ESI ITUUGHẠ PHỌ 01

Ika Kụ Idị ABaibul Phọ Alhoghonhaạn Nyinhạ Ḍighaạgh?

PEGH

Oomo phọ ayira ropuru ghan ni sipuru dị egbolhomaam ghuḍum, imhinhimhiịn, ḍuugh ḅilhẹ r’idị aghisigh phọ katọl. Yira omoghi kẹn ni olhoghonhaạn aḍighaạgh orue omhoọgh araraạr phọ ipẹ yira owạ bọ orolhọm r’ilọ omhoọgh eghunotu dị eḍighi elọ oḅaạl olhoghi. Etigheri ophagharanhaạn igbogh asipuru ilọ aghuḍum, aBaibul phọ aḅilhẹ kẹn ni rangọ ghan oromha orolhọm. Ika kụ idị nạ katue amooghọm aani suọ oromha aBaibul phọ?

1. Ighẹn kụ iniin asipuru dị aBaibul phọ aphanyanhaạn?

ABaibul phọ angọ ni ophanyanhaạn asipuru phọ iphẹn emhạn bọ ni maạr: Aghuḍum amhiigh ika? Utụ eeghe kụ ulhẹm bọ iyira? Uḍighi ika kụ awe romiinhọm ghan bọ? Eeghe kụ remite ghan mem dị oye amhugh? Eḍighi maạr dị torobọ oye rawạ ni eephọ, uḍighi ika kụ araaghạm remite ghan bọ? Eeghe kụ kemitenhaan de phọ ghisigh? ABaibul phọ uromha ni iyira mọ owạ ni ophanyanhaạn asipuru phọ iphẹn phọ, kụ irubal awe momhooghọm ni suọ ophanyanhaạn asipuru phọ iphẹn phọ.

2. ABaibul phọ kulhoghonhaạn iyira ika ḍighaạgh oghelhọm aghuḍum mọ ayira?

ABaibul phọ rungọ ghan ni iyira ogey oromha. Esi omaạm, rutughemhị ghan iyira ilọ omhoọgh oḅaạl olhoghi siphẹ eghunotu phọ. Aḅilhẹ rangọ ghan oromha ilọ ophamhaghạn onyạgh aloor, r’ilọ oghelhọm oḍighi ayira. Iduọn yira rooḅeghiọn bọ ḍinyạ phọ aḍiẹn phọ, nạ kamiịn idị aBaibul phọ atughemhị ilọ arumhuoghaạph phọ iphẹn phọ, kụ aḅilhẹ akuphom owol mọ ‘Enaạn kụ iphum ghan we mọ ogẹ oomo ipẹ edi bọ siphẹ aḍinyạ iigbia phọ . . . eḍighi bọ ilọ asuọ ayira.’—2 Timoti 3:16.

Aḍinyạ phọ aḍiẹn phọ ka/Baibul. Kuolọ kelhoghonhaạn nyinhạ ḍighaạgh omhiigha aloor otuughạ aBaibul phọ. Esi iduọn phọ, yoor rolọm ni mọ bạl li riisi aBaibul phọ omaaghị bọ siẹn phọ kụ asighẹ atomaạm iphẹn nạ ratuughạ bọ.

OLHEGHERI OBUGHẸ

Ooḅeghiọn idị aBaibul phọ malhoghonhaạn we ḍighaạgh, idị nạ katue akelhọm aạl ghan, ḅilhẹ r’iyaạr phọ enhighẹ bọ owạ olhoghonhaạn aḍighaạgh orue onhaghanhạn aBaibul phọ.

3. ABaibul phọ katue ni uuḅakị iyira

ABaibul phọ akịgh ḍiḅaạl. Katue ni ulhoghonhaạn iyira ḍighaạgh osopha ghan ogey osopha r’olhegheri ipẹ aghisigh phọ aphamhanhạm bọ.

Ibạl Psalm 119:105, kụ eeḅeghiọn sipuru phọ iphẹn:

Okọ suọr phọ ophọn phọ amhiịn ika Baibul phọ?
Nạ amiịn ika Baibul phọ?

4. ABaibul phọ apạm ni ophanyanhaạn asipuru phọ ayira

Oniin anhịr amhiịn ni ophanyanhaạn asipuru dị eeḅaghamhị ghan nyodị esi ibadị asiạ siphẹ aBaibul phọ. Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Ka/toph Oḍuomolhoghi Phọ Anạ! (1:48)

Siẹn avidio phọ, ighẹn asipuru kụ edị anhịr phọ amhoọgh?
Ika kụ idị ituughạ aBaibul phọ elhoghonhaạn nyodị ḍighaạgh?

ABaibul phọ uromha iyira opuru ghan asipuru. Ibạl Matiu 7:7, kụ eeḅeghiọn ḍipuru phọ edaphạn bọ siẹn:

Ighẹn asipuru kụ edị nạ amhoọgh dị aBaibul phọ katue apanyanhaạn?

5. Nạ katue ni akelhọm aạl ghan aBaibul phọ

Ibadị rokelhọm ni aạl ghan aBaibul phọ kụ romooghọm ni suọ. Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Ibạl ABaibul (2:05)

Siẹn avidio phọ, ika kụ idị iḍoọgh phọ omhiịn aạl ghan aḍinyạ?
Kụ ghalhamọ r’idiphọ phọ ni, uḍighi ika kụ bidị rokelhọm bọ ni aạl ghan aBaibul phọ?

ABaibul phọ katue ni ungọ iyira oromha dị kaadereghị kụ aḅilhẹ ungọ iyira oḍuomolhoghi. Ibạl Rom 15:4, kụ eeḅeghiọn ḍipuru phọ aḍiẹn:

Oguan aBaibul phọ ilọ omhoọgh iidereghị r’oḍuomolhoghi etir ri nyinhạ ḍughụm?

6. Abunhọn awe kotue ni olhoghonhaạn nyinhạ ḍighaạgh onhaghanhạn aBaibul phọ

Ibadị rokelhọm ni aạl ghan aBaibul phọ, kuolọ omiịn kẹn ni mọ abunhọn kotue ni ologhonhaạn bidị ḍighaạgh. Ibạl Iiḍighi 8:26-31, kụ eeḅeghiọn ḍipuru phọ aḍiẹn:

Ika kụ idị nạ katue anaghanhạn Baibul phọ?—Miịn siikpịgh phọ 30, ḅilhẹ r’31.

Oye olọ Etiopia phọ amhoghi ni olhoghonhaạn aḍighaạgh orue onhaghanhạn Igẹ Iigbia phọ. Rodon ibadị rokelhọm ni olhoghonhaạn aḍighaạgh abunhọn onhaghanhạn aBaibul phọ

ABUNIIN AWE OOTUGHIẠN MỌ: “Ituughạ aBaibul phọ eḍighi oroph amem.”