Torobọ onyọ ayira amoọgh ni iinmenhan dị eḅeraạn nyodị r’eten dị raseere ghan loor odị. Eḍighi maạr dị yira odaphạn sinhị-iilhogh aBaibul, yira koonmenhan ni ipẹ iḅeraạn bọ iyira kụ oḅilhẹ oḍighi idị olhoghi aZihova kaḅaạl. Ooḅeghiọn iniin asinhị-iilhogh aBaibul phọ ipẹ phọ.

1. Ighẹn asinhị-iilhogh kụ kilhoghonhaạn iyira ḍighaạgh osaḅạr iinmenhan r’eten phọ epẹ yira koseere bọ loor phọ ayira?

Ekpẹ dị yira kodaphạn oromha phọ odi bọ siphẹ 1 Timoti 2:9, 10 mem dị yira rosaḅạr iinmenhan r’eten oseere aloor ayira. Esi aBaibul phọ itughemhị iyira inya araraạr: (1) Eten iinmenhan r’oselhemian asilaạl phọ ayira eḍeenhaan mọ yira olọgh ni eegu Enhaạn phọ yira rooḅereghị bọ. Iduọn nạ mamhiịn ghan bọ ni, torobọ onyọ Ogbaanhaạn aZihova kụ rasopha ghan ni iinmenhan lọ odị kaanmenhan akị siphẹ ituughạ phọ, kuolọ eten iinmenhan r’ipẹ yira roseere ghan bọ loor phọ ayira eḅeraạn ni aZihova. (2) Kuu/nmenhan ghan eten dị eḍighi ilọ umugholoor, keḍeenhaan loor, obobọ keḍighi idị awe kusomoghi iyira. (3) Yira ku/daphạn ghan torobọ eten iinmenhan dị emite loor esi dị ibadị awe roonmenhan. (4) Iinmenhan phọ ayira eḍeenhaan ghan torobọ amem mọ yira awe dị rooḅereghị egey Enhaạn phọ.—1 Korịnt 10:31.

2. Uḍighi ika kụ yira kootughiạn bọ buḅaramạ omheeraam mọ ayira mem dị yira rosaḅạr iinmenhan?

Ghalhamọ r’iduọn yira omhoọgh bọ eereẹgh osaḅạr iyaạr dị yira koonmenhan, ewạ ni mọ oseere ghan olhoghi ipẹ iinmenhan phọ ayira ketir bọ bunhọn. Yira ro/wạ ghan oḍighi idị kepin esi oye, kparipẹ ghụn, torobọ onyọ ayira raḍighi ghan ilọ “kengọ onyọ asiya odị suọ, pidị alọgh apophe omheeraam mọ odị.”—Ibạl Rom 15:1, 2.

3. Ika kụ idị iinmenhan phọ ayira keḍur we elọgh siẹn igey iiseeny phọ?

Ii, yira rokparaghạ ghan ni oonmenhan eten dị ekpeanhaạn oomo amem, kuolọ yira rozuumaam ghan agey kophogh iinmenhan ayira mem dị yira rokị ituughạ obobọ romite epẹ erugh phọ. Yira ro/wạ ghan dị awe kokel iiḅi iinhaghạn phọ loor esi iinmenhan ayira. Kparipẹ ghụn, yira roonmenhan ghan eten dị keḍạ we elọgh siẹn igey phọ, kụ eḅilhẹ “elọgh omạn itughemị . . . Opeliạ phọ ayira.”—Taitọs 2:10.

 OLHEGHERI OBUGHẸ

4. Yira oonmenhan ghan eten dị enhighẹ, reḍeenhaan ghan mọ yira olọgh ni eegu aZihova

Eeghe kụ ekpanhạ iyaạr phọ yira otuạn bọ roonmenhan ghan eten dị enhighẹ? Ibạl Psalm 47:2, kụ eeḅeghiọn sipuru phọ iphẹn:

• Olhegheri mọ iinmenhan phọ ayira retir ghan ni eten phọ epẹ awe komiịn bọ aZihova kinyu iyira oḍighi eeghe?

• Nạ ragbi mọ enighẹ ni omhaạr ghan osaḅạr igey iinmenhan mem dị yira rokị ituughạ obobọ romite epẹ erugh phọ? Eeghe kụ iḍighi?

 5. Iyaạr dị kilhoghonhaạn iyira ḍighaạgh osaḅạr igey iinmenhan

Ipegh VIDIO phọ.

Mughumọ iinmenhan phọ ayira emạn iboom ikpoki obobọ i/mạn, oonmenhan ghan iinmenhan dị ekpeanhaạn esi phọ yira rokị bọ ḅilhẹ emhaạr eḅaạl. Ibạl 1 Korịnt 10:24 r’1 Timoti 2:9, 10. Kụ eeḅeghiọn iyaạr phọ eḍighi bọ kụ yira kokel bọ iinmenhan dị . . .

• i/ḅaạl obobọ i/sereghian.

• eḅol loor, eḍeenhaan loor, obobọ kelọgh ikarạph iitughiạn ilhoghi awe.

Ghalhamọ r’iduọn aKristẹn ro/dạph ghan mun bọ Olhogh phọ aMozis, bidị kotue ni otuughạ olegheri ipẹ aZihova raatughiạn ghan bọ. Ibạl Deuteronomy 22:5, kụ eeḅeghiọn ḍipuru phọ aḍiẹn:

• Uḍighi ika kụ yira kokel bọ iinmenhan dị keḍighi idị olhephiri oọny kakịgh anhịr ephoph obobọ anhịr ephoph kakịgh olhephiri oọny?

Ibạl 1 Korịnt 10:32, 33 r’1 Jọn 2:15, 16, kụ eeḅeghiọn sipuru phọ iphẹn:

• Uḍighi ika kụ yira komoọgh bọ ni ogbolhomaam mughumọ iinmenhan phọ ayira enighẹ ni ghisigh awe ekool phọ obobọ ookpomhoghan phọ?

• Eghẹn eten iinmenhan kụ iitura ekpisi anyinha?

• Nạ ragbi mọ iniin iinmenhan phọ ipẹ phọ ebeeph ni dị aKristẹn koonmenhan aani ḍughụm? Eeghe kụ iḍighi?

 OGHAẠPH OOKARAGH

Mem dị yira osaḅạr iinmenhan dị ekpeanhaạn, yira roḍeenhaan ghan mọ yira olọgh ni eegu aZihova r’abunhọn.

Ooḅula

• Uḍighi ika kụ iinmenhan r’eten phọ epẹ yira roseere ghan bọ loor phọ ayira emạn bọ maạr esi aZihova?

• Ighẹn kụ iniin asinhị-iilhogh dị kilhoghonhaạn iyira ḍighaạgh osopha iinmenhan dị yira koonmenhan?

• Ika kụ idị eten iinmenhan phọ ayira ketue etir ipẹ awe omhiịn bọ igey iiseeny phọ?