ESI ITUUGHẠ PHỌ 25
Enhaạn Imooghonhaạn Iyira Eeghe Igbiighi?
ABaibul phọ aḅẹm mọ ‘awe rotọl ghan ekulha amem bịn kụ r’iiḅaghamhị.’ (Job 14:1) Iphẹn phọ kụ igbiighi Enhaạn ilọ ayira? Eḍighi maạr dị i/ḍighi idiphọ, odị atuạn eeghe kụ ulhẹm bọ iyira? Kụ igbiighi phọ odị kemunhughan ni ḍughụm? Ooḅeghiọn ophanyanhaạn aBaibul phọ dị kuudereghị iyira.
1. AZihova rawạ dị adọl aghuḍum ayira ketọl ika?
AZihova rawạ dị yira kokelhọm ghuḍum dị amhaạr anhighẹ. Odị alhẹm bọ buḅẹl awe phọ, Adạm r’Iv, odị aseere bidị omạ oghoony dị oghol mọ oghoony Iden. Ipẹ reten kụ “Enhaạn esẹph bidị, kụ eḅenhị bidị mọ: ‘Imuum emuzeḍi eḍighi ibadị, imuzeḍi de phọ kụ etọ ḅerẹ engọ.’” (Genesis 1:28) AZihova awạ dị bidị komaraghị, oḍighi de phọ paradaịs oḅilhẹ opogh inhạm mọ. Odị agbiighi dị oomo awe kokelhọm ghuḍum r’ogey omhoon aloor kụ oḅilhẹ otọl k’agee-pọ.
Ghalhamọ r’iduọn araraạr i/kị bọ ni ipẹ odị agbiighi bọ, arigbiom mọ Enhaạn k”enmia a. (Isaiah 46:10, 11) Odị rawạ ni mọ awe dị onhaghanhạn nyodị orọl ḍimạ adọl k’agee-pọ.—Ibạl Ogananami 21:3, 4.
2. Yira kokelhọm ika ghuḍum dị amhoọgh emhụ nyiidiphọ?
AZihova ulhẹm iyira eten dị yira kowạ ghan iiḅakiọm odị, pọ kụ iyaạr phọ yira omhoọgh bọ eephuạ olhegheri kụ oḅilhẹ ooḅereghị odị. (Ibạl Matiu 5:3-6.) Odị rawạ ni mọ oḍigh righirị dị ekpạr r’odị, “odạph oomo areten phọ odị, ophomhoghiạn nyodị,” kụ oḅilhẹ “okumu nyodị r’oomo ekpom [ayira].” (Deuteronomy 10:12; Psalm 25:14) Yira oḍighi iphẹn phọ, yira komoọgh ni ogey oḅaạl olhoghi ghalhamọ yira umhoọgh ni iiḅaghamhị. Mem dị yira ooḅereghị aZihova, aghuḍum mọ ayira kamoọgh ni emhụ, loor esi dị yira roḍighi ipẹ odị rawạ bọ.
OLHEGHERI OBUGHẸ
Ooḅeghiọn omhiịn idị eten phọ aZihova alhẹm bọ de phọ eḍeenhaan eboom ephomhoghiạn phọ odị ḅilhẹ r’idị Ekpo-onhụ phọ odị egananami rigbiom mọ odị ilọ ayira.
3. AZihova rawạ dị awe kokelhọm ookiạ aghuḍum
Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Enhaạn atụ eeghe kụ alhẹm bọ de phọ?
Ibạl Ecclesiastes 3:11, kụ eeḅeghiọn ḍipuru phọ aḍiẹn:
-
Iphẹn phọ etughemhị nyinhạ eeghe ilọ aZihova?
4. Arigbiom mọ aZihova k”enmia
Ibạl Psalm 37:11, 29 r’Isaiah 55:11, kụ eeḅeghiọn ḍipuru phọ aḍiẹn:
-
Yira ulhegheri ika mọ arigbiom mọ aZihova k”enmia?
Idiphọ roselhemhi ghan bọ ni otu dị mophuẹ, kụ idị Enhaạn kaselhemhi aani de phọ awe mophuẹ bọ, kụ angọ buphẹ ophomhoghiạn bọ nyodị
5. Okumu aZihova ringọ ghan iyira ogey ogbaanyạn
Olhegheri iyaạr phọ Enhaạn atụ bọ kụ ulhẹm iyira ringọ ghan ni iyira oḅaạl olhoghi. Ipegh VIDIO phọ, kụ eeḅeghiọn ḍipuru phọ edaphạn bọ siẹn.
-
Eeghe asuọ kụ edị aTerumi amhoọgh siẹn alhegheri bọ iyaạr phọ otụ bọ kụ olhẹm oye?
Ibạl Ecclesiastes 12:13, kụ eeḅeghiọn ḍipuru phọ aḍiẹn:
-
Yira koḍeenhaan ika mọ yira rosereghiạn ni ibadị araraạr phọ aZihova muḍighinhaan bọ iyira?
OYE ATUE NI APURU MỌ: “Enhaạn atụ eeghe kụ ulhẹm bọ iyira?”
-
Nạ kapagharanhaạn ika?
OGHAẠPH OOKARAGH
AZihova rawạ dị yira kokelhọm ghuḍum siẹn ade phọ dị iiḅaghamhị i/lo. Mem dị yira okumu nyodị r’oomo ekpom, yira komoọgh ni ogey ogbaanyạn siphẹ aghuḍum mọ ayira—ghalhamọ nyiidiphọ.
Ooḅula
-
AZihova atụ eeghe kụ alhẹm bọ Adạm r’Iv?
-
Yira ulhegheri ika mọ arigbiom Enhaạn ilọ omhạr awe k”enmia?
-
Nạ kamoọgh ika ogey ogbaanyạn siphẹ aghuḍum mọ anạ?
WAAGHỊ AMHIỊN
Miịn raraạr dị eḍeenhaan mọ oghoony phọ Iden akạr ri arọl siẹn ade phọ.
“Oghoony Phọ Iden —Arọl Li Obobọ O/rọl?” (The Watchtower, January 1, 2011)
Miịn iyaạr phọ eḍighi bọ kụ yira kokuphom bọ ni owol mọ ko/piemhi de phọ.
Miịn idị aBaibul phọ aghaạph ilọ omhoọgh ogbaanyạn siphẹ aghuḍum mọ anạ.
Miịn idị oye dị aatughiạn mọ onọ amoọgh ni torobọ iyaạr siphẹ aghuḍum mọ odị amhiịn iyaạr dị odị u/moọgh.
a Siphẹ esi ituughạ phọ etum bọ siẹn, yira kotuughạ iyaạr phọ eḍighi bọ kụ adọl phọ enmia bọ.
