ESI ITUUGHẠ PHỌ 09

Ḍuraan Atuman Enhaạn Esi Iiḅereghị

PEGH

Nạ malhoghoma ghan ni mọ nạ awạ iiḅakiọm siphẹ aghuḍum mọ anạ? Nạ amoọgh ni sipuru dị nạ rawạ ophanyanhaạn? Nạ rawạ ni iidereghị ḍughụm? Keḅeeraạn ni nyinhạ okạr oḍuraan otuman aZihova? Iiḅereghị ketue ni elhoghonhaạn nyinhạ ḍighaạgh oḍighi oomo phọ iphẹn phọ. Kuolọ eghẹn kụ egey eten ooḅereghị ghan? Enhaạn ranaghạn ghan ni oomo odọ iiḅereghị ḍughụm? Nạ kaḍighi eeghe pidị odị anaghạn iiḅereghị anạ? Oghị omhiịn.

1. Yira kooḅereghị ghan oḅenhị anhiạn, kụ eeghe kụ iyaạr dị yira kotue okol ooḅereghị?

AZizọs atughemhị mọ yira ooḅereghị ghan ongọ oginha Odẹ phọ ayira odi bọ epẹ k’akẹ. Odị aZizọs phọ r’aloor bịn aaḅereghị ni angọ aZihova. Odị aḅẹm mọ: “Iiḅereghị ghan iduọn mọ: ‘Odẹ phọ ayoor odi bọ k’ake phọ . . .’” (Matiu 6:9) Ooḅereghị ghan ongọ aZihova, rekparamhị ghan ogọ arighirị phọ ayira r’odị.

Enhaạn ranaghạn ghan ni torobọ iiḅereghị ayira dị emhoọgh muḅọph r’ogbi phọ odị. ABaibul phọ aḅẹm ni mọ, ‘torobọ iyaạr dị yira olhọm Enhaạn, dị emhoọgh muḅọph r’arigbiom mọ odị, odị ranaghạn ghan ni.’ (1 Jọn 5:14) AZizọs amaaghị ni iniin araraạr dị yira kotue okol ooḅereghị. (Ibạl Matiu 6:9-13.) Mem dị yira rolọm Enhaạn raraạr dị riiḅaghamhị iyira, yira ku/bula oghol ghan araraạr phọ ipẹ odị muḍighinhaan bọ iyira osẹph odị, kụ oḅilhẹ olhọm ghan mọ alhoghonhaạn bunhọn ḍighaạgh.

2. Yira kooḅereghị ghan ika?

ABaibul phọ uḅenhị ni iyira mọ “oḅenhị Enhaạn oomo iiḅaghamhị phọ ayira.” (Psalm 62:8) Esi iduọn phọ ooḅereghị ghan k’ekpom. Yira kotue ni ooḅereghị omiteom obobọ ooḅereghiọm olhoghi, yira kotue ni otọl torobọ eten dị eḍeenhaan olhọgh eegu ooḅereghị. Yira kotue ni ooḅereghị torobọ esi, torobọ amem.

3. Ika kụ idị Enhaạn rapagharanhaạn ghan iiḅereghị ayira?

Odị raḍighi ghan iduọn phọ ibadị areten. AZihova amiteom ni Ekpo-onhụ phọ odị, aBaibul phọ, dị kepanyanhaạn ghan sipuru ayira. Aạl ghan Ekpo-onhụ phọ Enhaạn “ketue ni engọ olhegheri-iyaạr buphẹ u/moọgh bọ.” (Psalm 19:7; ibạl Jems 1:5.) Odị katue ni ungọ iyira eephọ ekpom mem dị yira osoman iiḅaghamhị. Odị katue ni anyu rebenhẹ phọ odị olhoghonhaạn ayira ḍighaạgh torobọ amem lọ ewạ.

OLHEGHERI OBUGHẸ

Ooḅeghiọn idị nạ katue aaḅereghị k’ekpom kụ keḅeeraạn Enhaạn, r’idị iiḅereghị ketue elhoghonhaạn nyinhạ ḍighaạgh.

4. Enhaạn amạ ni eten dị yira kooḅereghị ghan nyodị

Eeghe kụ ketue eḍighi iyaạr dị Enhaạn kanaghạn obobọ k’akel iiḅereghị ayira? Ipegh VIDIO phọ.

AVIDIO: Enhaạn Ranaghạn Ghan Ni Oomo Iiḅereghị?—Ookpera phọ (2:42)

AZihova rawạ mọ yira ooḅereghị oḅenhị nyodị. Ibạl Psalm 65:2, kụ eeḅeghiọn sipuru phọ edaphạn bọ siẹn:

Nạ ragbi mọ “Onaghanhạm iiḅereghị phọ” rawạ ni mọ nạ ḅeeḅereghị aḅenhị nyodị ḍughụm? Eeghe kụ iḍighi?

Ewạ mọ yira okparaghạ odaphạn siigbu phọ Enhaạn eḍighi maạr dị yira rowạ mọ odị anhaghạn iiḅereghị ayira. Ibạl Micah 3:4 r’1 Pita 3:12, kụ eeḅeghiọn ḍipuru phọ aḍiẹn:

Yira koḍighi eeghe kụ Enhaạn anaghạn iiḅereghị phọ ayira?

Awe eghạm dị rowạ eeghi rooḅereghị ghan omhoọgh okpạr opu. Eḍighi ni osụ-olhoghi omheeraam mọ Enhaạn kanaghạn ni iiḅereghị phọ iphẹn phọ ḍughụm?

5. Ooḅereghị ghan k’ekpom

Otughemhị buniin awe iiḅereghị dị bidị kooḅereghị ghan. Kuolọ epẹ kụ eten dị Enhaạn rawạ mọ yira ooḅereghị ghan ḍughụm? Ibạl Matiu 6:7, kụ eeḅeghiọn ḍipuru phọ edaphạn bọ siẹn:

Ika kụ idị nạ kaaḅereghị ghan dị nạ ‘kaa/ḅula ghan iniin phọ araraạr phọ’?

Torobọ aḍio, nạ atue ni aatughiạn eniin iyaạr dị aZihova maḍighinhaan nyinhạ akol asẹph nyodị. Nạ aḍighi ghan iduọn phọ torobọ aḍio siphẹ awiki phọ, pọ nạ kamoọgh oḍual araraạr oghol osẹph aZihova, dị nạ uu/ḅulha siphẹ iiḅereghị phọ anạ.

Ogey odẹ rawạ ghan mọ obumoọny odị aḅenhị nyodị idị edi olhoghi odị. Iginha phọ kẹn, aZihova rawạ ghan mọ ooḅereghị k’ekpom

6. Iiḅereghị eḍighi inmo k’Enhaạn

Ika kụ idị iiḅereghị kilhoghonhaạn iyira ḍighaạgh simem iiḅaghamhị? Ipegh VIDIO phọ.

AVIDIO: Iiḅereghị Rilhoghonhaạn Ghan Iyira Ḍighaạgh Okparạm (1:32)

ABaibul phọ aguanhaan ni mọ iiḅereghị ketue ni ilhoghonhaạn iyira ḍighaạgh omhoọgh eephọ ekpom. Ibạl Filipai 4:6, 7, kụ eeḅeghiọn sipuru phọ iphẹn:

Eḍighi bọ idị iiḅereghị re/sighẹ ghan bọ iiḅaghamhị phọ ayira, ika kụ idị rilhoghonhaạn ghan bọ iyira ḍighaạgh?
Ighẹn kụ araraạr dị keḅeeraạn nyinhạ oghol ooḅereghị?

Nạ alegheri ni?

K’iḍiodi phọ, roḅẹm ghan mọ “erọl li idiphọ” eekunha iiḅereghị.—1 Chronicles 16:36.

7. Wạ mem aaḅereghị ghan

Eeni amem yira kotue ni obula ooḅereghị loor ibadị araraạr oḍighi. AZizọs amhaghamhị maạr iiḅereghị asi k’iḍighen? Ibạl Matiu 14:23 r’aMạk 1:35, kụ eeḅeghiọn sipuru phọ edaphạn bọ siẹn:

AZizọs aḍighi eeghe omhoọgh amem ooḅereghị ghan?
Pụr amem kụ edị kenighenhaạn nyinhạ ooḅereghị?

ABUNIIN AWE OOTUGHIẠN MỌ: “Iiḅereghị re/lọgh ghan ḍighaạgh.”

Nạ aḅẹm aani ika?

OGHAẠPH OOKARAGH

Iiḅereghị dị eḍuạ k’ekpom r’iḍur ghan iyira ketumeriom Enhaạn, k’ingọ iyira eephọ olhoghi r’inyaạm mọ ipẹ yira owạ bọ oḍighinhom araraạr dị eḅeeraạn aZihova.