ESI ITUUGHẠ PHỌ 03
Nạ Katue Ni Aḍuomolhoghi Baibul Phọ?
ABaibul phọ apamhanhạm ni ibadị aruguanhaan r’oromha. Eeni keḅeeraạn ni nyinhạ olhegheri ilọ aBaibul phọ obughẹ, kuolọ eeni nạ amoọgh ni oọny oghiilaan. Nạ katue ni aḍuomolhoghi ruguanhaan r’oromha aBaibul phọ? Nạ katue ni ameeraam ruguanhaan aBaibul phọ ilọ oghelhọm aghuḍum nyiidiphọ r’epẹ ghisigh ḍughụm? Irubal awe oḍuom ni olhoghi Baibul phọ. Yoor rolhọm ni nyinhạ ooḅeghiọn ophogh aani.
1. Iphirigba aBaibul phọ etu ni inẹ?
ABaibul phọ akaạph mọ onọ apamhanhạm “ikpo onhụ dị ekpẹ oḍuomolhoghi.” (Ecclesiastes 12:10) ABaibul phọ apamhanhạm ni iphirigba awe dị orọl ghan ni igbaany. (Ibạl Luk 1:3; 3:1, 2.) Ibadị awe dị rotuughạ ghan ilọ iphirigba r’abudị roguphogh ghan ude owaaghị araraạr omeeraam ni mọ ipẹ aBaibul phọ aghaạph bọ ilọ awe, riisi, raraạr dị emite r’asimem mọ emite bọ etu ni inẹ.
2. Uḍighi ika kụ aBaibul phọ amoọgh bọ ni maạr oḍighinhom rodon?
E”gbạ gbạ amem, aBaibul phọ rakaạph ghan ni raraạr dị awe ko”lhegheri. Esi omaạm, aBaibul phọ akaạph ni ilọ asayẹns. Kuolọ mem mọ ogẹ bọ raraạr phọ iphẹn phọ, ibadị u/meeraam. Toroboiperolbọ, asayẹns momheeraam mọ ipẹ aBaibul phọ aghaạph bọ inẹ ni. Ḅilhẹ mọ “eḍighi ni ilọ oḍuomolhoghi, kụ kemeerạ ni k’agee-pọ.”—Psalm 111:8.
3. Yira utụ eeghe kụ koḍuom bọ olhoghi ruguanhaan aBaibul phọ?
ABaibul phọ apamhanhạm ni ibadị imiịn * dị eghaạph “k’emhiighom mọ raraạr dị kemite.” (Isaiah 46:10) Iphirigba eḍeenhaan ni mọ ipẹ aBaibul phọ aghaạph bọ retuụgh ghan ni kemite. ABaibul phọ akaạph kẹn ni ilọ esi r’esi raraạr phọ remite bọ rodon. Siẹn esi ituughạ phọ ephẹn phọ, yira kooḅeghiọn iniin imiịn aBaibul phọ. Eten phọ epẹ etuụgh bọ bịn emite eḍigh ni iikiạ ḍiigu!
OLHEGHERI OBUGHẸ
Ooḅeghiọn idị asayẹns m’omheeraam ipẹ aBaibul phọ aghaạph bọ, r’iniin imiịn aBaibul phọ dị eḍighan elhegh.
4. Asayẹns omeeraam ni ipẹ aBaibul phọ aghaạph bọ
Iḍiodi phọ, ibadị awe umheeraam ghan mọ ade phọ eḅamhiạn esi. Ipegh VIDIO phọ.
Lọgh elhegh iyaạr dị ogẹ ḍinyạ aJob 3,500 asiạ epẹ omhạn. Ibạl Job 26:7, kụ eeḅeghiọn ḍipuru phọ aḍiẹn:
-
Uḍighi ika kụ awe u/nuụn bọ umeeraam mọ “ade phọ i/ḅamhiạn esi”?
Iyạl okuron asiạ meten ni kụ awe ogbi orue okạr olhegheri ipẹ amuụm ratelhe ghan bọ. Ghalhamọ r’iduọn phọ ni, lọgh elhegh idị aBaibul phọ aghaạph esi asimuunịr asiạ epẹ omhạn. Ibạl Job 36:27, 28, kụ eeḅeghiọn sipuru phọ iphẹn:
-
Uḍighi ika kụ ipẹ oghaạph bọ mọ amuụm ratelhe ghan eḍighan bọ elhegh?
-
Ipẹ n’aạl bọ siẹn ariisi aBaibul phọ iphẹn phọ ekparamhị ni omheeraam mọ anạ esi aBaibul phọ ḍughụm?
5. ABaibul phọ akaạph ni iphigh araraạr dị emiteghu
Ibạl Isaiah 44:27–45:2, kụ eeḅeghiọn ḍipuru phọ aḍiẹn:
-
Eeghe araraạr ilọ amuphe phọ aBabilọn kụ edị aBaibul phọ aghaạph ilọ esi r’esi 200 asiạ epẹ omhạn?
Iphirigba emeeraam ni mọ Uw-emhạ phọ Cyrus, opọ aPersia, r’awe eghạm mọ odị ukpạr ri opu Babilọn lhạ phọ 539 B.C.E. * Bidị ukoghorọn okol kụ amuụm ophiịny phọ aghoph ghan bọ emhạ phọ akil aḍuạ. Bịn oḍigh emhạ phọ u/kughi yogh bọ rughuugh phọ, bịn okpạr opu dị u/be eghạm. Ii, 2,500 asiạ meten ni, kuolọ idiphọ imiịn phọ eghaạph bọ, aBabilọn odi ni idiphọ oogulhemhi bọ. Lọgh elhegh idị aBaibul phọ aghaạph.
Ibạl Isaiah 13:19, 20, kụ eeḅeghiọn ḍipuru phọ aḍiẹn:
-
Ika kụ idị ipẹ emitenhaan bọ Babilọn emhunhenhi imiịn phọ iphẹn phọ?
Ipẹ oogulhemhi bọ Babilọn epẹ Iraq
6. ABaibul phọ akaạph ni ilọ araraạr phọ iphẹn remite bọ rodon
ABaibul phọ akol siḍio phọ ayira mọ “[asiḍio] aruukuna phọ.” (2 Timoti 3:1) Miịn idị aBaibul phọ aghaạph ilọ asimem mọ iphẹn phọ:
Ibạl Matiu 24:6, 7, kụ eeḅeghiọn ḍipuru phọ aḍiẹn:
-
Ighẹn asidọl dị eḍighan elhegh kụ edị aBaibul phọ aghaạph mọ ketọl siḍio aruukunha phọ?
Ibạl 2 Timoti 3:1-5, kụ eeḅeghiọn sipuru phọ iphẹn:
-
Ighẹn aroozọ kụ edị aBaibul phọ aghaạph mọ awe komoọgh siḍio aruukunha phọ?
-
Ighẹn aroozọ phọ iphẹn phọ kụ edị nạ ramiịn?
ABUNIIN AWE OOTUGHIẠN MỌ: “ABaibul phọ aḍighi ḍinyạ oopho asidum.”
-
Nạ utụ eeghe kụ akuphom bọ owol mọ aBaibul phọ akpẹ ni oḍuomolhoghi?
OGHAẠPH OOKARAGH
Iphirigba, asayẹns, ḅilhẹ r’imiịn phọ eḍeenhaan mọ aBaibul phọ akpẹ ni oḍuomolhoghi.
Ooḅula
-
Iphirigba aBaibul phọ etu ni inẹ ḍughụm?
-
Ighẹn kụ iniin araraạr dị asayẹns r’aBaibul phọ oḅọph?
-
Nạ aatughiạn mọ aBaibul phọ akaạph ni ilọ aghisigh phọ ḍughụm? Eeghe kụ iḍighi?
WAAGHỊ AMHIỊN
Opiomạn odi ni esi ipẹ aBaibul phọ aghaạph bọ ilọ asayẹns ḍughụm?
“Asayẹns Amoọgh Ni Muḅọph r’ABaibul Phọ Ḍughụm?” (Edi intanẹt)
ABaibul phọ akaạph eeghe ilọ “asiḍio aruukunha phọ”?
“6 Imiịn ABaibul Dị Remunhughan Rodon” (The Watchtower, May 1, 2011)
Tuughạ alhegheri idị imiịn aBaibul phọ ilọ Itooghị aGreece emhunhughan.
Tuughạ amhiịn idị imiịn aBaibul phọ enme eten dị oniin oye amhiịn ghan Baibul phọ.
