Iḅaạl eḍighi ni iyaạr dị emhạn maạr iboom. Iḅaạl iyira i/lho, yira ko/tọl. Loor iduọn Enhaạn kụ aḍighi bọ Olemhiạ ayira, odị amoọgh ni elhiom oḅenhị ayira ilọ oḍighinhom iḅaạl. Odị akaạph eeghe ilọ iḅaạl? Enighẹ ni osạ aạny obobọ olhoghạ? Ika kụ edị nạ katue asopha ogey osopha dị agbolhomaam iḅaạl?

1. AZihova amiịn ika iḅaạl?

Iḍiodi phọ aZihova aḅenhị rebenhẹ phọ odị mọ: “Iḅaạl kụ aghuḍum atorobọ iyaạr dị repooghu.” (Leviticus 17:14) Esi aZihova, iḅaạl phọ pọ aghuḍum. Eḍighi bọ edị aghuḍum aḍighi bọ iikiạ inmo k’Enhaạn, iḅaạl phọ kẹn eḍighi eekiạ iyaạr.

2. Eeghe iyaạr kụ edị Enhaạn aḅẹm mọ ku/ḍighinhom iḅaạl?

Kụ egbi bọ oteẹny amem mọ ophighi bọ ookpomhoghan aKristẹn phọ, aZihova angọ ni itọ we phọ odị mọ ku/bạ iḅaạl. (Ibạl Genesis 9:4 r’aLeviticus 17:10.) Kụ dị eego esi Aloor Phọ Repogh Bọ, aZihova aḅilhẹ ni angọ iniin phọ itọ phọ ookpomhoghan aKristẹn phọ esi oḅenhị mọ “iḍuạ esi . . . iḅaạl.” (NWT)—Ibạl Iiḍighi 15:28, 29.

Remạ ghan eeghe oḍuạ esi iḅaạl? Eḍighi maạr dị oyil arookonhom aḅenhị nyinhạ mọ ka/pughọl ghan mugbagarạ amiim, nạ ka/pughọl. Kuolọ nạ kale ni eḍien dị olhọgh miim mọ obobọ atạph alọgh oghiph anạ ḍughụm? Eeye, nạ ka/ḍighi idiphọ. Itọ phọ Enhaạn eḅẹm bọ mọ oḍuạ esi iḅaạl remạ mọ ku/pughọl iḅaạl obobọ ku/bạ enhạm dị emhughom iḅaạl. Kụ i/wạ kẹn mọ olhe eḍien dị osaạm obobọ olhọgh iḅaạl.

Kokaạph ika ilọ arookonhom dị kosighẹ iḅaạl kụ oḍighinhom? Iniin ekạr egbạgh olhogh Enhaạn. Iphẹn phọ eḅaramaạm osighẹ okạr iḅaạl phọ obobọ ikpanhạ apakirị iḅaạl phọ, idiphọ itotọgh asẹl, iphalhaḅaạl asẹl, pakirị phọ rekọm ghan bọ dị iḅaạl keniir, obobọ amuụm iḅaạl phọ kụ olhoghạ. Kuolọ ko/tue okạr okaạph mughumọ inhọn areten arookonhom dị egbolhomaam iḅaạl ekạr ri egbạgh olhogh Enhaạn. Esi omaạm, iniin areten arookonhom edi ni dị roḍighinhom ghan ikpirikpirị apakirị ikpanhạ apakirị iḅaạl phọ. Kụ inhọn areten arookonhom edi ni dị rosighẹ ghan iḅaạl oye phọ r’aloor kụ koḍighinhom. Mem dị rokaạph ilọ arookonhom mọ iphẹn phọ, torobọ onyọ ayira kụ kasopha ilọ oḍighi. a—Galetia 6:5.

 OLHEGHERI OBUGHẸ

3. Saḅạr rookonhom dị eḅeraạn aZihova

Ika kụ idị nạ katue asaḅạr rookonhom dị emhoọgh muḅọph r’ipẹ Enhaạn amhiịn bọ iḅaạl? Ipegh VIDIO phọ, kụ eeḅeghiọn iyaạr phọ eḍighi bọ kụ emhạn bọ ni maạr oḍighi araraạr phọ iphẹn edaphạn bọ siẹn.

• Ḅeeḅereghị alhọm osụ-olhoghi.—Jems 1:5.

• Waaghị sinhị-iilhogh aBaibul r’areten dị kotue osighẹ oḍighinhom.—Proverbs 13:16.

• Waaghị alhegheri inhọn areten arookonhom dị edi epẹ ekool phọ anyinha.

• Waaghị amhiịn reten arookonhom dị nạ ka/meera asighẹ.

• Miịn ni mọ osopha phọ anạ ka/ḍighi idị ooruẹn olhoghi anạ kaaḅaghamhị nyinhạ.—Iiḍighi 24:16. b

• Legheri mọ i/wạ mọ onhọn oye, ghalhamọ opọ r’anạ aalhạn bọ, okumor oye ookpomhoghan, obobọ oye dị ratughemhị ghan nyinhạ Baibul phọ kụ aḅenhị nyinhạ osopha dị nạ kasopha mem dị ewạ mọ sighẹ ooruẹn olhoghi anạ asophaam ilọ oḍighi.—Rom 14:12.

• Gẹ osopha phọ anạ alhọgh esi.

4. Abugbaanhaạn aZihova rowạ ghan rookonhom dị emhaạr emhoon

Eḍighi maạr dị oye adaphạn olhogh phọ Enhaạn angọ bọ ilọ iḅaạl, katue kẹn ni ateẹny rookonhom dị emhoon dị i/ḅarạm iḅaạl. Ipegh VIDIO phọ.

Ibạl Taitọs 3:2, kụ eeḅeghiọn ḍipuru phọ aḍiẹn:

• Uḍighi ika kụ ewạ bọ dị yira kolọgh eegu oḅilhẹ osooromhi loor mem dị yira rokaaphạn r’abuọ arookonhom mọ?

 5. Mem dị meḅarạm ikpirikpirị apakirị ikpanhạ iḅaạl phọ

Iḅaạl emoọgh inya ikpanhạ apakirị—itotọgh asẹl, iphalhaḅaạl asẹl, apakirị dị rekọm ghan idị iḅaạl keniir, r’amuụm iḅaạl phọ. Inya phọ iphẹn phọ emoọgh kẹn ibadị ikpirikpirị apakirị. c Rosighẹ ghan ni iniin ikpirikpirị apakirị ikpanhạ apakirị phọ iphẹn phọ kolhemọm sirooghọ dị rebean ghan reezẹgh obobọ keloghonhaạn ḍighaạgh osoph iḅaạl dị rekil.

Idị egbolhomaam ikpirikpirị apakirị ikpanhạ apakirị iḅaạl phọ, torobọ onyọ aKristẹn kụ kasighẹ ni ooruẹn olhoghi odị asophaam ilọ oḍighi. Abuniin awe otue ni osopha oghel atorobọ eten arookonhom dị meḅarạm ikpirikpirị apakirị ikpanhạ apakirị iḅaạl phọ. Kuolọ ooruẹn olhoghi abuniin awe atue ni ameera dị bidị koḍighinhom ikpirikpirị apakirị ikpanhạ apakirị iḅaạl phọ.

Mem dị nạ raatughiạn osopha dị nạ kasopha, puruan loor anạ ḍipuru phọ aḍiẹn:

• Mị kaḅenhị oyil arookonhom mọ amhị mọ mị utuạn eeghe kụ akel bọ obobọ ameeraam bọ oḍighinhom iniin ikpirikpirị apakirị ikpanhạ apakirị iḅaạl phọ?

 OGHAẠPH OOKARAGH

AZihova rawạ mọ yira omhiịn iḅaạl idiphọ eekiạ iyaạr.

Ooḅula

• Uḍighi ika kụ iḅaạl eḍighi bọ eekiạ iyaạr esi aZihova?

• Yira ulhegheri ika mọ itọ phọ Enhaạn oḍuạ esi iḅaạl eḅarạm ni olhoghạ iḅaạl?

• Eeghe kụ kelhoghonhaạn nyinhạ ḍighaạgh osopha ogey osopha ilọ arookonhom dị eḅarạm iḅaạl?