ESI ITUUGHẠ PHỌ 47

Nạ Maakolhobian Ni Oḍiiny Amuụm?

PEGH

Ituughạ aBaibul phọ anạ metughemhị ni nyinhạ ibadị araraạr ilọ aZihova. Eeni nạ maaḅenhion ni raraạr siphẹ adọl aghuḍum mọ anạ obọ nạ atue aḍighi ipẹ nạ matuughạ bọ. Kuolọ eeni iyaạr edi ni dị ephạm nyinhạ eḅulhemhi omhạn oḅọgh aloor ongọ aZihova r’oḍiiny amuụm. Siẹn esi ituughạ phọ ephẹn phọ yira kooḅeghiọn iniin araraạr dị rekikima ghan we oḍiiny amuụm ḅilhẹ r’ilọ okpạr opu araraạr phọ.

1. Olhegheri iyaạr anạ kasi k’iḍighen kụ nạ agbi oḍiiny amuụm?

Orue oḍiiny amuụm, ewạ mọ moọgh “[ogey olhegheri] iyaạr phọ opọ igey phọ.” (1 Timoti 2:4) Iphẹn phọ re/mạ ghan mọ nạ kalegheri torobọ ophagharanhaạn aḍipuru aBaibul phọ kụ agbi oḍiiny amuụm. Ghalhamọ aKristẹn dị moḍiiny ni muụm k’amem dị mebia bịn okiọm ni ghisigh rotuughạ ghan Baibul phọ. (Kolosị 1:9, 10) Kuolọ ewạ ni mọ legheri iphigh itughemhị aBaibul phọ. Eḍighi maạr dị nạ u/kạr ulegheri mughumọ olhegheri iyaạr phọ anạ masi ni esi dị nạ kaḍiiny muụm, ikumor awe ookpomhoghan phọ kotue ni olhoghonhaạn nyinhạ ḍighaạgh.

2. Ighẹn kụ iniin araraạr dị nạ kaḍighi kụ agbi oḍiiny amuụm?

Tutụ nạ kaḍiiny muụm, pọ kewạ ni mọ ‘kiton esi ikarạph . . . asoman Enaạn.’ (Ibạl Iiḍighi 3:19.) Iphẹn phọ remạ ghan mọ nạ kaloghoma ni saị esi ikarạph dị nạ maḍighi kụ aḅilhẹ alọm aZihova osạr owilhenhaạn. Kụ nạ akạr asopha oghel atorobọ iyaạr dị Enhaạn i/ḅeraạn. Oḅarạm isiẹn, nạ kaḍighan aani ghan ookpomhoghan phọ oḍighi araraạr dị roḍighi, esi oghị aani ghan ituughạ ḅilhẹ r’oghaạph aani ghan iiḅi iinhaghạn phọ idiphọ okaaphọm dị muụm k”oḍiiny.

3. Eeghe kụ iḍighi kụ nạ ka/meera bọ mọ oghiilhaan aphạm nyinhạ aḅulhemhi omhạn?

Ibadị rokiilhaan ghan mọ bidị ko/tue oḍighi ipẹ bidị moguan bọ aZihova. Ogbạ agey, nạ kapiomạn ghan ni, idiphọ memitenhaan ghan bọ ni lephiri r’anmariịr dị okpẹ oḍuom olhoghi siphẹ aBaibul phọ. Kuolọ aZihova alegheri ni mọ arebenhẹ phọ odị u/munhughan. (Ibạl Psalm 103:13, 14.) Olhoghi odị raḅaạl ghan ni mem dị nạ aḍighi oomo ipẹ nạ katue bọ okumu odị! Odị kalhoghonhaạn ni nyinhạ ḍighaạgh. Okạr oghaạph, aZihova aguanhaan mọ iyaạr i/lo “dị ketue igbariọn iyira siphẹ ephomoghiạn phọ [odị].”—Ibạl Rom 8:38, 39.

OLHEGHERI OBUGHẸ

Ooḅeghiọn idị olhegheri ilọ aZihova obughẹ ḅilhẹ r’osighẹ olhoghonhaạn aḍighaạgh phọ odị ketue elhoghonhaạn nyinhạ ḍighaạgh okpạr opu ipaanhaạn dị ketue ni esophoghom nyinhạ oḍiiny amuụm.

4. Legheri ilọ aZihova abughẹ

Kewạ mọ olhegheri iyaạr phọ anạ ilọ aZihova asi k’iḍighen kụ agbi oḍiiny amuụm? Olhegheri iyaạr phọ anạ asi ni esi dị nạ kapomhoghiạn nyodị aḅilhẹ amoọgh eephuạ oḍighi ghan idị eḅeraạn nyodị. Ipegh VIDIO phọ omhiịn idị awe dị rotuughạ ghan Baibul phọ otuụgh iphẹn phọ roḍighi siẹn oomo aḅirinhi phọ. Kụ eeḅeghiọn ḍipuru phọ edaphạn bọ siẹn.

AVIDIO: Eten Dị Erorori Rengọ Oḍiiny Amuụm (3:56)

Siphẹ avidio phọ, nạ umhiịn mọ eeghe kụ ilhoghonhaạn ḍighaạgh ibadị ookolhobian oḍiiny amuụm?

Ibạl Rom 12:2, kụ eeḅeghiọn sipuru phọ iphẹn:

Nạ amoọgh ni iikia ilọ itughemhị aBaibul phọ obobọ mughumọ ipẹ Abugbaanhaạn aZihova rotughemhị bọ kụ igey phọ ni?
Eḍighi idiphọ, pọ ewạ mọ ḍighi eeghe?

5. Kpạr apu iniin araraạr dị ketue ni ekikima nyinhạ oḍiiny amuụm

Ipaanhaạn retọl ghan ni mem dị yira osopha oḅọgh aloor ongọ aZihova kụ oḅilhẹ oḍiiny amuụm. Omhiịn eniin eḍeenhaan, ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: Ophomhoghiạn AZihova Reḍighi Ghan Idị Yira Kokpạr Opu Ipaanhaạn (5:22)

Siphẹ avidiọ phọ, ighẹn ipaanhaạn kụ edị ewạ mọ aNarangerel akpạr apu orue okumu aZihova?
Ika kụ idị ophomhoghiạn aZihova elhoghonhaạn nyodị ḍighaạgh okpạr opu ipaanhaạn phọ?

Ibạl Proverbs 29:25 r’2 Timoti 1:7, kụ eeḅeghiọn ḍipuru phọ aḍiẹn:

Eeghe kụ kingọ iyira akpọ oḅio okpạr opu ipaanhaạn?

6. Ḍuom olhoghi olhoghonhaạn aḍighaạgh phọ aZihova

AZihova kalhoghonhaạn ni nyinhạ ḍighaạgh oḍighi idị eḅeraạn nyodị. Ipegh VIDIO phọ, kụ eeḅeghiọn sipuru phọ edaphạn bọ siẹn.

AVIDIO: AZihova Kalhoghonhaạn Ni Nyinhạ Ḍighaạgh (2:50)

Siphẹ avidio phọ, eeghe kụ ikikima ghan opọ rotughemhị ghan bọ Baibul phọ oḍiiny amuụm?
Eeghe iyaạr dị odị atuughạ kụ ilhoghonhaạn nyodị ḍighaạgh okparamhị oḍuom olhoghi odị esi aZihova?

Ibạl Isaiah 41:10, 13, kụ eeḅeghiọn ḍipuru phọ aḍiẹn:

Uḍighi ika kụ nạ ka/kiilaan bọ mọ nạ ka/tue amunhenhi oguan phọ nạ aguan bọ mem mọ nạ aḅọgh bọ loor angọ aZihova?

7. Maghamhị maạr agey ephomhoghiạn phọ aZihova

Nạ alhọgh mem dị ebụgh aatughiạn ghan ipẹ aZihova aphomhoghiạn bọ nyinhạ, nạ kakạr ri amaghamhị maạr aḅilhẹ awạ ooḅereghị odị k’agee-pọ. Ibạl Psalm 40:5, kụ eeḅeghiọn ḍipuru phọ aḍiẹn:

Ighẹn araraạr dị aZihova maḍighinhaan nyinhạ kụ edị nạ akạr amaghamhị maạr?

Oyil phọ Jeremiah aphomhoghiạn aZihova r’ekpo-onhụ phọ odị, kụ aḅilhẹ aḍeenhaan mọ odị amaghamhị ni maạr eepoogh phọ odị amhoọgh bọ oḍighi ebenhẹ aZihova. Odị aḅẹm mọ: “Ekpo-onhụ phọ anạ imuzeḍi ibo r’oḅaạl olhoghi ekpom amhị, loor esi dị mugholhom imhị ḍien phọ anạ, sey Zihova Enhaạn.” (Jeremiah 15:16) Ipanyanhaạn sipuru phọ iphẹn phọ:

Uḍighi ika kụ eḍighi bọ ni emạ eepoogh oḍighi aani oniin onyọ Ogbaanhaạn aZihova?
Nạ rawạ ni oḍiiny amuụm idiphọ oniin onyọ Ogbaanhaạn aZihova ḍughụm?
Iyaạr edi ni dị resophoghom nyinhạ oḍighi iduọn phọ ḍughụm?
Nạ aatughiạn mọ nạ kaḍighi eeghe orue oteẹny aḍiigbu oḍiiny amuụm?

ABUNIIN AWE OOTUGHIẠN MỌ: “Bidị ko/tue oḍighi oomo ipẹ bidị koguan bọ mem dị bidị oḍiiny muụm.”

Nạ aatughiạn aani ika?

OGHAẠPH OOKARAGH

R’olhoghonhaạn aḍighaạgh aZihova, nạ katue ni akpạr apu torobọ iyaạr dị resophoghom nyinhạ oḍiiny amuụm.

Ooḅula

Olhegheri iyaạr phọ anạ ilọ aBaibul phọ kabụgh asi k’iḍighen kụ nạ agbi oḍiiny amuụm?
Ighẹn araraạr kụ edị kewạ mọ nmeeghi siphẹ aghuḍum mọ anạ kụ agbi oḍiiny amuụm?
Uḍighi ika kụ i/wạ bọ mọ meera oghiilhaan asophoghom nyinhạ?

Utuughạ omhadạn:

Aḍiigbu

Ḅilhẹ aaḅula ḍipuru phọ “Mị Masianhaan Ni Odạph Ookpomhoghan Phọ Oghaạph Iiḅi Iinhaghạn Phọ?” ḅilhẹ r’aḍipuru phọ “Mị Masianhaan Ni Oḍiiny Amuụm?” edi bọ eekunha Ekpịgh phọ 4.

Enhọn iyaạr:

Your other goal