AZizọs aḅẹm mọ aKristẹn omoọgh oḍiiny amuụm. (Ibạl Matiu 28:19, 20) Kuolọ oḍiiny amuụm mọ p’eeghe? Kụ oye kaḍighi eeghe oteẹny aḍiigbu phọ aḍiẹn phọ?

1. Oḍiiny amuụm p’eeghe?

Mem mọ aZizọs aḍiiny bọ muụm, uḍiinye oomo aloor phọ odị siphẹ ophiịny phọ aJodạn, kụ odị ‘asoghoronụ pạ amuụm mọ.’ (Mạk 1:9, 10) Idiphọ aZizọs, abugey aKristẹn roḍiinye aani ghan kẹn ni oomo aloor oye phọ siphẹ amuụm mọ.

2. Oḍiiny amuụm remạ ghan eeghe?

Mem dị oye aḍiiny muụm, raḍeenhaan ghan m’onọ maḅọgh loor angọ aZihova Enhaạn phọ. Ika kụ idị oye raḅọgh ghan loor kangọ Enhaạn? Kụ oye phọ agbi oḍiiny amuụm, oginha odị kaaḅereghị ni aZihova aḅenhị m’onọ rawạ okumu Odị bịn k’agee-pọ. Oye phọ raguanhaan ghan ni ooḅereghị oginha aZihova ḅilhẹ r’osighẹ arigbiom mọ Enhaạn oḍighi eḅẹl iyaạr oomo adọl aghuḍum mọ odị. Odị asopha ‘opharanhaạn aloor kụ . . . oghiọm aghisigh odạph ghan,’ itughemhị phọ r’eḍeenhaan phọ aZizọs. (Matiu 16:24) Oḅọgh aloor ongọ r’oḍiiny amuụm mọ keḍighi idị kedughanhaan nyodị oḍighi oyaghirị aZihova r’awe phọ aZihova.

3. Ika kụ idị oye kasianhaan oḍiiny amuụm?

Orue osianhaan oḍiiny amuụm, pọ oye phọ katuughạ ni ilọ aZihova aḅilhẹ amoọgh omheeraam dị akpạr akị esi odị. (Ibạl Hibru 11:6.) Iḍuọn olhegheri iyaạr r’omheeraam mọ anạ rabụgh bọ, kụ edị ephomhoghiạn phọ anạ esi aZihova kebụgh. Kụ iphẹn phọ kebughẹ ni ḍiḅeraạn phọ anạ oḅenhị aani abunhọn ilọ Odị ḅilhẹ r’odaphạn asiigbu phọ odị. (2 Timoti 4:2; 1 Jọn 5:3) Mem dị oye phọ “ratelhe eten phọ epẹ aZihova rawạ bọ orue oḍighi oomo ipẹ eḅeraạn bọ nyodị,” odị katue ni asopha oḅọgh aghuḍum odị ongọ Enhaạn ḅilhẹ r’oḍiiny amuụm.—Kolosị 1:9, 10, NWT. a

 OLHEGHERI OBUGHẸ

4. Yira kotue ni otuughạ iyaạr esi oḍiiny amuụm mọ aZizọs

Ibạl Matiu 3:13-17 omhiịn araraạr dị emite mem mọ aZizọs aḍiiny bọ muụm. Kụ eeḅeghiọn sipuru phọ iphẹn:

• AZizọs aḍighi ephurukpu obumoọny mem mọ aḍiiny bọ muụm mọ ḍughụm?

• Uḍiinye ika nyodị muụm mọ? Usaraghiọm ni nyodị muụm mọ ḍughụm?

AZizọs amhiigh oḍighi phọ odị agbatanhaạn bọ, opọ Enhaạn engọ bọ nyodị siẹn ade phọ mem dị maḍiiny muụm. Ibạl Luk 3:21-23 r’aJọn 6:38, kụ eeḅeghiọn ḍipuru phọ aḍiẹn:

• AZizọs aḍiiny bọ muụm mọ, oghẹn oḍighi kụ edị odị aḍighi eḅẹl siphẹ aghuḍum m’odị?

5. Oḍiiny amuụm aḍighi ni ḍiigbu dị nạ katue ateẹny

Iitughiạn oḅọgh aloor ongọ r’oḍiiny amuụm etue ni engọ nyinhạ oghiilhaan eḅẹl amem mọ. Toroboiperolbọ, iduọn nạ raḍighinhom bọ ni raraạr phọ nạ ratuughạ bọ, kesi ni esi dị nạ ka/moọgh mun oghiilhaan ogbatạn edạ phọ ephẹn emhạn bọ ni maạr. Omhiịn awe dị morue oḍighi iduọn phọ, pọ ipegh VIDIO phọ.

Ibạl Jọn 17:3 r’aJems 1:5, kụ eeḅeghiọn ḍipuru phọ aḍiẹn:

• Eeghe kụ ketue eloghonhaạn oye ḍighaạgh ookolhobian oḍiiny amuụm?

1. Yira roḅọgh ghan loor kongọ aZihova mem dị yira oḅenhị nyodị mọ yira rowạ okumu odị k’agee-pọ

2. Mem dị yira roḍiiny muụm, yira roḍeenhaan ghan bunhọn mọ yira moḅọgh loor ayira ongọ Enhaạn

 6. Yira oḍiiny muụm bịn yira moḍighom aani pakirị eghunotu phọ aZihova

Yira oḍiiny muụm, pọ yira moḍighom aani pakirị eghunotu dị oḅọph onhụ siẹn oomo aḅirinhi phọ. Ghalhamọ r’iduọn yira oḍuạ bọ ni kirokirọ arikpisi ḅilhẹ asidọl phọ egbaranhaạn bọ ni, oomo phọ ayira oḅọph ni omheeraam ḅilhẹ odimom ghan iniin phọ asiigbu phọ. Ibạl Psalm 25:14 r’1 Pita 2:17, kụ eeḅeghiọn ḍipuru phọ aḍiẹn:

• Ika kụ idị oḍiiny amuụm ratir ghan siya oye phọ r’aZihova ḅilhẹ r’abueriphọ abumor phọ?

 OGHAẠPH OOKARAGH

AZizọs atughemhị mọ ewạ ni dị aKristẹn koḍiiny muụm. Oteẹny aḍiigbu phọ aḍiphẹ phọ, ewạ m’oye phọ amhoọgh omheeraam dị akpạr esi aZihova, adaphạn siigbu phọ Odị, aḅilhẹ aḅọgh loor angọ Nyodị.

Ooḅula

• Oḍiiny amuụm p’eeghe, kụ eeghe kụ iḍighi kụ emạn bọ ni maạr?

• Eeghe amuḅọph kụ odi igbo oḅọgh aloor ongọ r’oḍiiny amuụm?

• Eeghe iyaạr kụ edị ewạ mọ oye aḍighi kụ agbi oḅọgh aloor ongọ kụ oḅilhẹ oḍiiny amuụm?