ESI ITUUGHẠ PHỌ 13
Idị Aruukụ Iiḅereghị Okpẹ Mophuẹ Ḍien Enhaạn
Eḍighi bọ idị Enhaạn aḍighi ephomhoghiạn, uḍighi ika kụ odị ameera bọ mọ aruukụ iiḅereghị oghol ḍien odị oḍighi raraạr dị i/nighẹ? Oghaạph okpere, iphẹn phọ aruukụ iiḅereghị okpẹ; iḍighinhom araraạr abidị repuẹ ghan ḍien Enhaạn. Ika kụ idị bidị mophuẹ ḍien Enhaạn? Odị raloghoma ghan ika ilọ iphẹn phọ? Kụ odị kakol iphẹn phọ aḍighi eeghe?
1. Ika kụ idị aruukụ iiḅereghị okpẹ mosighẹ itughemhị phọ abidị ophuenhọm ḍien Enhaạn?
Aruukụ iiḅereghị okpẹ “osighẹ igey phọ Enhaạn kụ roonmenenom okpẹ.” (Rom 1:25) Esi omaạm, ibadị aruukụ iiḅereghị ro/tughemhị ghan budaphạm mọ abidị ḍien Enhaạn. Kuolọ, aBaibul phọ aḍeenhaan ni mọ yira omoọgh oḍighinhom ghan aḍien phọ Enhaạn. (Rom 10:13, 14) Mem dị ekarạph iyaạr emite, abuniin abuḍiemiom aruukụ iiḅereghị roḅẹm ghan mọ eḍighi ogbi Enhaạn. Kuolọ opọ phọ okpẹ. Enhaạn kụ ra/kọm ghan ikarạph araraạr. (Ibạl Jems 1:13.) Dị eeph ni iboom, okpẹ kirokirọ phọ aruukụ iiḅereghị mogbaaghị bọ meḍighi idị awe u/pomhoghiạn mun Enhaạn.
2. Ika kụ idị aruukụ iiḅereghị okpẹ mosighẹ iḍighinhom araraạr phọ abidị ophuenhọm ḍien Enhaạn?
Aruukụ iiḅereghị okpẹ re/zoọm ghan we eten phọ epẹ Enhaạn razoọm ghan bọ. Idị egbolhomaam ruukụ iiḅereghị okpẹ, aBaibul phọ akaạph mọ “mokpologhi egu ikarạph phọ odị rosiemi k’akẹ.” (Ogananami 18:5) Esi arukuron asiạ, aruukụ iiḅereghị moḍighan ni buọ itooghị imirighan, obakị raaghạm, oḅillhẹ okọm obobọ omeeraam mọ ozẹ simuunịr awe. Abuniin abuḍiemiom aruukụ iiḅereghị roliom ghan ikpoki ilọ eḅeraạn kụ obonyị budaphạm mọ abidị ikpoki orolhọm. Iḍighinhom araraạr phọ iphẹn phọ eḍeenhaan mọ bidị Enhaạn u/legheri, esi iduọn phọ u/moọgh elhiom oḅẹm mọ bidị awe Enhaạn.—Ibạl 1 Jọn 4:8.
3. Enhaạn amiịn ika ruukụ iiḅereghị okpẹ?
Eḍighi maạr dị iḍighinhom araraạr aruukụ iiḅereghị okpẹ repin ghan olhoghi anạ, nạ ragbi mọ aZihova aloghoma aani ika? Odị apomhoghiạn ni we, kuolọ akaghạm ni olhoghi buḍiemhiom aruukụ iiḅereghị phọ ropuẹ bọ ḍien phọ odị oḅilhẹ bọ rokpuuroghọm budaphạm mọ abidị. Odị aguanhaan ophiemhi aruukụ iiḅereghị okpẹ bịn ‘ko/miịn ghan mun.’ (Ogananami 18:21) Moọny amem, Enhaạn kesiemhi ni eekunha oomo aruukụ iiḅereghị okpẹ.—Ogananami 18:8.
OLHEGHERI OBUGHẸ
Ooḅeghiọn obughẹ ipẹ Enhaạn amhiịn bọ ruukụ iiḅereghị okpẹ. Oḅilhẹ otuughạ obughẹ raraạr dị bidị moḍighi, r’iyaạr phọ eḍighi bọ kụ i/wạ bọ dị iphẹn phọ kekikima nyinhạ olhegheri aZihova.
4. Oomo aruukụ iiḅereghị kụ i/ḅeraạn Enhaạn
Ibadị awe omeeraam mọ aruukụ iiḅereghị eḍighi kirokirọ areten dị retorori ghan kengọ Enhaạn. Ipẹ phọ inẹ ni ḍughụm? Ibạl Matiu 7:13, 14, kụ eeḅeghiọn ḍipuru phọ aḍiẹn:
-
ABaibul phọ akaạph eeghe ilọ eten phọ retorori bọ kengọ ghuḍum?
Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
ABaibul phọ akaạph ni mọ ibadị aruukụ iiḅereghị kụ iḅeraạn Enhaạn ḍughụm?
5. Aruukụ iiḅereghị okpẹ ii/ghironhaan ephomhoghiạn phọ Enhaạn
Aruukụ iiḅereghị okpẹ mophuẹ ni ḍien phọ Enhaạn ibadị areten. Eniin eten dị eeph ni iboom pọ oḍighom ghan ee araaghạm. Omhiịn eniin eḍeenhaan, pọ ipegh VIDIO phọ. Kụ eeḅeghiọn sipuru phọ edaphạn bọ siẹn.
-
Eeghe kụ edị ibadị asiosị oḍighi mem Eghạm Oomo Aḅirinhi Phọ II?
-
Nạ aloghoma ika ilọ araraạr phọ bidị oḍighi bọ?
Ibạl Jọn 13:34, 35 r’17:16. Kụ eeḅeghiọn sipuru phọ iphẹn:
-
Nạ ragbi mọ aZihova raloghoma ghan ika mem dị aruukụ iiḅereghị oḍighom aani ee araaghạm?
-
Aruukụ iiḅereghị okpẹ kụ rekọm ghan ibadị ikarạph araraạr dị remite rodon. Ighẹn areten kụ edị nạ amhiịn dị aruukụ iiḅereghị ii/ghironhaan ephomhoghiạn phọ Enhaạn?
Aruukụ iiḅereghị okpẹ ii/ghironhaan ephomhoghiạn phọ Enhaạn
6. Enhaạn rawạ otagharạn awe osighẹ esi aruukụ iiḅereghị okpẹ
Ibạl Ogananami 18:4, a kụ eeḅeghiọn ḍipuru phọ aḍiẹn:
-
Etọl ika esi anạ olhegheri mọ Enhaạn rawạ ni otagharạn abuphẹ aruukụ iiḅereghị okpẹ mookelheghi bọ?
7. Kiọm ghisigh atuughạ ghan ilọ egey Enhaạn phọ
Ekpẹ ni dị iḍighinhom araraạr aruukụ iiḅereghị okpẹ ketir eten phọ epẹ nạ amhiịn bọ Enhaạn ḍughụm? Gbiom olhoghi oọny dị aghel iiḅakiọm osụ-olhoghi dị odẹ odị angọ, bịn aḍuạ olhoghi otu amhiigh oḍighi yogh ikarạph araraạr. Kuolọ ipẹ odị raḍighi bọ i/ḅeraạn odẹ phọ. Uḍighi ika kụ ke/nighẹ bọ oghol ikarạph araraạr phọ oọny phọ raḍighi bọ okpalhạm odẹ phọ?
-
Kenighẹ ni otuạn araraạr phọ aruukụ iiḅereghị okpẹ roḍighi bọ okpalhạm Enhaạn oḅilhẹ owilhẹ otuughạ ilọ odị?
ABUNIIN AWE OOTUGHIẠN MỌ: “Iyaạr oghol otuughạ ilọ Enhaạn i/lo, loor esi dị aruukụ iiḅereghị kụ rekọm ghan bọ ibadị iiḅaghamhị.”
-
Nạ aloghoma aani ni eten phọ ephẹn phọ?
-
Uḍighi ikạ kụ i/nighẹ bọ omheera mọ iḍighinhom araraạr aruukụ iiḅereghị okpẹ etir ipẹ yira omhiịn bọ aZihova?
OGHAẠPH OOKARAGH
Aruukụ iiḅereghị okpẹ mophuẹ ḍien Enhaạn loor esi ikarạph itughemhị r’iḍighinhom araraạr phọ abidị. Enhaạn kepiemhi ni ruukụ iiḅereghị okpẹ.
Ooḅula
-
Ika kụ idị itughemhị r’iḍighinhom araraạr aruukụ iiḅereghị okpẹ etir nyinhạ?
-
AZihova amiịn ika ruukụ iiḅereghị okpẹ?
-
Enhaạn kaḍighi ika ruukụ iiḅereghị okpẹ?
WAAGHỊ AMHIỊN
Tuughạ alhegheri iyạl araraạr dị ibadị aruukụ iiḅereghị roḍighi ghan dị Enhaạn aghel.
“Oomo Aruukụ Iiḅereghị Kụ Igey Ni? Oomo Phọ Idị Kụ Retorori Ni Kengọ Enhaạn?” (Edi intanẹt)
Uḍighi ika kụ aZihova rawạ bọ mọ oḍighan bunhọn awe kụ ooḅereghị nyodị?
“Ekạr Ri Emoghi Dị Oye Kawạ Eniin Ekụ Iiḅereghị Aḍigh?” (Edi intanẹt)
Oniin oḍiemhiom ekụ iiḅereghị amhoọgh ni ooḅaghamhiạn aloor, loor esi ekụ iiḅereghị phọ odị. Kuolọ iphẹn phọ i/kikima nyodị otuughạ igey phọ ilọ Enhaạn.
“Iyaạr Dị Ekọm Idị Oniin Oḍiemhiom Ekụ Iiḅereghị Awilhẹ Siosị Odị” (Awake!, February 2015)
Esi arukuron asiạ, aruukụ iiḅereghị mogbaaghiọm ni Enhaạn bịn eḍighi idị awe omhiịn Enhaạn idiphọ oye dị ukelhạn iyira aḅilhẹ amhoọgh ogbagarạ olhoghi. Tuughạ alhegheri ilọ igey dị egbạgh iraạr okpẹ dị ogbạ.
“Okpẹ Kirokirọ Dị Aḅẹm Mọ Enhaạn O/mhoọgh Ephomhoghiạn” (The Watchtower, November 1, 2013)
a Olhegheri iyaạr phọ eḍighi bọ kụ aḍinyạ Ogananami phọ etomaạm bọ ruukụ iiḅereghị okpẹ anhịr dị oghol mọ aBabilọn Ogbogh Phọ, pọ miịn Igẹ Dị Opumhom 1.
