Abugey arighirị rungọ ghan iyira ibo koḅilhẹ ukparamhị iyira mem iiḅaghamhị. Kuolọ aBaibul phọ uphụr ri iyira rurụ mọ k/oomo awe kụ koḍighi bugey arighirị. Esi iduọn phọ, nạ kasaḅạr ika bugey arighirị? Ooḅeghiọn sipuru phọ edaphạn bọ siẹn.

1. Arighirị phọ nạ asaḅạr bọ ketir nyinhạ ika?

Yira rozọ ghan ni koḅilhẹ ootughiạn idiphọ awe phọ abuphẹ yira rogbor ghan bọ koghaaphạn. Iphẹn phọ ketue ni itir iyira egey eten obobọ ekarạph eten, mughumọ yira roḅaanhaạn ghan bidị eye obobọ siphẹ intanẹt phọ. ABaibul phọ aḅẹm ni mọ, “opọ ratelhean ghan bọ oye osụ-olhoghi phọ kasụ ni olhoghi, kuolọ opọ raḍighi ghan bọ raraạr r’uwo elolhoghi phọ kaḍigh ni esi iiḅaghamhị.” (Proverbs 13:20) Arighirị anạ dị ophomhoghiạn oḅilhẹ rokumu aZihova kotue ni olhoghonhaạn nyinhạ ḍighaạgh otuman aani aZihova kụ oḅilhẹ osopha ghan ogey osopha. Kuolọ ogbogh oyaghirị ayira kụ aḍighi oye dị u/pomhoghiạn aZihova, odị katue ni aḍighi idị yira koḍuạ ḍighaạgh aZihova. Iikia i/lo aBaibul phọ uromha bọ iyira osaḅạr ghan arighirị r’osụ-olhoghi! Yira oḍigh righirị r’awe dị ophomhoghiạn Enhaạn, yira r’abidị komooghọm ni suọ. Keḍighi idị ‘oniin kakparamhị ghan olhoghi oniin, oniin alọgh ghan apophe nyoniin.’—1 Tesalonikạ 5:11.

2. Ketọl ika esi aZihova eḍighi maạr dị yira oḍigh righirị r’awe dị u/pomoghiạn nyodị?

AZihova ramiigha ghan loor kụ asaḅạr righirị odị. “Odị raḍigh ghan righirị dị ekpulhạn r’awe elhiom eḍighinhom iyaạr.” (Proverbs 3:32) Ketọl ika esi aZihova eḍighi maạr dị yira osaḅạr righirị dị u/pomoghiạn nyodị? Olhoghi odị ka/ḅaạl! (Ibạl Jems 4:4.) Ḍieriphọ aḍighaạgh phọ, mem dị yira oghel ikarạph arighirị kụ oḍuraan otuman aZihova r’abuphẹ ophomhoghiạn bọ nyodị, olhoghi odị kaḅaạl li kụ odị aḅilhẹ usighẹ iyira righirị.—Psalm 15:1-4.

 OLHEGHERI OBUGHẸ

4. Awe dị ogbatanhaạn r’ayira kotue ni oḍighi bugey arighirị

ABaibul phọ akaạph ni ilọ iyạl awe dị orọl Izrạl iḍiodi phọ, Devid r’aJonathan. Asiạ phọ abidị r’adọl phọ abidị igbaranhaạn ni; ghalhamọ r’iduọn phọ ni, bidị uḍigh ni righirị dị ekpạr. Ibạl 1 Samuel 18:1, kụ eeḅeghiọn ḍipuru phọ aḍiẹn:

• Uḍighi ika kụ i/wạ bọ dị arighirị ayira koḍighi oginha iigbo ayira obobọ we dị r’ayira odi ḍinhiin phọ adọl phọ?

Ibạl Rom 1:11, 12, kụ eeḅeghiọn ḍipuru phọ aḍiẹn:

• Ika kụ idị arighirị dị ophomhoghiạn aZihova kotue ologhonhaạn ḍighaạgh siloor?

Siẹn avidio phọ ophọn phọ, omhiịn idị oḍoọgh onyọ umor amhoọgh righirị esi dị u/seere olhoghi. Ipegh VIDIO phọ, kụ eeḅeghiọn sipuru phọ edaphạn bọ siẹn.

• Siphẹ avidio phọ, eeghe kụ iḍighi kụ arighirị phọ Akil amhoọgh bọ epẹ otu askul phọ ekọm bọ ooḅaghamhiạn aloor engọ odẹ r’onhiin phọ odị?

• Eeghe kụ iḍighi kụ arighirị phọ odị oḅeraạn bọ nyodị eḅẹl amem mọ?

• Ika kụ idị odị akpạr apu dọl iginhi phọ odị?

 5. Ilọ omhoọgh abugey arighirị

 OGHAẠPH OOKARAGH

Mem dị yira omhiigha loor kụ osaḅạr righirị ayira, olhoghi aZihova raḅaạl ghan ni kụ yira romooghọm ghan kẹn ni suọ.

Ooḅula

• Uḍighi ika kụ aZihova amoọgh bọ ḍiḅeraạn akị esi abudọ arighirị phọ yira rosaḅạr ghan bọ?

• Abughẹn odọ awe kụ edị i/kpẹ osighẹ arighirị?

• Nạ kaḍigh ika righirị r’abugey awe?