ESI ITUUGHẠ PHỌ 15
Anhiạn Kụ AZizọs Phọ?
Iphirigba eḍeenhaan mọ aḍien aZizọs kụ iilheghaany epu inhọn asiḍien. Ghalhamọ r’iduọn phọ, ibadị u/legheri odọ oye phọ aZizọs aru bọ, kụ ibadị omoọgh kirokirọ aḍiitughiạn ilọ odọ oye phọ odị aru bọ. ABaibul phọ akaạph eeghe ilọ odị?
1. Anhiạn kụ aZizọs phọ?
AZizọs aḍighi olhẹm uwaloor dị odi ghan k’akẹ. AZihova Enhaạn phọ aphụr alhẹm nyodị kụ agbi olhẹm inhọn araraạr. Esi iduọn phọ, okol nyodị mọ “okpanạ dị arọl li kụ ogbi bọ olẹm aḅirini phọ.” (Kolosị 1:15) ABaibul phọ akol Zizọs mọ “ogina Oọny Enhaạn dị agbatanhaạn” loor esi dị odị kụ oye dị aZihova asighẹ ḍighaạgh odị alhemọm. (Jọn 3:16, NWT) AZizọs akumuan ghan oogaạny Odẹ phọ odị Zihova, alhoghonhaạn ghan nyodị ḍighaạgh olhẹm inhọn araraạr. (Ibạl Proverbs 8:30.) AZizọs akiọm ni ghisigh rakelhọm siya dị ekpulhạn r’aZihova. Odị aḅạr ri aZihova aḅilhẹ rakumuan idiphọ omeerạ enye, “Ekpo Onhụ phọ,” orelhe ghan asidom Enhaạn.—Jọn 1:14.
2. AZizọs atụ eeghe kụ aru bọ siẹn ade phọ?
Esi 2,000 asiạ epẹ omhạn, aZihova asighẹ ni uwaloor iigbia phọ odị aḍighinhom iiḍaạny. Odị asighẹ Zizọs alhọgh okuruḅakạ esinha onyanhị dị oghol mọ Meri, bịn eḍighi idị omhạr Zizọs siẹn ade phọ idiphọ oye. (Ibạl Luk 1:34, 35.) AZizọs aru siẹn ade phọ idiphọ aMesaya phọ oguanhaan bọ, r’oḅilhẹ otagharạn awe. a Oomo araraạr phọ ogẹ bọ siphẹ aBaibul phọ ilọ aMesaya phọ imhunhughan esi aZizọs, bịn edugh dị awe olhegheri mọ aZizọs “kụ aMesaya phọ, Oọny Enaạn phọ edi ghan bọ.”—Matiu 16:16.
3. AZizọs odi eghẹn nyiidiphọ?
AZizọs amhugh bọ siẹn ade phọ, uḅeton nyodị idiphọ uwaloor kụ aḅula epẹ k’akẹ. Epẹ phọ kụ edị ‘Enhaạn engọ nyodị ḍien dị epu oomo inọn asiḍien.’ (Filipai 2:9) Nyiidiphọ aZizọs atolhọm agadạ igbogh, dị oginha aZihova bịn kụ apu nyodị.
OLHEGHERI OBUGHẸ
Ooḅeghiọn obughẹ odọ oye phọ aZizọs aru bọ r’iyaạr phọ eḍighi bọ kụ otuughạ ilọ odị emhạn bọ maạr.
4. AZizọs k/Enhaạn phọ Epelheghiom bọ
ABaibul phọ atughemhị mọ aZizọs aḍighi uwaloor dị amhoọgh iikpọ epẹ k’akẹ, kuolọ odị aler loor ranaghanhạn ghan Enhaạn phọ aḍighi bọ Odẹ phọ odị, Zihova. Yira ulhegheri ika? Ipegh VIDIO phọ omhiịn idị aBaibul phọ atughemhị ilọ ogbaranhaạn dị odi igbo aZizọs r’Enhaạn phọ Epelheghiom bọ.
Ariisi aBaibul phọ edaphạn bọ siẹn kilhoghonhaạn ni iyira ḍighaạgh onhaghanhạn ogbaranhaạn dị odi igbo aZihova r’aZizọs. Mem dị nyinha aạl eniin esi aBaibul, iiḅeghiọn ghan sipuru phọ edaphạn bọ siẹn.
Ibạl Luk 1:30-32.
-
Ika kụ idị ikpo onhụ ookpaạny phọ eḍeenhaan ogbaranhaạn dị odi igbo aZizọs r’aZihova “Egbogh Enaạn phọ”?
Ibạl Mạk 1:10, 11.
-
Siphẹ aZizọs raḍiiny bọ muụm mọ, eḍọgh phọ eḅạ bọ epẹ k’akẹ phọ iḅẹm mọ eeghe?
-
Nạ aatughiạn mọ anhiạn kụ aḅạ bọ?
Ibạl Jọn 14:28.
-
Igbo odẹ r’oọny, anhiạn kụ apu anhiạn aḅilhẹ amhoọgh igbogh iikpọ?
-
Iduọn aZizọs amhạgh bọ aZihova mọ Odẹ odị remạ ghan eeghe?
Ibạl Jọn 12:49.
-
Nạ ragbi mọ aZizọs aatughiạn ni mọ Odẹ phọ odị r’odị ooleeny ni ḍughụm?
5. Araraạr dị eḍeenhaan mọ aZizọs kụ aMesaya phọ
Ibadị imiịn edi ni Baibul dị keloghonhaạn we ḍighaạgh olhegheri aMesaya phọ Enhaạn emạ bọ otagharạn awe. Ipegh VIDIO phọ omhiịn iniin imiịn dị emhunhughan esi aZizọs mem mọ arọl bọ siẹn ade phọ.
Ibạl riisi aBaibul phọ ephạm bọ imiịn phọ iphẹn phọ kụ eeḅeghiọn sipuru phọ edaphạn bọ siẹn:
Ibạl Micah 5:2 olhegheri ekpisi phọ komạr bọ aMesaya phọ. b
-
Ika kụ idị emariạ phọ aZizọs emhunhenhi imiịn phọ iphẹn phọ?—Matiu 2:1.
Ibạl Psalm 34:20 r’aZechariah 12:10 omhiịn k’anhị k’alhe idị imiịn phọ eghaạph ilọ aḍuugh aMesaya phọ.
-
Imiịn phọ iphẹn phọ imhunhughan ni ḍughụm?—Jọn 19:33-37.
-
Nạ ragbi mọ eḍighi idị aZizọs kụ aḍighi ghan idị imiịn phọ iphẹn phọ kemunhughan esi odị?
-
Iphẹn phọ etughemhị nyinhạ eeghe ilọ aZizọs?
6. Asuọ odi ni otuughạ ilọ aZizọs
ABaibul phọ aḅẹm mọ emạn ni maạr otuughạ ilọ aZizọs r’oḍighi phọ odị. Ibạl Jọn 14:6 r’17:3, kụ eeḅeghiọn ḍipuru phọ aḍiẹn:
-
Uḍighi ika kụ emạn bọ maạr otuughạ ilọ aZizọs?
AZizọs kụ aghughuron eten dị yira kotue oḍighi righirị Enhaạn. Odị atughemhị igey phọ ilọ aZihova, kụ esi odị kụ edị yira komoọgh ghuḍum k’agee-pọ
ABUNIIN AWE OOTUGHIẠN MỌ: “Abugbaanhaạn aZihova u/meeraam Zizọs.”
-
Nạ aatughiạn aani ika?
OGHAẠPH OOKARAGH
AZizọs ookpaạny dị amhoọgh ni iikpọ. Odị Oọny Enhaạn, kụ odị kẹn kụ aMesaya phọ.
Ooḅula
-
Uḍighi ika kụ oghol bọ Zizọs mọ “okpanạ dị arọl li kụ ogbi bọ olẹm aḅirini phọ”?
-
AZizọs aḍighi ghan eeghe kụ agbi bọ oru isiẹn ade phọ?
-
Yira ulhegheri ika mọ aZizọs kụ aMesaya phọ?
WAAGHỊ AMHIỊN
Tuughạ abughẹ ipẹ yira olhegheri bọ mọ aZizọs kụ aMesaya phọ.
“Imiịn Ilọ AMesaya Phọ Emạ Ni Emiteom Mọ AZizọs Kụ AMesaya Phọ?” (Edi intanẹt)
Miịn mughumọ aBaibul phọ atughemhị ni mọ Enhaạn aḍighi Odẹ aZizọs eniin phọ eten phọ awe roḍighi ghan bọ burudẹ.
“Uḍighi Ika Kụ Roḅẹm Ghan Bọ Mọ AZizọs Oọny Enhaạn?” (Edi intanẹt)
Miịn iyaạr phọ eḍighi bọ kụ itughemhị Iraạr Arumhụgh Kụ Eniin i/lo bọ Baibul.
Bạl amhiịn idị adọl aghuḍum oniin anhịr enmia mem dị awaaghị amhiịn ipẹ aBaibul phọ atughemhị bọ ilọ aZizọs.
a Esi Ituughạ phọ 26 r’27 keeḅeghiọn iyaạr phọ eḍighi bọ kụ omhạr awe owạ bọ etagharạn r’ipẹ aZizọs utagharạn bọ iyira.
b Miịn Igẹ Dị Opumhom 2 olhegheri ilọ imiịn dị eghaạph ilọ amem mọ aZizọs aru bọ siẹn ade phọ.
