ESI ITUUGHẠ PHỌ 11

Idị Nạ Katue Akạr Amooghọm Suọ Baibul Phọ

PEGH

Amem merọl ghan ni dị n’awạ oḍighi iyaạr kụ n’aatughiạn mọ epel nyinhạ loor? Oḍighi idị kedughanhaan nyinhạ, eeni nạ udi kụ aḍighi ghan enụm enụm. Iduọn kụ idị ibạl aBaibul phọ retọl aani ghan. Nạ atue ni apuru mọ, ‘Mị kamiighom ḍighen?’ Siẹn esi ituughạ phọ ephẹn phọ, yira kooḅeghiọn iniin ibạm araraạr dị nạ katue aḍighi orue oghelhọm ibạl r’ituughạ aBaibul phọ.

1. Uḍighi ika kụ yira kogbor ghan bọ obạl Baibul phọ?

Oye dị ragbor ghan k’aạl Baibul phọ, obobọ “olhogh phọ aZihova,” kamoọgh ni ekol r’oḅaạl olhoghi siphẹ aghuḍum mọ odị. (Ibạl Psalm 1:1-3.) Omhiighom, kparaghạ osighẹ iphurukpu ikalhạ aalhạm ghan aBaibul phọ torobọ aḍio. Iduọn olhegheri iyaạr phọ anạ ilọ Ekpo-onhụ phọ Enhaạn rabụgh bọ, iduọn kụ idị nạ kamiigh oghelhọm ibạl aBaibul phọ anạ.

2. Eeghe kụ kelhoghonhaạn nyinhạ ḍighaạgh omhooghọm asuọ ibạl aBaibul phọ?

Orue okạr omhooghọm asuọ, ewạ mọ sighẹ mem aatughiạn ipẹ n’aạl bọ. Ewạ mọ bạl kụ aḅilhẹ ‘agbiran.’ (Joshua 1:8, igẹ dị edi ude) Iduọn nạ rabạl bọ, puruan loor sipuru phọ iphẹn: ‘Iphẹn phọ iḅenhị imhị eeghe ilọ aZihova Enhaạn phọ? Ika kụ idị mị kasighẹ aḍighinhom siẹn aghuḍum mọ amhị? Ika kụ idị mị kasighẹ siikpịgh phọ iphẹn phọ aloghonhaạn ḍighaạgh bunhọn?’

3. Ika kụ idị nạ katue awạ mem aạl ghan aBaibul phọ?

Idiphọ ibadị, eeni rekparanhaạn ghan ni nyinhạ owạ amem aạl ghan aBaibul phọ. Kparaghạ omhiịn mọ nạ ‘o/pheghom ghan ephegh moọny eepoogh lọ nạ amhoọgh.’ (Efesọs 5:16) Iphẹn phọ ketue edugh eḍighi maạr dị nạ amaanhaạn mem aạl ghan aBaibul phọ torobọ aḍio. Abuniin awe omiịn mọ aạl ghan aBaibul phọ ḍiroọr kụ inighenhaạn bidị. Abunhọn rowạ ghan mem ootaany. Kụ abunhọn robạl ghan kụ ogbi omhinhạ. Pụr amem kụ ikạr enhighenhaạn nyinhạ?

OLHEGHERI OBUGHẸ

Ooḅeghiọn omhiịn idị nạ katue akelhọm ibạl aBaibul phọ anạ. Ḅilhẹ r’idị nạ katue akạr aakolhobian orue oghelhọm ituughạ aBaibul phọ anạ.

Idiphọ yira kotue bọ ni otuughạ oghelhọm ariiḍien kirokirọ, kụ edị yira kotue ni otuughạ oghelhọm ibạl aBaibul phọ

4. Tuughạ oghelhọm ibạl aBaibul phọ

Eeni kekparanhaạn ni nyinhạ omhiigh aạl ghan aBaibul phọ. Kuolọ yira kotue ni ‘olẹm eephuạ’ phọ ephẹn phọ idiphọ oye katue bọ ni alẹm eephuạ olhe eḍien dị ko/lhe ghan. Ibạl 1 Pita 2:2, kụ eeḅeghiọn ḍipuru phọ aḍiẹn:

Nạ ameeraam ni mọ aạl ghan aBaibul phọ torobọ aḍio ketue ni elhoghonhaạn nyinhạ ḍighaạgh oghelhọm ghan ibạl aBaibul phọ anạ?

Ipegh VIDIO phọ omhiịn idị abuniin momhiigh rokelhọm aạl ghan aBaibul phọ. Ipẹ reten kụ eeḅeghiọn sipuru phọ edaphạn bọ siẹn.

AVIDIO: Iḍoọgh Dị Motuughạ Ophomhoghiạn Ekpo-onhụ Phọ Enhaạn (5:33)

Siẹn avidio phọ, ighẹn ipaanhaạn kụ edị iḍoọgh phọ okpạr opu?
Eeghe kụ ilhoghonhaạn bidị ḍighaạgh ogbor ghan aạl aBaibul phọ?
Bidị uḍighi eeghe onhighemhị ituughạ phọ abidị?

Araraạr osighẹ omhiighom:

Saḅạr Baibul dị akpẹ obeḍenhọm aḅilhẹ adugh onhaghanhạn. Nạ atue ni apogh Ooḅi Oghaạph phọ obobọ New World Translation eḍighi maạr dị nạ anhaghạn ni aḅekeeny agey.
Miighom aạl ariisi aBaibul dị eḅeraạn nyinhạ agey. Omhiịn araraạr dị kelhoghonhaạn nyinhạ ḍighaạgh, miịn igbe phọ “Miigh Aạl ABaibul Phọ.”
Gẹ ipẹ nạ m’aạl bọ. Ḍighinhom igbe phọ “Gẹ Riisi ABaibul Phọ N’aạl Bọ” edi bọ siẹn aḍinyạ phọ.
Ḍighinhom JW Library^®app phọ. Nạ katue ni abạl Baibul phọ obobọ anaghạn idị aạl olhọgh siphẹ aJW app phọ torobọ esi lọ nạ odi, runhụ kirokirọ.
Ḍighinhom appendix phọ odi bọ New World Translation. Iphẹn phọ eḅarạm simạp, idoronheẹn, r’aglossary dị kelhoghonhaạn nyinhạ ḍighaạgh oghelhọm ibạl phọ anạ.

5. Kookolhobian ghan ituughạ aBaibul phọ anạ

Ibạl Psalm 119:34, kụ eeḅeghiọn ḍipuru phọ aḍiẹn:

Uḍighi ika kụ enhighẹ bọ ooḅereghị kụ ogbi aạl aBaibul phọ obobọ ookolhobian ituughạ phọ anạ?

Eeghe kụ kelhoghonhaạn nyinhạ ḍighaạgh omhooghọm oboom asuọ? Mem dị nạ raakolhobian torobọ esi ituughạ, kparaghạ odaphạn iphẹn phọ:

Bạl ghan iḅẹl asiikpịgh esi ituughạ phọ.
Bạl riisi aBaibul phọ kụ akparaghạ onhaghanhạn iyaạr phọ otụ bọ kụ olhọgh esi aBaibul phọ.
Goọr esi phọ ophagharanhaạn aḍipuru phọ odi bọ; iphẹn phọ keḍighi idị ituughạ phọ anyinha kedụgh.

Nạ alegheri ni?

Abugbaanhaạn AZihova moḍighinhom ni ibadị inhọn asị-Baibul. Kuolọ yoor okạr rosereghiạn New World Translation of the Holy Scriptures loor esi dị aaleeny, adugh onhaghanhạn, aḅilhẹ aḍighinhom ḍien phọ Enhaạn.—Miịn emhuoghaạph phọ edi bọ intanẹt phọ “Abugbaanhaạn AZihova Omoọgh Ni Baibul Olọ Abidị Bịn?”

ABUNIIN AWE OOTUGHIẠN MỌ: “Aạl kụ oḅilhẹ otuughạ ghan aBaibul phọ eḍighi oboom oḍighi. Ḅilhẹ mọ amem kẹn i/lo.”