OOḄAGHAMIẠN aloor rateẹny ghan ni torobọ oye—ghalamọ r’awe k’Enaạn ni. “Ooḅaghamiạn aloor kirokirọ uminọm ni imị,” iduọn kụ idị okọ suọr phọ agẹ. (Psalm 94:19) Kụ aJizọs aḅẹm mọ siphẹ amem eekuna phọ, ooḅaghamiạn aloor obobọ “igbiriḅa ilọ araraạr isiẹn aḅirini phọ” ketue ni eḍighi eboom iyaạr ipaanaạn okumu aJihova. (Luk 21:34) Kokaạph ika ilọ anạ? Nạ aloghoma ni idị iiḅaghamị ikpoki, iiḅaghamị eghun-otu, obobọ e/moon meminoghọm nyinạ ḍughụm? Ika kụ idị aJihova kalhoghonaạn nyinạ ḍighaạgh orue okaran?

Yira r’aloor bịn ko/tue opamaghạn ooḅaghamiạn aloor. “Ruuḅaghamị ghan nị iyoor omạn r’ighisigh,” iduọn kụ idị otelhedom mọ aPọl agẹ. “Rowalawalamị ghan ni iitughiạn ayoor . . . ; runyuughi ghan ni iyoor kolereghi.” Ghalamọ r’iduọn phọ ni, odị aḅilẹ kẹn ni aḅẹm mọ “kuolọ u/tue ukuphogh iyoor ugbemeghị,” “kuolọ yoor u/toph ilhoghi phọ ayoor,” ḅilẹ mọ “yoor roḅerenu ghan ni kogbam orelhe.” Eeghe kụ riloghonaạn ghan bọ iyira ḍighaạgh orue okparạm? “Iikpọ phọ ipẹ epelom bọ oopho iikpọ”—iikpọ dị eḍuạ esi Enaạn oomo iikpọ phọ Jihova, kụ eru.—2 Korịnt 4:7-9.

Tuutughiạn aḅula omạn ilọ ipẹ nạ amoọgh ghan bọ “iikpọ phọ ipẹ epelom bọ oopho iikpọ” mem mọ opọ eten bọ. Nạ aatughiạn ni ipẹ oghaạph olhọgh oye oḅeton dị ongọ aḍiinyemi ghan bọ ḍiḅeeraạn phọ anạ esi ephomoghiạn oḅạr phọ aJihova? Omeeraạm mọ anạ esi aruguanaan phọ aJihova akpạr ghan ni aghị ghisigh mem lọ nạ atughemị bunhọn awe ilọ oḍuom olhoghi aParadaịs phọ? Mem lọ yira oghị simitin aKristẹn phọ kụ oghaạph ghan ilọ omeeraam mọ ayira oḅenị bunhọn awe, yira romoọgh ghan ni inyaạm orue okparạm adọl ooḅaghamiạn aloor ilọ aghuḍum ḅilẹ yira romoọgh ghan ni kẹn eephọ olhoghi okumu aJihova r’ibo.

Agey ni, nạ atue ni aloghoma dị roḍurogh nyinạ koghiọm agạ kirokirọ eniin phọ amem mọ. Esi omaạm, aJihova uḅenị iyira mọ ophụr owạ Omạr phọ ḅilẹ mọ ophamanạm edeọm arukumuan eten aruwaloor. (Matiu 6:33; Luk 13:24) Kụ eniin phọ amem mọ, kokaạph ika eḍighi yaạr lọ isophoghom, areekpeleghụ, obobọ iiḅaghamị eghun-otu kụ mekpoomị ukpe ipẹ nạ katue bọ aḍighi? Obobọ kokaạph ikạ eḍighi yaạr lọ oḍighi phọ opọ nạ raleom ghan bọ eḍien phọ kụ rasighẹ ghan mem mọ r’inyaạm mọ nạ musighẹ bọ arolhọm r’ookpomoghan phọ? Mem dị iboom araraạr oḍighi yogh kụ ekoom nyinạ, kụ nạ u/moọgh mem r’inyaạm dị emanạm oḍighi oomo phọ idị, bịn eeni nạ malhoghoma mọ meminoghọm nyinạ. Iduọn siẹn nạ maatughiạn ghan ni mughumọ aJihova ragon ni ḍighaạgh anạ oḍighi idị epel nyinạ oḍighi.

AJihova ranaghanạn ghan ni. Odị ra/gon ghan idị epel ipẹ yira kotue bọ oḍighi. Kụ odị alọgh kẹn ni elhegh mọ resighẹ ghan ni mem kụ yira kogbị oḍum esi ooḅaghamiạn aloor.—Psalm 103:13, 14.

Esi omaạm, ḅeeḅeghiọn, ipẹ aJihova aako bọ oyil phọ Ilaijạ. Mem mọ Ilaijạ aḅonyonu bọ azuan aḅilẹ amoọgh oboom oghiilaan dị tutụ odị asuma aghị epẹ edalạ phọ, aJihova aḅaạm ni oyil phọ atọ aḅenị mọ odị aḅula aḍighi oḍighi phọ ongọ bọ nyodị ḍughụm? Eeye. Esi  iyạl amem, aJihova arom ni ookpaạny mọ aghị asumeẹny Ilaijạ eten iidọ kụ angọ nyodị eḍien olhe. Ghalamọ r’iduọn phọ ni, 40 aḍughul otu reten, Ilaijạ aḅilẹ ni amoọgh ooḅaghamiạn aloor r’oghiilhaan. Eeghe enhọn iyaạr kụ edị aJihova aḍighi olhoghonaạn odị ḍighaạgh? Ẹbẹl phọ, aJihova aḍighi ni aḍeenaan mọ onọ katue ni akoph nyodi. Omuneniom iyạl, aJihova aadereghiọm ni Ilaijạ r’eḍọgh “iidọ dị esoor ude.” Ekureriom mọ, aJihova agananami ni mọ abunhọn asimuoonịr awe odi ni dị rooseeny ni Enaạn eten dị ekpẹ oḍuom olhoghi. Moọny amem, bịn Ilaijạ aḅilẹ amiigh rukumuan ariil phọ odị r’oophugh. (1 Kings 19:1-19) Eeghe kụ iyaạr ituughạ phọ? Mem mọ ooḅaghamiạn aloor phọ aarọm bọ Ilaijạ, aJihova asighẹ ni okparạm r’igbiririph kụ aphoghom nyodị. AJihova ko/nmia. Odị ruphogh ghan iyira eniin phọ eten phọ kẹn nị.

Mem dị nạ aatughiạn ilọ ipẹ nạ katue bọ aḍighi angọ aJihova, tuụgh ipẹ nạ katue bọ aḍighi kụ aatughiạn. Ka/sighẹ ipẹ nạ katue bọ aḍighi rodon kụ atomaạn ipẹ nạ aḍighi ghan bọ mem dị meten. Esi oghaạph omaaniọm: Okiilhom eghiil dị awilẹ ituughạ eghiil phọ esi ibadị arunwanyụ obobọ siạ ka/tue mun aḅilẹ amiigh oghiil ipẹ odị aghiil ghan bọ mem mem mọ. Kparipẹ ghun, odị kamiighom esi ophighi ghan iḅam iḅam asigbu dị keḍighi idị odị kamoọgh inyaạm ḅilẹ r’okparạm. AKristẹn otọl idiphọ abukiilhom eghiil. Abidị rotuughạ ghan ilọ eghiil phọ r’aḍiitughiạn ophorogh iyaạr oteẹny. (1 Korịnt 9:24-27) Uḍighi ika kụ nạ o/phorogh bọ ḍiniin aḍiigbu aruwaloor dị eghịgh mudị kedughanaan ni nyinạ iboom onuụn oteẹny nyiidiphọ phọ? Esi omaạm, nạ katue ni akoọr ḍiigbu oghị aani ghan ituughạ ookpomoghan phọ. Lọm aJihova dị kalhoghonaạn nyinạ ḍighaạgh oteẹny aḍiigbu phọ anạ. Iduọn nạ kaḅilẹ bọ amoọgh inyaạm eten aruwaloor, nạ “kaanemạ ni amiịn mọ aJihova anighẹ ni.” (Psalm 34:8) Legheri mọ torobọ iyaạr lọ nạ aḍighi oḍeenaan ephomoghiạn phọ nạ amoọgh bọ esi aJihova—torobọ ilọ eghom eghom—pọ emạn ni maạr esi odị.—Luk 21:1-4.

Ika kụ idị aJihova angọ inyaạm June oḅula esi odị? Odị uḅenị iyira mọ: “Mị ughiọm ni ghisigh alhọm ghan aJihova, esi iiḅereghị ilọ odị kulhoghonaạn imị ḍighaạgh. Bịn anhịr oọny amị uḅenị imị ilọ asẹmbli dị ropạm epẹ emạ phọ amị. Mị usopha ni oghị aani aḍiniin aḍio asẹm-bli phọ. P’eeghe imạ olhoghoma dị mị amoọgh oḅilẹ oḅula ooḅukuan r’awe phọ aJihova! Asẹm-bli phọ opọ phọ kụ ibuọm mọ mị akori ghan bọ. Nyiidiphọ mị maḅilẹ rakumu aJihova r’ibo. Aghuḍum makaraghị amoọgh eboom mọ emụ esi amị. Idị epelom idị merọl ghan, mị malhegheri mọ mị ka/tue mun agbatạn loor phọ amị asighẹ esi abumor r’abumarani phọ amị dị olhoghonaạn aḍighaạgh abidị mị u/wạ. Olhoghi amị aḅaạl li iduọn mị aḅula bọ siẹn amem mọ edi bọ ni.”