Ii, aBaibul phọ angọ ni riphigh dị ekpẹ oḍuom olhoghi mọ Enhaạn edi ghan ni. ABaibul phọ uroma iyira mọ omhoọgh omheeraam esi Enhaạn, kuolọ re/mạ ghan mọ yira komeeraam torobọ ilọ aruukụ iiḅereghị oghaạph, kparipẹ ghụn osighẹ “iikpọ iitughiạn” phọ ayira kụ oḍighinhom. (Rom 12:1; 1 Jọn 5:​20) Omhiịn iniin ariphigh siphẹ aBaibul phọ dị eḍeenhaan mọ Enhaạn edi ghan ni:

•   Aghuḍum r’ipẹ omhaạr bọ odẹ raraạr siẹn ade phọ r’epẹ k’akẹ phọ eḍeenhaan ni mọ Olemhiạ odi ni. ABaibul phọ aḅẹm ni mọ: “Otu o/lo ghan dị oye kụ u/lọgh. Kuolọ Enaạn phọ kụ ilemọgh bọ oomo araraạr phọ.” (Hibru 3:4) Aḍiitughiạn phọ aḍiẹn phọ edugh ni onhaghanhạn, kụ ibadị awe dị oghị ni askul omeeraam ni mọ ephẹn phọ egey ephigh otuạn omheeraam mọ Enhaạn edi ni. *

•   Eḍighi ni eseeriom ayira owạ ghan olhegheri iyaạr phọ yira otuạn bọ omite, eephuạ dị eḍien r’iinmenhian ke/tue egbaanyamhị. Iphẹn phọ eḍighi pakirị araraạr phọ aBaibul phọ aghaạph bọ aghol mọ yira omoghi ni olhegheri, eḅarạm kẹn ni eephuạ olhegheri Enhaạn r’okumu odị. (Matiu 5:3; Ogananami 4:​11) Eephuạ phọ ephẹn phọ eḍeenhaan mọ Enhaạn edi ghan ni ḅilhẹ kẹn mọ odị Olemhiạ dị amhoọgh ephomhoghiạn dị rawạ mọ yira ogbaanyamhị eephuạ phọ ephẹn phọ.​—Matiu 4:4.

•   Imiịn aBaibul dị ogẹ simuunịr asiạ epẹ omhạn ighaạph ni k’anhị k’alhe ilọ araraạr dị kemite, kụ ituụgh ni bịn emite. Ipẹ araraạr phọ iphẹn phọ etuụgh bọ bịn kaị emite eḍeenhaan mọ oye isiẹn ade phọ kụ o/ghaạph.​—2 Pita 1:​21.

•   Abuẹn ogẹ bọ Baibul phọ umhoọgh ni olhegheri iyaạr araraạr asayẹn dị awe u/moọgh mem mọ amuphẹ phọ. Esi omaạm, iḍiodi phọ, ibadị awe umheeraam mọ iniin inhạm idiphọ oomạ, amuzi, r’anạm kụ iphạm de phọ. Dị egbạgh r’iphẹn phọ, aBaibul phọ aḅẹm mọ Enhaạn “o/ḅạm esi de phọ.” (Job 26:7) Iduọn kẹn kụ idị aBaibul phọ aghaạph mọ ade phọ “eeghiraa.” (Isaiah 40:22, igẹ dị edi ude; Douay Version) Ibadị awe ootughiạn mọ abuẹn ogẹ bọ Baibul phọ ulhegheri iphẹn phọ loor esi dị oye dị apelheghiom kụ aḅenhị bidị.

•   ABaibul phọ apanyanhaạn ni ibadị igbagarạ asipuru, sipuru dị eḍighi maạr dị oye phọ u/moọgh ophanyanhaạn dị agbaanyạn keḍighi idị oye phọ kameeraam mọ Enhaạn o/lho ghan. Esi omaạm: Eḍighi maạr dị Enhaạm amhoọgh ni ephomhoghiạn r’oomo iikpọ, eeghe kụ iḍighi kụ imhinhimhiịn r’ikarạph emuza bọ aḅirinhi phọ? “Uḍighi Ika Kụ Ozeeghị Bọ We Mem Dị Meten?,” obobọ Uḍighi ika kụ awe rokol ghan bọ ḍien Enhaạn koḍighi ikarạph kparipẹ roḍighi igey?​—Taitọs 1:​16.