Ooḅi onyọ oḅaramạ omeeraam:

Iduọn nạ alhegheri bọ ni, aBaibul phọ aḍighi ḍinyạ dị ogbogh opol eghaạph ilọ awe. Ibadị abidị uḍighi lhephiri r’anmariịr dị okpẹ ni oḍuom ologhi dị osoman ipaanaạn kirokirọ dị erọl aanị iduọn iphẹn ayira. Bidị uḍighi ni “we iduọn ayira.” (Jems 5:17) Iiḅaghamị kirokirọ r’ooḅaghamiạn aloor iwiririom ghan ni ibadị abidị. Abunhn urọl li dị abuọ eghun-otu phọ abidị obobọ buẹn r’abidị oḅophạn bọ iiseeny phọ kụ oḍighi bidị egey phọ iyaạr. Ibadị abidị urọl li dị olhoghoma apum esi opiomạn dị abidị opiomạn kụ regurọgh ghan bidị.

Abudọ phọ awe phọ abuẹn phọ mowilhẹ aJihova bịn omạn ḍughụm? Eeye. Ibadị abidị urọl idiphọ okosuọr phọ opọ aaḅereghị bọ mọ: “Mị mayeelha aḍuạ idiphọ iyool ogạ dị maphe. Wạ ebenẹ phọ anạ, loor esi dị mị ko/wulha itọ phọ anạ.” (Psalm 119:176) Nạ mamoọgh aani ghan ni odọ phọ olhoghoma phọ ophọn phọ?

AJihova ra/bulha ghan r’amem buusenyom mọ odị abuphẹ oḍuạ bọ siphẹ oghoony phọ obobọ egu iyool phọ. Ḍierị phọ aḍighaạgh phọ, odị raselhe ghan ni ḍighaạgh kangọ mọ bidị okpạph—raḍighi ghan iduọn phọ ibadị amem dị eego esi abuḅaramạ omeeraam mọ abidị. Esi omaạm, ooḅeghiọn, ipẹ aJihova alhoghonaạn bọ ḍighaạgh ebenẹ phọ odị Job, opọ idokirokirọ ekperenom iiḅaghaghamị kụ emelheghuom bọ—dị eḅarạm ni dọl ekulhom, ḍuugh abudị odị aphomoghiạn, ḅilẹ r’egbagarạ ezẹgh. AJob aḅilẹ kẹn ni akparạm ikpo-onhụ eephina esi abuphẹ obọ eghị phọ abidị miḍighi bọ oodereghị odị. Kuolọ odị o/gumọm omạn aJihova, ii obọ odị agbọl li siphẹ iitughiạn phọ odị mem. (Job 1:22; 2:10) Ika kụ idị aJihova alhoghonaạn ḍighaạgh Job oḅilẹ omoọgh aḍimeerạ dị emiigh?

Eniin etẹn dị aJihova alhoghonaạn ḍighaạgh Job pọ iigo esi oniin oḅaramạ omeeraam dị oghọl mọ Ilaihu. Mem mọ aJob aghaạph bọ ipẹ edi bọ ologhi phọ odị, Ilaihu alher ri rurụ anhaghạn kụ enyu nyodị oḅạ eḍọgh. Odị kakaạph eeghe? Odị kaḍaghạ Job phọ obobọ kakparaghạ onyaamị odị esi oḍighi idị odị kaloghoma apum obobọ umugholoor ḍughụm? Ilaihu phọ amiịn ni loor odị idiphọ oye dị apu Job phọ ḍughụm? I/ḍighi idiphọ r’amem r’amem! Dị uwaloor Enaạn kụ anyu nyodị, Ilaihu aḅẹm mọ: “Siphẹ aghisigh egey Enaạn phọ iyạl phọ ayira iniin ni; usighe aani kẹn ni aḅạy phọ kuḅolhọm aani bọ imị.” Kụ odị agbi okparamị aJob mọ: “Oghiilaan amị nyinạ k/uukperemi, ekpaariọm amị nyinạ ki/minoghọm.” (Job 33:6, 7) Kparipẹ robughẹ adool eemọr phọ aJob, Ilaihu r’eten ephomoghiạn ni angọ oroma phọ r’okparamị phọ opọ aJob awạ bọ.

Seseeny legherị mọ r’oniin phọ odọ uwaloor phọ opọ phọ kụ edị yoor ookolobianam bọ abrosọ phọ ophọn phọ. Eḅẹl phọ yoor ulher rurụ onaghạn, kụ omiigha loor ooḅeghiọn sidọl phọ r’ikpo-onhụ ibadị awe dị omeel oḍuạ. (Proverbs 18:13) Kụ yoor ogbi nuụn ooghiraan osoman Igẹ-iigbia phọ, r’iiḅereghị ni kụ ooḅeghiọn ophogh araghaạph idị aJihova alhoghonaạn ḍighaạgh rebenẹ phọ odị epẹ omạn mem dị bidị osoman sidọl dị eghighimạ iphẹn phọ. Ekureriom mọ, yoor uḅạr oḅophoghị raghaạph Igẹ-iigbia phọ ipẹ phọ r’iphẹn emiteghu bọ ḍio phọ arodon kụ omiteom bọ abrosọ phọ ophọn phọ. Yoor romạgh ni nyinạ r’eenyuụm ni okiririom ophogh aḍinyạ phọ aḍiẹn phọ. Seseeny kuphom ni owol mọ yoor ophomoghiạn ni nyinạ r’oomo ologhi ayoor.

Aloor phọ Repogh bọ Bugbaanaạn aJihova