ESI ITUUGHẠ PHỌ 41
ABaibul Phọ Akaạph Eeghe Ilọ Orolhạn Esi?
Re/ḅeraạn ghan ibadị awe oghaạph araghaạph orolhạn esi. Toroboiperolbọ, mem dị aBaibul phọ aghaạph aghol orolhạn esi, rakị ghan onyen kuolọ r’eten eghuan. Kụ ipẹ aBaibul phọ aghaạph bọ kingọ ni iyira suọ loor esi dị aZihova kụ Olemhiạ ayira. Kụ odị alegheri ni ipẹ kekạr bọ inhighenhaạn iyira. Odị uḅenhị ni iyira raraạr dị yira oḍighi kụ keḅaalhamhị olhoghi odị, r’idị kilhoghonhaạn iyira ḍighaạgh oghelhọm aghuḍum k’agee-pọ.
1. AZihova amiịn aani ika orolhạn esi?
Orolhạn esi aḍighi inmo aZihova. Odị rawạ ghan mọ olhephiri oọny r’anhịr ephoph dị maalhạn bịn kụ oghelhọm ghan. Inmo phọ iphẹn phọ rengọ ghan eepoogh olom r’anhịr omharaghiạn ḅilhẹ r’oḍeenhaan kụ oḅilhẹ oghelhọm ephomhoghiạn eten dị eḅeraạn Enhaạn. Pọ kụ iyaạr phọ Ekpo-onhụ phọ Enhaạn eḅẹm bọ mọ: “Eḍighi idị nạ kabo r’anhịr phọ nạ aphin bọ k’amem ugheel phọ anạ.” (Proverbs 5:18, 19) AZihova rawạ ghan mọ aKristẹn dị maalhạn oḅạr opọ r’abidị aalhạn bọ, obọ bidị kole ghan bọ emhạ.—Ibạl Hibru 13:4.
2. Orolhạn esi dị u/ḅaạl p’eeghe?
ABaibul phọ uḅenhị iyira mọ ‘Abuọ ipesi ko/moọgh aani bin omhạr phọ k’Enhaạn.’ (1 Korịnt 6:9, 10) Abuẹn ogẹ bọ Baibul phọ onhụ aGrik uḍighinhom ghan ekpo-onhụ phọ por·neiʹa mem dị rokaạph ilọ orolhạn esi dị u/ḅaạl. Ekpo-onhụ phọ ephẹn phọ roḍighinhom ghan kẹn ni mem dị rokaạph ilọ (1) orolhạn esi a igbo awe dị k”aalhạn, (2) orolhạn esi igbo alhephiri anmụny obobọ igbo anmariịr, ḅilhẹ (3) r’orolhạn esi igbo awe r’inhạm. Yira koḅaalhamhị olhoghi aZihova kụ oḅilhẹ omooghọm suọ eḍighi maạr dị yira okporiọn “raghaạgh ipesi.”—1 Tesalonikạ 4:3.
OLHEGHERI OBUGHẸ
Miịn idị nạ katue aḍuạ esi orolhạn esi dị u/ḅaạl ḅilhẹ r’asuọ dị nạ kamoọgh orọl adọl dị eḅaạl.
3. Kiil aḍuạ esi orolhạn esi dị u/ḅaạl
Oye dị akpẹ oḍuom olhoghi dị oghol mọ aJosef aḍighi ni ipẹ odị katue bọ omhiịn mọ odị atọl li dọl dị eḅaạl. Ibạl Genesis 39:1-12, kụ eeḅeghiọn sipuru phọ edaphạn bọ siẹn:
-
Eeghe kụ ilhoghonhaạn bọ Josef ḍighaạgh oghiil oḍuạ esi orolhạn esi dị u/ḅaạl?—Miịn ekpịgh phọ 9.
-
Nạ ragbi mọ osopha phọ aJosef aḍighi ni ogey ḍughụm? Eeghe kụ iḍighi?
Ika kụ idị iḍoọgh kotuughaạny Josef kụ okiil oḍuạ esi orolhạn esi dị u/ḅaạl rodon? Ipegh VIDIO phọ
AZihova rawạ mọ oomo ayira oghel ipesi. Ibạl 1 Korịnt 6:18, kụ eeḅeghiọn sipuru phọ iphẹn:
-
Ighẹn asidọl kụ ketue eḍighi idị oye kapesi ipesi?
-
Ika kụ idị nạ katue akiil aḍuạ esi ipesi?
4. Nạ katue ni akpạr apu odẹgh ophogh
Eeghe iyaạr kụ ketue eḍighi idị kekparanhaạn oye oghel odẹgh ophogh orolhạn esi dị u/ḅaạl? Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Siphẹ avidio phọ, onyọ umor phọ aḍighi eeghe mem mọ alhoghoma bọ mọ iitughiạn r’eḍighinhom araraạr odị kekọm idị odị kabi anhịr phọ odị?
Ghalhamọ aKristẹn dị okpẹ ni oḍuom olhoghi bịn eeni amem robe ghan ni elhebiri omhoọgh iitughiạn dị esererẹ. Ika kụ idị nạ kakel oghiọm aghisigh ootughiạn ghan araraạr dị i/ḅaạl? Ibạl Filipai 4:8, kụ eeḅeghiọn sipuru phọ iphẹn:
-
Ewạ mọ yira ootughiạn ghan ighẹn araraạr?
-
Ika kụ idị aạl ghan aBaibul phọ r’olhọgh amuboom amem rukumuan phọ aZihova kilhoghonhaạn iyira ḍighaạgh oghel odẹgh ophogh oḍighi ikarạph?
5. Iilhogh phọ aZihova eḍighi ilọ asuọ ayira
AZihova kụ akạr alhegheri idị kinhighenhaạn iyira. Odị muḅenhị iyira ilọ oḅaạl eten iitughiạn r’eḍighinhom araraạr, r’asuọ dị odi oḍighi iduọn phọ. Ibạl Proverbs 7:7-27 obobọ ipegh VIDIO phọ, kụ eeḅeghiọn sipuru phọ edaphạn bọ siẹn.
-
Ika kụ idị oḍoọgh oọny phọ arelhe aghị aḍigh esi odẹgh ophogh?—Miịn Proverbs 7:8, 9.
-
Odaphạn Proverbs 7:23, 26, orolhạn esi dị u/ḅaạl rakọm ghan ni iboom iiḅaghamhị. Eḍighi maạr dị yira oḅaạl esi iitughiạn r’eḍighinhom araraạr, ighẹn iiḅaghamhị kụ edị yira kokpetenhaan?
-
Ika kụ idị oḅaạl eten iitughiạn r’eḍighinhom araraạr kilhoghonhaạn iyira ḍighaạgh oghelhọm aghuḍum k’agee-pọ?
Abuniin awe ootughiạn mọ ipẹ aBaibul phọ aghaạph bọ ilọ orolhạn esi igbo alhephiri anmụny obobọ nmariịr i/ḍeenhaan ephomhoghiạn. Kuolọ Enhaạn ephomhoghiạn phọ, Zihova, rawạ mọ oomo awe oghelhọm ghuḍum k’agee-pọ. Kụ orue omhoọgh aghuḍum k’agee-pọ phọ, yira omoọgh ophogh araraạr eten phọ epẹ odị rapogh ghan bọ. Ibạl 1 Korịnt 6:9-11, kụ eeḅeghiọn ḍipuru phọ aḍiẹn:
-
Odaphạn ipẹ Enhaạn rapogh ghan bọ raraạr, eephuạ orolhạn esi dị olhephiri oọny amhoọgh aghị esi onhọn olhephiri oọny obobọ anhịr ephoph amhoọgh aghị esi onhọn anhịr ephoph kụ eginha ekarạph eephuạ ḍughụm?
Orue oḅaalhamhị olhoghi Enhaạn, ewạ ni mọ oomo phọ ayira onmeeghi raraạr. Ekpẹ ni olhọgh inyaạm oḍighi iduọn phọ ḍughụm? Ibạl Psalm 19:8, 11, kụ eeḅeghiọn sipuru phọ iphẹn:
-
Nạ ragbi mọ yira kotue ni oḍighi oomo ipẹ aZihova rawạ bọ ḍughụm? Eeghe kụ iḍighi?
AZihova malhoghonhaạn ni ḍighaạgh ibadị odạph iilhogh phọ odị ilọ orọl adọl dị eḅaạl. Odị kalhoghonhaạn kẹn ni nyinhạ ḍighaạgh
ABUNIIN AWE OOTUGHIẠN MỌ: “I/beeph dị oye katolhạn esi onhọn oye, mughumọ olhephiri oọny obobọ anhịr ephoph, eḍighi maạr dị ophomhoghiạn ni siloor.”
-
Nạ akaạph aani ika?
OGHAẠPH OOKARAGH
Orolhạn esi aḍighi inmo dị aZihova kụ angọ mọ olom r’anhịr oghelhọm.
Ooḅula
-
Mem dị oḅẹm mọ orolhạn esi dị u/ḅaạl, pọ rokaạph ghan ilọ eeghe?
-
Eeghe kụ kilhoghonhaạn iyira ḍighaạgh oḍuạ esi orolhạn esi dị u/ḅaạl?
-
Eeghe asuọ kụ edị yira komoọgh mem dị yira odạph ghan iilhogh phọ aZihova ilọ orọl adọl dị eḅaạl?
WAAGHỊ AMHIỊN
Tuughạ alhegheri iyaạr phọ eḍighi bọ kụ Enhaạn rawạ bọ mọ olhephiri oọny r’anhịr ephoph aalhạn kụ ogbi orọl idiphọ olom r’anhịr.
Miịn iyaạr phọ eḍighi bọ kụ ipẹ aBaibul phọ aghaạph bọ ilọ orolhạn esi igbo alhephiri anmụny r’igbo anmariịr, re/mạ ghan bọ mọ olhọgh ḍien we dị roḍighi ghan ipẹ phọ.
“Orolhạn Esi Igbo Alhephiri Anmụny r’Igbo Anmariịr Ebeeph Ni Ḍughụm?” (Edi intanẹt)
Ḅeeḅeghiọn amhiịn idị iilhogh phọ Enhaạn ilọ atorobọ odọ orolhạn esi righoph ghan iyira.
“Orolhạn Esi Dị Eego Esi Onhụ Akạr Ri Aḍighi Orolhạn Esi Ḍughụm?” (Edi intanẹt)
Siphẹ emhuoghaạph phọ “Bidị Uzoọm Imhị R’olhọgh Eegu,” miịn iyaạr dị enyu olhephiri oọny dị arolhạn ghan esi ilhephiri anmụny onme adọl aghuḍum odị pidị amoọgh kuuḅi aghisigh Enhaạn.
“ABaibul Phọ Ranme Ghan Ni Sighuḍum” (The Watchtower, April 1, 2011)
a Iphẹn phọ eḅarạm ni orolhạn esi igbo awe dị k”aalhạn, orolhạn esi dị eego esi onhụ, omhiniạn eenhiọm ariịr, ḅilhẹ r’oopiḍiạn esi phọ rosighẹ ghan bọ korolhạn esi, ogbaanyamhiọm eephuạ orolhạn esi.
