Ewạ omheeraam orue oḍighi araraạr dị keḅeraạn aZihova. Kuolọ aBaibul phọ aḅẹm ni mọ, oomo awe ku/moọgh omheeraam. (2 Tẹs. 3:2) Mem mọ otelhedom mọ Pọl aghaạph bọ iphẹn phọ, odị aghaạph ghan ilọ “abukarạph awe” phọ ogbiphoghọm ghan bọ nyodị. Kuolọ, ikpo onhụ phọ odị egbolhomaam ni torobọ oye. Abuniin awe odi ni dị u/wạ omheeraam mọ Enhaạn edi ni dị elhẹm oomo araraạr. (Rom 1:20) Abunhọn odi dị omheeraam mọ iyaạr obobọ oye odi ni dị amhoọgh iikpọ dị epu ilọ abidị. Kuolọ ophọn phọ ko/gey omheeraam.

Ewạ mọ okuphom owol mọ aZihova odi ni ḅilhẹ mọ odị ranmo ghan ni ruunmo we dị omhoọgh omheeraam dị akpạr oghị esi odị. (Hib. 11:6) Orue omhoọgh odọ omheeraam mọ ophọn phọ, yira omoghi olhoghonhaạn aḍighaạgh uwaloor iigbia phọ Enhaạn. Kụ omhoọgh uwaloor iigbia phọ pọ yira kolọm aZihova. (Luk 11:9, 10, 13) Enhọn ekpanhạ eten omhoọgh uwaloor iigbia phọ pọ aạl ghan Ekpo-onhụ phọ Enhaạn ogẹ bọ dị eego esi uwaloor phọ aZihova. Kụ ogbiran ghan ipẹ yira aạl bọ kụ osighẹ oḍighinhom, kilhoghonhaạn iyira ḍighaạgh orọl adọl aghuḍum dị keḍeenhaan mọ yira omoọgh ni ogey omheeraam.