Gbiom olhoghi onhiin dị aphomhoghiạn oọny odị kụ raanmenhemhi dị kakị askul. Onhiin phọ kamiịn ni mọ obur ri muụm moọny phọ ḅilhẹ mọ iinmenhan phọ ekuạ ni eḅilhẹ eḅaạl. Iphẹn phọ reḍighi ghan idị oọny phọ kamoon loor, kụ eḅilhẹ eḍeenhaan mọ odẹ r’onhiin phọ ropogh ni agey moọny phọ. Iginha phọ kẹn, Odẹ ephomhoghiạn phọ ayira, Zihova, rawạ mọ yira oḅaạl loor, oḅạ ghan imạ ikpo-onhụ, ootughiạn ghan oḅilhẹ oḍighi raraạr dị enhighẹ. Mem lọ yira oḅaạl loor, kingọ ni iyira suọ eḅilhẹ ekuenhi nyodị.

1. Yira koḍighi eeghe orue oḅaạl aloor?

AZihova uḅenhị iyira mọ: “Iikuan ghan.” (1 Pita 1:16) Orue ookuan, yira koḅaạl ghan loor, oḅạ ghan imạ ikpo-onhụ, ootughiạn ghan oḅilhẹ oḍighi raraạr dị enhighẹ. Yira kotue ni oḅaạl loor mem dị yira ogbor ghan owura muụm, oḅaalhamhị marugh ayira, ootol ghan kụ oḅilhẹ omhaạr ophạm rukpe r’arughuugh dị yira rokiilhom ghan. Yira kotue kẹn ni ologhonhaạn ḍighaạgh oḅaalhamhị aKindọm Họl phọ. Mem dị yira oḅaạl ghan loor, yira rokuenhi ghan aZihova.—2 Korịnt 6:3, 4.

2. Orue orọl adọl dị eḅaạl, ighẹn araraạr kụ edị yira kokel?

ABaibul phọ uḅenhị iyira mọ ‘oḅaalhamhị loor ayira osighẹ oomo ikarạph Iọ aruzu phọ r’aruwaIoor phọ ayira mebiphighạ.’ (2 Korịnt 7:1) Iphẹn phọ remạ ghan mọ okporiọn raghaạgh torobọ iyaạr dị kepuẹ iitughiạn r’aloor phọ ayira. Rewạ mọ araraạr phọ ipẹ yira rootughiạn ghan bọ eḍighi raraạr dị keḅeraạn aZihova, esi iduọn phọ yira roḍighi ghan oomo ilọ yira kotue okpor osighẹ ikarạph iitughiạn. (Psalm 104:34) Yira rokparaghạ ghan kẹn oḍighinhom imạ ikpo-onhụ.—Ibạl Kolosị 3:8.

Eeghe kụ ketue eḍighi idị aloor ayira, ikpo-onhụ, iitughiạn r’eḍighinhom araraạr ayira ke/ḅaạl? Araraạr edi ni dị ketue epuẹ loor phọ ayira. Esi iduọn phọ, yira okel li iniin araraạr idiphọ ipughọl asigerẹt, olhoghạ aḍire, ḅilhẹ r’oḍighinhom asirooghọ eten dị i/kpeanhaạn, obobọ idị agomẹt oghel. Mem dị yira oghel raraạr phọ iphẹn phọ, yira komoon ni loor, oḍeenhaan kẹn mọ yira omaghamhị ni maạr inmo aghuḍum mọ. Yira koḅaạl kẹn ni eten eḍighinhom araraạr r’iitughiạn mem dị yira eenhan ekarạph eegharạ opilhighọm obobọ oroḅolhoghạ aloor oye phọ ogbaanyamhiọm eephuạ orolhạn esi ḅilhẹ r’ophogh ghan asifoto aradaḅạ. (Psalm 119:37; Efesọs 5:5) Rekpạr ghan ni owilhẹ araagharạ phọ iphẹn phọ, kuolọ aZihova katue ni ulhoghonhaạn iyira ḍighaạgh owilhẹ.—Ibạl Isaiah 41:13.

 OLHEGHERI OBUGHẸ

3. Oḅaạl aloor rangọ ghan eghuan aZihova

Mem dị yira ooḅeghiọn iilhogh phọ aZihova angọ bọ Izrạl iḍiodi phọ, yira komiịn ni idị orọl adọl dị eḅaạl emhạn maạr esi odị. Ibạl Exodus 19:10 r’30:17-19, kụ eeḅeghiọn sipuru phọ iphẹn:

• Asiikpịgh phọ iphẹn phọ eganhanhamhi eeghe ilọ ipẹ aZihova rapogh ghan bọ dọl oḅaạl aloor?

• Ighẹn imạ araagharạ kụ ketue elhoghonhaạn nyinhạ ḍighaạgh oḅaạl aloor oomo amem?

Orọl ghan adọl dị eḅaạl resighẹ ghan ni mem r’inyaạm. Kuolọ etigheri ekpisi phọ yira odi bọ, yira kotue ni oḅaạl loor mughumọ yira omoọgh ikpoki obobọ u/moọgh. Ipegh VIDIO phọ, kụ eeḅeghiọn ḍipuru phọ edaphạn bọ siẹn.

• Ika kụ idị omhaạr ghan oḅaalhamhị araraạr ayira rekuenhi ghan aZihova?

4. Kpạr apu ikarạph araagharạ

Eḍighi maạr dị nạ rapughọl ghan asigerẹt obobọ raḍighinhom ghan rooghọ dị agomẹt oghel, iikia i/lo mọ etue ni ekpạr owilhẹ araagharạ phọ iphẹn phọ. Eeghe kụ keloghonhaạn ḍighaạgh? Tuutughiạn idị araagharạ phọ iphẹn phọ ketir nyinhạ. Ibạl Matiu 22:37-39, kụ eghaạph idị ipughọl asigerẹt obobọ oḍighinhom asirooghọ eten dị i/kpeanhaạn ketir . . .

• siya oye phọ r’aZihova.

• eghunotu oye phọ r’amatuman oye phọ.

Kookolhobian ilọ okpạr opu ekarạph eegharạ. a Ipegh VIDIO phọ.

Ibạl Filipai 4:13, kụ eeḅeghiọn ḍipuru phọ aḍiẹn:

• Ika kụ idị ogbor ghan ooḅereghị, otuughạ aBaibul, ḅilhẹ r’oghị ghan ituughạ kengọ oye inyaạm okpạr opu ekarạph eegharạ?

 5. Bian ikarạph iitughiạn r’eḍighinhom araraạr

Ibạl Kolosị 3:5, kụ eeḅeghiọn sipuru phọ iphẹn:

• Yira ulhegheri ika mọ ophogh asifoto r’asifim aradaḅạ, ogẹ obobọ oghiọm oye raraạr ipesi, ḅilhẹ r’opilhighọm obobọ oroḅolhoghạ aloor oye phọ ogbaanyamhiọm eephuạ orolhạn esi eḍighi iyaạr dị i/ḅaạl riḍien aZihova?

• Nạ ragbi mọ yira kotue ni otọl dọl dị eḅaạl idiphọ aZihova rawạ bọ ḍughụm? Eeghe kụ iḍighi?

Miịn idị nạ kaḍighi kụ atue akpạr apu ikarạph iitughiạn. Ipegh VIDIO phọ.

AZizọs adogh ni ḍidogh dị eḍeenhaan mọ ewạ ni mọ yira osopha oḍighi ilọ ewạ orọl adọl dị eḅaạl. Ibạl Matiu 5:29, 30, kụ eeḅeghiọn ḍipuru phọ aḍiẹn:

• Siẹn phọ aZizọs iyira ru/ḅenhị ghan mọ okạr osoph esi aloor ayira oroph, odị raḍeenhaan ghan mọ ewạ ni oḍighi iyaạr omiteom. Oghẹn osopha dị amhạn maạr kụ edị oye kasopha oghel ikarạph iitughiạn? b

Eḍighi maạr dị nạ rakparaghạ ghan okpạr opu ikarạph iitughiạn, pọ legheri mọ aZihova rasereghiạn ni inyaạm mọ anạ. Ibạl Psalm 103:13, 14, kụ eeḅeghiọn ḍipuru phọ aḍiẹn:

• Eḍighi maạr dị nạ rakparaghạ ghan okpạr opu ikarạph araagharạ, ika kụ idị esi aBaibul phọ ephẹn phọ ekparamhị nyinhạ oghiọm aghisigh?

 OGHAẠPH OOKARAGH

Yira roḅaalhamhị ghan ni olhoghi aZihova mem dị aloor ayira, iitughiạn, r’eḍighinhom araraạr phọ ayira eḅaạl.

Ooḅula

• Uḍighi ika kụ emạn bọ maạr orọl adọl dị eḅaạl?

• Ika kụ idị nạ katue aḅaạl loor?

• Nạ kaḍighi ika kụ iitughiạn r’eḍighinhom araraạr anạ eḅaạl?