1-2. Eeghe kụ iḍighi kụ aZizọs amhoọgh bọ ooḅaghamiạn aloor phọ?

ḌIO phọ aZizọs kamugh bọ, iiḅaghamị ni nyodị iboom. Loor esi dị moọny amem odị kamugh ḍuugh egbo ḍighaạgh abuḍighinom ikarạph. Kuolọ ooḅaghamiạn aloor phọ odị o/ḍighi olọ aḍuugh phọ odị kamugh bọ bịn. Odị aphomoghiạn iboom Odẹ phọ odị kụ awạ oḍighi ipẹ eḅeraạn bọ nyodị. AZizọs alegheri ni mọ eḍighi maạr lọ odị aphamanạm ni ḍimeerạ phọ odị eeḍiạn ogbagarạ odẹgh ophogh phọ ophọn, keḅaalamị ni ḍien phọ aZihova. AZizọs aphomoghiạn kẹn ni we, odị alegheri ni mọ aḍuugh phọ odị kamugh bọ kụ keḍighi iyaạr dị omhạr awe k’otọl k’agee-pọ.

² Ghalamọ r’iduọn aZizọs asoman bọ igbogh iminimiịn phọ iphẹn, odị amhoọgh ni eephọ. Odị aḅenị butelhedom mọ odị mọ: “eephọ phọ epẹ amị kụ edị mị ringọ inyina.” (Jọn 14:27) Odị amoọgh ni “eephọ phọ k’Enaạn,” ophoomị aloor phọ opọ raḍuạ ghan bọ kamite mem lọ oye amhoọgh imạ asiya r’aZihova. Eephọ phọ epẹ kụ iḍighi bọ iyaạr phọ aZizọs aphoomị bọ ni ekpom odị.—Fil. 4:6, 7.

3. Yira kooḅeghiọn eeghe siẹn emhuoghaạph phọ ephẹn?

³ Onyọ ayira o/lho dị kasoman odọ ikpuuroghọm mọ aZizọs asoman bọ, kuolọ oomo abulọ rowạ odạph aZizọs kosoman ni odẹgh ophogh. (Mat. 16:24, 25; Jọn 15:20) Kụ idiphọ aZizọs, eeni amem yira kologhoma ni ooḅaghamiạn aloor. Yira koḍighi ika kụ ooḅaghamiạn aloor abilẹ o/sophoghom eephọ ologhi phọ ayira? Uguạ ooḅeghiọn ophogh iraạr araraạr dị aZizọs aḍighi mem arukumuan phọ odị siẹn ade phọ, kụ omhiịn idị yira kotue otuughaạny aani nyodị mem dị yira osoman odẹgh ophogh.

4. Odaphạn ipẹ ogẹ bọ 1 Tesalonikạ 5:17, ngọ reḍeenhaan dị eḍeenhaan mọ aZizọs o/soph ghan mem ooḅereghị ḍio phọ aḍiphẹ odị k’amugh bọ.

⁴ Bạl 1 Tesalonikạ 5:17. AZizọs aaḅereghị ni ibadị amem ḍio phọ aḍiphẹ odị kamugh bọ. Mem mọ odị aphighi bọ eḍighieeny ootughianạm aḍuugh phọ odị, aaḅereghị ni angọ abrẹd phọ r’amiim mọ. (1 Kọr. 11:23-25) Kụ ogbi bọ oḍuạ esi phọ bidị orọl bọ ophạm eyaạl ophẹl otene phọ, odị aaḅereghị ni r’abutelhedom mọ odị. (Jọn 17:1-26) Mem mọ odị r’abutelhedom mọ odị osi bọ siphẹ Oghoony phọ aGetsemani ḍughul phọ aḍiphẹ phọ, odị aaḅereghị ni ibadị amem. (Mat. 26:36-39, 42, 44) Ḅilhẹ ikpo onhụ phọ odị aḅạ bọ mem mọ resophaan bọ nyodị iḍighi iiḅereghị. (Luk 23:46) AZizọs aḅenị ghan ni aZihova ilọ atorobọ iyaạr dị remitenaan nyodị ḍio phọ aḍiphẹ odị kamugh bọ, esi iiḅereghị.

5. Eeghe kụ iḍighi kụ abutelhedom mọ oroph bọ akpọ oḅio phọ abidị?

⁵ Eniin iyaạr dị eloghonaạn Zizọs ḍighaạgh okparạm pọ, odị abeḍenọm Odẹ phọ odị esi iiḅereghị. Abutelhedom mọ pakirị opọ abidị, u/tue utolonaạn aani esi iiḅereghị ḍughul phọ aḍiphẹ phọ. Loor esi iduọn phọ, bidị uroph ni akpọ oḅio phọ abidị mem mọ odẹgh ophogh phọ asoor bọ. (Mat. 26:40, 41, 43, 45, 56) Yira kotue opạm ḍimeerạ phọ ayira mem lọ yira osoman odẹgh ophogh, esi otuughaạny eḍeenhaan phọ aZizọs kụ ‘ooḅereghị ghan.’ Yira kooḅereghị ilọ eeghe?

6. Ika kụ idị omeeraam kuloghonaạn iyira ḍighaạgh omhoọgh eephọ?

⁶ Yira kotue ni olọm aZihova mọ: “Bughẹ omeeraam mọ ayoor.” (Luk 17:5; Jọn 14:1) Yira omoghi omhoọgh omheeraam loor esi dị aSetan k’adẹgh ni apogh oomo abuphẹ rodạph bọ Zizọs. (Luk 22:31) Ika kụ idị omheeraam  kulhoghonhaạn iyira ḍighaạgh omhoọgh eephọ ghalamọ r’amem dị yira osoman iiḅaghamị kirokirọ? Mem dị yira moḍighi oomo phọ ipẹ inyaạm mọ ayira esi bọ okaran odẹgh ophogh, omheeraam kaḍighi idị yira kosighẹ ipẹ esugha bọ onyaariọm aZihova. Loor esi dị yira oḍuom ologhi mọ odị kụ alegheri ilọ ekpẹ oḍighi upu iyira, bịn yira m’omoọgh eephọ ologhi.—1 Pit. 5:6, 7.

7. Nạ atuughạ eeghe esi ipẹ aRobert aghaạph bọ?

⁷ Iiḅereghị r’iloghonaạn ghan iyira ḍighaạgh ophamhanhạm eephọ olhoghi etigheri odọ ipaanaạn lọ yira osoman. Ooḅeghiọn eḍeenhaan umor phọ Robert, okumor oye ookpomoghan dị akpẹ oḍuom ologhi dị m’amhạn 80 asiạ. Odị aḅẹm mọ: “Oroma phọ ogẹ bọ siphẹ Filipai 4:6, 7 miloghonaạn imị ḍighaạgh okaran odẹgh ophogh kirokirọ siẹn adọl aghuḍum mọ amị. Mị umheel li ekulom. Esi ekula amem Mị uroph ni eepoogh arukumuan phọ amị idiphọ okumor oye.” Eeghe kụ ilhoghonhaạn ḍighaạgh Robert ophamhanhạm eephọ ologhi? Odị aḅẹm mọ: “mị uuḅereghị ghan torọ amem lọ mị amhiigh olhoghoma ooḅaghamiạn aloor. Mị ameeraam mọ mị agbor ghan aaḅereghị, mị k’akuamị ni amoọgh eephọ.”

8. Odaphạn Jọn 8:29, eeghe kụ enhọn iyaạr dị engọ Zizọs eephọ ologhi?

⁸ Bạl Jọn 8:29. AZizọs aphamanạm ni eephọ ologhi ghalamọ r’amem dị rogbiphoghọm nyodị, loor esi dị odị alegheri ni mọ okparạm mọ odị kaḍighi iyaạr dị olhoghi Odẹ phọ odị k’aḅaạl. Odị anaghanạn ghan ni Odẹ phọ odị ghalamọ r’amem dị ekparanaạn ni nyodị oḍighi iduọn phọ. Odị aphomoghiạn Odẹ phọ  odị kụ asighẹ okumu aZihova aḍighi eḅẹl siphẹ aghuḍum mọ odị. Kụ agbi bọ oru isiẹn ade phọ odị aḍighi ghan “Uw-oḍighi Enaạn.” (Prov. 8:30) Kụ siẹn ade phọ, r’oophugh, odị atughemị ni we ilọ Odẹ phọ odị. (Mat. 6:9; Jọn 5:17) Oḍighi phọ opọ phọ angọ ni Zizọs iboom ibo.—Jọn 4:34-36.

9. Ika kụ idị okuọm oomo amem mọ ayira esi oḍighi iphelegbeel phọ kiloghonaạn iyira ḍighaạgh omhoọgh eephọ olhoghi?

⁹ Yira kotue otuughaạny Zizọs esi onaghanạn ghan aZihova kụ osighẹ “oomo inyaạm mọ” ayira oḍighinom ongọ Omoọgh-we phọ.’ (1 Kọr. 15:58) Mem dị yira ‘okuọm oomo amem’ oḍighi iphelegbeel phọ, yira ko/kạr ooḅaghamiạn ghan loor ilọ iiḅaghamị ayira. (Iiḍighi 18:5) Esi omaạm, abuphẹ yira roteẹny ghan bọ epẹ erugh phọ rosoman ghan iiḅaghamị dị epel iphẹn ayira. Kuolọ mem dị bidị otuughạ ilọ aZihova, kụ odaphạn oroma phọ odị, asighuḍum mọ abidị renmia ghan ni bịn komoọgh oḅaạl ologhi. Torọ amem lọ emite iduọn phọ, yira rologhoma ghan okuphom owol mọ aZihova kuphogh ni iyira. Kụ ologhoma phọ opọ ruloghonaạn ghan iyira ḍighaạgh omhoọgh eephọ ologhi. Onyọ umarani dị aloghoma ghan mọ onọ o/moọgh maạr oḍighinom siphẹ oomo adọl aghuḍum mọ odị ḅilhẹ aḅonyonu ghan azuan, ameeraam ni iphẹn phọ. Kụ aḅẹm mọ: “mem dị mị agbor r’amite epẹ erugh phọ, mị ratue ghan ni kaphamaghạn ologhoma phọ amị, aḅilhẹ amhoọgh oḅaạl olhoghi. Mị ragbi mọ mem dị mị odi epẹ erugh phọ, mị raloghoma ghan mọ mị akạr odi r’aZihova.”

10. Nạ atuughạ eeghe esi iphẹn aBrenda aghaạph bọ?

¹⁰ Oḅilhẹ ooḅeghiọn ilọ onhọn onyọ umarani dị oghol mọ Brenda. Onyanị odị r’odị omeelhom egbogh ezẹgh. Inyaạm i/lo Brenda, kụ ka/tue atelhe emuton lọ aḍigh agadạ iidighila. Eeni amem odị rakị ghan ni oḍuạ otu ogbạ otu phọ, kuolọ odị agbor ghan rangọ ogbaanaạn dị eego esi ogẹ arinyạ. Odị aḅẹm mọ: “Iduọn mị alegheri bọ mọ ko/tue uukonom imị siẹn aḅirini phọ ophọn, mị uphoomị ni ologhi bịn agbon oḍighi iphelegbeel phọ amị. Ogbạ agey, mem dị mị ragbeelhom iiḅi iinaghạn phọ, mị ra/seere ghan mun olhoghi iiḅaghamhị phọ amhị. Mị ragbon ghan ghụn ilọ ologhonaạn aḍighaạgh buphẹ mị rateẹny ghan bọ epẹ erugh phọ. Kụ oomo amem r’iitughianhạm ghan imhị ilọ oḍuom olhoghi phọ amhị ghisigh.”

11-13. (a) Ika kụ idị abutelhedom mọ r’abunhọn oḍeenhaan mọ abunọ okạr arighirị aZizọs? (b) Eeghe etirom kụ edị arighirị phọ aZizọs omhoọgh oghị esi odị?

¹¹ Siphẹ oomo oḍighi iphelegbeel phọ aZizọs, abumatuạn phọ odị okpẹ bọ oḍuom ologhi phọ uḍeenhaan ni mọ abunọ okạr arighirị. Bidị uḍighi budọ arighirị phọ aBaibul phọ aḅẹm bọ mọ: “Oyaghirị odi ghan ni dị aḅạr apu oọny onhiin.” (Prov. 18:24) AZizọs amaghamị ni maạr righirị phọ odị abuẹn phọ. Mem mọ odị arọl bọ siẹn ade phọ, okạr abumor odị bịn u/meeraam nyodị. (Jọn 7:3-5) Eniin amem, okạr abumor odị uḅẹm ni mọ emhụ odị i/pọ. (Mạk 3:21) Ḍierị phọ aḍighaạgh phọ, aZizọs aḅenị ghụn bumatuạn phọ odị ḍughul phọ kosiph bọ nyodị mọ: “Nyina kụ irolạn bọ omạn amị oomo phọ amem mọ odẹgh ophogh phọ uteẹny ghan bọ imị.”—Luk 22:28.

¹² Eeni amem abutelhedom mọ aZizọs uḍighi ghan ni idị ephin ologhi odị, kuolọ odị awilẹ sipiomạn phọ abidị aphogh ghan ghụn omeeraam mọ bidị omoọgh bọ. (Mat. 26:40; Mạk 10:13, 14; Jọn 6:66-69) Ḍughul phọ aḍiphẹ eḅaạl kokiigh bọ nyodị, aZizọs aḅenị buẹn oḅạr bọ nyodị mọ: “Mị kighol ghụn inyina mọ arighirị Ioor esi dị oomo phọ ipẹ mị anaghạn bọ esi Odẹ phọ mị miḅenị ni inyina.” (Jọn 15:15) Eten dị iikia i/lo, arighirị phọ aZizọs ukạr kụ okparamị ghan nyodị. Ologhonaạn aḍighaạgh phọ abidị aḍighi iyaạr dị ekpom aZizọs emuza r’ibo.—Luk 10:17, 21.

 ¹³ Epel butelhedom mọ, aZizọs aḅilẹ ni amhoọgh bunọn arighirị, nmariịr r’alephiri dị ologhonaạn nyodị ḍighaạgh siphẹ oḍighi iphelegbeel phọ. Buniin umạgh ghan ni nyodị oru aani k’abidị olhe eḍien. (Luk 10:38-42; Jọn 12:1, 2) Abunhọn dị oḍighi nmariịr usighẹ ghan ni raraạr dị ekuom oghiomaạn nyodị. (Luk 8:3) AZizọs aḍighi ogey oyaghirị pọ kụ iyaạr phọ odị amoọgh bọ bugey arighirị phọ. Odị aḍighi ghan bidị iiḅi kụ o/puru ghan bidị idị epel inyaạm mọ abidị. Ghalamọ r’iduọn aZizọs amunughan bọ ni, odị asighẹ ghan ni ologhonaạn aḍighaạgh esi arighirị phọ odị u/munughan bọ. Iikia i/lo, bidị ulhoghonhaạn ni nyodị ḍighaạgh omhoọgh eephọ olhoghi.

14-15. Ika kụ idị yira kotue omoọgh igey arighirị, kụ ika kụ idị bidị kotue uloghonaạn iyira ḍighaạgh?

¹⁴ Abugey arighirị kulhoghonhaạn iyira ḍighaạgh oḅạr aZihova. Eten dị enighẹ epelhom omhoọgh arighirị pọ oḍighị ogey oyaghirị. (Mat. 7:12) Esi omaạm, aBaibul phọ uroma iyira mọ osighẹ mem mọ r’inyaạm mọ ayira ologhonaạn ḍighaạgh bunhọn, ekạr nuụn ekpaariọm bulọ “ekuom.” (Efẹ. 4:28) Nạ alegheri ni oye dị nạ katue aloghonaạn ḍighaạgh ookpomoghan anyina ḍughụm? Nạ katue ni akianaạn ḍighi onyọ umor dị m’aḍigh otu ḍughụm? Nạ katue ni angọ aani iyaạr olhe eghun otu lọ u/kạr umoọgh? Eḍighi maạr dị nạ amaạr ilọ osighẹ oḍighinhom jw.org^® r’aJW Library app phọ, nạ katue ni atughemị aani buọ ookpomoghan phọ anạ ilọ osighẹ oḍighinhom aani? Mem dị yira ogbon ologhanaạn ghan aḍighaạgh bunhọn, k’ingọ ni iyira oḅaạl olhoghi.—Iiḍighi 20:35.

¹⁵ Arighirị ayira kubakị ni iyira mem lọ yira osoman odẹgh ophogh, oḅilhẹ ulhoghonhaạn ayira ḍighaạgh omhoọgh eephọ olhoghi. Idiphọ  Elihu alher bọ rurụ mem mọ aJob aghaạph bọ ilọ odẹgh ophogh phọ odị, arighirị phọ ayira ruloghonaạn ghan iyira ḍighaạgh esi okparạm kụ olher arurụ onaghạn ipẹ yira rokaạph bọ ilọ iiḅaghamị phọ ayira. (Job 32:4) Yira ku/gon dị arighirị phọ ayira kụ kuḅenị iyira ilọ oḍighi, kuolọ olher rurụ bịn ongọ oroma aBaibul phọ abidị. (Prov. 15:22) Idiphọ Uw-emhạ phọ aDevid asooromi bọ loor asighẹ ologhonaạn aḍighaạgh arighirị phọ odị, yira ku/meera ophoophe aloor u/kikima iyira osighẹ ologhonaạn aḍighaạgh lọ ewạ ni. (2 Sam. 17:27-29) Ogbạ agey, abudọ arighirị phọ abuẹn oḍighi inmo dị eḍuạ k’aZihova kụ eru.—Jems. 1:17.

16. Odaphạn Filipai 4:6, 7, eeghe kụ egina eten dị yira kotue omoọgh eephọ? Gbạ.

¹⁶ Bạl Filipai 4:6, 7. Eeghe kụ iḍighi kụ aZihova uḅenị bọ iyira mọ eephọ phọ odị kungọ bọ iyira k’eego “esi aJizọs [aZizọs] Kraist”? Loor esi dị amem dị yira onaghanạn ipẹ aZizọs aḍighi bọ omuneni ogbi phọ Enaạn oḅilhẹ omheeraam nyodị kụ edị yira kotue omoọgh eephọ olhoghi. Esi omaạm, esi ekiạ etagharạn phọ aZizọs, kụ edị kotue osạr obilenaạn oomo ikarạph phọ ayira. (1 Jọn 2:12) P’eeghe iidereghị dị iphẹn phọ ingọ iyira! Idiphọ Uw-emhạ Omhạr phọ k’Enaạn, aZizọs k’aakonom oomo iminimiịn phọ aSetan r’aḅirini phọ odị mokọm bọ. (Isa. 65:17; 1 Jọn 3:8; Ogan. 21:3, 4) P’eeghe oḍuom olhoghi dị ipẹ phọ ingọ iyira! Ghalamọ r’iduọn odị ungọ bọ ni iyira oḍighi dị aḅarạm ipaanaạn, odị odi ni r’ayira, obakị ayira siẹn asiḍio eekuna phọ. (Mat. 28:19, 20) P’eeghe idị ipẹ phọ ingọ iyira akpọ oḅio! Iidereghị, oḍuom olhoghi, r’akpọ oḅio—eḍighi iniin arokọ ophighiom eephọ olhoghi phọ ayira.

17. (a) Ika kụ idị aKristẹn kotue opamanạm eephọ olhoghi? (b) Odaphạn ipẹ oguanaan bọ siphẹ Jọn 16:33, eeghe kụ edị yira kotue oḍighi?

¹⁷ Ika nuụn kụ edị nạ katue aḅilẹ amoọgh eephọ ologhi phọ anạ, mem dị iiḅaghamị kirokirọ reekpoḍị nyinạ? Esi oḍighi aani araraạr phọ ipẹ aZizọs aḍighi bọ. Eḅẹl phọ, ḅeeḅereghị, kụ arolonaạn ghan esi iiḅereghị. Edị emuneniom iyạl, naghanạn ghan aZihova kụ agbeelhom ghan r’oophugh ghalamọ r’amem dị ekpạr ri. Edị emuneniom iraạr, meera ghan arighirị anạ ologhonaạn nyinạ ḍighaạgh mem dị nạ asoman oḍẹgh ophogh. Pọ kụ amem dị eephọ phọ epẹ k’Enaạn keeḅakị ekpom mọ anạ. Kụ, idiphọ aZizọs, nạ kakpạr ri apu torobọ ipaanaạn.—Bạl Jọn 16:33.