OMHIIGHOM OGHAẠPH
ESI ITUUGHẠ PHỌ 4
Osooromhi Aloor
Aḍinhị-olhogh: “Torobọ onyọ anyina asighenọm ghan mọ ophorị phọ kụ aḍighi ogey apu nyinọ!”—Fil. 2:3.
Idị APọl Aḍighi
1. Pogh VIDIO phọ, obobọ bạl Iiḍighi 26:2, 3. Kụ aaḅeghiọn sipuru phọ edaphạn bọ siẹn:
-
(1) APọl aḍeenhaan ika osooromhi aloor mem mọ odị raḅaanhaạn bọ Uw-emhạ phọ Agripạ?
-
(2) APọl aḍighi ika pidị abuphẹ ronaghạn bọ oghaạph phọ ogbon aZihova r’aḍinyạ iigbia phọ kparipẹ rogbon odị?—Miịn Iiḍ. 26:22.
Ipẹ APọl Aḍighi Bọ Itughemhị Iyira Eeghe?
2. Oghaạph phọ ayira kakạr atir we mem dị yira oghaaphọm r’osooromhi aloor ḅilhẹ r’eten olhọgh eegu.
Tuughaạny Pọl
3. Kaạph ghan r’eten olhọgh eegu. Ka/ḍighi idị opọ nạ rakaaphạn bọ kaloghoma mọ nạ kụ ulhegheri amhạn, ḅilhẹ mọ odị iyaạr o/lhegheri. Ḅaanhaạn oye phọ r’eten olhọgh eegu.
4. Ḍeenhaan ghan mọ ipẹ nạ ratughemhị bọ edi ni siphẹ aBaibul phọ. ABaibul phọ apạm ikpo onhụ dị ketue ni etir rokpom awe. Mem dị yira osighẹ oḍighinhom, yira rologhonhaạn ghan we ḍighaạgh omhoọgh omheeraam dị okpasị siphẹ aBaibul phọ.
5. Ka/kạgh olhoghi. Ka/tolhonhaạn oḍighi idị oye phọ kameeraam mọ iyaạr dị nạ rakaạph kụ igey. Yira ro/wạ ghan oogbakiạn r’awe. Ḍeenhaan osooromhi aloor esi ophoomhị aloor kụ osiemhi eekunha oghaạph phọ mem dị ewạ mọ ḍuạ. (Prov. 17:14; Taị. 3:2) Eḍighi maạr dị nạ u/ḅaạm igbagarạ ikpo onhụ, kemiteom ni eepoogh omhoọgh imạ araghaạph r’oye phọ enhọn amem.
