EKPỊGH PH’OOGH

Ḅula esi ‘Okoriom Iyool phọ r’Opoghom Asighuḍum mọ Anyina’

PEGH

Nạ masoman ghan ni nyeniin obobọ iniin ipaanaạn phọ iphẹn phọ oghaạph bọ siẹn aborosọ phọ ophọn ḍughụm? Eḍighi idiphọ, pọ ko/gina anạ bịn. Ibadị arebenẹ Enaạn dị okpẹ oḍuomologhi k’asimem aBaibul phọ ni ḅilẹ r’aḍio arodon mokaran ghan ni odọ phọ ipaanaạn phọ iphẹn phọ. Idiphọ abidị omoọgh bọ ni olhoghonaạn aḍighaạgh aJihova orue okpạr opu odọ ipaanaạn phọ ipẹ phọ, iduọn kẹn kụ edị nạ kamoọgh aani ni.

AJihova karolhonaạn ni nyinạ iduọn nạ kaḅula bọ esi odị

KUPHOM ni owol mọ aJihova karolhonaạn ni nyinạ iduọn nạ kaḅula bọ esi odị. Odị kalhoghonaạn ni nyinạ ḍighaạgh okaran ooḅaghamiạn aloor, oḍighi idị olhoghi anạ kawologhụ ilọ iyaạr dị oḍighi nyinạ dị repin esi anạ, ḅilẹ romoọgh eephọ olhoghi r’eephọ ekpom mọ epẹ retọl ghan bọ mem lọ oye phọ amoọgh ooruẹn olhoghi dị aḅaạl. Bịn ketue ni eḅilẹ enyu nyinạ okumu aJihova r’abupherị phọ abuusenyom mọ. Adọl phọ anạ kekịgh aani idiphọ aḍiphẹ abuniin aKristẹn oḅẹl-okuron asiạ phọ, buphẹ otelhedom mọ aPita agẹ bọ aghiọm: ‘Obọ nyina ighịgh iyool igạ dị repe eten, kụ nyiidiphọ nyinạ meḅula eteẹny okoriom iyool phọ r’opoghom asighuḍum mọ anyina.’—1 Pita 2:25.

Oḅula esi aJihova kụ iyaạr dị enighẹ epelom dị edi dị nạ katue aḍighi. Eeghe kụ iḍighi? Nạ kangọ ibọ ekpom aJihova. (Proverbs 27:11) Iduọn nạ alhegheri bọ ni, aJihova raloghoma ghan ni iyaạr, kụ iḍighi kụ ilọ yira oḍighi retir ghan ni nyodị. Okạr agey, aJihova iyira ru/kpaariọm ghan ophomoghiạn odị r’okumu odị. (Deuteronomy 30:19, 20) Oniin oye dị aghị asukul aBaibul aghaạph iduọn: “Oye ka/tue aghughuronaan nyinạ ekpom anạ. Epel lọ nạ r’aloor kụ aghughuron.” Esi ooseeny ghan aJihova r’ekpom dị emuza r’ephomoghiạn, kụ edị yira kotue osopha oghughuron ekpom mọ ayira. Mem lọ yira oḍighi iduọn phọ, pọ yira mongọ nyodị inmọ dị emạn maạr—aruukuan phọ ayira—bịn yira mongọ iboom ibo ekpom odị. Okạr agey, iyaạr i/lo dị kotue osighẹ otomaạm oḅaạl olhoghi phọ opọ yira romoọgh ghan bọ esi ongọ aJihova iiseeny phọ ipẹ ekpẹ bọ ongọ odị.—Iiḍighi 20:35; Ogananami 4:11.

Idị epelom pạ, mem lọ nạ aḅilẹ amiigh iiseeny aKristẹn phọ, nạ kagbaanyamị ni ephuọm araraạr aruwaloor phọ anạ. (Matiu 5:3) Eghẹn eten? Awe siẹn oomo aḅirini phọ rookia ghan ni, ‘Utụ eeghe kụ yira odi ghan bọ?’ Bidị romoghi ghan omoọgh ophanyanaạn asipuru ilọ iyaạr phọ aghuḍum atụ bọ kụ odi ghan bọ. Omạr awe omoghi dị kogbaanyamị ephuọm aruwaloor phọ epẹ phọ loor esi dị aJihova alemọm bidị r’ephuọm mọ epẹ phọ. Odị ulhẹm iyira idị yira komoọgh ghan ogbaanyạn esi okumu odị. Ogbaanyạn o/lo dị katue aaleenyan nyopọ yira komoọgh bọ mem dị yira olhegheri mọ yira r’ooseeny ni aJihova loor esi ephomoghiạn dị yira omoọgh oghị esi odị.—Psalm 63:1-5.

Seseeny ni legheri mọ aJihova rawạ ni mọ nạ ḅula esi odị. Ika kụ idị nạ kameeraam bọ iphẹn phọ? Miịn aani: R’iboom iiḅereghi ni, kụ edị osighẹ bọ ookolobianam aborosọ phọ ophọn phọ. Kụ eeni okumor oye siphẹ ookpomoghan phọ, obobọ onhọn onyọ oḅaramạ omeeraam anạ kụ asighẹ bọ aruom nyinạ. Kụ enyu bọ nyinạ aạl phọ ḅilẹ r’omegheron oghị esi adom mọ dị ephạm bọ. Oomo phọ iphẹn phọ areḍeenaan dị emạ emiteom mọ aJihova nyinạ ko/wulha. Kparipẹ ghun ni, odị amiigha loor kụ raḍur ghan nyinạ kaḅulemi esi odị.—Jọn 6:44.

Yira kotue ni omoọgh iidereghị esi olhegheri mọ aJihova ra/bula ghan r’amem rebenẹ odị dị mophe. Epẹ kụ iyaạr dị oniin onyọ umarani dị oghol mọ Donna aru alhegheri. Odị aḅẹm mọ: “Mị uḍighi ni ḅuụn enụm enụm bịn aḍuạ siẹn igey phọ kuolọ ibadị amem mị umiịn ghan loor amị dị mị ragbirima ikpo-onhụ asuọr phọ Psalm 139:23, 24, ipẹ eḅẹm bọ mọ: ‘Waaghị oomo amị, sey Enaạn, kụ alhegheri ekpom mọ amị. Uuḅeghiọn imị, kụ alhegheri iitughiạn phọ regbiriḅa bọ olhoghi phọ amị. Miịn mughumọ eten edi ni dị kiḍighi imị iyaạr dị i/nighẹ dị edị siẹn aloor phọ amị, kụ uḍiemiom imị siphẹ eten k’agee-pọ phọ.’ Mị ulhegheri ni mọ mị ko/lọ aḅirini phọ—mị u/kạr utue u/ḅọph r’abidị—kụ mị ulhegheri ni mọ oḍighom mọ aJihova kụ esi dị ewạ mọ mị utọl. Mị amiigh omiịn mọ aJihova imị u/wilẹ r’amem; iyaạr dị ewạ ḍighaạgh amị pọ owạ eten oḅula esi odị bịn. Kụ olhoghi amị aḅaạl li agey iduọn mị aḅula bọ!”

“Mị amiigh omiịn mọ aJihova imị u/wilẹ r’amem; iyaạr dị ewạ ḍighaạgh amị pọ owạ eten oḅula esi odị bịn”

Yoor rooḅereghị r’oomo olhoghi ayoor mọ nạ kẹn ni kaḅilẹ ni aloghoma “ibo phọ aJihova.” (Nehemiah 8:10) Nạ ka/ḅẹm mọ eeghe kụ isu imị kụ mị aḅilẹ bọ aḅula esi aJihova.

Ophanyanaạn Asipuru Ilọ Oḅilẹ Oḅula esi AJihova

MỊ KAMIIGHOM ḌIGHEN?

Oye dị arọl e/moon kewạ ni mọ akoronaạn kụ aḅilẹ aḅula omiigh arukumuan phọ odị enụm enụm. Eniin phọ eten phọ kẹn ni, nạ katue aḅilẹ amoọgh inyaạm mọ anạ idiphọ onyọ aKristẹn esi okparaghạ ghan olhe ghalamọ oọny enụm eḍien aruwaloor torobọ aḍio. Ka/loghoma mọ nạ kaḍighi oomo phọ araraạr phọ mem bịn. Eeni nạ atue ni asighẹ iyạl ikpo ikalạ abalạm obobọ anaghanạm ibạl aBaibul phọ dị moḅạ olhọgh esi, atuughaạm ḍiniin aḍinyạ ayira, awaaghiọm raraạr siphẹ osoph intanẹt phọ jw.org, obobọ apogh aani eniin edeom mọ epẹ roḍeenaan ghan bọ siphẹ tv.pr418.com. Ḅilẹ kẹn kaa/binyemiom okparaghạ oghị aani ituughạ ookpomoghan phọ. Idị epelom oomo phọ inẹ, ḅeeḅereghị aJihova alhọm olhoghonaạn aḍighaạgh phọ odị. “Inyaariọm nyodị oomo phọ iiḅaghamị phọ anyina, idị eḍighi bọ odị kụ riiko inyina.”—1 Pita 5:7.

“Mem mọ mị aaphoọm bọ esi iiseeny phọ amị, oboom umugholoor kusiph ghan imị dị ghalamọ r’ooḅereghị bịn mị u/tue. Kụ mem dị mị amighirom bọ aaḅereghị, okumor oye isiphẹ ookpomoghan ekool phọ ayoor aru uphogh imị. Odị ulhoghonaạn ni imị ḍighaạgh olhegheri mọ aJihova ko/roph olhoghi odị esi amị. Okumoor oye phọ uroma ni imị mọ mị umiighom aạl ghan aBaibul phọ torobọ aḍio. Mem dị mị aḍighi bọ idiphọ phọ, bịn mị aru amoọgh inyaạm oḅilẹ omiigh oghị ituughạ phọ. Amem mọ rekị bọ ni, mị aḅilẹ amiigh ophinom abin esi arukumuan epẹ erugh phọ. Olhoghi amị aḅaạl li iboom iduọn aJihova u/toph bọ olhoghi odị r’amem esi amị.”—Eeva.

IKA KỤ IDỊ OOKPOMOGHAN PHỌ KUSIGHẸ IMỊ?

Nạ katue ni akuphom owol mọ abuọ ookpomoghan phọ koghuraam ni nyinạ r’eenyuụm ni. Kparipẹ r’oḍaghạ yogh anạ obobọ osiphi anạ iilogh, bidị koḍeenaan ni ephomoghiạn phọ bidị omoọgh bọ esi anạ kụ oḍighi torobọ ilọ bidị kotue okparamị anạ.—Hibru 10:24, 25.

“Umugholoor usiph ni imị oḅilẹ oḅula ipạ aKindọm Họlphọ. Mị uutughiạn ghan ni ipẹ awe phọ kusighẹ bọ imị. Oniin okumor anhịr onyọ umarani ayira dị arọl siphẹ ookpomoghan phọ 30 asiạ dị meten uḅenị imị, mọ ‘Nạ marigheel, Moọny amị!’ Ipẹ phọ ikạr ri kụ etir ekpom mọ amị. Mị makạr atigheel ologhi-otu.”—Javier.

“Mi ughị ni epẹ aKindọm Họl phọ kụ mị arọl eekuna omạn obọ oye k’ulọgh ghan bọ imị elhegh. Torobọ ipẹ erọl bọ, ibadị umiigh ni osighẹ aghisigh ibạm-anmụny phọ amị olhoghọm amị elhegh mọ mị oye dị maghị ghan ni ituughạ mem ibạm-anmụny phọ amị. Bidị ughuraam ni imị kụ ughurughi imị r’eenyuụm dị eḍighi idị mị alhoghoma eboom eephọ. Ighịgh mudị mị marigheel olhoghi-otu.”—Marco.

IKA KỤ IDỊ IKUMOR AWE PHỌ KULHOGHONAẠN BỌ IMỊ ḌIGHAẠGH?

Ikumọr awe phọ kosighẹ ni eten iidọ kụ ophamạm nyinạ. Bidị kosẹph ni nyinạ esi eephuạ phọ nạ amoọgh bọ oḅilẹ osumeẹny ‘ephomoghiạn phọ nạ amoọgh ghan bọ eḅẹl amem mọ.’ (Ogananami 2:4) Bidị kosighẹ ni onmạ ighirigiir kụ oḍighinom olhoghonaạn anạ ḍighaạgh oolemi atorobọ opiomạn dị nạ mapiomạn, koḍighinom iduọn phọ r’“ophoomị aloor” obobọ r’uwaloor dị ayoghoyoghọ. (Galetia 6:1; Proverbs 28:13) Ikumor awe phọ kookolobian ni oye dị katuughạ ituughạ r’anạ, eeni kosighẹ ḍiniin esi arinyạ phọ iphẹn Draw Close to Jehovah obobọ “Keep Yourselves in God’s Love.” Kuphom ni owol mọ ikumor awe phọ koodereghị ni oḅilẹ oḅegh nyinạ esi atorobọ edạ lọ nạ agbatạn.—Isaiah 32:1, 2.

“Esi ophaanyạ asiạ phọ mị aaphoọm bọ, ikumor awe phọ u/bilẹ oru ghan ophogh amị. Ḍiniin aḍio, oniin okumor oye uḍeenaan ni imị iniin asifoto dị yoor oḍigh. Ipẹ phọ iitughianạm imị ibadị araraạr dị meten epẹ omạn dị mị mawula yogh bịn eḍighi idị mị amiigh omoọgh eephuạ ibo phọ ipẹ mị amoọgh ghan bọ mem mọ mị akumu ghan bọ aJihova. Ikumor awe phọ usighẹ ni r’ephomoghiạn kulhoghonaạn imị ḍighaạgh oḅilẹ ophighi okol arukumuan aruwaloor phọ amị.”—Victor.

“Odị Kaḍighi ni Idị Nạ Kakpạr”

Aḍinyạ asuọr phọ ayira, Sing to Jehovah, epamanạm ni iboom asuọr dị kemoogh oye dị ketue ni eedereghị kụ eḅilẹ ekparamị nyinạ iduọn nạ kaḅilẹ bọ amiigh rukumuan aKristẹn phọ anạ. Pogh aani, esi omaạniọm ikpo-onhụ asuọr phọ ipẹ edi bọ ḍuọr phọ 60. Dị ekpasị esi ikpo-onhụ phọ ipẹ edi bọ siphẹ 1 Pita 5:10, ḍuọr phọ ughol mọ “Odị Kaḍighi ni Idị Nạ Kakpạr.”

Enaạn atuạn ni ‘yaạr k’-aruom b’inhạ ‘gey phọ

Amạgh inhạ uf’ri alhọgh ḍiḅaạl.

P’ekpom ‘na dị amiịn oyạgh aloor ph’anạ

Owạ odị r’oḍighi ghan imạ.

N’uguan es’iib’reghị okum odị;

M’alhọgh ni ḍighaạgh kụ kalọgh n’akiọm.
Enaan atuạn nyin angọ ogin oọny odị;

Esi iduọn, p’awạ mọ moọgh ekol.

’Ḍighi ‘yaạr dị’dị u/kaagh ongọ oọny ph’odị,

Ka/moọgh iikia k’anyaamị ni nyinạ.

Ka/bulha ‘meeraam r’ephom’ghiạn ph’anạ;

’Dị ka/piọm ophogh abuphẹ odị.

(KO-RỌS)

Aghoom nyin’ iḅaạl ‘Jizọs, na’tu olọ k’Enaạn.

’Dị kaghoph ni nyinạ, kụ akp’ramị nyinạ.

Kaaḅaki aghoph nyinạ, oḍeenhaan m’onọ ni.

Ii, ‘dị kaghoph nyinạ, kụ akp’ramị nyinạ.

Sighẹ kood phọ aḍighinom esi onaghạn aḍuọr phọ aḍiẹn phọ ḍidị omoorọm onhụ ḅilẹ r’inhọn asuọr Omạr phọ, obobọ kiạ pạ www.pr418.com. Pogh eediạn PUBLICATIONS > MUSIC.

Eeni Keḅeraạn Kẹn Ni Nyinhạ

ILỌ AYOOR

Lọm Oye Aru Ateẹny Nyinhạ

Iiḅeghiọn ḍipuru dị aBaibul phọ aphagharanhaạn, obobọ tuughạ abughẹ ilọ Abugbaanhaạn aZihova.

ḄULA ESI AJIHOVA