Даиани — Бразилиа заамҭа зегь ажәабжьҳәара иазызкуа Иегова ишаҳаҭ лоуп. Ҽнак зны ҭелла ажәабжь анылҳәоз, ҳаҵеи-ԥҳәыси драцәажәеит. Дара Даиани иларҳәеит иаарласны алашареи аинтернети ахьыҟам ақыҭахь нхара ишиасуа. Уа Иегова ишаҳаҭцәагьы ыҟаӡамызт. Дара Абиблиа алацәажәара ргәаԥхон, убри аҟынтә Даиани уи ақыҭаҿы иҟаз атаксофон аномер лырҭеит, насгьы асра анлылшо аамҭеи амши ларҳәеит.

 Ианеибырҳәаз аамҭазы Даиани уи аномер ахь дасит, иагьеицәажәеит. Анаҩстәи ҩымчыбжьа рыҩныҵҟа дара еиҭа хынтә еицәажәеит.

 Аха нас аҭак аҟаҵара иаҟәыҵит. Даиани лгәы камҳаӡакәа мчыбжьык ахь хынтә уи аномер ахь дасуан. Даҽаӡәы аҭел анышьҭихуаз, лара уи Абиблиа аӡбахә изеиҭалҳәон. Убас Даиани уи ақыҭаҿы инхоз даҽа шьоукгьы Абиблиа дырҵара далагеит.

 Ҽнак зны Даиани лхаҵеи лареи хаҵак ҭелла Абиблиа анидырҵоз, аҭыԥантәи ауахәама ахада рыбжьы иаҳаит. Ирҳәо ибзианы иаҳарц азы иара рааигәа днеит, насгьы Даиани лхаҵеи лареи драцәажәарц иҭаххеит. Иара еиликааз даараӡа игәаԥхеит, Абиблиа аҵарагьы иҭаххеит.

 Аамҭак ашьҭахь Даиани лхаҵеи лареи уи ақыҭаҿы фҩык Абиблиа ддырҵон, ауахәама ахадагьы дналаҵаны. Шьоукы уи атаксофон ала аизарақәа ирзыӡырҩуеит. Руаӡәк асқамгьы ҟаиҵеит, Абиблиа зҵо итәаны Абиблиа рҵаларц азы.

 Даиани лхаҵеи лареи уи ақыҭаҿы инхо ауаа Аҳра аӡбахә ахьраҳаз даараӡа иеигәырӷьоит. Даиани илҳәоит: «Иегова илшоит ажәабжь бзиа ауаа ахьыҟазаалакгьы идирҳар».