“Nyina mekasiạn otughemị aani abunọn.” (Hib. 5:12) Gbiom olhoghi! Dị aJihova​—Otughemiạ phọ apelheghiom bọ siẹn aḅirinhi phọ​—kụ rumhạgh ghan iyira otughemhị aani abunhọn ilọ odị! Oomo oḍighi itughemhị olọ aJihova​—mughumọ isiphẹ olhoghi otu phọ, siphẹ ookpomhoghan phọ, obobọ epẹ erugh phọ,​—kụ eḍighi emạ eepoogh dị eemọr ri iboom. Ika kụ idị yira komoọgh ekol siẹn oḍighi ph’ophọn phọ?

Ophagharanhaạn ph’odi siphẹ igẹ ph’onyọ amatuạn phọ aPọl agẹ bọ Timoti: “Kuọm ni Ioor phọ anạ amite ghan siphẹ ogbo phọ aạl ḍinyạ iigbia phọ, aghaạph ghan atughemiọm we.” APọl aḅarạm mọ: “Nạ aḍighi . . . iphẹn phọ, pọ nạ kapẹl Ii Ioor phọ anạ r’abuphẹ ronaghanạn ghan bọ nyinạ.” (1 Tim. 4:​13, 16) Yira omoọgh dom apelieẹny oḅenhị abunhọn. Esi iduọn phọ, emạn maạr agey olhọgh inyaạm orophomhi eten ibạl r’itughemhị ph’ayira. Ogẹ ḍinyạ ph’aḍiẹn eten dị kelọgh ḍighaạgh oḍighi iduọn phọ. Ooḅeghiọn iniin araraạr dị ephamanhạm;

AJihova kụ “Ogbogh Otomhoghiom” mọ. (Isa. 30:20) Obọ ookolhobian ḍinyạ phọ aḍiẹn phọ orophomhi aḍighalhanyạ ph’ayira idiphọ abugey abutughemhiạ r’abubalhạm ḍinyạ, kuolọ ku/bulha mọ aJihova kụ Azin adom mọ ayira ḅilhẹ mọ odị kụ raḍur ghan we kalhoghomạ. (Jọn 6:44) Esi iduọn phọ, lọm ghan aJihova uwaloor iigbia ph’odị. Kụ aḍighinhom ghan Ekpo onhụ ph’odị oomo amem. Ḍeenhaan ghan mọ nạ asighẹ olhegheri iyaạr aJihova kụ raḍighinhom, k/olọ anạ. Kparaghạ oḍighi idị abuphẹ nạ rakaaphạn bọ kopomhoghiạn aJihova k’ekpom.

Ongọ nyinạ eepoogh otughemhị awe dom dị emhạn maạr epelheghiom dị mongọ ghan oye. Yoor okuphom ni owol mọ, nạ “asighẹ ni inyaạm mọ Enaạn” kụ aḍighinom, pọ nạ kamoọgh ni ekol.​—1 Pit. 4:11.

Abuḅaramạ arukumuan phọ anyina,

Aloor Phọ Repogh Bọ Bugbaanhaạn AJihova