ара иаагоу ф-шьаҿак ихы иаирхәароуп. Ахаҵа иҽиԥсахырц азы иибо аџьабаа Иегова хымԥада дазылԥхоит (Аԥсал. 37:5). Аха аԥҳәыс лгәы лзырхьуа уаҳа аҟамҵара мацара азхаӡом. Ахаҵа иԥҳәыс ҳаҭыр лықәҵашьагьы иҵароуп. Иҟаиҵалар акәзеи иара уи азы?

АҲӘСА ҲАҬЫР ШРЫҚӘҴАЛАТӘУ

15. Илирбалар шԥаилшо ахаҵа иԥҳәыс бзиа дшибо?

¹⁵ Шәыԥшәма бзиа дшыжәбо лшәырбала. Зҭаацәараҿы агәырӷьара змоу аишьцәа шьоукы ирыӡбеит есыҽны рыԥшәма лгәы ҟазҵо, бзиа дшырбо лзырбо ак ҟарҵаларц (1 Иоанн 3:18). Абзиабареи ахаареи амаҷ аҿгьы иубар улшоит.  Иаҳҳәап, ахаҵа илшоит иԥҳәыс лнапы ааникылар, мамзаргьы дигәыдиҳәҳәалар. Уи адагьы, иара илшоит амш аҩныҵҟа «Быгәхьаазгеит», мамзаргьы «Бусқәа шԥацо?» ҳәа СМС-аацҳарақәа лзишьҭлар. Зны-зынла ахаҵа иԥҳәыс бзиа дшибо аоткрытка ианҵаны илиҭалар илшоит, мамзаргьы ашәҭқәа ҳамҭас илиҭалар ауеит. Ахаҵа ус аныҟаиҵо, иԥҳәыс ҳаҭыр лықәиҵоит, уи иԥҳәыси иареи реизыҟазаашьақәагьы арӷәӷәалоит.

16. Избан ахаҵа иԥшәма дирҽхәалар зихәҭоу?

¹⁶ Шәыԥшәма дшәырҽхәала, ҭабуп ҳәагьы лашәҳәала. Зыԥҳәыс ҳаҭыр лықәызҵо ахаҵа лыхә ҳаракны ишьоит, лыхә шишьогьы леиҳәоит. Иаҳҳәап, дивагыланы аҭаацәаразы аџьабаа ахьылбо азы ҭабуп ҳәа леиҳәоит (Кол. 3:15). Ахаҵа иԥҳәыс гәык-ԥсыкала данирҽхәо, уи лгәы ҟанаҵоит. Лхаҵа лыхә шишьо, насгьы бзиа дшибо ахьылдыруа, лгәы ҭынчуп (Ажәам. 31:28).

17. Ишԥаилшо ахаҵа иԥҳәыс пату лықәиҵалар?

¹⁷ Шәыԥшәма қьиаралеи патуқәҵаралеи шәлызныҟәала. Зыԥҳәыс бзиа дызбо ахаҵа иԥҳәыс лыхә ҳаракны ишьоит, насгьы Иегова иҟынтә иоуз аҳамҭа еиԥш длыхәаԥшуеит (Ажәам. 18:22; 31:10). Иара еснагь иԥҳәыс қьиаралеи патуқәҵаралеи длызныҟәоит, цәеижьла ианеизааигәахогьы, дызцәыԥхашьо, лыпату лазырҟәуа, мамзаргьы лыламыс иаҵанамкуа акгьы лирҟаҵаӡом f. Ахаҵа ихаҭагьы уи аганахь ала Иегова иҿаԥхьа иламыс цқьазароуп (Аус. 24:16).

18. Ишԥаилшо ахаҵа иԥшәма ҳаҭыр лықәиҵалар? (Шәахәаԥш иара убас арамка « Уԥҳәыс пату шлықәуҵо ааурԥшыр шулшо. Ԥшь-лабжьарак».)

¹⁸ Ахацәа, агәра ганы шәыҟаз Иегова шәыԥшәма ажәалеи услеи пату лықәышәҵаларц азы ижәбо аџьабаа шгәеиҭо. Убри аҟынтә лгәы лышәмырхьлан, хаалеи, қьиаралеи, патуқәҵаралеи шәылзыҟаз. Убас бзиа дшыжәбо, лыхәгьы шышәшьо лшәырбоит. Шәыԥшәма ҳаҭыр лықәышәҵалар, Иеговеи шәареи шәеиҩызара бжьышәхӡом (Аԥсал. 25:14).