ESI ITUUGHẠ PHỌ 16

AZizọs Aḍighi Eeghe Mem Mọ Arọl Bọ Siẹn Ade Phọ?

PEGH

Ibadị awe rootughiạn ghan mọ aZizọs aḍighi oọny aḍipugh, oyil dị asụ-olhoghi obobọ oye dị odi oreeny aḍuugh. Kuolọ yira kotue ni otuughạ obughẹ ilọ odị esi ooḅeghiọn adọl aghuḍum mọ odị siẹn ade phọ? Siẹn esi ituughạ phọ ephẹn phọ, yira kooḅeghiọn iniin iphigh araraạr dị aZizọs aḍighi r’idị iphẹn phọ kelhoghonhaạn nyinhạ ḍighaạgh.

1. Eeghe kụ okpanhạ oḍighi dị aZizọs aḍighi ghan?

Okpanhạ oḍighi dị aZizọs aḍighi ghan pọ “[oghaạph] ooḅi oghaạph ilọ omạr phọ k’Enaạn.” (Ibạl Luk 4:43.) Odị agbeelhom ghan iiḅi iinhaghạn dị eḅẹm mọ Enhaạn kapighi itooghị obobọ omhạr dị kasiemhi eekunha iiḅaghamhị omhạr awe. a Esi iraạr asiạ r’egbem, aZizọs aḍighi ni oomo ipẹ odị katue bọ oghaạph iiḅi iinhaghạn phọ.—Matiu 9:35.

2. AZizọs atụ eeghe kụ aḍighi yogh ghan bọ iiḍaạny?

ABaibul phọ apamhanhạm ni ibadị araraạr “aruugu r’iiḍaạny r’areḍeenaan [dị Enhaạn angọ Zizọs iikpọ kụ aḍighi yogh].” (Iiḍighi 2:22) R’iikpọ phọ Enhaạn, aZizọs aphamaghạn ni oghim, angọ eḍien simuunịr, aakonhom bulọ u/moon aḅilhẹ aḅerion bulọ omhuughu. (Matiu 8:23-27; 14:15-21; Mạk 6:56; Luk 7:11-17) Iiḍaạny phọ aZizọs aḍighi yogh ghan bọ iḍeenhaan ni mọ Enhaạn kụ arom nyodị. Eḅilhẹ kẹn eḍeenhaan mọ aZihova amoọgh ni iikpọ osiemhi eekunha iiḅaghamhị ayira.

3. Adọl aghuḍum mọ aZizọs itughemhị iyira eeghe?

AZizọs anhaghanhạn ghan aZihova torobọ amem. (Ibạl Jọn 8:29.) Etigheri isophoghom, aZizọs aḍighi ghan torobọ ilọ Odẹ phọ odị aḅenhị nyodị tutụ k’aḍuugh. Odị amạ amiteom mọ awe kotue ni okumu Enhaạn ghalhamọ asidọl phọ ikpạr ri. Esi iduọn phọ, aZizọs aḍighi eḍeenhaan omaạm ghan, “pidị [yira odạph] ghan igbaranuọm aruwol phọ odị.”—1 Pita 2:21.

OLHEGHERI OBUGHẸ

Ooḅeghiọn ipẹ aZizọs agbeelhom ghan bọ iiḅi iinhaghạn phọ aḅilhẹ ghan aḍighi iiḍaạny.

4. AZizọs agbeelhom ni iiḅi iinhaghạn

AZizọs arelhe ni rukuron itobi reten dị ophugh odi oghị oghaạph iiḅi iinhaghạn phọ oḅenhị atorobọ oye dị odị ateẹny. Ibạl Luk 8:1, kụ eeḅeghiọn sipuru phọ iphẹn:

AZizọs aghaạph ghan iiḅi iinhaghạn phọ aḅenhị oginha awe dị oghị oteẹny nyodị bịn?
Eeghe ikuph kụ edị aZizọs alhọgh oteẹny awe?

Enhaạn aghaạph ni mọ aMesaya phọ kakaạph ni iiḅi iinhaghạn phọ. Ibạl Isaiah 61:1, 2, kụ eeḅeghiọn sipuru phọ iphẹn:

AZizọs amhunhenhi ika imiịn phọ iphẹn phọ?
Nạ aatughiạn mọ ewạ ni dị awe konaghạn iiḅi iinhaghạn phọ?

5. AZizọs atughemhị raraạr dị emhạn maạr

Epel oghaạph iiḅi iinhaghạn ilọ Omhạr phọ k’Enhaạn, aZizọs atughemhị kẹn ni raraạr dị keloghonhaạn ḍighaạgh we. Ooḅeghiọn iniin itughemhị phọ iphẹn phọ siphẹ Oghaạph Anyụ Eeḅarạph phọ odị. Ibạl Matiu 6:14, 34 r’7:12, kụ eeḅeghiọn sipuru phọ iphẹn:

Ighẹn araraạr dị kengọ suọ kụ edị aZizọs aghaạph siẹn asiikpịgh phọ iphẹn phọ?
Nạ ragbi mọ iphẹn phọ ketue ni eloghonhaạn ḍighaạgh we rodon?

6. AZizọs aḍighi yogh iiḍaạny

AZihova angọ Zizọs iikpọ oḍighinhom ibadị iiḍaạny. Omhiịn eniin eḍeenhaan, ibạl Mạk 5:25-34 obobọ ipegh VIDIO phọ. Kụ eeḅeghiọn sipuru phọ edaphạn bọ siẹn.

AVIDIO: Anhịr Dị Arọl E/moon Mamhoon (5:10)

Anhịr phọ arọl bọ e/moon siphẹ avidio phọ amheeraam eeghe?
Eeghe iyaạr siẹn iiḍaạny phọ kụ iḅeraạn nyinhạ?

Ibạl Jọn 5:36, kụ eeḅeghiọn ḍipuru phọ aḍiẹn:

Iiḍaạny phọ aZizọs aḍighi yogh ghan bọ engọ eeghe ogbaanhaạn ilọ odị?

Nạ alegheri ni?

Ibadị araraạr dị yira olhegheri ilọ aZizọs edi siphẹ ḍinyạ aMatiu, Mạk, Luk, r’aJọn. Inya phọ awe phọ ogẹ bọ rinyạ aBaibul phọ iphẹn phọ okaạph ni kirokirọ araraạr dị aZizọs aḍighi. Mem dị yira aạl inya phọ idị, yira rokạr ghan kolhegheri ipẹ adọl aghuḍum mọ aZizọs erọl bọ.

AMATIU

kụ aphụr agẹ ḍiphẹ odị. Egbon itughemhị phọ aZizọs, ekạr nuụn ekpaariọm ipẹ aZizọs atughemhị bọ ilọ Omhạr phọ k’Enhaạn.
AMẠK

kụ agẹ ḍidị ekper. Epamanhạm iikiạ araraạr dị emiteghu.
ALUK

akaạph idị aZizọs amhaghamhị maạr iiḅereghị ḅilhẹ r’idị azoọm ghan nmariịr eyoghoyoghọ eten.
AJỌN

akaạph ibadị araghaạph dị aZizọs amhoọgh r’arighirị phọ odị otuman bọ nyodị, kụ iphẹn phọ eganhanhamhi odọ oye phọ aZizọs aru bọ.