Winston, uḅenị aani iyoor ipẹ nạ arue bọ alhegheri Enaạn.

Uukonhom imị raaghanạ dị edi ghan epẹ Queensland, Ostrelia, otọ ayoor siosị u/kị ghan. Loor esi iduọn yoor orọl ghan bọ raaghanạ phọ, otọ ayoor bịn kụ edị mị amhiịn ghan. Mem dị mị amhạn 12 asiạ, kụ edị mị amhiigh owạ Enaạn. Mị uuḅereghị ni mọ odị uḍeenaan imị igey phọ. Ekureriom mọ, mị umhoọgh ni oḍighi epẹ Adelaide, Saụt Ostrelia bịn mị aḍuạ epẹ araaghanạ phọ. Mem dị mị amhạn 21 asiạ, mị uuzuanaan ni Pam mem dị mị aghị ophooghian epẹ Sidni, kụ odị uḅenị imị ilọ ekụ iiḅereghị aBritis-Izrạl phọ, oghophora bọ mọ awe aBritis uḍuạ siphẹ arughunughun phọ Izrạl ophe bọ kụ omite. Bidị uḅẹm mọ ipẹ kụ aḍioph arughunughun phọ Izrạl orọl bọ dọl arebenẹ phọ siphẹ ophaanyạ  okuron asiạ phọ  kụ aZizọs agbi bọ oru. Kụ iḍighi kụ mem dị mị aḅula bọ epẹ Adelaide, mị ughaạph ni iphẹn phọ aḅenhị oye dị r’amị oḍighi ghan oḍighi dị mamhiigh otuughạ aBaibul phọ r’aBugbaanhaạn AZihova. Men dị yoor roghaaphạn esi iyạl ikpo awạ—ilọ aremeeraam Abugbaanhaạn phọ—bịn mị aru alhoghoma mọ Enaạn mamhiigh ranaghạn iiḅereghị phọ mị amhiigh bọ ooḅereghị k’eghoroghọr. Mị mamiigh otuughạ igey phọ ilọ Olemiạ phọ amị r’Omhạr phọ odị! Mị mamhiịn “egbogh ekpo ebẹ phọ.”—Mat. 13:45, 46.

Pam, k’amem dị nạ aghom ni kụ edị nạ amhiigh aani owạ ekpo ebẹ phọ. Nạ umhiịn ika?

Uukonom imị eghunotu dị oghị ghan ni siosị, eniin emạ epẹ Kọfs Habọ, Niu Saụt Wels. Odẹ r’onhiin amị ḅilhẹ r’ogbogh odẹ r’onhiin amị umeeraam aani ni itughemị aBritis-Izrạl phọ. Utughemị imhị, obạm umor amị okumor umarani amị r’abunhọn asiya odẹ r’onhiin ayoor, mọ awe dị aburudẹ aburudẹ phọ oḍighi buọ aBriten kụ romoọgh ghan kuuḅi aghisigh ḍighaạgh Enaạn. Mị u/meeraam  aani ipẹ phọ, kụ iḍighi kụ mị u/moọgh ghan ogbaanyạn eten aruwaloor. Mem dị mị amhạn bọ 14 asiạ, mị ughiighị ni ibadị asisiosị ekpisi phọ ayoor, iḅaramaạm ni Anglican, Baptist, ḅilhẹ r’aSeventh-day Adventist. Kuolọ u/tue ugbaanyamị okoọny aruwaloor phọ amị.

Moọny amen bịn eghunotu ayoor ogheel Sidni, epẹ kụ edị mị aazuanaan Winston mem dị odị aru ophooghian. Idiphọ odị maghaạph bọ ni, iduọn yoor ogbor ghan bọ oghaạph ilọ aruukụ iiḅereghị, bịn odị amhiigh otuughạ aBaibul phọ r’aBugbaanhaạn phọ. Bịn enhighẹ oḅẹm mọ torobọ aḍinyạ dị odị agẹ uruom imị iḅarạm ghan ibadị ariisi aBaibul! Ogbạ agey, iiḅaghamị ni olhoghi amị iboom eḅẹl amem mọ—eeni amem ephin ghan esi amị. Kuolọ enụm enụm bịn mị aru alegheri mọ ipẹ odị agẹ ghan bọ kụ igey phọ.

Reteẹny 1962, bịn mị aḍuạ aghị epẹ Adelaide obọ mị akuamị atuman Winston. Odị uukolobianaan ni imị orolạn r’Abugbaanhaạn dị oḍighi olom r’anhịr—Thomas r’aJanice Sloman—uḍighi ghan bukọy eten dị ogbatanaạn epẹ Papua Niu Gini. Bidị uphạm ni imị agẹy; mem mọ opọ phọ mị m’amhạn 18 asiạ , kụ bidị ulhoghonhaạn ni imị ḍighaạgh iboom olhegheri aZihova. Kụ iḍighi kụ mị amhiigh otuughạ Ekpo-onhụ phọ Enaạn, i/bia iboom bịn mị ameeraam mọ mị m’amhiịn igey phọ. AWinston r’amị raalạn bịn yoor oḍigh rukumuan dị asuọ phọ anhighẹ apeleghiom—rukumuan dị, etigheri ipaanaạn kirokirọ, rabughẹ ghan ḍiḅeraạn phọ ayoor ilọ egbogh ekpo ebẹ phọ yoor oḅọm bọ.

Winston, uḅenị aani iyoor ilọ arukumuan phọ anạ siẹn oḍighi phọ aZihova.

APam r’amị aalhạn bọ, i/bia bịn aZihova amhiigh oghunyon arughuugh “oboom oḍighi” dị amoọgh ni emụ dị yoor kobughẹ rukumuan phọ ayoor. (1 Kọr. 16:9) Umor phọ Jack Porter, kụ uḍeenhaan iyoor eḅẹl eghuugh phọ, odị aru ophogh obạm ookpomoghan ayoor idiphọ opoghom eghir. (Odị Nyiidiphọ oniin Siphẹ Ekụ Abuphẹ Ropogh Bọ Olạ Agadạ phọ Ostralesia.) Umor phọ Jack r’anhịr odị, Roslyn, ukparamị ni iyoor osighẹ aani okọy eten—yoor ughelọm ni okọy eten phọ esi oogh asiạ. Mị romhạn 29 asiạ bịn oḅenị Pam r’amị oghị okumuan idiphọ opoghom eghir rukpu ogbo dị edi epẹ Saụt Pasifik, odi bọ ekool dị olạ agadạ phọ aFizi kụ aphogh ghan. Arukpu ogbo phọ iḍighi Amerika Samoa, Samoa, Kiribati, Nauru, Niue, Tokelau, Tongạ, Tuvalu, r’aVanuatu.

Siḍio phọ ipẹ phọ, awe dị orọl ghan iniin arukpu ogbo phọ u/kạr ghan uḍighom Bugbaanaạn AZihova, kụ iḍighi kụ iwạ ni mọ yoor ogona loor ḅilhẹ osụ olhoghi. (Mat. 10:16) Arookpomoghan phọ ighom ghan agey, ḅilhẹ abunhiin r’esi dị yoor kotọl bịn u/moọgh ghan. Yoor kụ ughị ghan oteẹny buọ ekpisi phọ orọl aani r’abidị, kụ bidị ulhoghomaạm ni iyoor agey.

Umor phọ Winston, oḍighi ogbạ oteneghi inhọn arunhụ phọ aḅeeraạn nyinạ iikiạ. Ikạr emhiigh ika?

Mem mọ amuphẹ phọ, abumor phọ epẹ ekpu ogbo phọ aTongạ umhoọgh ghan iyạl ikpo asitrạkt r’arinyạ bịn epẹ Tongạn—onhụ aPolinesia. Usighẹ ghan oḍighinhom ḍinyạ onhụ aḅekeeny phọ oghol bọ mọ The Truth That Leads to Eternal Life mem lọ omite epẹ erugh phọ. Kụ iḍighi kụ, mem dị ophạm askul ikumor awe phọ esi inya asiwiki, iraạr abumor ekpisi phọ dị u/kạr unaghạn aḅekeeny umeeraam ni mọ ogẹ oteneghi ḍinyạ phọ The Truth That Leads to Eternal Life onhụ aTongạ. APam kụ agẹ ghan, ipẹ reten kụ yoor osighẹ oghiọm olạ agadạ phọ epẹ Yunaitẹd Stet kụ oprint. Isighẹ ophaanyạ awiki ogẹ r’omiteom aḍinyạ phọ. Ghalamọ r’iduọn egeọm aḍinyạ phọ i/kạr bọ ni i/nighẹ, aḍinyạ phọ ilhoghonhaạn ni ḍighaạgh ibadị awe aTongạ olhegheri igey phọ. Obọ aPam r’amị u/ḍighi aani budị rogbạ ghan koteneghi inhọn arunhụ, kuolọ iphẹn phọ iḍạ ni ḍiḅeraạn ayoor oḍighi aani oḍighi phọ.

Pam, ika kụ idị adọl ekpisi arukpu ogbo phọ egbatanaạn r’epẹ Ostrelia?

Ogbaranaạn phọ apughạn! Iniin arikpisi yoor oghị ghan bọ, iboom imhaạm, eghologhọl, eephoọm, iwo, e/moon ḅilhẹ eenyẹ eḍien kụ irọl ghan. Etigheri oomo phọ iphẹn phọ, siphẹ eekuna aḍio phọ, yoor ughelọm ghan ni orọl isiphẹ  oọny otu phọ ayoor ophoghoghom abazị phọ—aḍighi ghan otu dị awe aPolinesia olhọgh ghan, uzaạm ghan okạm ḅilhẹ o/moọgh ghan iikpe. Ḍughul lọ odạy amite, yoor urọl ghan ni epẹ olhoghi otu phọ bịn omhiịn sigo iziph phọ, kụ odạy phọ amaạr asoor aaghironaan abazị phọ. Idọ asimem mọ iphẹn phọ inyu ghan iyoor ogbirima kụ oḅilhẹ ooḅereghị, bịn eḍighi iyaạr dị yoor oru ootughiạn imạ ilọ ekpisi phọ kparipẹ ghụn r’ikarạph.

Ibạm anmụny phọ uḅeraạn iyoor iikiạ loor esi dị, omaạr agey oḍighi ilọ areẹgh ḅilhẹ omaạr ghan opuru asipuru mem lọ omhiịn aḅekeeny. Mem mọ yoor oghị bọ Niue, oniin obạm oọny aru ni bịn aapholiọn ḍighaạgh aWinston idiphọ aburụ phọ amuza bọ, kụ aḅẹm mọ “Idị asuphuugh anạ iḅeraạn imị.” Eḍeenaan mọ, odị ko/miịn ghan ḍighaạgh dị aburụ amuza idiphọ, kụ o/kạr olhegheri ilọ oghaạph!

Itir ghan ni iyoor omhiịn asidọl arukulom mọ. Amarugh phọ abidị amaạr ri anhighẹ kuolọ adọl omhoon aloor phọ r’amuụm ophughọl kụ isughanam. Ghalamọ r’iduọn phọ ni bịn i/kịgh maạr esi abumor phọ. Mephironom bidị. Olhoghi abidị aḅaạl li iduọn bidị odi bọ ni r’arughun otu phọ abidị, ḅilhẹ r’eepoogh omoọgh esi orọl ghan ooseeny aZihova. Eḍeenaan phọ abidị iloghonaạn iyoor ḍighaạgh ogbon araraạr dị emhạn maạr ḅilhẹ r’odughe adọl aghuḍum mọ ayoor.

Pam, eeni amem iwạ ghan dị nạ kụ kakpạ muụm ḅilhẹ asạ eḍien olhe eten dị egbatanaạn. Ika kụ idị nạ arue ghan bọ aḍighi iphẹn phọ?

Odẹ amị kụ uloghonaạn imị ḍighaạgh. Odị kụ utughemị imị ilọ oḍighi ibadị araraạr, idiphọ okpoonị aniạn osaạm eḍien ḅilhẹ r’ilọ osighẹ iyạl ikpo araraạr oḍighinhom mem dị asidọl phọ ekpạr. Eniin amem dị yoor oghị epẹ Kiribati, yoor urọl obạm otu okạm dị oḅolhom ikpo abrik kụ okpeom iwạ. Osạ eḍien, mị uguph ude phọ, kụ asighẹ roopho oziph akpooniọm niạn. Okpạ amuụm, mị ughị aḍigh aani ḍikoọl dị anmariịr emạ phọ oḍigh akori aani. Ophune amuụm mọ, bidị uḍighinhom ghan oreeny dị amhạn iyạl akuḅu, kụ osighẹ ogheleghelẹ oḍigh okpoọm epẹ eekuna phọ, iwạ oghịgh aḍiwạ akonị. Kuolọ kparipẹ rosighẹ ekokọm kụ otulom epẹ eekuna oḍigh phọ, okạgh ghụn kuruma. Oye lọ eteẹny, katu asighẹ kuruma phọ kụ atuụgh bịn apighemhi asumeeny. Kụ akuruma phọ akị gạ phọ odị rawạ bọ bịn akor muụm mọ amuzeḍi. Minạ ugbi loor mọ edugh ni!—Tutụ iteẹny imị okpạ aani. Mị maphighemi kuruma phọ bịn iphẹr imị, i/ḅọph! Mem dị abuerị phọ anmariịr phọ mumilọgh imị ephẹr, oniin onyọ abidị aru ni uloghonaạn imị ḍighaạgh. Awe emhạ phọ iyoor u/pheghom ghan ephegh.

Nyina ikạr kụ eghelọm oḍighi phọ anyina epẹ arukpu ogbo phọ. Nyina ketue ni iḅenị aani iyoor iniin imạ idị emite epẹ phọ?

Winston: Isighẹ ni iyoor oọny amem ophironom iḍighinom araraạr ekpisi phọ. Esi omhaạm, mem dị abumor phọ uruomaan iyoor eḍien, Iḍighi ghan oomo eḍien phọ bidị osạ bọ. Eḅẹl amem mọ, yoor u/legheri ghan mọ ekpẹ osughenaan aani abidị. Kụ iḍighi kụ yoor ulhe ghan bịn kpel omhạn! Esighẹ rekị kụ yoor ogbi olegheri, pọ kụ amem dị yoor omhiigh osughenaan aani ghan abidị. Abumor phọ ulegheri ni mọ e”legheri kụ iḍighi bọ iyaạr phọ yoor bidị u/sughenaan ghan bọ. Ologhi abidị aḅaạl ghan agey omhiịn ayoor torobọ odiiny unwanyụ mem dị yoor oghị okumu abidị. Ipel iyoor, abumor phọ u/moọgh ghan bunhọn abumor siphẹ ookpomoghan phọ dị oḍighi ruuruen.

Eghị phọ ayoor ingọ ghan kẹn imạ ogbaanaạn ramạ phọ. Ibadị awe emhạ phọ ugbi ghan mọ ookpomoghan abumor phọ amuneen siphẹ emhạ phọ abidị bịn. Kụ iḍighi kụ iduọn yoor oḍuạ bọ emhạ aḅekeeny oghị ophogh abumor phọ, abuọ ekpisi phọ umhoọgh ni oḅaạl olhoghi oḅilhẹ olhegheri m’ookpomoghan phọ aleeny ni eleeny.

Pam: Amem dị mị ka/tue ni bịn abula pọ amem dị yoor oghị epẹ Kiribati, ookpomoghan dị iyạl ikpo abumor bịn kụ orọl ghan. Ogina okumor oye dị arọl ghan bọ, Itinikai Matera, aḍighi ni oomo idị odị katue omhiịn mọ odị amaạr ri uphogh iyoor. Eniin aḍio, odị aphạm egunum dị eniin eghele akenẹgh bịn edi kụ arumom, kụ aḅẹm mọ: “Mị uruomnaan inyina.” Eghele akenẹgh iḍighi ghan eekiạ iyaạr mem mọ amuphẹ phọ. Eniin eghele akenẹgh phọ epẹ phọ itir agey rokpom ayoor.

 Pam, imoọgh ni mem dị okuruḅakạ anạ aḅuạ. Eeghe kụ iloghonaạn nyinạ ḍighaạgh orue okparạm?

Mị usoph ni eghun lhạ phọ 1973 mem dị aWinston r’amị orọl Saụt Pasifik. Kuolọ yoor oḅula bọ Ostrelia, inya arunwanyụ kụ iten bịn okuruḅakạ phọ aḍuạ. Ipẹ emite bọ itir aani agey Winston; loor esi dị abumoọny odị aani ni. Idiphọ amem mọ rekị bọ, eephina phọ iphọ ni, kuolọ mị u/tue bịn ubula tutụ yoor omhiịn Watchtower April 15, 2009. Iphạm emuoghaạph dị eḅẹm mọ: “Is there any hope of a resurrection for a baby that dies in its mother’s womb?” pakirị phọ eḅẹm bọ mọ “Questions From Readers.” AZihova kụ alegheri ipẹ odị kaḍighi bọ, loor esi dị oomo amem odị raḍighi ghan ipẹ eru bọ elhiom. Odị kagbuurogh ni asighẹ oomo ariiphina phọ okarạph aḅirini phọ ophọn m’akọm bọ, iduọn odị k’atom bọ Oọny phọ odị “ophiemi iiḍighi phọ eru.” (1 Jọn 3:8) Emhuoghaạph phọ iloghonaạn kẹn iyoor ḍighaạgh omaghamị amaạr egbogh “ekpo ebẹ” phọ yoor oḅọm bọ idiphọ awe k’aZihova! Yoor muḍighi bọ ika nuụn eḍighi maạr dị oḍuomologhi Omhạr phọ k’u/lo?

Mem mọ okuruḅakạ phọ amị aḅuạ bọ, yoor uḅilẹ ni oḅula okọy eten phọ. Yoor ukumu ni siphẹ Olạ Agadạ phọ Ostrelia, kụ ekureriom mọ yoor oḅilẹ omhiigh oḍighi opoghom eghir phọ. Lhạ phọ 1981, mem dị yoor mokumu inya asiạ rikpisi dị ke/ghughuronhu agey dị oghol mọ Niu Saụt Wels r’aSidni, umhạgh ni iyoor oghị okumu epẹ Olạ Agadạ phọ Ostrelia, idiphọ oghol ghan bọ k’eḅẹl emhiighom mọ.

Winston, adọl phọ anạ epẹ arukpu ogbo phọ aSaụt Pacific iloghonaạn ni nyinạ ḍighaạgh siphẹ oḍighi phọ anạ, idiphọ oniin Odị Rapogh aani ghan Olạ Agadạ phọ Ostrelesia Ḍughụm?

Ghụn ni, ibadị areten. Eḅẹl amem mọ, Ostrelia kụ uphogh ghan Amerika Samoa r’aSamoa. Esighẹ rekị, bịn osighẹ olạ agadạ aNiu Ziland oḅarạm opọ Ostrelia bịn oghol mọ Olạ Agadạ Ostrelesia. Nyiidiphọ, olạ agadạ Ostrelesia rapogh ghan Ostrelia, Amerika Samoa r’aSamoa, rukpu ogbo phọ aKuk, Niu Ziland, Niue, Timor-Leste, Tokelau, r’aTongạ—kụ mị mamoọgh ni eepoogh oghị aani ibadị arikpisi phọ iphẹn phọ idiphọ omeerạ enye olạ agadạ. Okumuan r’abumor r’abumarani phọ odi bọ rukpu ogbo phọ ipẹ phọ ekạr kụ iloghonaạn imị ḍighaạgh siẹn mị rakumuan bọ ephẹn olạ agadạ phọ.

Oghaạph okureriom, mị iḅenhị inyinha, aPam r’amị mokạr kụ olegheri k’amem dị m’ebia ni iboom mọ, ghalamọ ibạm anmụny bịn rowạ ghan ni Enaạn ki/kumor awe bịn. Iḍoọgh awe kẹn bịn rowạ aani ni “egbogh ekpo ebẹ” phọ ephẹn phọ—ghalamọ abuọ eghunotu abidị u/ḍeenaan ni ḍiḅeraạn, iduọn imitenaan bọ iyoor. (2 Ki. 5:2, 3; 2 Chron. 34:1-3) Ogbạ agey, aZihova aḍighi Enaạn ephomoghiạn dị rawạ mọ torobọ oye, mughumọ iḍoọgh m’ikumor awe, omhoọgh ghuḍum!

Mem mọ aPam r’amị omhiigh bọ owạ Enaạn 50 asiạ epẹ omhạn, r’eghereḅa yoor u/legheri mọ imạ keḍuạ ni emite. Dị iikia i/lo, igey ilọ Omhạr phọ eḍighi ekpo ebẹ dị ikpoki ke/tue eko! Yoor osopha ophạm okananaạm egbogh ekpo ebẹ phọ epẹ phọ r’oomo inyaạm ayoor!