EMHUOGHAẠPH ITUUGHẠ PHỌ 20
AḌUỌR PHỌ 67 “Preach the Word”
Ephomhoghiạn Enyu Nyinhạ Oghiọm Aghisigh Oghaạph Iiḅi Iinhaghạn Phọ!
“Tutụ reteẹny eekuna phọ, kopụr okaạph ooḅi oghaạph oleenye oomo areelhe.”—MẠK 13:10.
EGBON
Ipẹ ephomhoghiạn rinyu ghan bọ iyira olhọgh oophugh r’okuọm aloor siphẹ oḍighi oghaạph iiḅi iinhaghạn phọ.
1. Yira utuughạ eeghe siphẹ aruupuruan phọ ropạm ghan bọ torobọ alhạ olọ 2023?
SIPHẸ aruupuruan phọ ropạm ghan bọ torobọ alhạ olọ 2023, a ologhi ayira aḅaạl li onhaghạn imhoom araraạr dị mooḅenhion siphẹ omheeraam mọ ayira r’iiḍighi arukumuan phọ ayira epẹ erugh phọ. Esi omaạm, yira utuughạ mọ mem dị amuphe aBabilọn Ogbogh phọ aten, abuniin awe komoọgh ni eepoogh oḍighan ayira okumu aZihova. Uḅilhẹ ni kẹn uḅenhị iyira mọ emhiigh unwanyụ aNovember 2023, abukaaphọm ilọ Omhạr phọ ko/ngọ ghan mun oomo iiḍighi arukumuan abidị epẹ erugh phọ. Ooḅenhion phọ ophọn phọ ramạ ghan mọ oḍighi oghaạph iiḅi iinhaghạn phọ ayira epẹ erugh phọ o/kạr mun omạn maạr ḍughụm? Eeye!
2. Eeghe kụ iḍighi kụ ewạ bọ mọ oogboronhom oghaạph iiḅi iinhaghạn phọ? (Mạk 13:10)
2 Ophọn kụ amem dị ekạr ewạ oogboronhom oḍighi iphelhegbeel phọ. Eeghe kụ iḍighi? Loor esi dị eekunha aḅirinhi phọ ophọn phọ mekpulhạn. Ooḅeghiọn idị aZizọs aghaạph idị egbolhomaam oghaạph iiḅi iinhaghạn phọ siḍio aruukunha phọ. (Bạl Mạk 13:10.) Odaphạn ipẹ aMatiu agẹ bọ, aZizọs aghaạph ni mọ iiḅi iinhaghạn phọ kokaạph ni oleenye oomo aḅirinhi phọ kụ “eekuna phọ” egbi oteẹny. (Mat. 24:14) Ikpo onhụ phọ ipẹ phọ remạ ghan eekunha aḅirinhi phọ aSetan. AZihova magu ni ‘ḍio r’amem’ dị aḅirinhi phọ aSetan kasi eekunha. (Mat. 24:36; 25:13; Iiḍ. 1:7) Eghul eḅaạl yira roḍuraan ghan bịn kotuman ḍio phọ aḍiphẹ phọ. (Rom 13:11) Kuolọ nyiidiphọ, ewạ mọ oghiọm ghisigh oghaạph iiḅi iinhaghạn phọ kụ eekunha phọ egbi oteẹny.
3. Eeghe kụ rinyu ghan bọ iyira oghaạph iiḅi iinhaghạn phọ?
3 Iduọn yira roḍighi bọ oḍighi iphelhegbeel phọ, ewạ ni mọ ootughiạn ḍipuru phọ aḍiẹn emhạn bọ ni maạr: Eeghe kụ iḍighi kụ yira rogbeelhom ghan bọ iiḅi iinhaghạn phọ? Oghaạph onyen, ephomhoghiạn kụ rinyu ghan iyira oghaạph iiḅi iinhaghạn phọ. Ephomhoghiạn phọ yira omhoọgh bọ oghị esi iiḅi iinhaghạn phọ, esi awe, kụ dị epelhom pạ, ephomhoghiạn phọ yira omhoọgh bọ oghị esi aZihova r’aḍien phọ odị kụ rinyu ghan bọ iyira oghaạph iiḅi iinhaghạn phọ. Ooḅeghiọn iphẹn phọ eniin etum nyeniin.
YIRA ROGBEELHOM GHAN LOOR ESI DỊ YIRA OPOMHOGHIẠN IIḄI IINHAGHẠN PHỌ
4. Retọl ghan ika esi ayira mem dị yira onhaghạn imạ iinhaghạn?
4 Nạ aatughiạn ni idị erọl esi anạ mem dị nạ anhaghạn imạ iinhaghạn, iduọn amem dị olọ eghunotu anyinha amhạr moọny obobọ ongọ nyinhạ oḍighi dị nạ rawạ ghan? Dị iikia i/lo, oḅaạl olhoghi phọ aḍighi ni idị nạ aḅenhị buọ eghunotu r’arighirị anạ mem mem mọ. Nạ ulhoghoma aani ni eniin phọ eten phọ mem mọ nạ anhaghạn bọ iiḅi iinhaghạn ilọ Omhạr phọ Enhaạn enighẹ bọ epelheghiom?
5. Irọl ika esi anạ eḅẹl amem mọ nạ atuughạ bọ igey phọ siphẹ Ekpo Onhụ phọ Enhaạn? (Miịn kẹn sifoto phọ.)
5 Tutuughiạn ipẹ erọl bọ eḅẹl amem mọ nạ anhaghạn bọ igey phọ siphẹ Ekpo onhụ phọ Enhaạn. Nạ utuughạ ni alhegheri mọ Odẹ k’akẹ phọ anạ aphomhoghiạn ni nyinhạ ḅilhẹ mọ rawạ ni dị nạ kaḍighom aani pakirị eghunotu ph’odị. Nạ uḅilhẹ kẹn ni atuughạ mọ odị aguanhaan mọ ariiphina r’imhinhimhiịn ke/tọl mun, ḅilhẹ mọ nạ katue kẹn ni amiịn buọ ephomhoghiạn phọ anạ momhuughu bọ siphẹ omhoom aḅirinhi phọ. (Mạk 10:29, 30; Jọn 5:28, 29; Rom 8:38, 39; Ogan. 21:3, 4) Igey phọ iphẹn phọ ingọ ni nyinhạ oboom oḅaạl olhoghi. (Luk 24:32) Nạ uphomhoghiạn ni iboom igey phọ, dị enyu ni nyinhạ oḅenhị aani abunhọn awe!—Poghom Jeremiah 20:9.
Eḅẹl amem mọ yira otuughạ bọ igey phọ, inyu ghan ni iyira oghaạph oḅenhị aani abunhọn! (Miịn ekpịgh phọ 5)
6. Nạ atuughạ eeghe esi eḍeenhaan phọ Ernest r’aRose?
6 Ooḅeghiọn eḍeenhaan umor phọ Ernest. b Odị odi ḍioph asiạ mem dị odẹ odị amhugh. Ernest aḅẹm mọ: “Mị uutughiạn ghan ni mọ: ‘Odị odi epẹ k’akẹ ḍughụm? Obobọ odị akạr ri amugh bịn?’ Mem dị mị amhiịn bunhọn ibạm anmụny dị aburudẹ abidị odi, mị uḅẹm ghan mọ elọ abidị kụ eyạ.” Torobọ aḍio, Ernest aghị ghan siphẹ oḍi odẹ phọ odị akpuḍian, kụ aḅẹm mọ: “Seseeny Enhaạn, mị rawạ olhegheri ekpisi dị odẹ phọ amhị odi.” Mem dị 17 asiạ reten egbi k’amem mọ odẹ phọ odị amhugh bọ, Ernest amhoọgh ni eepoogh otuughạ aBaibul phọ. Olhoghi odị aḅaạl li mem dị odị atuughạ mọ buphẹ momhuughu bọ u/legheri mun iyaạr idiphọ oye dị ranaanị tugbogh aralhạ, ḅilhẹ mọ aBaibul phọ aguanhaan mọ koḅerion ni we dị momhuughu. (Eccl. 9:5, 10; Iiḍ. 24:15) Ituughạ phọ iḍighi idị odị amhiịn ophanyanhaạn asipuru phọ eeḅaghamhị ghan bọ nyodị iboom epẹ omạn! Olhoghi Ernest aḅaạl li iboom otuughạ igey aBaibul phọ iphẹn phọ. Anhịr odị Rose, amhiigh ni otuughạ aani aBaibul phọ, kụ odị kẹn aphomhoghiạn igey phọ edi bọ siphẹ aBaibul phọ. Lhạ phọ 1978 bidị uḍiiny ni muụm. R’oophugh bidị ughaạph ni ilọ igey aBaibul phọ bidị motuughạ bọ oḅenhị aani buọ eghunotu abidị, righirị, r’abunhọn awe dị igey phọ eḅeraạn. Esi iduọn phọ, Ernest r’aRose molhoghonhaạn ḍighaạgh we dị opel li 70 orue otuughạ aani aBaibul phọ oḅilhẹ oḍiiny amuụm.
7. Eeghe kụ remite ghan mem lọ yira ophomhoghiạn igey aBaibul phọ? (Luk 6:45)
7 Mem dị yira ophomhoghiạn igey phọ edi bọ siphẹ aBaibul phọ, rinyu ghan ni iyira oḅenhị aani abunhọn. (Bạl Luk 6:45.) Yira rologhoma aani ghan idiphọ abutelhedom mọ aZizọs orọl bọ siphẹ oḅẹl okuron asiạ phọ oḅẹm bọ mọ: “Yoor ko/bilẹ oghaạph araraạr phọ ipẹ yoor momiịn bọ oḅilẹ onaghạn.” (Iiḍ. 4:20) Ephomhoghiạn phọ yira omhoọgh bọ oghị esi igey phọ, reḍighi ghan idị yira rowạ ghan oghaạph aani oḅenhị atorobọ oye lọ yira oteẹny.
YIRA ROGBEELHOM GHAN LOOR ESI DỊ YIRA OPOMHOGHIẠN WE
8. Eeghe kụ rinyu ghan iyira oghị oteẹny awe r’iiḅi iinhaghạn phọ? (Miịn igbe phọ “ Pomhoghiạn We—Aḍighi Bidị Bumatuạn.”) (Miịn kẹn afoto phọ.)
8 Idiphọ AZihova r’Oọny phọ odị, yira opomhoghiạn we. (Prov. 8:31; Jọn 3:16) Yira romoọgh ghan ni igbiririph koghị esi awe phọ abuphẹ ‘u/legheri’ bọ Enhaạn ḅilhẹ ‘oḍuom ologhi u/moọgh’ bọ siẹn aḅirinhi phọ. (Efẹ. 2:12) Bidị okịgh idiphọ oye dị raḅi ophiịny loor iiḅaghamhị aḅirinhi phọ, kụ yira omoọgh eepoogh otebeeny iyaạr dị bidị kokpạph omughi opun—iyaạr phọ epẹ phọ pọ iiḅi iinhaghạn ilọ Omhạr phọ k’Enhaạn. Ephomhoghiạn phọ r’igbiririph phọ yira omhoọgh bọ oghị esi abidị rinyu ghan iyira oḍighi oomo ilọ yira kotue oghị oghaạph iiḅi iinhaghạn phọ oḅenhị abidị. Imạ phọ adom mọ aḍiẹn phọ rengọ ghan bidị oḍuom olhoghi, elhoghonhaạn bidị ḍighaạgh omhoọgh imạ aghuḍum nyiidiphọ, keḅilhẹ engọ bidị oḍuom olhoghi “akugey aghuḍum,” iduọn phọ pọ aghuḍum k’agee-pọ phọ siphẹ omhoom aḅirinhi phọ.—1 Tim. 6:19.
Ephomhoghiạn phọ r’igbiririph phọ yira omhoọgh bọ oghị esi awe rinyu ghan iyira oḍighi oomo ilọ yira kotue oghaạph ghan iiḅi iinhaghạn phọ oḅenhị abidị (Miịn ekpịgh phọ 8)
9. Eeghe iphụr arurụ ilọ iyaạr dị kemite ghisigh kụ edị yira rongọ ghan, kụ eeghe kụ iḍighi? (Ezekiel 33:7, 8)
9 Ephomhoghiạn phọ yira omhoọgh bọ oghị esi awe eḅilhẹ kẹn rinyu ghan iyira oghị ophụr abidị rurụ ilọ eekunha okarạph aḅirinhi phọ ophọn mekpulhạn bọ. (Bạl Ezekiel 33:7, 8.) Yira roseenyaạn aani ghan ni matuman phọ ayira r’abuọ eghunotu ayira dị k”omhiigh ooḅereghị aZihova. Ibadị odi ni dị u/legheri mọ ‘igbogh iiḅaghamhị’ dị ke”mite ghan “emiigh k’eḅẹl egbiom aḅirini phọ kụ eteẹny nyiidiphọ retu ni omite. Kụ inọn idị epu iphẹn phọ ke/mite mun.” (Mat. 24:21) Yira rowạ mọ bidị olhegheri raraạr phọ kemite bọ mem iiruẹn phọ, kopiemhi bọ ruukụ iiḅereghị okpẹ ḅilhẹ r’aḅirinhi phọ aSetan siphẹ eghạm mọ Amagedọn. (Ogan. 16:14, 16; 17:16, 17; 19:11, 19, 20) Yira rolọm ni mọ ibadị onhaghạn iphụr arurụ phọ, ḅilhẹ osopha oḍigh aani siẹn iserereẹny iiseeny phọ nyiidiphọ. Kuolọ kokaạph ika ilọ amatuman ayira r’abuọ eghunotu ayira dị yira ophomhoghiạn ku/meera usighẹ iphụr arurụ phọ nyiidiphọ?
10. Eeghe kụ iḍighi kụ ewạ bọ mọ oghiọm ghisigh ophụr ghan we rurụ?
10 Idiphọ moghaạph bọ epẹ omhạn, eeni etue ni eḍighi ogbi aZihova ophẹl awe dị kowạ olhegheri odị mem dị omhiịn muphe aBabilọn Ogbogh phọ. Eḍighi idiphọ, pọ ekạr kụ ewạ oghiọm aghisigh iphụr arurụ phọ nyiidiphọ. Ka/bulha mọ: Ipẹ yira roḅenhị bọ bidị nyiidiphọ kụ iyaạr dị bidị kootughiạn mem mọ amuphẹ phọ. (Poghom Ezekiel 33:33.) Eeni bidị kootughiạn ni iphụr arurụ phọ yira ongọ ghan bọ bidị, kụ ipẹ phọ enyu bidị oḍighan ayira ooḅereghị aZihova kụ amem mọ egbi oten. Idiphọ ekpom okoriom otu ikoli phọ epẹ Filipi enmia bọ mem mọ odị amhiịn bọ dị “otu ikoIi phọ aphiigha k’ephighiom mọ,” eeni iitughiạn abuniin dị u/meera rodon ketue ni enmia mem lọ bidị omhiịn idị araraạr kepiigha mem mọ kopiemhi bọ Babilọn Ogbogh phọ.—Iiḍ. 16:25-34.
YIRA ROGBEELHOM GHAN LOOR ESI DỊ YIRA OPOMHOGHIẠN AZIHOVA R’AḌIEN PHỌ ODỊ
11. Ika kụ edị yira rongọ ghan aZihova eghuan r’igbogh? (Ogananami 4:11) (Miịn kẹn sifoto phọ.)
11 Ekpanhạ ephigh phọ yira rogbeelhom ghan bọ iiḅi iinhaghạn phọ pọ ephomhoghiạn phọ yira omhoọgh bọ oghị esi aZihova r’aḍien iigbia ph’odị. Yira omiịn oḍighi iphelhegbeel phọ ayira idiphọ eten ooseeny Enhaạn phọ yira ophomhoghiạn bọ. (Bạl Ogananami 4:11.) R’oomo ekpom, yira omeeraam ni mọ aZihova Enaạn phọ, amạn ni osighẹ ghan eghuan, r’igbogh, r’iikpọ ḍighaạgh arebenhẹ phọ odị oḅạr bọ nyodị. Yira rongọ ghan aZihova eghuan r’igbogh, mem lọ yira oghaạph oḅenhị bunhọn raraạr phọ eḍeenhaan bọ mọ odị ‘kụ alhẹm oomo araraạr’ ḅilhẹ aghuḍum mọ ayira aḍuạ ḍighaạgh odị kụ uteẹny iyira. Yira rongọ ghan aZihova iikpọ mem dị yira osighẹ mem mọ ayira, inyaạm mọ ayira, ḅilhẹ raraạr dị yira omhoọgh kụ oghaaphọm iiḅi iinhaghạn phọ oḅenhị bunhọn awe ipẹ yira kotue bọ. (Mat. 6:33; Luk 13:24; Kọl. 3:23) Oghaạph onyen, riḅeraạn ghan iyira oghaạph ilọ Enhaạn phọ yira ophomhoghiạn bọ. Ḅilhẹ rinyu ghan iyira oghaạph oḅenhị abunhọn ilọ aḍien ph’odị ḅilhẹ r’odọ oye phọ odị aru bọ. Eeghe kụ iḍighi?
Yira rongọ ghan aZihova iikpọ mem dị yira osighẹ mem mọ ayira, inyaạm mọ ayira, ḅilhẹ r’araraạr dị yira omhoọgh kụ oghaaphọm iiḅi iinhaghạn phọ oḅenhị bunhọn ipẹ yira kotue bọ (Miịn ekpịgh phọ 11)
12. Epẹ erugh phọ, ika kụ edị yira roḅaalhamhị ghan ḍien phọ aZihova?
12 Ephomhoghiạn phọ yira omhoọgh bọ oghị esi aZihova rinyu ghan iyira oḍighi araraạr dị keḅaalhamhị ḍien ph’odị. (Mat. 6:9) Yira ropinhom aani ghan bin oḅaalhamhị aḍien phọ aZihova, esi omạ omiteom mọ ikarạph araraạr phọ aSetan aghaạph bọ ilọ aZihova okpẹ ni. (Gen. 3:1-5; Job 2:4; Jọn 8:44) Mem lọ yira odi epẹ erugh phọ, riḅeraạn ghan iyira oḅenhị oomo awe dị konaghạn ni ilọ odọ oye phọ aZihova aru bọ. Yira rowạ dị oomo awe kolegheri mọ ekpanhạ eegharạ odị pọ ephomhoghiạn, ḅilhẹ mọ eten itooghị phọ odị kụ inighẹ. Yira roḅenhị ghan kẹn we mọ Omhạr phọ odị kasiemhi eekunha imhinhimhiịn aḅilhẹ asighẹ atu eephọ r’oḅaạl olhoghi siẹn ade phọ. (Ps. 37:10, 11, 29; 1 Jọn 4:8) Yira roḅaalhamhị ghan kẹn ḍien phọ aZihova mem dị yira oghaạph oḅenhị we epẹ erugh phọ odọ oye phọ aZihova aru bọ. Olhoghi ayira raḅaạl ghan kẹn, loor esi dị yira roḍighi ghan raraạr phọ ipẹ rewạ bọ m’oḍighi idiphọ Abugbaanhaạn AZihova. Ika?
13. Eeghe kụ iḍighi kụ eḍighi bọ eghuan omeera aḍien phọ Abugbaanhaạn AZihova? (Isaiah 43:10-12)
13 AZihova musaḅạr iyira oḍighi “abugbaanhaạn” odị. (Bạl Isaiah 43:10-12.) Aḍinyạ dị Aloor Phọ Repogh bọ ogẹ siạ dị meten iḅẹm mọ: “Eghuan dị epelheghiom dị onyọ ayira katue amoọgh pọ omheera aḍien phọ onyọ Ogbaanhaạn AZihovah.” c Eeghe kụ iḍighi? Ooḅeghiọn oghaạph omaaniọm mọ ophọn. Eḍighi iyaạr dị oye agbaanhaạn nyinhạ okpẹ mọ nạ aḍighi iyaạr dị i/nighẹ, kụ nạ rawạ oye dị kakaạph aḅenhị bunọn mọ ipẹ oghaạph bọ ilọ anạ okpẹ ni. Anhiạn kụ edị nạ kamạgh oghaạph oḅenhị awe odọ oye phọ nạ aru bọ? Nạ kasighẹ oye dị amhoọgh egey eegharạ ḅilhẹ akpẹ oḍuom olhoghi dị ilọ aghaạph abunhọn komeeraam. Esi osaḅạr ayira oḍighi Abugbaanhaạn odị, aZihova maḍeenhaan mọ odị usighẹ ni iyira ḅilhẹ uḍuom iyira olhoghi mọ yira kokaạph ni oḅenhị bunhọn mọ odị bịn kụ egey Enhaạn. Loor esi eghuan phọ yira omhoọgh bọ oḍighi Abugbaanhaạn odị, yira rosighẹ ghan ni koḍighinhom torobọ eepoogh oḅenhị awe ḍien phọ Enhaạn ḅilhẹ r’oḅaalhamhị aḍien phọ odị esi okpẹ kirokirọ phọ mogbaanhaạn bọ nyodị. Oḍighi ghan iduọn phọ kụ edị yira koḍeenhaan mọ olhoghi ayira aḅaạl li omheera aḍien phọ, Abugbaanhaạn AZihova!—Ps. 83:18; Rom 10:13-15.
YIRA KOKIỌM NI GHISIGH OGBEELHOM GHAN TUTỤ EEKUNHA PHỌ ETEẸNY
14. Eeghe imạ araraạr kụ edị yira rogon omhiịn?
14 P’eeghe imạ araraạr dị yira rogon omhiịn epẹ ghisigh! R’olhoghonhaạn aḍighaạgh aZihova, yira oḍuom ni olhoghi mọ ibadị kokiton ni uḍighan iyira okumu aZihova kụ igbogh iiḅaghamhị phọ egbi omhiigh. Ḅilhẹ olhoghi ayira aḅaạl li olhegheri mọ eeni mem dị igbogh iiḅaghamhị phọ emhiigh, awe koḍuạ ni ḍighaạgh aSetan otu uḍighan iyira ooseeny aZihova!—Iiḍ. 13:48.
15-16. Eeghe kụ edị yira kokiọm ghisigh oḍighi ghan, kụ kapụr amem?
15 Nyiidiphọ yira omoọgh ni oḍighi oḍighi. Yira omoọgh eepoogh ophinhom aani abin oḍighi dị ko/ḍighi mun, oḍighi oghaạph iiḅi iinhaghạn ilọ Omhạr phọ k’Enhaạn oleenye siẹn ade phọ. Eniin phọ amem mọ kẹn, yira omoọgh ophụr arurụ we ilọ araraạr phọ kemite bọ ghisigh. Ewạ ni mọ awe olhegheri mọ okarạph aḅirinhi phọ ophọn phọ raagborion ni osi eekunha. Mem dị amem iiruẹn phọ eteẹny, awe kolegheri ni mọ adom mọ yira ogbeelhom ghan bọ iḍuạ ḍighaạgh aZihova kụ eru.—Ezek. 38:23.
16 Eeghe kụ iyaạr dị yira osopha oḍighi? Loor esi iduọn yira ophomhoghiạn bọ iiḅi iinhaghạn phọ, ophomhoghiạn we, kụ edị epelhom siẹn, ophomhoghiạn aZihova r’aḍien ph’odị, yira kokiọm ni ghisigh oogboronhom ogbeelhom ghan iiḅi iinhaghạn phọ r’oophugh ḅilhẹ r’aḍiḅeraạn tutụ aZihova aḅẹm mọ, “Mekasiạn ni.”
AḌUỌR PHỌ 54 “Ephẹn Kụ Eten Phọ”
a October 7, 2023, kụ edị ophạm ruupuruan phọ ropạm ghan bọ torobọ alhạ siphẹ Asembili Họl Abugbaanhaạn AZihova epẹ Newburgh, New York, U.S.A. Umiteom—eḅẹl ekpịgh phọ siphẹ JW Broadkastịn® aNovember 2023, kụ ekpịgh phọ emhunhenhiom bọ iyạl umiteom January 2024.
b Miịn emhuoghaạph phọ “The Bible Changes Lives—I Was Impressed by the Bible’s Clear, Logical Answers,” omiteom bọ siphẹ Watchtower aFebruary 1, 2015.
