«Сара сиит Иегова ишаҳаҭцәа рҭаацәараҿы, — еиҭалҳәоит Реичел, уажәы Доминиканатәи Ареспубликаҿы инхо. — Даараӡа сгәы снархьуеит быжь-шықәса анысхыҵуаз саб аизара ахьаанижьыз, насгьы Иегова ишаҳаҭцәа дахьырҿагылаз. Саб Иегова даансыжьырц азы иҟаимҵоз ҳәа акы ыҟамызт. Иаҳҳәап, иара уи азы аҳамҭақәа сыдигалон: аҭел, Диснеилендҟа ацара, акредиттә картагьы. Зны-зынла саб ҭаҷкәымла дсысуан, Иегова имаҵ аура саҟәыҵырц азы. Иара иҳәон бзымныҟәо-бзымцәажәо бҟалар, аизарахьгьы бызцалаӡом ҳәа. Аха уи сара ахаангьы сааннакылаӡомызт. Сара еснагь сҽазысшәон аизарақәа рҭаара.

 Саб изыгәаӷьӡомызт сан ишылбоз сыпҟара, аха бшысыпҟо бан илзеиҭабҳәар, ларгьы дсыпҟоит ҳәа сиршәон. Саб исныз ашәытақәа рзы ииҳәашазгьы иԥшааит: акарате лсырҵоит ҳәа иҳәон.

 Сара зынӡа сқәыԥшын, сабгьы сицәшәон, убри аҟынтә сан акгьы ласҳәаӡомызт. Аха Иегова зегь изеиҭасҳәон. Ҳара ҳанхон Мериленд (Еиду Америкатәи Аштатқәа). Ҳаҩны ашьҭахь абнара ыҟан, бзиа избон уа аныҟәара. Абнаҿы игылан иԥшӡоу аџьҵла. Уи аҵлаҿы, иманшәалоу азмахәҭак аҿы, сықәтәаны Анцәа сиҳәон. Сара Иегова изеиҭасҳәон сцәаныррақәеи схәыцрақәеи, сандухалак иара изы иҟасҵарц исҭаху — уи азы сыуадаҩрақәа зегь рыхгара дсыцхраауазар. Иара убас бзиа избон адунеи ҿыц аҿы иҟасҵало атәы изеиҭаҳәара, изеиҭасҳәон зеиԥш ҭаацәароу исоуа, ахьааи ашәареи анықәӡаалак, агәырӷьареи аҭынчреи ансоулак, аԥсҭазаара шаҟа ибзиахо атәгьы изеиҭасҳәон.

 Саб Иегова имаҵ аура саҟәыҵырц азы санипҟоз, аҳамҭақәагьы ансыдигалоз, избон Иегова еснагь сааигәара дшыҟаз, сгәы шышьҭихуаз, амчгьы шсиҭоз. Анцәа дсыцхрааит гәыкала имаҵ аура, сизиашаны аанхара.

 Сара аӡы сыҽӡаасхит 10 шықәса анысхыҵуаз. Ҩышықәса рышьҭахь пионерс амаҵ аура салагеит. Саб раԥхьа уи атәы издырӡомызт, аха ианеиликаа ашьҭахь иӷәӷәаны дысҿасит, сыцламҳәагьы ҭирԥеит.

 Шьоукы апионертә маҵзура саламгарц сарҳәон — дара макьана сқәыԥшцәоуп ҳәа ргәы иаанагон, насгьы уи иаҵанакуа ибзианы исзеилкааӡом ҳәа рҳәон. Уи адагьы, сара избон ҳҭыԥ аҿы иқәыԥшу аишьцәеи аиҳәшьцәеи рацәаҩны Иегова имаҵ аура уиаҟара аинтерес шрымамыз. Дара есқьынгьы аиҩызаратә еиԥыларақәа еиҿыркаауан, аччареи ахәмарреи ракәын изҿыз. Зны-зынла дара иҟарҵо ҟасҵалар сҭахын. Сара схәыцуан: „Изаҭахи абриаҟара ажәабжьҳәара? Сықәлацәа иҟарҵо ҟасҵалар амуеи!“ Аха абас еиԥш иҟоу ахәыцрақәа сызцәырҵцыԥхьаӡа, Иегова уи атәы иаартны изеиҭасҳәон.

 15 шықәса анысхыҵуаз, еицырдыруа амодельтә агенствахь аусуразы ааԥхьара сырҭеит. Исыдыргалаз аконтракт даараӡа ибзиан. Уи аконтракт ишаҳәоз ала, Милан (Италиа) аус зулар акәын. Сара модельс аҟалара сҭахын, уи сыхнахуан. Схаҿы иаазгон ажурналқәа рҿы спатреҭқәа шанылоз, аподиум аҿы зыхә цәгьоу амаҭәақәа сышәҵаны сышныҟәало. Пионерс амаҵ зуеижьҭеи абар хышықәса ҵуан. Ус схәыцуан: „Ари исҭахыҵәҟьоу акоуп! Ариаҟара аԥара соулар, акыраамҭа пионерс амаҵ зуларгьы сылшоит!“ Саб усҟан ҳааныжьны дцахьан, убри аҟынтә уа аусура салагар, сан ԥарала слыцхраалоит ҳәа сгәы иаанагон.

 Сара уи азы Иегова сиҳәеит. Акыршықәса пионерс амаҵ зуаз сангьы слацәажәеит, иара убас даара пату зқәысҵоз аизара ахылаԥшҩы сиацәажәеит. Уи адагьы, абжьааԥны ишыҟасҵалоз еиԥш, абнахь сцеит, нас бзиа избоз аџьҵла схалан, акыраамҭа Анцәа сиҳәон. Иегова сыҳәарақәа рҭак ҟаиҵеит. Аизара ахылаԥшҩы хаала дсацәажәеит, иара убас дысзаԥхьеит Екклезиаст 5:4 иану ажәақәа: „Анцәа ажәа аниуҭо, аамҭа мгакәа инагӡа... Иуҭаз ажәа нагӡа“. Сара Иегова ажәа исҭахьан сыԥсҭазаара иара ишизыскуа, гәыкала имаҵ шызуло. Убри азы исыдыргалоз аусура Иеговеи сареи ҳаиҩызара иаԥырхагахар сҭахӡамызт. Убри аҟынтә амодельтә кариера мап ацәыскырц сыӡбеит.

 Сара схәыҷра мариаӡамызт, аха Иегова дсыцхрааит зегь ахгара. Уажәы сара аҭаацәара салоуп. Схаҵа Хасир аизара ахылаԥшҩыс амаҵ иуеит, быжь-шықәса зхыҵуа ҳаҷкәын Коннор иӡаахым жәабжьҳәаҩыс дыҟоуп. Сара сакәзар, абар 27 шықәса ҵуеит пионерс амаҵ зуеижьҭеи.

 Сара лассы-лассы исгәалашәоит абнаҿы бзиа избоз аџьҵла сықәтәаны Иегова сышиҳәоз. Сара сӷьаҵәыӷьаҵәуа сиҳәон дсыцхраарц азы. Иара есымша сыҳәарақәа рҭак ҟаиҵон, амч сиҭон, сгәы ирҭынчуан, сымҩақәиҵон. Сыԥсҭазаараҿы зныкымкәа игәасҭахьеит Иегова зегь иреиӷьу Аб шиакәу. Сара даараӡа сеигәырӷьоит гәык-ԥсыкала имаҵ аура ахьысыӡбаз! Уи зегь иреиӷьу ԥсҭазааратә мҩоуп».