EMHUOGHAẠPH ITUUGHẠ PHỌ 25
AḌUỌR PHỌ 7 AZihova Inyaạm Ayira
Legheri Mọ AZihova Kụ “Enhaạn Phọ Edi Ghan Bọ”
“AZihova odi ghan bịn!”—PS. 18:46.
EGBON
Suọ phọ yira romoọgh ghan bọ esi olegheri mọ Enhaạn phọ yira rooḅereghị ghan bọ kụ “Enhaạn phọ edi ghan bọ.”
1. Eeghe kụ reloghonhaạn ghan ḍighaạgh we phọ aZihova oghiọm aghisigh ooḅereghị odị etigheri iiḅaghamhị dị osoman?
ABAIBUL phọ akaạph ni mọ amem mọ yira odi bọ kekpạr ri agey orọl. (2 Tim. 3:1) Awe phọ aZihova rosoman aani ghan ni iiḅaghamhị phọ torobọ oye siẹn aḅirinhi phọ aSetan rasoman ghan bọ. Oḅarạm isiphẹ phọ, oḅilhẹ rugbiphoghọm ghan iyira loor iduọn yira rokumu bọ aZihova. Eeghe kụ rilhoghonhaạn ghan iyira ḍighaạgh oghiọm aghisigh ooḅereghị aZihova etigheri iiḅaghamhị dị yira osoman? Eniin ekpanhạ iyaạr dị kilhoghonhaạn iyira ḍighaạgh pọ olhegheri mọ aZihova “Enhaạn dị edi ghan.”—Jer. 10:10; 2 Tim. 1:12.
2. Eeghe iyaạr dị yira olhegheri ilọ aZihova kụ rikparamhị ghan iyira?
2 AZihova akạr odi ghan kụ rulhoghonhaạn ghan kẹn iyira ḍighaạgh mem lọ yira osoman iiḅaghamhị. (2 Chron. 16:9; Ps. 23:4) Olhegheri mọ Enhaạn amoọgh ogbolhomaam ayira, kụ aakolhobian kẹn olhoghonhaạn ayira ḍighaạgh ringọ ghan iyira inyaạm dị yira kotue osoman torobọ iiḅaghamhị. Ooḅeghiọn eḍeenhaan Uw-emhạ phọ Devid omhiịn idị iphẹn phọ eru inẹ.
3. Ikpo onhụ phọ aDevid aḅẹm bọ mọ “aZihova kụ Enhaạn dị edi ghan” remạ ghan eeghe?
3 ADevid akạr alhegheri aZihova kụ abeḍenhọm kẹn nyodị. Mem mọ Uw-emhạ phọ Sọl r’abunhọn roporogh bọ Devid oghiigh, odị alhọm ni aZihova olhoghonhaạn aḍighaạgh. (Ps. 18:6) Mem mọ Enhaạn ephagharanhaạn bọ Devid kụ etagharạn bọ nyodị, odị agbeelhom mọ: “AZihova kụ Enhaạn dị edi ghan!” (Ps. 18:46) Ikpo onhụ phọ aDevid iphẹn phọ remạ ghan eeghe? ADevid aghaạph ghan akparamhị mọ aZihova kụ egey Enhaạn, dị reloghonhaạn ghan ḍighaạgh rebenhẹ phọ odị. ADevid akuphom ni owol mọ aZihova alegheri ni ipẹ remitenhaan bọ nyodị ḅilhẹ anyaaghiạn ni olhoghonhaạn odị ḍighaạgh. Ipẹ phọ ilhoghonhaạn Devid ḍighaạgh oghiọm aghisigh okumu r’oseeny ghan aZihova.—Ps. 18:28, 29, 49.
4. Eeghe asuọ kụ edị yira komoọgh eḍighi maạr dị yira omhiịn aZihova idiphọ Enhaạn dị edi ghan?
4 Mem dị yira okuphom owol mọ aZihova odi ghan bịn kilhoghonhaạn iyira ḍighaạgh okumu odị r’oophugh. Ipẹ phọ kingọ iyira inyaạm oghiọm aghisigh okparạm odẹgh ophogh dị yira osoman ḅilhẹ kinyu iyira oghiọm aghisigh okumu ghan aZihova. Kụ oḅilhẹ osopha omhoọgh asiya dị ekpạr r’aZihova.
ENHAẠN PHỌ EPẸ EDI GHAN BỌ KEKPARAMHỊ NI NYINHẠ
5. Eeghe kụ ringọ ghan iyira akpọ oḅio mem lọ yira osoman odẹgh ophogh? (Filipai 4:13)
5 Yira kotue ni okpạr opu torobọ odẹgh ophogh dị yira osoman, mughumọ obạm obobọ ogbogh, eḍighi maạr dị yira ootughiạn ghan mọ aZihova kụ Enhaạn dị edi ghan ḅilhẹ mọ odị odi ni olhoghonhaạn ayira ḍighaạgh. Odị katue ni ulhoghonhaạn iyira ḍighaạgh omherenyạn atorobọ iiḅaghamhị, loor esi dị iiḅaghamhị dị epel nyodị i/lo. Odị kụ amhoọgh iikpọ dị epelheghiom, esi iduọn phọ, odị kungọ ni iyira inyaạm okparạm. (Bạl Filipai 4:13.) Iphẹn phọ ringọ ghan iyira akpọ oḅio mem lọ yira osoman odẹgh ophogh. Mem dị aZihova ulhoghonhaạn iyira ḍighaạgh okpạr opu iiḅaghamhị dị eghom, ringọ ghan iyira akpọ oḅio mọ mem dị yira osoman iiḅaghamhị dị ebụgh, odị kulhoghonhaạn kẹn ni iyira ḍighaạgh.
6. Eeghe araraạr dị emitenhaan Devid mem eghoroghọr odị kụ ibughẹ akpọ oḅio odị esi aZihova?
6 Ooḅeghiọn iyạl araraạr dị emitenhaan Devid dị elhoghonhaạn ḍighaạgh obughẹ oḍuomolhoghi phọ odị esi aZihova. Mem dị aDevid aghom kụ aphogh ghan iyool igạ odẹ odị, ebeẹny isighẹ ni oniin iyool phọ, kụ enhọn amem anạm-dikạ aru kẹn ni asighẹ onhọn. Iyạl phọ amem mọ aDevid r’akpọ oḅio aphorogh ni ilhom inhạm mọ ateẹny, aphẹl iyool phọ asghẹ. Ghalhamọ r’iduọn phọ ni, odị o/ḅẹm mọ odị asighẹ iikpọ odị kụ aḍighinhom. Odị alhọgh ni elhegh mọ aZihova kụ alhoghonhaạn nyodị ḍighaạgh. (1 Sam. 17:34-37) ADevid o/wulha raraạr phọ emitenhaan bọ nyodị. Ogbiran ghan araraạr phọ iphẹn phọ ingọ ni nyodị akpọ oḅio mọ Enhaạn phọ edi ghan bọ kangọ ni nyodị inyaạm okaran idị kemite ghisigh.
7. Eeghe kụ edị aDevid agbon, kụ ika kụ idị ipẹ phọ elhoghonhaạn nyodị ḍighaạgh omherenyạn aGoliath?
7 Ghisigh mem dị aDevid ko/mhạn iyạl-dị asiạ, odị aghị ni epẹ amarugh abuọ eghạm mọ Izrạl. Odị amhiịn mọ awe eghạm mọ Izrạl rokiilhaan ghan ophelhegbe eghạm olọ aFilistia dị oghol mọ Goliath, dị “rapạ ghan we eghạm mọ Izrạl.” (1 Sam. 17:10, 11) Awe eghạm mọ Izrạl ughiilhaan ghan loor esi dị bidị ugbon ḍibụgh phọ aGoliath r’ipạ phọ odị. (1 Sam. 17:24, 25) Toroboiperolbọ, aDevid, amhiịn raraạr enhọn eten. Odị o/mhiịn iphẹn remite bọ idiphọ ipạ dị ropạ weye eghạm mọ Izrạl bịn, kuolọ odị amhiịn idiphọ ipạ dị ropạ “Enhaạn phọ re/mugh ghan bọ.” (1 Sam. 17:26) ADevid aphụr aatughiạn aZihova. ADevid aḍuom olhoghi mọ Enhaạn phọ elhoghonhaạn bọ nyodị ḍighaạgh mem mọ odị aḍighi bọ okoriom iyool-igạ phọ keḅilhẹ ni eloghonhaạn nyodị ḍighaạgh nyiidiphọ. R’okuphom owol mọ Enhaạn kebakị ni nyodị, aDevid aghị ni abian aGoliath. Kụ iḍiphọ yira olhegheri bọ ni, odị akpạr ri apu!—1 Sam. 17:45-51.
8. Eeghe kụ keloghonhaạn ḍighaạgh okparamhị oḍuomolhoghi ayira mọ aZihova kulhoghonhaạn ni iyira ḍighaạgh mem iiḅaghamhị? (Miịn kẹn afoto phọ.)
8 Yira kẹn kotue ni okaran odẹgh ophogh oḅilhẹ omoọgh ekol eḍighi maạr dị yira ootughiạn ghan mọ Enhaạn phọ edi ghan bọ bịn aakolhobian ni olhoghonhaạn ayira ḍighaạgh. (Ps. 118:6) Yira kotue ni okuphom owol mọ Enhaạn kilhoghonhaạn ni iyira ḍighaạgh esi ootughiạn ghan araraạr phọ ipẹ odị maḍighi ghan bọ igbaany. Bạl ghan riisi aBaibul dị reetughianhạm ghan nyinhạ idị aZihova aphẹl rebenhẹ odị mem dị eten. (Isa. 37:17, 33-37) Pogh kẹn ni iinhaghạn dị edi siphẹ jw.org, dị eḍeenhaan idị aZihova malhoghonhaạn ḍighaạgh bumor r’abumaranhi phọ ayira ḍio phọ arodon. Tuutughiạn kẹn reten dị aZihova malhoghonhaạn ghan nyinhạ ḍighaạgh. Kaa/ḅaghamhiạn loor eḍighi maạr dị nạ u/tue uutughiạn mem dị aZihova aḍighinhaan nyinhạ iyaạr dị ekạr eḍighan elhegh, idiphọ obian ebeẹny obobọ anạm-dikạ. Eeghe kụ iḍighi? Iyaạr dị ewạ mọ legheri pọ, aZihova maḍighinhaan ni nyinhạ ibadị araraạr! AZihova kụ aḍur nyinhạ oru oḍigh arighirị r’odị. (Jọn 6:44) Kụ esi olhoghonhaạn aḍighaạgh odị bịn kụ edị nạ odi bọ siẹn igey phọ. Esi iduọn phọ, nạ katue ni alọm aZihova olhoghonhaạn anạ ḍighaạgh ootughiạn amem dị odị aphagharanhaạn iiḅereghị anạ, alhoghonhaạn nyinhạ ḍighaạgh mem mọ opọ nạ awạ bọ, obobọ alhoghonhaạn nyinhạ ḍighaạgh mem iiḅaghamhị. Ogbiran ghan araraạr phọ iphẹn phọ keloghonhaạn ḍighaạgh okparamhị oḍuomolhoghi phọ anạ, mọ aZihova kakiọm ni ghisigh alhoghonhaạn nyinhạ ḍighaạgh.
Iiḅaghamhị phọ yira osoman bọ eḍighi idiphọ eepoogh dị aZihova amhoọgh osighẹ ophagharanhaạm aSetan (Miịn siikpịgh phọ 8-9)
9. Ewạ mọ ootughiạn eeghe mem dị yira osoman odẹgh ophogh? (Proverbs 27:11)
9 Mem dị yira omhiịn aZihova idiphọ oye dị odi ghan, kilhoghonhaạn iyira ḍighaạgh omhiịn iiḅaghamhị phọ ayira eten dị eeleeny. Ika? Keḍighi idị yira komiịn iiḅaghamhị phọ ayira idiphọ eepoogh dị aZihova amhoọgh osighẹ ophagharanhaạm aSetan. Eru aḅẹm mọ mem dị yira omhoọgh iiḅaghamhị, yira kobilhẹ ni okumu aZihova. (Job 1:10, 11; bạl Proverbs 27:11.) Esi iduọn phọ, mem dị yira oḅạr aZihova etigheri iiḅaghamhị dị yira osoman, reḍeenhaan ghan mọ yira opomhoghiạn ni aZihova ḅilhẹ mọ Eru phọ ogbaạm okpẹ. Kụ iḍighi kụ, eḍighi maạr dị nạ amhoọgh iiḅaghamhị ikpoki, obobọ abuọ itooghị phọ osophoghom rukumuan phọ nạ rangọ bọ aZihova, obobọ nạ odi ekpisi dị awe ro/naghạn iiḅi iinhaghạn phọ, obobọ nạ asoman inhọn iiḅaghamhị, legheri mọ adọl phọ anạ mengọ nyinhạ eepoogh oḍighi idị olhoghi aZihova kaḅaạl. Ka/bulha kẹn mọ odị ka/meera mọ odẹgh ophogh dị apel nyinhạ ateẹny nyinhạ. (1 Kọr. 10:13) Odị kangọ ni nyinhạ inyaạm pidị nạ atue akparạm.
ENHAẠN PHỌ EDI GHAN BỌ KENMO NI NYINHẠ RUUNMO
10. Enhaạn phọ edi ghan bọ keḍighinhaan eeghe buphẹ rooḅereghị bọ nyodị?
10 AZihova ranmo ghan ni ruunmo buphẹ rooḅereghị bọ nyodị. (Hib. 11:6) Odị raḍighi ghan idị yira komoọgh eephọ olhoghi nyiidiphọ, kụ epẹ ghisigh odị kunmoom iyira ghuḍum k’agee-pọ. Yira kotue ni oḍuomolhoghi mọ aZihova anyaaghiạn ni aḅilhẹ amoọgh iikpọ onmoom ayira ruunmo. Esi iduọn phọ, ewạ mọ osighẹ oomo inyaạm mọ ayira okumuom aZihova idiphọ arebenhẹ phọ odị iḍiodi phọ. Kụ iphẹn phọ kụ edị aTimoti aḍighi.—Hib. 6:10-12.
11. Eeghe kụ inyu bọ Timoti olhọgh oomo inyaạm odị siphẹ arukumuan ookpomhoghan phọ? (1 Timoti 4:10)
11 Bạl 1 Timoti 4:10. ATimoti akuphom ni owol mọ Enhaạn phọ edi ghan bọ kanmo ni nyodị ruunmo. Esi iduọn phọ, odị alhọgh ni inyaạm rukumuan aZihova aḅilhẹ alhoghonhaạn ḍighaạgh bumor phọ. Ika? Otelhedom mọ aPọl aroma nyodị onhighemhị eten itughemhị phọ odị siphẹ ookpomhoghan phọ r’epẹ erugh phọ. APọl aḅilhẹ kẹn ni aroma nyodị oḍighi egey eḍeenhaan ongọ abumor r’abumaranhi phọ. Ungọ kẹn ni nyodị inhọn iiḍighi dị ekpạr ri iboom, idiphọ oḅaạm ghan abulọ opiomạn, kuolọ, reten ephomhoghiạn. (1 Tim. 4:11-16; 2 Tim. 4:1-5) Eeni amem abunhọn awe u/miịn ghan obobọ u/sereghiạn ghan iiḍighi phọ aTimoti aḍighi ghan bọ. Kuolọ, odị akuphom ni owol mọ aZihova kanmo ni nyodị ruunmo.—Rom 2:6, 7.
12. Eeghe kụ renyu ghan bọ ikumor awe phọ olhọgh oomo inyaạm abidị siphẹ arukumuan phọ aZihova? (Miịn kẹn afoto phọ.)
12 Rodon, ikumor awe ookpomhoghan phọ kotue kẹn ni okuphom owol mọ aZihova amiịn ni kụ aḅilhẹ rasereghiạn imạ iiḍighi phọ bidị roḍighi bọ. Ikumor awe ookpomhoghan phọ ropogh ghan iyool phọ, kotughemhị oḅilhẹ omite epẹ erugh phọ. Ibadị abidị oḅilhẹ kẹn ni rologhonhaạn ghan ḍighaạgh mem dị rolọgh ruutu ookpomhoghan phọ r’amem dị iiḅaghamhị emite. Abunhọn odị agạ Oghị Ghan Ophogh Abumor Dị Odi Otu Arookonom obobọ agạ aHospital Liaison Committee. Ikumor awe phọ roḍighi bọ iiḍighi phọ iphẹn phọ olegheri ni mọ ookpomhoghan phọ olọ aZihova, k/olọ oye. Esi iduọn phọ, bidị rolọgh ghan oomo inyaạm abidị siphẹ arukumuan phọ iphẹn phọ, kụ oḅilhẹ oḍuomolhoghi mọ aZihova kanmo ni bidị ruunmo.—Kọl. 3:23, 24.
Enhaạn phọ edi ghan bọ kekpẹ ni nyinhạ iikpiạ loor ikuph phọ nạ alhọgh bọ okumuan isiphẹ ookpomhoghan phọ (Miịn siikpịgh phọ 12-13)
13. AZihova amiịn ika raraạr phọ ipẹ yira roḍighinhaan ghan bọ nyodị?
13 K/oomo ayira kụ kotue okumuan idiphọ ikumor awe. Kuolọ torobọ onyọ ayira amoọgh ni iyaạr dị katue aḍighinhaan aZihova. Enhaạn phọ ayira rasereghiạn ghan ni mem dị yira osighẹ oomo inyaạm ayira okumuom nyodị. Odị ramiịn ghan ni mem dị yira osogh aani osogh obakiọm oḍighi omhạr phọ ghalhamọ ighom ni. Olhoghi odị raḅaạl ghan ni mem dị yira ophoophe ḍighaạgh ayira kụ ophagharanhaạn aani ḍipuru otu ituughạ, ghalhamọ yira rokiil ghan ni umugholoor. Reḅaạl ghan kẹn olhoghi odị mem dị yira osạr owilhenhaạn oye dị upiomạn iyira. Eḍighi maạr dị nạ alhoghoma mọ nạ o/rue oḍighi raraạr dị nạ awạ oḍighinhaan aZihova, kuphom ni owol mọ odị amaghamhị ni maạr ipẹ nạ arue bọ raḍighi. Odị aphomhoghiạn ni nyinhạ, kụ kanmo ni nyinhạ ruunmo.—Luk 21:1-4.
KIỌM NI GHISIGH ATUMAN ENHAẠN PHỌ EDI GHAN BỌ
14. Ika kụ idị omhoọgh asiya dị ekpạr r’aZihova kilhoghonhaạn iyira ḍighaạgh oghiọm aghisigh okumu odị? (Miịn kẹn afoto phọ.)
14 Eḍighi maạr dị arighirị phọ ayira r’aZihova ekpạr, pọ kidughanhaan ni iyira oghiọm aghisigh okumu odị. Ipẹ emitenhaan bọ Josef eḍeenhaan iphẹn phọ. Odị o/mheera opesi ipesi loor esi dị asiya phọ odị r’aZihova ikpạr ri. Odị o/wạ oḍighi iyaạr dị kepin esi aZihova. (Gen. 39:9) Orue omhoọgh asiya dị ekpạr r’aZihova pọ ewạ mọ yira ooḅereghị ghan kụ oḅilhẹ otuughạ ghan Ekpo Onhụ phọ odị. Asiya phọ ayira r’odị kepoph ghan bịn. Idiphọ aJosef, eḍighi maạr dị asiya phọ ayira r’aZihova ekpạr, yira ko/ḍighi iyaạr dị kepin esi Odị.—Jems 4:8.
Oḍuraan ghan otuman Enhaạn phọ edi ghan bọ Zihova kelhoghonhaạn nyinhạ ḍighaạgh orọl adọl dị ekpẹ oḍuomolhoghi (Miịn siikpịgh phọ 14-15)
15. Ipẹ emitenhaan bọ we phọ Izrạl epẹ edalạ phọ itughemhị iyira eeghe? (Hibru 3:12)
15 Redugh ghan agey owilhẹ aZihova mem dị oye phọ u/ḍuom mun olhoghi nyodị. Ooḅeghiọn ipẹ emitenhaan bọ we phọ Izrạl mem mọ bidị orọl bọ epẹ edalạ phọ. Bidị ulhegheri ni mọ aZihova odi ni, kuolọ bidị umhiigh omhoọgh iikia mughumọ odị kapogh ni bidị agey. Bidị ukạr kẹn ni opuru mọ: “AZihova odi ni r’ayira obobọ o/lho ḍughụm?” (Ex. 17:2, 7) Esi iduọn phọ, bidị uḅaạr ri emhụ oghị esi Enhaạn. Yira r’amem r’amem u/wạ odaphạn aani eḍeenhaan phọ abidị eḍighi bọ eḍeenhaan iphụr arurụ.—Bạl Hibru 3:12.
16. Eeghe kụ ketue edẹgh epogh omheeraam mọ ayira?
16 Aḅirinhi phọ yira odi bọ raḍighi ghan idị kikparanhaạn iyira omhoọgh asiya dị ekpạr r’aZihova. Ibadị u/meeraam mọ Enhaạn edi ghan ni. Ibadị amem, rekịgh ghan mudị abuphẹ ro/naghanhạn ghan bọ Enhaạn kụ rokelhọm ghuḍum. Ipẹ phọ etue ni edẹgh epogh oḍuomolhoghi phọ ayira esi aZihova. Ghalhamọ r’iduọn yira omheeraam bọ ni mọ Enhaạn edi ni, yira otue ni omiigh ookia mughumọ odị kulhoghonhaạn ni iyira ḍighaạgh. Amem irọl li dị opọ agẹ bọ Psalm 73 amhoọgh iikia phọ iphẹn phọ. Odị amhiịn dị abuphẹ roo/ko ghan bọ iilhogh phọ Enhaạn kụ rokelhọm ghuḍum. Iphẹn phọ iḍighi idị odị amhiigh ookia mughumọ asuọ odi ni okumu Enhaạn.—Ps. 73:11-13.
17. Eeghe kụ kilhoghonhaạn iyira ḍighaạgh oḍuraan ghan otuman aZihova?
17 Eeghe kụ ilhoghonhaạn ḍighaạgh okọ suọr phọ oolemhi iitughiạn phọ odị? Odị aatughiạn ipẹ kemitenhaan bọ we phọ abuphẹ owilhẹ bọ oḍuomolhoghi aZihova. (Ps. 73:18, 19, 27) Odị aḅilhẹ kẹn aatughiạn suọ dị odi okumu Enhaạn. (Ps. 73:24) Yira otue kẹn ni ootughiạn ḍisẹph kirokirọ dị yira momhoọgh iduọn yira rokumu bọ aZihova. Kụ asighẹ ipẹ phọ aphoghom idị aghuḍum anạ mutọl mughumọ nạ ra/kumu bọ aZihova. Oḍighi ghan iduọn phọ kilhoghonhaạn iyira ḍighaạgh oghiọm aghisigh okumu aZihova kụ osopha aani idiphọ okọ suọr phọ. Kụ yira kotue ni oḅẹm aani idiphọ okọ suọr phọ aḅẹm bọ mọ: “Kụ elọ amhị, oḍuraan ghan otuman Enhaạn kụ inhighenhaạn imhị.”—Ps. 73:28.
18. Eeghe kụ iḍighi kụ i/wạ bọ mọ oghiilhaan ipẹ kemite bọ ghisigh?
18 Yira kotue ni okpạr opu torobọ odẹgh ophogh dị yira osoman, loor esi dị yira roḍighi ghan ‘oḍighi kongọ okaraghị Enhaạn phọ edi ghan bọ.’ (1 Tẹs. 1:9) Enhaạn phọ ayira uphomhoghiạn ni iyira, ḅilhẹ kulhoghonhaạn ni iyira ḍighaạgh. Odị arolhạn ni rebenhẹ phọ odị iḍiodi phọ, kụ odị odianhaan ni r’ayira ḍio phọ arodon. Moọny amem yira kosoman ni igbogh iiḅaghamhị dị k”emite ghan. Kuolọ aZihova katọl li r’ayira. (Isa. 41:10) Eḍighi idị torobọ onyọ ayira kaḅẹm r’oḍuomolhoghi mọ, aZihova kụ rulhoghonhaạn imhị ḍighaạgh mị ka/kiilhaan.—Hib. 13:5, 6.
AḌUỌR PHỌ 3 Our Strength, Our Hope, Our Confidence
