ESI ITUUGHẠ PHỌ 18
Ilọ Olhegheri Abugey AKristẹn
Irubal awe oḅẹm mọ bunọ aKristẹn. Kuolọ omoọgh kirokirọ omheeraam r’asiigbu dị rodạph ghan. Esi iduọn phọ, yira koḍighi ika kụ olegheri bugey aKristẹn phọ?
1. Remạ ghan eeghe oḍighi onyọ aKristẹn?
Onyọ aKristẹn pọ onyọ amatuạn aZizọs Kraist. (Ibạl Iiḍighi 11:26.) Oye kaḍighi eeghe omạ omiteom mọ onọ onyọ amatuạn aZizọs? AZizọs aḅẹm mọ: “Nyina edạph onhụ phọ amị, pọ nyina kụ okaraghị abumatuạn phọ amị.” (Jọn 8:31) Iphẹn phọ remạ ghan mọ ogey onyọ aKristẹn amoọgh odaphạn itughemhị phọ aZizọs. Kụ aZizọs atughemhị ghan ipẹ edi bọ siphẹ aBaibul phọ, esi iduọn phọ omheeraam abugey aKristẹn phọ kakpasị siphẹ aBaibul phọ.—Ibạl Luk 24:27.
2. Abugey aKristẹn roḍeenhaan ghan ika ephomhoghiạn?
AZizọs aḅenhị bumatuạn phọ odị mọ: “Oniin aphomoghiạn nyoniin, idiphọ mị iphomoghiạn bọ inyina.” (Jọn 15:12) AZizọs aḍeenhaan ika ephomhoghiạn bumatuạn phọ odị? Odị arọl ghan r’abidị, akparamhị bidị aḅilhẹ alhoghonhaạn bidị ḍighaạgh. Odị amhughanhaan kẹn bidị. (1 Jọn 3:16) Idiphọ aZizọs, abumatuạn phọ odị ro/kaạph ghan ilọ ephomhoghiạn bịn. Bidị roḍeenhaan ghan mọ bunọ opomhoghiạn ni siloor esi ikpo-onhụ r’iḍighinhom araraạr.
3. Oghẹn oḍighi kụ edị abugey aKristẹn ogbon oḍighi?
AZizọs angọ ni oḍighi bumatuạn phọ odị. “Odị alọgh bidị oghị oghaạph ghan ilọ omạr phọ k’Enaạn.” (Luk 9:2) Abuḅẹl aKristẹn phọ u/gbạ ghan ikpo-onhụ phọ siphẹ otu iiḅereghị phọ bịn, bidị ughị ghan ni ilhoghi aruutu awe r’atorobọ esi dị bidị komiịn we. (Ibạl Iiḍighi 5:42; 17:17.) Abugey aKristẹn ḍio arodon rogbeelhom ghan kẹn igey aBaibul phọ torobọ ekpisi dị awe odi. Loor esi ephomhoghiạn amatuman, bidị r’oḅaạl olhoghi rosighẹ ghan mem r’inyaạm abidị kogbeelhom dom oḍuomolhoghi r’iidereghị phọ edi bọ siphẹ aBaibul phọ.—Mạk 12:31.
OLHEGHERI OBUGHẸ
Ooḅeghiọn idị yira kotue olegheri ogbaranhaạn dị odi igbo abugey aKristẹn r’abuphẹ ro/dạph ghan bọ itughemhị r’eḍeenhaan phọ aZizọs.
4. Bidị rowạ ghan igey phọ siphẹ aBaibul phọ
Abuḅẹl aKristẹn phọ umhaghamhị maạr Ekpo-onhụ phọ Enhaạn
Abuniin awe dị oḅẹm mọ bunọ aKristẹn u/maghamhị maạr igey phọ edi bọ siphẹ aBaibul phọ. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Ighẹn itughemhị dị egbatanhaạn r’ipẹ aZizọs kụ edị awe dị oḅẹm mọ bunọ aKristẹn rotughemhị ghan?
AZizọs atughemhị ghan ipẹ edi bọ siphẹ Ekpo-onhụ phọ Enhaạn. Ibạl Jọn 18:37, kụ eeḅeghiọn ḍipuru phọ aḍiẹn:
-
Odaphạn ikpo-onhụ phọ aZizọs, ika kụ idị yira kotue olegheri Kristẹn dị odi “ekụ igey phọ”?
5. Bidị rogbeelhom ghan igey aBaibul phọ
Abuḅẹl aKristẹn phọ uḅenhị ghan bunhọn iiḅi iinhaghạn phọ
Kụ aZizọs agbi bọ ogheel k’akẹ, odị angọ ni bumatuạn phọ odị oḍighi dị odi ni k’arodon. Ibạl Matiu 28:19, 20 r’Iiḍighi 1:8, kụ eeḅeghiọn ḍipuru phọ aḍiẹn:
-
Kokaạph iiḅi iinhaghạn phọ osiemhi k’iḍighen?
6. Bidị roḍighi ghan ipẹ bidị rotughemhị bọ
Eeghe kụ ikọm idị oye dị oghol mọ Tom akuphom owol mọ onọ mamhiịn bugey aKristẹn? Ipegh VIDIO phọ, kụ eeḅeghiọn sipuru phọ edaphạn bọ siẹn.
-
Eeghe kụ iḍighi kụ aTom aroph bọ oḍuomolhoghi esi aruukụ iiḅereghị?
-
Eeghe kụ iḍighi kụ odị aḅilhẹ bọ akuphom owol mọ odị mamhiịn bugey aKristẹn?
Eḍighi maạr dị oye aḅẹm mọ onọ onyọ amatuạn aZizọs, ewạ mọ odị aḍighi aḍeenhaan. Ibạl Matiu 7:21, kụ eeḅeghiọn ḍipuru phọ aḍiẹn:
-
Odaphạn Zizọs, eeghe kụ iḍighi kụ i/nighẹ bọ opu bịn oḅẹm mọ yira abumatuạn aZizọs?
7. Bidị omoọgh ephomhoghiạn igbo abidị
Abuḅẹl aKristẹn phọ umhoọgh ephomhoghiạn siphẹ igbo phọ abidị
Abugey aKristẹn rokol ghan ni emhụ abunhọn kolhọgh ghuḍum abidị esi ooto r’osooromhinheen ḍughụm? Ipegh VIDIO phọ, kụ eeḅeghiọn sipuru phọ edaphạn bọ siẹn.
-
Eeghe kụ inyu bọ Umor phọ Lloyd otuạn Umor phọ Johansson olhọgh aghuḍum odị esi ooto r’osooromhinheen?
-
Nạ ragbi mọ ipẹ odị aḍighi bọ eḍeenhaan ni mọ odị ogey onyọ aKristẹn?
Ibạl Jọn 13:34, 35, kụ eeḅeghiọn sipuru phọ iphẹn:
-
Ika kụ idị abugey abumatuạn aZizọs kozoọm ghan we enhọn eelhe?
-
Ika kụ idị bidị koḍighi iduọn phọ mem eghạm?
ABUNIIN AWE OOTUGHIẠN MỌ: “Oomo aKristẹn abuniin phọ awe phọ ni, etigheri ekụ iiḅereghị phọ.”
-
Eghẹn esi aBaibul kụ edị nạ kaḍighinhom omạ omiteom idị yira kotue olegheri bugey aKristẹn phọ?
OGHAẠPH OOKARAGH
Abugey aKristẹn rodạph ghan ipẹ Baibul phọ aghaạph bọ, koḍeenhaan ephomhoghiạn ghalhamọ kesighenhọm ni ghuḍum abidị, koḅilhẹ ogbeelhom igey aBaibul phọ.
Ooḅula
-
Omheeraam abugey aKristẹn akpasị ḍighen?
-
Ighẹn araagharạ kụ edị kosighẹ olegheriom bugey aKristẹn?
-
Eeghe oḍighi kụ edị abugey aKristẹn roḍighi?
WAAGHỊ AMHIỊN
Tuughạ alhegheri ilọ egu awe dị rokparaghạ ghan oḍighi ipẹ bidị kotue bọ odaphạn eḍeenhaan r’itughemhị phọ aZizọs Kraist.
Miịn iyaạr dị elhoghonhaạn ḍighaạgh oniin anhịr dị aḅọgh loor angọ oḍighi asiosị, omhiịn “eghunotu awe dị okạr rooḅereghị Enhaạn.”
“Bidị Usighẹ Baibul Phọ Kụ Ophagharanhaạm Torobọ Aḍipuru!” (The Watchtower, April 1, 2014)
Miịn idị abugey aKristẹn roḍeenhaan ghan ephomhoghiạn buḅaramạ omheeraam mọ abidị dị owạ olhoghonhaạn aḍighaạgh.
Olhoghonhaạn Aḍighaạgh Bumor Ayira Mem Dị Ekperenhom Iiḅaghamhị Emite—Ookpera phọ (3:57)
Miịn raraạr dị abuḅẹl aKristẹn phọ oḍighi ghan r’idị abugey aKristẹn roḍighi ḍio arodon, dị emhoọgh muḅọph r’ipẹ aZizọs aḅẹm bọ mọ kosighẹ olegheriom bumatuạn phọ odị.
“Ighẹn Kụ Areeghe Abugey Akristẹn?” (The Watchtower, March 1, 2012)
