ESI ITUUGHẠ PHỌ 44

Oomo Arayaạl Kụ Iḅeraạn Ni Enhaạn?

PEGH

AZihova rawạ ni mọ oghelhọm ghuḍum, eeni amem esi olhe amalhe. Kuolọ iniin arayaạl r’ariiḍio dị rooko ghan edi ni dị i/ḅeraạn aZihova ḍughụm? Yira koḍeenhaan ika mọ yira opomhoghiạn ni aZihova gạ phọ ophọn phọ?

1. Eeghe kụ iḍighi kụ ibadị arayaạl aZihova i/ḅeraạn bọ?

Eeni keḍighi ni iikia esi anạ olhegheri mọ arayaạl edi ni dị i/moọgh muḅọph r’aBaibul phọ obobọ emoọgh muḅọph r’aruukụ iiḅereghị okpẹ. Eeni etue ni emoọgh muḅọph r’ikarạph aruwaloor obobọ aḍiitughiạn dị eḅẹm mọ oye amoọgh ni uwaloor dị ra/mugh ghan. Iniin ekpasị esi itughemhị okpẹ. (Isaiah 65:11) AZihova apụr ri rurụ buphẹ rooseeny ghan bọ nyodị mọ: “Igbatanaạn siphẹ ogbo phọ abidị . . . ke/moọgh iyaạr oḍighinom ilọ eḍighi ḅaphanyạ.”—2 Korịnt 6:17. a

2. Arayaạl dị rekuenhi ghan we eten dị i/kpeanhaạn retir ghan ika aZihova?

AZihova o/wạ mọ yira okpasị “oḍuomolhoghi” ayira esi “awe.” (Ibạl Jeremiah 17:5.) Iniin ariiḍio dị awe rooko ghan rekuenhi ghan butooghiạ obobọ rephelhegbe eghạm. Inhọn rekuenhi ghan ḍio dị eelhe phọ omhooghạ loor obobọ elhegh eelhe phọ, idiphọ alagbạ. (1 Jọn 5:21) Iniin okol itooghị imirighan obobọ rookpomhoghan awe kụ rooko obobọ role ghan. AZihova kaloghoma ika eḍighi maạr dị yira ongọ eghuan dị i/kpeanhaạn oye obobọ ookpomhoghan awe, ekạr nuụn ekpaariọm mem dị itughemhị oye phọ obobọ ookpomhoghan phọ egbạgh ipẹ aZihova?

3. Ighẹn aroozọ kụ ketue eḍighi iyaạr dị Enhaạn kekel eyaạl dị awe role?

ABaibul phọ akel li ‘ookọ amiim, sipati dị roḍighi yogh ghan ilọ ateẹny, r’ipughọl.’ (1 Pita 4:3) Mem dị role iniin arayaạl, awe roḍighi yogh ghan raraạr ilọ ateẹny koḅilhẹ opesi ipesi. Esi iduọn phọ, eḍighi maạr dị yira rowạ ni oghiọm aghisigh oḍighi arighirị aZihova, ewạ mọ yira oḍuạ esi aroozọ dị i/ḅaạl.

OLHEGHERI OBUGHẸ

Ooḅeghiọn idị yira kotue osopha ogey osopha mem dị rokaạph ilọ arayaạl r’ooko ariiḍio.

4. Kel olheeghi arayaạl dị aZihova i/ḅeraạn

Ibạl Efesọs 5:10, kụ eeḅeghiọn sipuru phọ iphẹn:

Ewạ dị yira kokạr olegheri eeghe mem dị yira rosopha mughumọ yira kooko ni riiḍio?
Ighẹn ariiḍio dị awe rooko ghan kụ iitura ekpisi phọ anyinha?
Nạ ragbi mọ ooko ariiḍio phọ ipẹ phọ eḅeraạn ni aZihova?

Esi omaạm, nạ maatughiạn ghan ni idị Enhaạn amhiịn rayaạl ootughianhạm aḍio dị omhạr oye? ABaibul phọ o/ghaạph oghol ebenhẹ aZihova dị alhe eyaạl aḍio dị omhạr nyodị, kuolọ akaạph ni ilọ iyạl awe dị u/ḍighi rebenhẹ aZihova dị olhe eyaạl aḍio dị omhạr bidị. Ibạl Genesis 40:20-22 r’aMatiu 14:6-10. Kụ eeḅeghiọn sipuru phọ iphẹn:

Eeghe kụ imite mem mọ iyạl phọ awe phọ olhe bọ eyaạl aḍio phọ omhạr bọ bidị?
Odaphạn iyạl phọ ariisi phọ yira aạl bọ, nạ ragbi mọ aZihova amiịn ika olhe eyaạl aḍio dị omhạr oye?

Kuolọ eeni nạ atue ni apuru mọ, ‘Retir ghan ni aZihova mem dị mị alhe eyaạl aḍio dị omhạr oye obobọ aḍighom aani olhe eyaạl dị i/lo Baibul?’ Ibạl Exodus 32:1-8. Ipẹ reten, ipegh VIDIO phọ kụ eeḅeghiọn sipuru phọ edaphạn bọ siẹn.

AVIDIO: Ooko Ariiḍio r’Arayaạl Dị Enhaạn I/ḅeraạn (5:07)

Uḍighi ika kụ ewạ bọ dị yira kowạ ghan olegheri mughumọ araraạr phọ yira roḍighi ghan bọ eḅeraạn ni aZihova?
Ika kụ idị yira kotue oḍighi iduọn phọ?

Ilọ olhegheri eyaạl dị Enhaạn i/ḅeraạn

Ekpasị ni esi itughemhị dị i/lo Baibul? Orue olhegheri, waaghị amhiịn ipẹ emhiigh bọ.
Rengọ ni eghuan dị i/kpeanhaạn we, rookpomhoghan obobọ elhegh eelhe, idiphọ alagbạ? Yira rongọ ghan aZihova eghuan kopuemhi we, koḅilhẹ oḍuom olhoghi mọ odị kasiemhi ni eekunha iiḅaghamhị aḅirinhi phọ.
Araraạr phọ roḍighi bọ egbạgh ni siigbu aBaibul phọ ḍughụm? Ewạ mọ aroozọ ayira eḅaạl.

5. Loghonhaạn bunhọn ḍighaạgh olhọgh eegu omheeraam mọ anạ

Ketue ni eḍighi ipaanhaạn oghel aḍimhạgh olhe aani arayaạl dị aZihova i/ḅeraạn. Esi iduọn phọ, miigha loor asighẹ magheel aghaaphọm osopha phọ anạ. Omhiịn eḍeenhaan ilọ oḍighi iduọn phọ, ipegh VIDIO phọ.

AVIDIO: Sighẹ Magheel Aghaaphọm Omheeraam Mọ Anạ (2:01)

Ibạl Matiu 7:12, kụ eeḅeghiọn sipuru phọ iphẹn phọ:

Odaphạn esi aBaibul phọ ephẹn phọ, ekpẹ ni dị nạ kaḅenhị buọ eghunotu anạ dị u/moọgh oniin phọ omheeraam mọ r’anạ mọ i/nighẹ dị bidị kole eyaạl dị awe role?
Nạ kaḍighi ika kụ aḍeenhaan buọ eghunotu anạ mọ nạ apomhoghiạn ni kụ aḅilhẹ amaghamhị bidị maạr, ghalhamọ r’iduọn nạ ka/dạph bọ bidị ale eyaạl dị bidị role?

6. AZihova rawạ ni mọ omhoọgh oḅaạl olhoghi

AZihova rawạ ni mọ yira oghelhọm mugey amem r’arighirị ḅilhẹ r’eghunotu ayira. Ibạl Ecclesiastes 8:15, kụ eeḅeghiọn ḍipuru phọ aḍiẹn:

Ika kụ idị esi phọ isiẹn phọ eḍeenhaan mọ aZihova rawạ ni dị yira komoọgh oḅaạl olhoghi?

AZihova rawạ mọ awe phọ odị omhoọgh ibo oḅilhẹ oḅophoghạn oghelhọm mugey amem. Ipegh VIDIO phọ omhiịn mọ iphẹn phọ igey ni siphẹ igbogh arookpomhoghan eephugh phọ ayira.

AVIDIO: Okọ Ghan Igoni Mem Igbogh Arookpomhoghan Eephugh (5:40)

Ibạl Galetia 6:10, kụ eeḅeghiọn sipuru phọ iphẹn:

Ewạ ni dị yira koḍighan we oleeghi rayaạl dị eetura orue ‘oḍighi iiḅi’ bidị?
Apụr amem kụ edị olhoghi anạ kaḅaạl iboom onmo oye inmo—amem dị nạ amhiịn dị awe roḍighi loor esi eyaạl dị role obobọ mem dị eḍuạ k’ekpom anạ kụ eru?
Eeni amem Abugbaanhaạn aZihova rookolhobian ghan ni raraạr kongọ nmụny abidị. Eḍighi maạr dị nạ amhoọgh ibạm anmụny, ighẹn imạ araraạr kụ edị nạ katue aḍighinhaan bidị?

ABUNIIN AWE OOTUGHIẠN MỌ: “Ipẹ eyaạl phọ emite bọ i/moọgh maạr oḍighinhom. Iyaạr dị emhạn maạr pọ oghelhọm amugey amem r’arighirị ḅilhẹ r’abuọ eghunotu ayira.”

Nạ akaạph aani ika?

OGHAẠPH OOKARAGH

AZihova rawạ mọ yira oghelhọm mugey amem r’arighirị ḅilhẹ r’abuọ eghunotu ayira. Kuolọ o/wạ mọ yira oḍighom olheeghi arayaạl dị nyodị i/ḅeraạn.

Ooḅula

Ighẹn asipuru kụ edị yira kotue osighẹ olegheriom mughumọ eyaạl dị role eḅeraạn ni aZihova?
Ika kụ idị yira kotue ologhonhaạn ḍighaạgh buọ eghunotu r’arighirị ayira onhaghanhạn osopha ayira ilọ ooko ariiḍio?
Yira ulhegheri ika mọ aZihova rawạ ni mọ yira omhoọgh oḅaạl olhoghi oḅilhẹ oghelhọm ghan mugey amem?

Utuughạ omhadạn:

Aḍiigbu

Sighẹ iphẹn nạ matuughạ bọ siẹn esi ituughạ phọ ephẹn phọ aphoghom rayaạl dị role ghan ekpisi phọ anyinha.

Enhọn iyaạr:

Your other goal