Uḍighi ika kụ aZizọs aḅạ bọ ikpo onhụ aDevid edi bọ Psalm 22:1 mem mọ kesophaan bọ nyodị?

Matiu 27:46 eḅẹm mọ: “Enaạn amị, Enaạn amị, uḍighi ika kụ nạ mughel bọ imị?” Ikpo onhụ phọ iphẹn phọ, eḍighi aani iniin ikpo onhụ dị aZizọs aḅạ mem mọ resophaan bọ nyodị. Mem mọ aZizọs aḅẹm bọ iduọn phọ, odị amhunhenhi ikpo onhụ okọ suọr phọ Devid, edi bọ siphẹ Psalm 22:1. (Mạk 15:34) Keḍighi ni opiomạn okureri mọ aZizọs aḅạ ikpo onhụ phọ iphẹn phọ loor idị aZihova kụ abi nyodị, obobọ mọ odị aroph omheeraam esi Enhaạn ekulha amem. AZizọs akạr ri alhegheri iyaạr phọ eḍighi bọ kụ ewạ bọ ni mọ odị amhugh, kụ odị aakolhobian ni oḍighi iduọn phọ. (Mat. 16:21; 20:28) Odị alhegheri ni kẹn mọ mem aḍuugh phọ onọ, kewạ ni dị aZihova kasighẹ oghoph odị esi odị. (Job 1:10) Kụ iḍighi kụ aZihova angọ eepoogh mọ aZizọs amạ amiteom mọ odị aḅạr ri nyinọ etigheri odọ phọ aḍuugh phọ odị kamugh bọ.—Mạk 14:35, 36.

Eeghe kụ iḍighi kụ aZizọs aḅạ bọ ikpo onhụ aḍuọr phọ aḍiẹn phọ? Yira u/kạr ulegheri, kuolọ ooḅeghiọn riphigh dị eeni ketue ni ekọm. *

Nạ ragbi mọ aZizọs aḅạ ikpo onhụ phọ iphẹn phọ olhọgh iiphaghamhiọm mọ aZihova ka/sophoghom ḍuugh phọ onọ ḍughụm? Iwạ mọ aZizọs akpẹ etagharạn phọ bịn dị aZihova ka/loghonhaạn ḍighaạgh. Odị aḍighi iḅaạl r’iphulhupul, kụ iwạ mọ odị “aghol oomo awe amugh.”—Hib. 2:9.

 Ilọ koḅẹm mọ odị aghaạph aghol pakirị aḍuọr phọ aḍiẹn phọ, ootughianhạm awe phọ ipẹ oomo aḍuọr phọ eghaạph bọ ḍughụm? Mem mọ opọ phọ, iḍighi ghan ni idị awe aJu phọ omhoọr ghan ibadị asuọr phọ ipẹ phọ, dị esi u/pogh. Bidị ronhaghạn eniin ekpịgh bịn meetughianhạm bidị oomo phọ aḍuọr phọ. Eḍighi maạr dị aZizọs atụ idiphọ, pọ iduọn phọ odị alhoghonhaạn ḍighaạgh Ju phọ odạph ghan bọ nyodị, ootughiạn oomo imiịn phọ aḍuọr phọ ephamhanhạm bọ ilọ aḍuugh phọ odị. (Ps. 22:7, 8, 15, 16, 18, 24) Ḅilhẹ kẹn, epẹ eekunha aḍuọr phọ, omoọr mọ itooghị phọ aZihova bịn kụ ipelheghiom oomo isiẹn ade phọ.—Ps. 22:27-31.

Odị amạ ghan amiteom mọ araghaạgh onọ eḅaạl li, esi oḅạ ikpo onhụ phọ aDevid ipẹ phọ ḍughụm? Kụ ogbi bọ oghiigh aZizọs, odị asoman ni owaaghị ophogh dị u/daphạn olhogh, bịn oḅẹm mọ odị asoor olhogh oopụ Enhaạn. (Mat. 26:65, 66) Bidị ukem bịn ookpomhoghan ogbo aḍughul ophạm owaaghị ophogh dị u/daphạn olhogh. (Mat. 26:59; Mạk 14:56-59) Iduọn kụ iḍighi kụ, eeni aZizọs aḅạ ikpo onhụ phọ iphẹn phọ oḍighi idị awe kolegheri m’onọ o/soor olhogh dị emhoghi oghiigh odị.

Ilọ koḅẹm mọ aZizọs aatughianhạm ghan we phọ mọ ghalhamọ r’iduọn aDevid ogeọm aḍuọr phọ amhiinhọm bọ ni, mọ o/roph kuuḅi aghisigh aZihova ḍughụm? Aḍipuru phọ aDevid i/ḍeenhaan mọ odị o/mhoọgh omheeraam esi Enhaạn. ADevid ropuru ḍipuru phọ, bịn aghiọm ghisigh aghaạph amiteom oḍuomolhoghi phọ odị amhoọgh bọ aghị esi iikpọ apelieẹny phọ aZihova, kụ aZihova aghiọm ni ghisigh asẹph ghan nyodị. (Ps. 22:23, 24, 27) Iniin phọ kẹn ni, ghalhamọ r’iduọn aZizọs, ‘Oọny phọ aDevid’ amhiinhọm bọ ni siphẹ oreeny imhinhimhiịn phọ, i/ḍeenhaan mọ odị o/mhoọgh mun kuuḅi aghisigh aZihova.—Mat. 21:9.

Iḍighi edị aZizọs aḍeenhaan ghan oboom okururu loor iduọn aZihova kabilhẹ bọ oghoph Odị eẹny ekulha amem obọ odị aḍeenhaan ḍimeeraam mọ odị ḍughụm? AZihova o/lhẹm Oọny phọ odị dị kamiinhọm kụ aḅilhẹ amugh. Iphẹn phọ imite loor esi oḅaạr emhụ phọ Adam r’Iv. AZizọs ko/piọm ghan iyaạr, odị awạ ophagharanhaạn aḍipuru phọ aSetan apuru bọ r’oḅilhẹ omiteom ekiạ etagharạn phọ pidị awe oḅilhẹ omhoọgh raraạr phọ ipẹ bidị oroph bọ. (Mạk 8:31; 1 Pit. 2:21-24) Iphẹn phọ kemite mem dị aZihova awilhẹ oghoph aZizọs eẹny ekulha amem siphẹ adọl aghuḍum mọ odị.

AZizọs awạ ghan mọ abumatuạn phọ odị ootughiạn ghan iyaạr phọ eḍighi bọ kụ aZihova amheera bọ mọ odị amhugh siphẹ oreeny phọ ḍughụm? * AZizọs alhegheri ni mọ aḍuugh egbo phọ odị kamugh bọ idiphọ osoroghuom iilhogh siphẹ oreeny imhinhimhiịn phọ, kekọm ni idị ibadị komelheghu. (1 Kọr. 1:23) Kuolọ eḍighi maạr dị abumatuạn phọ odị ogbon okạr iyaạr phọ odị atụ bọ kụ amhugh, keloghonhaạn bidị ḍighaạgh olhegheri idị aḍuugh phọ odị emhạn maạr. (Gal. 3:13, 14) Keḅilhẹ eḍighi idị bidị komiịn mọ odị ko/soroghuom iilhogh, kparipẹ ghụn aḍighi Opeliạ.

Etigheri iyaạr phọ eḍighi bọ kụ aZizọs aghaạph bọ aghol ikpo-onhụ phọ iphẹn phọ, odị alhegheri ni mọ odị raḍighi ni ogbi phọ Enhaạn esi omhugh isiphẹ oreeny phọ. AZizọs aḅạ bọ ikpo onhụ okọ suọr phọ, I/bia bịn aḅẹm mọ: “Memuneen!” (Jọn 19:30; Luk 22:37) Idiphọ aZihova awilhẹ bọ oghoph aZizọs esi ekulha amem imiteom eepoogh dị aZizọs amhunhenhi oomo ipẹ orom bọ nyodị oru isiẹn ade phọ oḍighi. Ingọ kẹn nyodị eepoogh omhunhenhi oomo ipẹ ogẹ bọ ilọ odị “siphẹ iilogh phọ aMozis, r’igeeghị ariil phọ Enaạn, r’aḍinyạ asuọr phọ.”—Luk 24:44.