Абиблиа уи азҵаара аҭак ҳнаҭаӡом. Аха уа иану аинтерес зҵоу хҭысқәак, иҟалап иҳаилдыркаар дара уи аҩыза аӡбара зрыдыркылаз.

Амаалықь Мариа илеиҳәеит лцәалтәымкәа дшыҟало, насгьы аԥа дышлоуа. Усҟан Мариеи Иосифи Галилеиа, Назарет, инхон (Лука 1:26—31; 2:4). Ԥыҭрак ашьҭахь, дара аамҭак аҩныҵҟа Египет инхон, нас Назаретҟа ихынҳәит. Иисус уи ақалақь аҿы изҳаит, насгьы Назарет датәхеит (Матф. 2:19—23). Убри аҟынтә Иисуси, Иосифи, Мариеи рыӡбахә анаҳҳәо, ҳара лассы-лассы Назарет аӡбахәгьы ҳҳәоит.

Мариа Елизавета зыхьӡыз ауа длыман, уи Иудеиа дынхон. Лара аԥшьаҩы Захариа иԥшәма лакәын, насгьы Иоанн Аӡӡаахҩы иан лакәхеит (Лука 1:5, 9, 13, 36). Мариа Елизавета лбара дцеит, насгьы лара лҿы, Иудеиа, хымз раҟара дыҟан. Нас Мариа Назаретҟа дхынҳәит (Лука 1:39, 40, 56). Ус анакәха, Иудеиа аҭыԥқәа маҷк илдыруан.

Хара имгакәа ауаа ашәҟәы рҽанырҵарц адҵа ҟалеит. Убасҟан Иосиф Назаретынтәи Вифлеемҟа дцеит. Вифлеем «Давид иқалақь» акәын, аԥааимбаражәа инақәыршәаны Мессиа уаҟа дир ахәҭан (Лука 2:3, 4; 1 Сам. 17:15; 20:6; Мих. 5:2). Уа Мариа Иисус длоуит. Иосиф иҭахӡамызт лара аӡҟы длыманы Назаретҟа ахынҳәразы амҩа хара дықәларц. Дара Вифлеем иаангылеит. Уи ақалақь аҟынтә Иерусалимынӡа 9 километрак раҟара бжьан. Убри аҟынтә, азакәан ишранаҳәоз еиԥш, раԥхьатәи рыхшара дрыманы аныҳәарҭахь ицаны амҭақәа рнагара рзыманшәалан (Алев. 12:2, 6—8; Лука 2:22—24).

Иисус диаанӡа Анцәа имаалықь Мариа илеиҳәахьан лыҷкәын «Давид иаҳраҭыԥ» шиоуа, насгьы Аҳас дшыҟало. Иҟалап Иосифи Мариеи аҵакы ӷәӷәа арҭазар Иисус Давид иқалақь аҿы дахьиз (Лука 1:32, 33; 2:11, 17). Дара ргәы иаанагозҭгьы ҟаларын, уа иаангыланы Анцәа анаҩс ириҭо анапхгара иазыԥшыр, еиҳа иҟәыӷарахоит ҳәа.

Ҳара иҳаздырӡом астрологцәа Вифлеемҟа инеиаанӡа Иосифи Мариеи уа шаҟаамҭа иҟаз. Аха уи аамҭазы аҭаацәара аҩнаҿы инхон, насгьы рыҷкәын «[дхәыҷын]», аха дыӡҟӡамызт (Матф. 2:11). Излаҳбо ала, алкаа ҟаҳҵар ҳалшоит ашәҟәы рҽананырҵа ашьҭахь дара Назаретҟа ихнымҳәӡакәа Вифлеем ишаангылаз, насгьы ԥыҭк аамҭа ҵызар ҟалап, избанзар уи аҩны нхарҭа ҭыԥс илырхит.

Ирод Вифлеем «ҩышықәса рҟынӡа зхыҵуаз аҷкәынцәа зегь ршьырц адҵа ҟаиҵеит» (Матф. 2:16). Анцәа Иосиф игәиҽаниҵарц азы Ирод игәы иҭеикыз иеиҳәеит, убри аҟынтә иара Мариеи Иисуси аашьҭихын, Египетҟа дыбналаны дцеит. Дара уа Ирод дыԥсаанӡа иҟан. Ԥыҭрак ашьҭахь Иосиф иҭаацәа иманы Назаретҟа диасит. Избан дара Вифлеемҟа изыхнымҳәыз? Иудеиа напхгара зуаз, игәымбылџьбараз Ирод иԥа, Архелаи имбарц азы. Уи адагьы Иосиф Анцәа иҟынтә агәҽанҵара иоуит. Иосиф илшон Иисус ашәарҭара дҭамыргылаӡакәа Назарет аҟны Анцәа изакәанқәа инарықәыршәаны диааӡалар (Матф. 2:19—22; 13:55; Лука 2:39, 52).

Иисус егьырҭ рзы жәҩантәи аԥсҭазаарахь амҩа ылихаанӡа Иосиф дыԥсызар акәхап. Ус анакәха, Иосиф адгьыл аҿы иԥсы ҭалоит. Аӡәырҩы уи хаҭала иабадырыр рылшоит, насгьы Иисус дани Мариеи иареи Вифлеем изаангылаз иара иҟынтә еилыркаартә алшара роуеит.