Ахы 10

Анцәа иаҳра напхгара ауеит

1, 2. Излаҳбарҭоузеи, ауаатәыҩса реиҳабырақәа рымчқәа шмаҷу?

 ИҞАЛАП, абри аҩыза уақәшәахьазар: уара приборк ухәҳаит, ашьҭахь иаалырҟьаны игәоуҭеит, уи аус шамуаз. Иаҳҳәап, уи иазҟазоу аӡәы уиҧхьеит. Аха иара аҧхасҭа иаиуз «анаҧырих» ашьҭахьгьы, априбор еиҭах иҧҽит. Шаҟа угәы унархьуазеи!

² Абри ауаатәыҩса реиҳабырақәа ааугәаланаршәоит. Ауаатәыҩса еснагь ирҭахын, аҭынчреи анасыҧи ирықәзыргәыҕша аиҳабыра рымазарц. Аха урҭ ауаажәларра ирыгыз аҧыхразы иҟарҵоз аҽазышәарақәа башахеит. Зны ирыбжьарҵаларын, зны ихдырбгаларын хыҧхьаӡара рацәала аҭынчратә еиқәшаҳаҭрақәа. Уи адагьы, иҟалахьоума аҕарреи, аиашамреи, ацәгьауреи, ачымазарақәеи, аекологиатә проблемақәеи раҧыхра зылшаз еиҳабыра заҵәыкгьы? Ауаатәыҩса реиҳабырақәа ари рымч ақәхом. Иҟәышыз израилаа раҳ Соломонгьы дҵаауан: «Излеидыррызеи ауаҩы ихатәы мҩа?» (Ажәамаанақәа 20:24).

3. а) Иисус иажәабжьҳәара зызкыз арбан? б) Џьоукы Анцәа Иаҳра рхаҿы ишҧааргои?

³ Аха угәы каумыжьын! Узықәгәыҕша адунеи аиҳабыра — ари гәыхәтәы мацарам. Уи азы дажәабжьҳәон Иисус. Иара уи «Анцәа Иаҳра» ҳәа дашьҭан, ишьҭанеицәагьы идирҵон уи азы Анцәа иҳәара (Лука 11:2; 21:31, ИА). Ҳәара аҭахыума, Анцәа Иаҳра атәы зны-зынла иалацәажәалоит адинхаҵаратә гәыҧқәа рҟынгьы. Миллионҩыла есыҽны уи азы Анцәа иҳәоит, Иҳақәиҭу иныҳәара (иара убасгьы, «Ҳаб», мамзаргьы иҿырҧшыгоу  аныҳәара ҳәа изышьҭоу) еиҭаҳәауа. Аха изакәузеи «Анцәа Иаҳра» ҳәа ауаа ианразҵаауа, урҭ иҟарҵо аҭакқәа зынӡа еиқәшәом. Џьоукы ирҳәоит: «Уи уаҩы игәаҿы иҟоуп». Егьырҭ Аҳра акәны ирыҧхьаӡо ажәҩан ауп. Аха наҟ-наҟ ишаҳбарҭахо еиҧш, Абиблиа ари азҵаара еилкааҵәҟьаны аҭак анаҭоит.

АҲРА ЗЫЗКЫУ ЕИЛКААУП

4, 5. Иегова инапхгара даҽакала иааирҧшырц зиӡбазеи, насгьы уи иалҵшәахои?

⁴ Анцәа Иегова еснагь Адунеи Аҳас иахагылаз, мамзаргьы амчра нагӡа Знапаҿы иҟаз иакәын. Зегьзшаз иаҳасабала уи абри аҩыза аҭыҧ ду дақәиҭуп (1 Ашықәсынҵа 29:11; Ҧсалом 102:19; Аусқәа 4:24). Аха Иисус ажәабжьны ирылеиҳәоз Аҳра Анцәа инапхгараҿы ицхыраагӡатәу ароль нанагӡоит. Абри Мессиа Иаҳра иазалхыуп иҷыдоу ароль. Иарбану уи?

⁵ Абри ашәҟәы 6-тәи ахы ишҳаилнаркаауа еиҧш, раҧхьатәи ҩыџьауаа Анцәа инапхгара иаҿагылеит. Еимактәхаз азҵаарақәа ирхырҟьаны, Иегова инапхгара даҽакала иааирҧшырц иӡбеит. Анцәа ирылеиҳәеит гәҭакыс имаз: Амаҭ, Аҩсҭаа, дықәызхшеи ауаатәыҩса шьҭрала ироуз агәнаҳа иахылҿиааз аҧырзхшеи «ажәла» арҿиара. «Ажәла» хада Иисус Христос иакәхеит, «Анцәа Иаҳра» — ари Аҩсҭаа дҧыххааса дызлақәиҵо ихадоу маругоуп. Абри Аҳрала Иисус Христос адгьылаҿы еиҭашьақәиргылоит Иегова инапхгара, нас наӡаӡа ирқьиоит Анцәа имчра иаша (Аҟазаара 3:15; Ҧсалом 2:2—9).

6, 7. а) Иабаҟоу Аҳра, уи Аҳас иамада, насгьы аҳра ицеиҩызшода? б) Аҳра анапаҵаҟа иҟоу зусҭцәада?

⁶ Абиблиа Асинодтә еиҭага инақәыршәаны, абас иҳәоуп Иисус иуаацәгьақәаз афарисеицәа ирзынаирхаз иажәақәа: «Анцәа Иҧсҳара [«Иаҳра», ИА] шәыҩнуҵҟа иҟоуп» (Лука 17:21). Аҳра убарҭ зыуаҩра зҭиуаз ауаа цәгьақәа ргәаҿы иҟоуп ҳәа иҳәарц иҭахызма Иисус? Ҳәарада, мап. Абырзен бызшәа аҟынтә еиҳа ииашоу аиҭага иаҳәоит: «Анцәа Иаҳра шәыбжьара иҟоуп» («Аиҭага Ҿыц» аҟны атекст азы асноска). Иисус урҭ  рыгәҭа дыҟан, убри аҟнытә заҧхьаҟа Иаҳхашаз аӡәы иаҳасабала ихы акәын зыӡбахә имаз. Ауаҩы игәаҿы иреалтәымкәа иҟоу акы ахаҭыҧан, Анцәа Иаҳра — ари иреалтәу, аус зуа еиҳабыроуп. Уи анапхгаҩи анапаҵаҟа иҟоу ауааи амоуп. Ари — жәҩантәи еиҳабыроуп, «Жәҩантәи Аҳра» ма «Анцәа Иаҳра» ҳәа излашьҭоу ала (Маҭфеи 13:11; Лука 8:10). Аҧааимбар Даниил ибеит, абри Аҳра Анапхгаҩы дышизцәырҵыз. Уи «Ауаҩытәыҩс Ҧа» диеиҧшын; абри Анапхгаҩы Зегьзымчу Анцәа иҟны днаган, иагьианашьан «амчреи, ахьӡыҧшеи, аҳреи, ажәларқәеи, ахылҵшьҭрақәеи, абызшәақәеи зегьы имаҵ руларц» (Даниил 7:13, 14). Дызусҭада ари Аҳ? «Ауаҩытәыҩс Ҧа» ҳәа Абиблиа зыӡбахә аҳәо Иисус Христос иоуп (Маҭфеи 12:40; Лука 17:26). Ааи, Иегова Иҧа, Иисус Христос, Аҳас дҟаларц инапы ианиҵеит.

⁷ Иисус имала напхгара иуам. 144 000-ҩык «адгьыл аҟынтә иҿыхуп», аҳреи аҧшьауаареи уи ицеиҩыршарц (Аартра 5:9, 10; 14:1, 3; Лука 22:28—30). Анцәа Иаҳра анапаҵаҟа иҟоу, Христос инапхгара иацныҟәо ауаа дунеизегьтәи ҭаацәараны иҟалоит (Ҧсалом 71:7, 8). Аха уеизгьы, Аҳра Анцәа имчра арқьиареи адгьылаҿы џьанаҭ ҧсҭазаара аиҭашьақәыргылареи алшоит ҳәа агәра заҳгозеи?

АНЦӘА ИАҲРА ИҞАҴӘҞЬОУ АКОУП

8, 9. а) Анцәа Аҳра азы иҳаиҭаз агәыҕра ҕәҕәа зыҿҳарҧшырц ҳалшозеи? б) Аҳра шыҟаҵәҟьоу агәра заҳгозеи?

⁸ Ухаҿы иаага, уҩны блызшәа. Иахәҭоу зегь рыла иеибыҭоу уҩызагьы уақәиргәыҕуеит, уи ҿыц аргылараҿы дышуцхраауа, уи адагьы, уҭаацәа фатәыла ишеиқәиршәо ала. Уи еснагь аиаша уеиҳәозҭгьы, абри аангьы игәра умгаӡари? Иаҳҳәап, адырҩаҽны аусура ахьынтә уанааи, аусуцәа аҧҽыхақәа реизгара ишаҿыз гәоуҭеит, уҭаацәагьы аӡәы афатә рзааигеит. Ари, ҳәарада, наҟ-наҟ зегьы шышьақәыргылахо мацара акәымкәа, аха уаанӡа иҟаз аасҭа, еиҳагьы ишеиҕьхо азы иумоу агәрагара арҕәҕәарын.

⁹ Убасҵәҟьа Иегова Аҳра шыҟаҵәҟьоу ҳақәиргәыҕуеит. Ауриацәа рахь инашьҭыз ашәҟәы ишҳаилнаркаауа  еиҧш, Азакәан аганқәа жәпакы Аҳра ашьақәгылашьа уазхьадырҧшуан (Ауриацәа рахь 10:1). Убасеиҧш Анцәа Иаҳра иахаҿырҧшын адгьылаҿтәи израилаа раҳра. Уи иузрылымкааша ҳәынҭқаррамызт, избанда уи анапхгаҩцәа «Иҳақәиҭу итәарҭа» иқәтәан (1 Ашықәсынҵа 29:23). Убри инеиҳангьы, заанаҵы иҳәан: «Иуда иаҳра алабашьа имҟәыҵшәом, азакәанҧҵаҩгьы уи ишьҭраҿы дыҟазаауеит, Аинраалаҩы [«Шило» a, ИА] даанӡа, Уи иоуп ажәларқәагьы зҳәатәы иахымҧало» (Аҟазаара 49:10). Ааи, Иисус, ҧсахра зқәым Анцәа иеиҳабыра Аҳас иахагылоу, Иуда ишьҭра датәхар акәын (Лука 1:32, 33).

10. а) Анцәа имессиатә Аҳра ауасхыр анбазышьҭаҵаз? б) Иарбан усу адгьыл ахьынӡанаӡааӡо имҩаҧыргалаша заҧхьаҟа Иисус аҳра ицызураны иҟоу?

¹⁰ Анцәа имессиатә Аҳра ауасхыр азышьҭаҵан Иисус иапостолцәа ралхрала (Ефесаа рахь 2:19, 20; Аартра 21:14). Дара Иисус Христос ажәҩанаҿы аҳра ицызуло 144 000-ҩык рахьынтә иаҧхьатәиқәан. Иисус наҟ-наҟ напхгара ицҟазҵало адгьылаҿы инхонаҵы, урҭ шаҳаҭрауразы инарҭбаау аус мҩаҧаргоит, иагьықәныҟәоит иара иҧҟара: «Шәцаны ажәларқәа зегьы идшәырҵа, Аби, Аҧеи, Иҧшьоу Адоуҳаи рыхьӡала аӡы иӡаахуа» (Маҭфеи 28:19, ИА).

11. Ишҧамҩаҧысуеи иахьатәи аамҭазы Аҳра иазкны ажәабжьҳәара аус, насгьы иарбан еихьӡарақәоу иҟоу?

¹¹ Иахьа зеиҧшҟамлац амҽхак аманы анагӡахара иаҽуп ажәларқәа зегьы аҵара дырҵара аҧҟара. Иисус иҧааимбаражәақәа инарықәыршәаны, Иегова Ишаҳаҭцәа адгьыл ахьынӡанаӡааӡо Аҳра иазкыу ажәабжь бзиа рыладырҵәоит: «Ари Аҳра иазкыу агәырҕьажәа рылаҳәахоит ауаа зқәынхо адгьыл зегь аҟны, ажәларқәа зегьы ирзышаҳаҭхарц азы; убасҟан иаауеит аҵыхәтәа» (Маҭфеи 24:14, АҾ). Ажәабжьҳәара аус аганқәа  ируакыуп инарҭбаау аҵарадырратә программа. Анцәа Иаҳра азакәанқәеи апринципқәеи ирықәныҟәо ауаа аҭынчреи акзаареи уажәнатә ирылагәырҕьоит. Ауаатәыҩса реиҳабырақәа уи аҩыза анагӡара рымч ақәымхеит. Абарҭ зегьы иҳарҳәоит, Анцәа Иаҳра шыҟаҵәҟьоу!

12. а) Аҳра ацҳаражәҳәаҩцәа Иегова Ишаҳаҭцәа ҳәа рыхьӡ аҳәара зақәнагоузеи? б) Анцәа Иаҳра ауаатәыҩса реиҳабырақәа излареиҧшымзеи?

¹² Иегова израилаа иреиҳәеит: «Сара сышаҳаҭцәа... шәареи иалсхыз Стәи» (Исаиа 43:10—12). Иисус, «ашаҳаҭ иаша», дазыҳаҵҳаҵуа ирылеиҳәон Аҳра иазкыз  ажәабжь бзиа (Аартра 1:5; Маҭфеи 4:17). Убри аҟнытә иахьатәи Аҳра ацҳаражәҳәаҩцәа ирнаалоит Анцәа ириҭаз ахьӡ — Иегова Ишаҳаҭцәа. Аха Ашаҳаҭцәа егьырҭ Анцәа Иаҳра атәы раҳәара абысҟак раамҭеи рымчқәеи задырҵозеи? Урҭ убас ҟарҵоит, избанзар Аҳроуп ауаатәыҩса гәыҕра заҵәыкны ирымоу. Ауаатәыҩса реиҳабырақәа знымзар-зны рҵыхәтәа ааиуеит, аха Анцәа Иаҳра ахаангьы аҵыхәтәа ҟалом. Исаиа ишәҟәы 9:6, 7 аҟны абри Аҳра анапхгаҩы, Иисус, «адунеи Аҳ» ҳәа ихьӡ арбоуп. Уи адагьы, уаҟа иаҳәоит: «Имчреи аҭынчреи реизҳазыҕьара ҳәаак амаӡам». Анцәа Иаҳра иахьа иҟоу, аха уаҵәы ииаӡаауа ауаатәыҩса реиҳабырақәа иреиҧшым. Даниил ишәҟәы 2:44 аҟны иаҳәоит: «Жәҩан иҟоу Анцәа ишьақәиргылоит наӡаӡа ҧгара зқәымло аҳра, ари аҳрагьы даҽа жәларык ирыҭахом; уи... наӡаӡа игылазаауеит».

13. а) Закәытә проблемақәоузеи Анцәа Иаҳра қәҿиарала иаӡбраны иҟоу? б) Анцәа ҳзықәиргәыҕыз шынаӡо агәра заҳгозеи?

¹³ Дарбан уаҩытәыҩсатә аҳау, аибашьрақәа раанкылареи, ацәгьауреи, ачымазарақәеи, амлакреи раҧыхреи, ахыҵакырҭа амамзаара апроблема аӡбреи зылшарыз? Насгьы: дарбан ҳәынҭқару адгьылаҿы аҧсцәа рыргылара зылшо? Абарҭ зегь рыҟаҵара зылшо зхатәы Аҳ дызхагылоу Анцәа Иаҳроуп. Аҳра аҿҳәара кьаҿхом, еснагь арҽеира зҭахыу иҧхасҭахаз априбор еиҧш. Уи ус акәымкәа, Иегова ҳшақәиргәыҕуа ала, Анцәа Иаҳра ақәҿиара ацзаауеит: «Сҿы иҭыҵыз сажәа... Сара сахь баша ихынҳәуам, аха Сгәы иаахәареи иззынасышьҭыз ауси нанагӡоит» (Исаиа 55:11). Анцәа игәҭакы нагӡахоит, хымҧада; аха ианбалагари Аҳра напхгара аура?

ИАНБАЛАГОИ АҲРА НАПХГАРА АҞАҴАРА?

14. Иисус иҵаҩцәа Аҳра аганахьала ирзеилымкаауаз арбан, насгьы Иисус иаҳра аҵыхәала иидыруази?

¹⁴ «Абри аамҭа азы акәхару, Иҳақәиҭу, Израил Аҳра аназышьақәургыло?» Иисус иҵаҩцәа рызҵаара иаанарҧшуеит, урҭ усҟан Анцәа Иаҳра зызкызи уи напхгара аҟаҵара ианалагози шырзымдыруаз. Иисус, урҭ абри аганахьала ирымаз агәаанагарақәа ирцәихьчарц, абас  иҳәеит: «Шәара ишәусым Саб дызқәиҭу аамҭақәеи аҿҳәарақәеи рдырра». Иисус идыруан, иара ҧыҭраамҭак ашьҭахь адгьыл напхгара аҭара дшалагоз, иҧсҭалареи ажәҩанахь ихалареи рышьҭахь акыр шықәса анҵлак (Аусқәа 1:6—11; Лука 19:11, 12, 15). Заанаҵы абас аҳәахьан Абиблиа. Уаҟа абри аҵыхәала иаҳәозеи?

15. Ҧсалом 109:1 аҟны иаҳәозеи Иисус инапхгара алагамҭа азы?

¹⁵ Ҧааимбаражәала Иисус дихцәажәо, «Исықәиҭу» ҳәагьы диҧхьауа, аҳ Давид иҳәеит: «Иегова иеиҳәеит сара Исықәиҭу: утәа Сара сарҕьарахь, Уаҕацәа ушьапы иаҵасҵаанӡа» (Ҧсалом 109:1, Г. П. Павски иеиҭагамҭа; иаҿырҧш Аусқәа 2:34—36). Ари аҧааимбаражәа излаҳнарбо ала, Иисус ажәҩанахь дышхалаз еиҧш, иаразнак аҳра аура даламгеит. Уи Анцәа иарҕьарахьала дтәаны дыҧшыр акәын (Ауриацәа рахь 10:12, 13). Шаҟаамҭа уи азыҧшра иқәшәеи? Уи иаҳра данбалагеи? Абарҭ азҵаарақәа рҭакқәа рыҧшаараҿы иҳацхраауеит Абиблиа.

16. Иҟалазеи 607 шықәсазы ҳ. ҟ., насгьы уи Анцәа Иаҳра изладҳәалази?

¹⁶ Адгьыл зегь аҟны Иегова ихьӡ ахьықәыҩуаз қалақь заҵәыкны иҟаз Иерусалим акәын (3 Аҳрақәа 11:36). Уи, иара убасгьы, жәҩантәи Анцәа Иаҳра иахаҿырҧшыз адгьылаҿтәи Анцәа иаҳра иаҳҭнықалақьын. Убри аҟнытә 607 шықәсазы ҳ. ҟ. вавилонаа Иерусалим ахьықәырхыз даара крызҵазкуа хҭысны иҟалеит. Абри ахҭыс инаркны иалагеит зҵыхәаҧҵәара ааигәамыз аамҭа ду, адгьылаҿы Анцәа хаҭала иуаажәлар данырхагыламыз. Фышә шықәса раҟара анҵы ашьҭахь, Иисус иҳәеит, иҿахҵәаз Анцәа иаҳра апериод уаанӡеиҧш уажәгьы ацара ишаҿыз, абар иара иажәақәа: «Иерусалимгьы ажәларқәа аҕрагылашт, ажәларқәа раамҭа ииасаанӡа» (Лука 21:24, АҾ).

17. а) Изахьӡузеи «ажәларқәа раамҭа», шаҟа аамҭагьы ицои урҭ? б) Ианбалагеи иагьанбахыркәшахеи «ажәларқәа раамҭа»?

¹⁷ «Ажәларқәа ианраамҭаз» ари адунеи аиҳабырақәа азин рыман Анцәа идикылахьаз аҳра ахырбгалара. Ари апериод алагеит 607 шықәсазы ҳ. ҟ. Иерусалим анықәырх инаркны, Даниилгьы иҳәеит, уи «бжьы-аамҭакы» ишцало (Даниил 4:20—22). Шаҟа аҭахыузеи  «бжьы-аамҭакы» риасра? Абиблиаҿы излаҳәо ала, хҧеи бжаки зҵазкуа «аамҭа» 1 260 мшы ираҟароуп (Аартра 12:6, 14). Абасала, абарҭ реиҧш иҟоу ҩ-периодк, мамзаргьы бжьы-аамҭакы, 2 520 мшы ираҟароуп. Аха абри аамҭа кьаҿк ала хҭыс ҷыдак ҟамлеит. Аха уеизгьы, апринцип «ҽнак шықәсык ҳәа иҧхьаӡаны», Даниил иҧааимбаражәа иадаҳкылар, насгьы 607 шықәса ҳ. ҟ. даҽа 2 520 шықәса анацаҳҵалак, ҳара 1914-тәи ашықәс ҳ. ҳ. ҳазнеиуеит (Ахыҧхьаӡарақәа 14:34; Иезекииль 4:6).

18. Иҟаиҵазеи Иисус, аҳратә мчра шааиоуз еиҧш, насгьы уи адгьыл ишҧаныҧши?

¹⁸ Далагама Иисус ажәҩанаҿы напхгара аҟаҵара убри ашықәс азы? Анаҩс ицо ахы аҟны ирылацәажәахоит уи ус шакәу шьақәзырҕәҕәо абиблиатә ршаҳаҭгақәа. Аха уаҳа наҭахымкәа еилкаауп: Иисус инапхгара алагара иаанагомызт иаарласны адгьылаҿы аҭынчра аҟалара. Аартра 12:7—12 аҟны иаҳәоит, Иисус аҳратә мчра шааиоуз еиҧшҵәҟьа, уи Аҩсҭаа идемонцәеи иареи ажәҩан иалырбганы ишкаижьуа. Ари адгьыл иқәынхо арыцҳара рзаанагарын, аха угәы арҭынчуеит, Аҩсҭаа изаанхаз «аамҭа ахькьаҿхаз». Дук хара имгакәа агәырҕьара азы аҵаҵҕәы ҳауеит, Аҳра напхгара ахьыҟанаҵо мацаразы акәымкәа, уи адгьыли аҳәатәхаҵара злоу ауаатәыҩсеи уаҩы иимбац азылҧхарақәа ахьырзаанаго азгьы (Ҧсалом 71:7, 8). Излаадыруеи, абри иаарласны ишыҟало?

[Албаагақәа]

ИҦЫШӘА УДЫРРАҚӘА

Изакәузеи Анцәа Иаҳра, насгьы иабантәаауеи уи анапхгара?

Дарбан Аҳраҿы напхгара зуа, уи анапаҵаҟа иҟоугьы зусҭцәада?

Иегова Иаҳра шыҟаҵәҟьоу агәра шҧаҳиргои?

Ианбалагеи иагьанбахыркәшахеи «ажәларқәа раамҭа»?

[Аҵаразы иҟоу азҵаарақәа]

[Арамка/Асахьа, адаҟьа 94]

АНЦӘА ИАҲРА ИАДҲӘАЛОУ КРЫЗҴАЗКУА ХҬЫСҚӘАК

• Иегова ирылеиҳәоит, Амаҭ, Аҩсҭаа Аџьныш, ахы ҭаҧызҽуа «ажәла» арҿиара гәҭакыс ишимоу (Аҟазаара 3:15).

• 1943 шықәсазы ҳ. ҟ. Иегова «ажәла» Авраам ихылҵ шиакәхо аирбоит (Аҟазаара 12:1—3, 7; 22:18).

• 1513 шықәсазы ҳ. ҟ. Анцәеи Израили ирыбжьаҵаз Азакәан Еиқәшаҳаҭра «ҧхьаҟатәи абзиарақәа ирцәаарахоит» (Ақәҵымҭа 24:6—8; Ауриацәа рахь 10:1).

• Адгьылаҿтәи израилаа раҳра ауасхыр азышьҭаҵан 1117 шықәсазы ҳ. ҟ., нас ҳамҭакы ашьҭахь урҭ напхгара рызҭоз Давид ихылҵшьҭра иатәыз аҳцәа ракәын (1 Аҳрақәа 11:15; 2 Аҳрақәа 7:8, 16).

• Иерусалим 607 шықәсазы ҳ. ҟ. ианықәырх инаркны иалагоит «ажәларқәа раамҭа» (4 Аҳрақәа 25:8—10, 25, 26: Лука 21:24).

• 29 шықәса ҳ. ҳ. азы Иисус Аҳра азы дыҧшьан, нас уи адгьыл аҟны Анцәа имаҵура далагоит (Маҭфеи 3:16, 17; 4:17; 21:9—11).

• 33 шықәса ҳ. ҳ. азы Иисус ажәҩан ахь дхагалахоит, дагьтәоит Иаб иарҕьарахьала, иаҳра даналаго дазыҧшны (Аусқәа 5:30, 31; Ауриацәа рахь 10:12, 13).

• «Ажәларқәа раамҭа» ахыркәшамҭазы 1914 шықәса ҳ. ҳ. азы Иисус жәҩантәи Аҳраҿы аҳас дҟалоит (Аартра 11:15).

• Аҩсҭаа идемонцәеи иареи ажәҩан аҟынтә адгьыл аҳәаақәа рахь илбаарышьҭуеит, даргьы ирхырҟьаны ауаа ргәырҩа еиҳа-еиҳа иацлоит (Аартра 12:9—12).

• Иисус напхгара аиҭоит Анцәа Иаҳра иазкыу ажәабжь бзиа рылаҳәара адунеизегьтәи аус (Маҭфеи 24:14; 28:19, 20).