Шықәсык еиҳаны иҵуан Вефиль амаҵ зуаз аишьцәа Ньиу-Иорк иҟоу адгьылбжьаха Ста́тен аҿы арадиостанциа WBBR аргылара иаҿижьҭеи. Дара аҵлақәа ԥырҟеит, нас аусуҩцәа ахьынхалаша аҩн ду дыргылеит, хазы астудиагьы дыргылеит. Арҭ аусурақәа ианрылга ашьҭахь, аишьцәа аефир ахь излацәырҵша арадиотехника аиқәыршәара иалагеит, аха уи ауадаҩрақәагьы ацын.

Арадиостанциа ихадоу антенна ақәыргылара мариаӡамызт. Зоура 90 метра иреиҳаз антенна 60 метра еиҳаз амҿы иалхыз ҩ-шьаҟак ирыбжьгатәын. Аишьцәа уи иаразнак ирзалымҵӡеит, аха дара ргәы карыжьуамызт. Нас Иегова ицхыраарала уи рылшеит. Уи апроект аҿы аус зуаз Ка́лвин Про́ссер игәалаиршәон: «Иаразнак зегь ҳзалҵызҭгьы иҟаҳҵаз жәбо ҳәа ҳаҽхәаларын!». Аха аишьцәа еилыркаауан Иегова ицхыраарала шакәу уи шрылшаз. Аха иҟан даҽа уадаҩракгьы.

Усҟан арадиодырраҭара ҿыц ицәырҵыз ак акәын. Адәқьан ахь уцаны зегь рыла еиқәшәаз атехника узаахәаӡомызт. Аха аишьцәа 500 ватт амчра змаз аӡәы инапала иҟаиҵаз, хар змамыз арадиопередатчик ааигәа џьара иаархәеит. Амикрофон иаабац аҭел иҭыргеит. Февраль мзазы, хәылбыҽхак аишьцәа уи аус шауа гәарҭарц рыӡбеит. Дара аефир ахь иҭыҵырц азы программак рымазар акәын, убри аҟынтә Аҳра ашәақәа рҳәарц рыӡбеит. Ерне́ст Ло́у урҭ рдебиут шхыркәшахаз  анигәалашәоз, аччара дакуан. Ашәа шырҳәоз аӡбаҩ b Рутерфорд астудиахь аҭел дасит. Иара 25 километра раҟара ахьыбжьаз Бруклинынтәи раԥхьаӡатәи ари апередача дазыӡырҩуан.

«Шәаҟәыҵ наҟ шәызҿу, — иҳәеит аиашьа Рутерфорд. — Шәара ацыгәқәа реиԥш ауп шәыбжьы шго!» Аишьцәа иаразнак арадиопередатчик аҿырхит. Ҳәарада, Рутерфорд ииҳәаз иацәыԥхашьеит, аха дара еилыркааит атехника ибзианы аус шауа, насгьы аефир ахь иҭыҵыр шрылшо.

1924 шықәса, февраль 24 азы аофициалла иҭыҵыз раԥхьатәи арадиодырраҭара аан аиашьа Рутерфорд арадиостанциа «Мессиа Иаҳра аинтересқәа» ирзикит. Иара иҳәеит арадиостанциа хықәкыс иамоу — «ауаа зегьы, ирымоу адинхаҵара зеиԥшразаалакгьы, Абиблиа еиҳа еиӷьны аилкаареи иарбан аамҭоу ҳазҭагылоу аилкаареи рыцхраара шакәу».

Раԥхьатәи арадиодырраҭара ибзиаҵәҟьаны имҩаԥысит. Анаҩс 33 шықәса рыҩныҵҟа Иегова ишаҳаҭцәа Анцәа Иаҳра иазку ажәабжь ауаа ирыларҳәаларц азы арадиостанциа WBBR ирацәаны рхы иадырхәон.

1924 шықәса, ииуль мзазы Абиблиа аҭҵааҩцәа Колу́мбус (аштат Ога́ио) имҩаԥысуаз аконгресс аҿы еизеит. Дара еиуеиԥшым атәылақәа рҟынтә иааит. Ажәахәқәа рҳәон англыз бызшәала, араб бызшәала, авенгер бызшәала, абырзен бызшәала, италиан бызшәала, алитов бызшәала, анемец бызшәала, аполиак бызшәала, урыс бызшәала, аукраин бызшәала, афранцыз бызшәала, иара убас скандинавиатәи абызшәақәа рыла. Ажәахәқәак арадио ала ирышьҭит. Насгьы аишьцәа иҟарҵаз аҳәара инақәыршәаны аҭыԥантәи агазеҭ аҿы есыҽны аконгресс шымҩаԥысуаз анырҵон.

Аԥшьаша, ииуль 24 азы, 5 000-ҩык инареиҳаны аишьцәеи аиҳәшьцәеи ажәабжьҳәара ицеит. Дара 30 000 раҟара ашәҟәқәа ршеит, насгьы зқьыла Абиблиа аҵарақәа ирылагеит. «Ахьчаратә бааш» аҿы ианын уи амш «зегь раасҭа агәырӷьара зцыз аконгресс ахәҭа» акәын ҳәа.

 Иухамышҭуаз даҽа хҭыск ҟалеит ахәаша, ииуль 25 рзы. Усҟан аиашьа Рутерфорд адиннапхгаҩцәа рахь ирхаз ақәыӡбара даԥхьеит. Уи аиуристтә документ астиль ала иҩын. Уа ианын, аполитикатә, адинхаҵаратә, иара убас акоммерциатә напхгаҩцәа ауаа «Анцәа Иаҳра иаанаго азылԥхарақәа реилкаара ишырԥырхагоу». Уи адагьы, адокумент ианын урҭ ауаа «Лига Нации ишадгылаз, насгьы уи „Анцәа Иаҳра адгьыл аҿы политикала иаарԥшхаз“ ауп ҳәа шазырҳәаз». Абиблиа аҭҵааҩцәа уи ажәабжь ауаа ирыларҳәаларц азы агәымшәара ду рҭахын.

Ԥыҭрак ашьҭахь «Ахьчаратә бааш» аҿы ианын: «Колумбус еизаз зхыԥхьаӡара рацәамыз Иҳақәиҭу ир, рхаҵара еиҳагьы иӷәӷәахеит... ...Уажәшьҭа дара изыцәшәо мчык ма амца зку хыцк ыҟаӡам». Уи аконгресс аҿы иҟаз Ле́о Кла́ус иҳәон: «Аконгресс ашьҭахь аҩныҟа ҳаныхынҳәуаз ҳҭыԥаҿы инхоз ауаа иҳаҳаз анбарзеиҭаҳҳәо ҳәа ҳаҟан».

Аиашьа Рутерфорд аконгресс аҿы дзыԥхьаз ақәыӡбара абуклет «Ауахәама амаҵзуҩцәа ахара рыдуп» аҿы икьыԥхьын. Уи абуклет миллион екземплиарла иҭыжьын. Нас, октиабр мзазы, Абиблиа аҭҵааҩцәа уи ауаа ирзыршо иалагеит. Ақалақь хәыҷ Кли́вленд (аштат Оклахо́ма) аиашьа Френк Џьо́нсон иучасток аҿы ажәабжь ҳәаны даналга ашьҭахь, егьырҭ ажәабжьҳәаҩцәа ааны дыргаанӡа 20 минуҭ иман. Аха амҩаду аҿы аԥшра шәарҭан, избанзар ақалақь аҿы инхоз ахацәа ииҳәоз ажәабжь азы игәаӷ кны ишьҭан. Аиашьа Џьонсон ааигәа иҟаз ауахәамаҿы иҽиҵәахырц иӡбеит. Уа аӡәгьы дыҟаӡамызт, убри аҟынтә иара абуклет «Ауахәама амаҵзуҩцәа ахара рыдуп» екземплиарк апастор и-Библиа иагәылеиҵеит, насгьы тәарҭацыԥхьаӡа иқәиҵеит. Френк уи ирласны иҟаиҵон. Уи ашьҭахь еиҭа аамҭа анизынха, даҽа ҩ-уахәамак рҿы убасҵәҟьа ҟаиҵеит.

Анаҩс Френк аишьцәеи иареи еиқәшәараны иахьыҟаз аҭыԥ ахь дыҩны дцеит. Иара абылтәыҭаҭәарҭа давагыланы иҽиҵәахит. Иара ибеит ишьҭаз ахацәа дгәамҭаӡакәа машьынала ишиаҩсыз. Нас аишьцәа ааин, иара амашьына дыҩҭаԥалан, ицеит.

Аишьцәа руаӡәк игәалаиршәоит: «Ақалақь ҳалҵны ҳанцоз, урҭ х-уахәамак ҳбеит. Уахәамацыԥхьаӡа 50-ҩык раҟара ауаа гылан. Шьоукы абуклет кны иаԥхьон, даҽа шьоукы уи апастор идырбон. Урҭ ҳарҿашәазҭгьы издыруада иаҳзырурыз! Ҳара Иегова ҭабуп ҳәа иаҳҳәон, ҳаӷацәа шҳашьҭазгьы, иус анагӡара дахьҳацхрааз».

Егьырҭ атәылақәа рҿгьы Абиблиа аҭҵааҩцәа убас еиԥш агәымшәара аадырԥшуан. Франциа аҩадатәи ахәҭаҿы аиашьа Иу́зеф Кретт Польшантәи иааз уа инхоз ашахтиорцәа ажәабжь рзеиҭеиҳәон. Иара «Аԥсҭалара зынӡа иааигәоуп» захьӡыз ажәахә иманы дықәгыларц игәы иҭан. Аишьцәеи аиҳәшьцәеи ауаа ааԥхьаратә бӷьыцқәа рызшара ицхраауан. Аҭыԥантәи аԥшьаҩы уи аниаҳа, иуахәамахь иныҟәоз ауаа иреиҳәеит ажәахә ахьыҟалоз аҭыԥ амԥангьы иқәымларц. Аха иажәақәа дара еиҳагьы аинтерес рызцәырнагеит. 5 000-ҩык инареиҳаны ауаа ажәахә иазыӡырҩырц иааит, аԥшьаҩы ихаҭагьы урҭ дрылан. Иузеф аԥшьаҩы зыгәра иго шьақәирӷәӷәарц алшара ииҭар иҭахын, аха иара уи мап ацәикит. Ажәахә ашьҭахь аиашьа Кретт имаз алитература зегь ишеит, — урҭ ауаа доуҳала амла ишакуаз ҩашьомызт (Ам. 8:11).

 Клод Бра́ун Африкаҟа, уажәы Га́на ҳәа еицырдыруа атәыла (усҟан Золотои Берег) ажәабжь иҳәаларц дцеит. Иара ажәахәқәа иманы дықәгылон, алитературагьы ишон, уи абзоурала ирацәаҩны ауаа аҵабырг раҳаит. Фармацевтс дҟаларц азы аҵара иҭаз Џьон Бла́нксон, аиашьа Браун иажәахәқәа руак дазыӡырҩит. Иара иаразнак еиликааит аҵабырг шиԥшааз. Џьон игәалаиршәоит: «Сара аҵабырг даараӡа бзиа избеит. Сҿы еихамкӡакәа уи аҵара сыцызҵоз ирзеиҭасҳәон».

Абиблиа аҟынтә Џьон еиликааит Анцәа х-хаҿрак змоу шиакәым. Убри аҟынтә иара Англикантәи ауахәамахь дцеит, аԥшьаҩы уи аӡбахә диазҵаарц азы. Аха уи «Уара уқьырсианӡам, Аџьныш имаҵзуҩы уоуп! Уахьысымбо уца!» ҳәа диҵаҳәҳәан ддәылицеит.

Џьон аҩныҟа дхынҳәны данааи аԥшьаҩы асаламшәҟәы изиҩын, х-хаҿрак иазку аҵара ауаа ишраҳауа иалацәажәарц идигалеит. Аха аԥшьаҩы Џьон изынаицҳаит аҵара ахьиҵоз еиҳабыс иамаз икабинет ахь днеирц. Арҵаҩы аԥшьаҩы асаламшәҟәы изуҩыҵәҟьама ҳәа Џьон диазҵааит.

— Ааи, сер, — иҳәеит Џьон.

Арҵаҩы Џьон иеиҳәеит аҭамзаара шышьҭаиҵо ала ашәҟәы иҩырц. Убри аҟынтә Џьон абас иҩит:

«Сер, сырҵаҩы дсыҳәеит шәҿаԥхьа аҭамзаара шьҭасҵарц. Сара уи аҟаҵара сазхиоуп, ауаа амц шыдшәырҵо аартны ишәҳәар».

— Бланксон, абас ануҵар уҭахыҵәҟьоума? — дҵааит арҵаҩы иџьашьаны.

— Ааи, сер. Сара аиаша сҳәар сҭахуп.

— Усҟан иаразнак аҵара уҭырцоит. Аҳәынҭқарратә уахәама аԥшьаҩы уиҿагыланы ак ануҳәа ашьҭахь аҳәынҭқарратә ҵараиурҭаҿы уаанрыжьып ҳәа угәы иаанагома?

— Аха, сер, шәлекциақәа рҿы ак анаҳзеилымкаауа азҵаара шәаҳҭар ҟамлаӡои?

— Ҳәарада, ишԥаҟамло.

— Убри ауп сара иҟасҵазгьы. Абиблиа ҳзырҵоз уи ауаҩ азҵаара исҭеит. Иара сызҵаара аҭак изыҟамҵазар, сара ашәҟәы ҩны иҿаԥхьа аҭамзаара зышьҭасҵар акәзеи?

Бланксон ашәҟәы ҩны аҭамзаара шышьҭаимҵазгьы, аҵара дҭырымцаӡеит.

Декабр мзазы «Ахьчаратә бааш» аҿы абас анын: «Ҳара Давид ииҳәаз ҳақәшаҳаҭуп: „Уара аибашьразы амч суҭоит“ (Аԥсалом 18:39). Шаҟа ибзиази ари ашықәс! Ҳара ақәҿиара ҳаман, избанзар Иҳақәиҭу дҳацын... Изиашоу имаҵзуҩцәа... игәырӷьаҵәа ажәабжь рҳәон».

Ашықәс анҵәамҭазы аишьцәа Чикаго иацәыхарамкәа даҽа радиостанциакгьы дыргыларц рыӡбеит. Уи иахьӡырҵеит WORD, иаанагоит «ажәа». Уи ахьыӡ цәгьала ианаалон, избанзар иара ацхыраарала Анцәа Иажәа ауаа еиҳагьы ирылаҵәеит. 5 000 ватт амч змаз апередатчик асигнал шә-километрала иакуан, Канаданӡагьы инеиуан.

1925 шықәсазы Иегова ижәлар Аатра 12-тәи ахаҿы иану аԥааимбаражәа аилкаара дрыцхрааит. Шьоукы уи ргәамԥхаӡеит, дара Иегова имаҵ аурагьы иаҟәыҵит. Аха аишьцәа аӡәырҩы ажәҩанаҿ иҟалази уи адгьыл аҿы Анцәа ижәлар ишырныруеи ахьеилыркааз еигәырӷьеит.