ESI ITUUGHẠ PHỌ 36

Ḍighi Oye Dị Akpẹ Oḍuom Olhoghi Esi Oomo Araraạr

PEGH

Torobọ oye rawạ ghan righirị dị okpẹ oḍuom olhoghi. AZihova kẹn rawạ ghan mọ arighirị odị oḍighi we dị okpẹ oḍuom olhoghi. Kuolọ ekpạr ri oḍighi oye dị akpẹ oḍuom olhoghi aḅirinhi dị ibadị awe oḍighi we dị ko/tue oḍuom olhoghi. Eeghe asuọ kụ odi oḍighi oye dị akpẹ oḍuom olhoghi?

1. Eeghe kụ ekpanhạ iyaạr otuạn oḍighi oye dị akpẹ oḍuom olhoghi?

Mem dị yira oḍighi we dị abunhọn kotue oḍuom olhoghi, yira roḍeenhaan ghan mọ yira opomhoghiạn kụ oḅilhẹ olọgh eegu aZihova. Ka/bula mọ: AZihova ramiịn ghan ni raraạr phọ ipẹ yira rootughiạn ghan bọ koḅilhẹ oḍighi. (Hibru 4:13) Odị ramiịn ghan ni kaḅilhẹ asereghiạn mem dị yira oḍighi oḍeenhaan mọ yira okpẹ ni oḍuom olhoghi. Ekpo-onhụ phọ odị eḅẹm mọ: “AZihova akel li we iikelheghian, kuolọ odị rakuraam ghan ni we aruukuan.”—Proverbs 3:32.

2. Ighẹn areten kụ edị yira kotue oḍeenhaan mọ yira okpẹ ni oḍuom olhoghi esi atorobọ iyaạr?

AZihova rawạ mọ “oniin agbạ ghan agey kụ aḅenhị nyooriphọ.” (Zechariah 8:16, 17) Iphẹn phọ remạ ghan eeghe? Mughumọ yira roḅaanhaạn buọ eghunotu ayira, we otu oḍighi ayira, bumor r’abumaranhi ayira, obobọ we agomẹt, yira ko/gbạ ghan okpẹ obobọ o/kaạph raraạr iikelheghian. Awe dị okpẹ oḍuom olhoghi ro/mi ghan obobọ roo/gbegheḍiom ghan bunhọn. (Ibạl Proverbs 24:28 r’Efesọs 4:28.) Rosogh ghan kẹn ni iisogh agomẹt. (Rom 13:5-7) Esi iphẹn phọ r’inhọn areten, yira roḍeenhaan ghan mọ yira awe dị “okpẹ ni oḍuom ologhi.”—Taitọs 2:10.

3. Eeghe asuọ kụ odi oḍighi oye dị akpẹ oḍuom olhoghi?

Mem dị abunhọn olhegheri mọ yira awe dị okpẹ oḍuom olhoghi, bidị kuḍuom ni iyira olhoghi. Yira oḍighi we dị okpẹ oḍuom olhoghi, keloghonhaạn ḍighaạgh ookpomhoghan phọ omhoọgh eephọ idiphọ eniin eghunotu. Yira komoọgh kẹn ooruẹn olhoghi dị aḅaạl. Oḍighi awe dị okpẹ oḍuom olhoghi kelọgh kẹn “omạn itughemị Enaạn, Opeliạ phọ ayira,” eḅilhẹ eḍighi idị awe kotu oḍigh aani siẹn igey iiseeny phọ.—Taitọs 2:10.

OLHEGHERI OBUGHẸ

Omhiịn idị aZihova raloghoma ghan mem dị yira oḍighi we dị okpẹ oḍuom olhoghi r’asuọ dị odi ghan oḍighi iduọn phọ. Oḅilhẹ otuughạ idị yira kotue oḍeenhaan mọ yira awe dị okpẹ ni oḍuom olhoghi simem kirokirọ.

4. Olhoghi aZihova raḅaạl ghan ni mem dị yira orọl dọl dị ekpẹ oḍuom olhoghi

Ibạl Psalm 44:21 r’aMalachi 3:16, kụ ephanyanhaạn sipuru phọ iphẹn:

Uḍighi ika kụ eḍighi bọ elologhi omheeraam mọ yira kotue ni obooghinhaạn iyaạr aZihova?
Nạ ragbi mọ aZihova raloghoma ghan ika mem dị yira ogbạ agey, ghalhamọ ikpạr ri oḍighi iduọn phọ?

Reḅaạl ghan ni olhoghi aburudẹ r’aburunhiin mem dị ibạm anmụny abidị ogbạ agey. Olhoghi aZihova raḅaạl ghan ni mem dị yira ogbạ agey

5. Ḍighi oye dị kotue ni oḍuom olhoghi torobọ amem.

Ibadị awe ootughiạn mọ k/oomo amem kụ edị ewạ mọ ogbạ ghan agey. Kuolọ miịn iyaạr phọ eḍighi bọ kụ yira kogbạ ghan bọ agey oomo amem. Ipegh VIDIO phọ.

AVIDIO: Eeghe Kụ Rengọ Ghan Oye Ibo?—Ooruẹn Olhoghi Dị Aḅaạl (2:32)

Ibạl Hibru 13:18, kụ eeḅeghiọn sipuru phọ iphẹn. Ighẹn areten kụ edị yira kotue oḍeenhaan mọ yira awe dị kotue ni oḍuom olhoghi . . .

siphẹ eghunotu phọ ayira.
epẹ otu oḍighi phọ obobọ otu askul.
esi inhọn araraạr.

6. Asuọ odi ghan ni esi ogbạ agey

Eeni amem ogbạ ghan agey atue ni akọm iiḅaghamhị. Kuolọ esighẹ rekị, nạ kamiịn ni mọ ogbạ agey kụ emạ iyaạr oḍighi. Ibạl Psalm 34:12-16, kụ ephagharanhaạn ḍipuru phọ aḍiẹn: