ESI ITUUGHẠ PHỌ 43
ABaibul Phọ Akaạph Eeghe Ilọ Amugbagarạ Amiim?
Awe siẹn aḅirinhi phọ omoọgh ni kirokirọ aḍiitughiạn ilọ amugbagarạ amiim. Abuniin osopha ophughọl ghan amiim eeni amem dị bidị odi r’arighirị abidị. Abunhọn osopha mọ bunọ ko/pughọl r’ophughọl. Kụ abunhọn ropughọl ghan kotenhom okụ. ABaibul phọ akaạph aani eeghe ilọ amugbagarạ amiim?
1. Ebeeph ni ophughọl amugbagarạ amiim?
ABaibul phọ o/ghel ophughọl amugbagarạ amiim. Esi omaạm, mem dị aBaibul phọ ragọ imạ araraạr dị Enhaạn anmoom we, akolhom ni “miim mọ raḍighi ghan bọ idị ilhoghi awe keḅaạl.” (Psalm 104:14, 15) ABaibul phọ aḅilhẹ kẹn ni akaạph akol buniin alhephiri anmụny r’anmariịr dị okpẹ oḍuom olhoghi dị ophughọl li mugbagarạ amiim.—1 Timoti 5:23.
2. ABaibul phọ angọ eeghe oromha we dị osopha ophughọl amugbagarạ amiim?
AZihova akel li ophughọl amuboom amiim ḅilhẹ r’ophughọl otenhom okụ. (Galetia 5:21) Ekpo-onhụ phọ odị eḅẹm mọ: “Ka/telhian we dị ropughọl ghan muboom amiim.” (Proverbs 23:20) Esi iduọn phọ, mughumọ yira osopha ophughọl esi ogbo obobọ mem lọ oginha ayira bịn odi, yira ku/pughọl miim dị kurelheom iyira, aḍighi idị yira kokaạph raraạr dị i/kpeanhaạn obobọ kaaḅaghamhị omhoon aloor phọ ayira. Eḍighi maạr dị yira ko/tue opughọl enụm bịn obilhẹ, pọ kenighẹ ghụn dị yira ko/pughọl r’ophughọl.
3. Yira koḍeenhaan ika mọ yira olọgh ni eegu osopha abunhọn awe ilọ amugbagarạ amiim?
Torobọ oye kụ kasopha mughumọ odị kapughọl li mugbagarạ amiim obobọ ka/pughọl. Yira ku/sikị oye dị asopha ophughọl enụm, ḅilhẹ ku/kpaariọm oye dị aḅẹm mọ onọ ra/pughọl. (Rom 14:10) Yira kotue ni osopha mọ yira ko/pughọl eḍighi maạr dị kekọm iiḅaghamhị engọ bunhọn. (Ibạl Rom 14:21.) Yira owạ ghan “ilọ kengọ suọ nyoorị phọ, k/ilọ [ayira] bịn.”—Ibạl 1 Korịnt 10:23, 24.
OLHEGHERI OBUGHẸ
Ooḅeghiọn sinhị-iilhogh aBaibul dị kelhoghonhaạn nyinhạ ḍighaạgh osopha mughumọ nạ kapughọl li mugbagarạ amiim obobọ ka/pughọl, r’onhụ ipẹ nạ kapughọl bọ eḍighi maạr dị nạ asopha ophughọl. Yira koḅilhẹ kẹn ni ooḅeghiọn ilọ oḍighi eḍighi maạr dị nạ amhoọgh iiḅaghamhị ophugholhọgh ghan amiim.
4. Sopha mughumọ nạ kapughọl li
AZizọs amhiịn aani ika mugbagarạ amiim? Olhegheri ophagharanhaạn phọ, ooḅeghiọn iḅẹl iiḍaạny phọ odị aḍighi bọ. Ibạl Jọn 2:1-11, kụ eeḅeghiọn sipuru phọ iphẹn:
-
Odaphạn iiḍaạny phọ iphẹn phọ, aZizọs amiịn aani ika mugbagarạ amiim r’abuphẹ ropughọl ghan bọ?
-
Eḍighi bọ idị aZizọs u/kel ophughọl amugbagarạ amiim, ekpẹ dị onyọ aKristẹn kamiịn aani ika oye dị asopha ophughọl amiim?
Toroboiperolbọ, ghalhamọ r’iduọn onyọ aKristẹn amhoọgh bọ ni eereẹgh ophughọl ghan amiim mọ, bịn re/mạ ghan mọ enighẹ dị odị kapughọl ghan oomo amem. Ibạl Proverbs 22:3, kụ eeḅeghiọn riphigh phọ edaphạn bọ siẹn olhegheri mughumọ nạ kapughọl li miim obobọ ka/pughọl:
-
Nạ kakiilhom oghuugh obobọ aḍighinhom enzịn dị emhoọgh iikpọ.
-
Nạ odi r’eghun.
-
Oyil arookonhom aromha nyinhạ mọ ka/pughọl mugbagarạ amiim.
-
Nạ ra/tue ghan kaphughọl enụm bịn.
-
Olhogh ekpisi phọ anyinha o/mheeraam mọ pughọl mugbagarạ amiim.
-
Nạ odi r’oye dị asopha mọ onọ ka/pughọl ghan mun miim loor esi dị ikparanhaạn ghan nyodị ophamaghạn aloor mem dị aphughọl ghan miim.
Nạ kaseere ni mugbagarạ amiim mem apinien obobọ mem dị awe ookpomhoghan olhe amalhe? Omhiịn iyaạr dị kelhoghonhaạn nyinhạ ḍighaạgh osopha ilọ oḍighi, ipegh VIDIO phọ.
Ibạl Rom 13:13 r’1 Korịnt 10:31, 32. Mem dị nyinha aạl eniin esi aBaibul, iiḅeghiọn ghan ḍipuru phọ aḍiẹn:
-
Ika kụ idị nạ kasighẹ ḍinhị-olhogh phọ aḍiẹn phọ aḍighinhom kụ elhoghonhaạn nyinhạ ḍighaạgh osopha idị keḅeraạn aZihova?
Torobọ onyọ aKristẹn kụ kasopha mughumọ odị kapughọl li mugbagarạ amiim. Ghalhamọ oye asopha ni ophughọl, k/oomo amem kụ edị odị kapughọl ghan
5. Sopha onhụ ipẹ nạ kapughọl bọ
Eḍighi maạr dị nạ asopha ophughọl amugbagarạ amiim pọ ka/bulha mọ: Ghalhamọ r’iduọn aZihova u/kel bọ ni ophughọl amugbagarạ amiim, odị akel li ophughọl amiim otenhom okụ. Eeghe kụ iḍighi? Ibạl Hosea 4:11, 18, kụ eeḅeghiọn ḍipuru phọ aḍiẹn:
-
Eeghe kụ ketue emite mem dị oye aphughọl muboom amiim?
Eeghe kụ kilhoghonhaạn iyira ḍighaạgh oḍuạ esi ophughọl amuboom amiim? Ewạ dị yira kolegheri okụ ayira. Ibạl Proverbs 11:2, kụ eeḅeghiọn ḍipuru phọ aḍiẹn:
-
Uḍighi ika kụ enighẹ bọ ni osopha esi dị nạ kapughọl asi?
6. Kpạr apu ipughọl amugbagarạ amiim
Miịn iyaạr dị elhoghonhaạn ḍighaạgh oniin oye owilhẹ iboom ipughọl amiim. Ipegh VIDIO phọ, kụ eeḅeghiọn sipuru phọ edaphạn bọ siẹn.
-
Odaphạn vidio phọ, ika kụ idị amugbagarạ amiim atir eḍighinhom araraạr aDmitry?
-
Idughanhaan ni oye phọ onhuụn owilhẹ ipughọl amiim ḍughụm?
-
Eeghe kụ ilhoghonhaạn bọ nyodị ḍighaạgh owilhẹ ipughọl amiim?
Ibạl 1 Korịnt 6:10, 11, kụ eeḅeghiọn sipuru phọ iphẹn:
-
ABaibul phọ akaạph eeghe ilọ ophughọl amiim otenhom okụ?
-
Eeghe kụ iḍeenhaan bọ mọ oye dị rapughọl ghan miim katenhom okụ katue ni anmia?
Ibạl Matiu 5:30, kụ eeḅeghiọn ḍipuru phọ aḍiẹn:
-
Osoph aḍighaạgh phọ oroph remạ ghan ophinyọn arikiạ oḍighi idị eḅeraạn aZihova. Nạ kaḍighi eeghe orue okpạr opu eegharạ ophughọl ghan amiim otenhom okụ? a
Ibạl 1 Korịnt 15:33, kụ eeḅeghiọn ḍipuru phọ aḍiẹn:
-
Eeghe kụ kemite eḍighi maạr dị nạ amhoọgh righirị dị ropughọl ghan muboom amiim?
OYE ATUE NI APURU MỌ: “Ebeeph ni ophughọl amugbagarạ amiim ḍughụm?”
-
Nạ kapagharanhaạn ika?
OGHAẠPH OOKARAGH
AZihova amiteom mugbagarạ amiim pidị yira okelhọm, kuolọ odị akel li ookọ amiim ḅilhẹ r’ophughọl amiim otenhom okụ.
Ooḅula
-
ABaibul phọ akaạph eeghe ilọ amugbagarạ amiim?
-
Eeghe iiḅaghamhị kụ retọl ghan mem dị oye aphughọl muboom amiim?
-
Nạ kaḍeenhaan ika olhọgh eegu osopha abunhọn idị egbolhomaam mugbagarạ amiim?
WAAGHỊ AMHIỊN
Ika kụ idị anmụny dị purukụ omuunha ukpe kotue osopha ogey osopha ilọ amugbagarạ amiim?
Miịn raraạr dị nạ katue aḍighi orue oḍuạ esi iiḅaghamhị ipughọl amiim.
“Oḍighinhom Amiim Eten Dị Ekpeanhaạn” (The Watchtower, January 1, 2010)
Ewạ ni dị onyọ aKristẹn kaḍighom aani mem dị rokaran sitobilhị amiim?
“Asipuru Dị Abuẹn Robạl Ghan Bọ Rinyạ Phọ Ayira Opuru” (The Watchtower, February 15, 2007)
Siphẹ emhuoghaạph phọ “Mị Uḍighi Adrọm Dị Ra/muza Ghan,” miịn idị oniin oye arue awilhẹ ophughọl ghan amuboom amiim.
“ABaibul Phọ Ranme Ghan Ni Sighuḍum” (The Watchtower, May 1, 2012)
a Eeni amem remoghi ghan ni dị awe dị ipughọl amiim meḍigh iḅaạl kowạ olhoghonhaạn aḍighaạgh abuọ arookonhom. Abuniin awe arookonhom oḅẹm mọ awe dị omhoọgh ghan iiḅaghamhị ipughọl amiim ogboton bịn owilhẹ miim.
