1-2. Etagharạn phọ p’eeghe, kụ uḍighi ika kụ yira omhoghi bọ etagharạn phọ?

MEM mọ Adạm aḍighi bọ ikarạph phọ, odị aroph eepoogh aghuḍum k’agee-pọ odị ḅilhẹ r’olọ anmụny phọ odị. Egbaạm i/lo esi ipẹ Adạm aḍighi bọ. Odị akạr ri alhegheri kụ aḍighi ikarạph phọ. Kokaạph ika ilọ ibạm anmụny phọ odị? Bidị u/ḍighom aani ikarạph phọ Adạm. (Rom. 5:12, 14) Kotue ni otagharạn bidị esi erugh aḍuugh phọ osophonhaan bọ ogbogh odẹ phọ abidị ḍughụm? Ii! Onyebel roten, mem mọ Adạm aḍighi bọ ikarạph phọ, bịn aZihova amhiigh ogananami ipẹ odị katagharạn bọ irubal anmụny phọ Adạm esi ikarạph r’aḍuugh. (Gen. 3:15) Eteẹny mem mọ, aZihova katom Oọny phọ odị epẹ k’akẹ phọ oru isiẹn ade phọ “osighẹ aghuḍum mọ odị otagharanạm aḍita.”—Mạk 10:45; Jọn 6:51.

² Etagharạn phọ p’eeghe? Odaphạn Igẹ Iigbia aKristẹn Grik phọ, etagharạn phọ kụ iyaạr phọ aZizọs akpẹ bọ, ogho oḅulhemi iyaạr phọ Adạm aroph bọ. (1 Kọr. 15:22) Uḍighi ika kụ yira omhoghi bọ ni etagharạn phọ? Loor esi dị odaphạn elhiom ooruẹn phọ aZihova, idiphọ edi bọ siphẹ Olhogh phọ, aghuḍum amerenyạn ghuḍum. (Ex. 21:23, 24) Adạm aroph ghuḍum dị amhunhughan. Oḍighi idị kekasiạn r’elhiom ooruẹn phọ Enhaạn, aZizọs aphighirọn ghuḍum mọ odị amhunhughan bọ. (Rom. 5:17) Esi iduọn phọ, odị maḍighi “Odẹ k’agee-pọ” esi oomo abuphẹ omheeraam bọ etagharạn phọ.—Isa. 9:6; Rom. 3:23, 24.

3. Odaphạn Jọn 14:31 r’15:13, uḍighi ika kụ aZizọs aakolhobian bọ ni ophighirọn aghuḍum mọ odị amhunhughan bọ?

³ AZizọs aakolhobian ophighirọn aghuḍum mọ odị loor eboom ephomhoghiạn phọ odị amhoọgh bọ aghị esi Odẹ phọ odị r’ayira. (Bạl Jọn 14:31; 15:13.) Loor ephomhoghiạn phọ ephẹn phọ, aZizọs asopha orọl adọl aruukuan bịn k’eekunha  aghuḍum mọ odị, ḅilhẹ r’omhunhenhi ogbi Odẹ phọ odị. Iphẹn phọ meḍighi idị iḅẹl igbiom mọ aZihova ilọ omhạr awe r’ade phọ kemunughan. Siẹn emhuoghaạph phọ ephẹn phọ, yira kooḅeghiọn iyaạr phọ eḍighi bọ kụ Enhaạn amheera bọ mọ aZizọs amhugh ḍuugh egbo. Yira koḅilhẹ kẹn ooḅeghiọn eḍeenhaan ogeọm aBaibul dị asereghiạn etagharạn phọ. Eekunha phọ kụ yira ooḅeghiọn ipẹ yira kotue bọ oḍeenhaan mọ yira osereghiạn ni etagharạn phọ, ḅilhẹ r’ipẹ yira kotue bọ okuamhị osereghiạn ekiạ phọ aZihova r’aZizọs omiteom bọ.

4. Kaạph ipẹ aZizọs amhugh bọ.

⁴ Tuutughiạn ipẹ emite bọ ḍughul otu phọ aZizọs esughanham bọ omhạn siẹn ade phọ. Obọ odị mutue ni amhạgh ḍita aruukpaạny oghoph odị, kuolọ odị amheera ni mọ awe eghạm aRom mọ osiph nyodị okuphogh ilọ eḅeraạn. (Mat. 26:52-54; Jọn 18:3; 19:1) Bidị ugoroghọm nyodị ikparạ dị ephanyị ḍizu phọ odị. Kụ oḅilhẹ okpaariọm nyodị osighẹ omhạn phọ mokponyọn bọ oroolhom oreeny dị k/oọny enụm. AZizọs akururuọm ni oreeny phọ anyeenheom epẹ kokiigh bọ nyodị, i/bia bịn bidị ozuan oye dị raten aani kụ okpaariọm mọ aroolnaan nyodị. (Mat. 27:32) AZizọs rosi siphẹ kokiigh bọ nyodị, kụ abuọ eghạm mọ okạn raghaạgh r’aruwol odị siphẹ oreeny phọ. Loor eemọr aloor phọ odị, ariisi phọ okanạgh bọ nyodị imhiigh ni ophanyuạn. Arighirị phọ r’onhiin phọ odị romoghi, abutooghiạ aJu phọ rogilaạm nyodị. (Luk 23:32-38; Jọn 19:25) Odị amhiinọm ni ikika awạ. Ekpom mọ r’amuupuph phọ odị eemọr, kụ enhịn nyodị ophooghu. Kesophaan bọ nyodị, kụ odị aaḅereghị iiḅereghị okpạr opu. Kụ azumeri emhụ phọ odị bịn esophaan nyodị. (Mạk 15:37; Luk 23:46; Jọn 10:17, 18; 19:30) Eten aḍuugh dị ekoronhaạn r’imhinhimhiịn, r’eephinha ḅilhẹ r’aroofola!

5. Esi aZizọs, eeghe kụ eeph epu eten phọ epẹ oghiigh bọ nyodị?

⁵ Esi aZizọs, obọ eten phọ oghiigh bọ nyodị kụ ko/kạr iiḅaghamhị phọ. Kuolọ iyaạr phọ oghol bọ kụ rokiigh nyodị kụ ikạr bọ eeḅaghamhị nyodị. Usiph nyodị olhogh oopụ Enhaạn—idiphọ oye dị u/lọgh eegu Enhaạn obobọ ḍien phọ Enhaạn. (Mat. 26:64-66) Olhogh phọ bidị osiph bọ nyodị kụ aaḅaghamhị bọ nyodị dị tutụ odị aatughiạn ghan mọ obọ Odẹ phọ onọ asighẹ egọ imhinhimhiịn phọ. (Mat. 26:38, 39, 42) Uḍighi ika kụ aZihova amheera bọ mọ Oọny phọ odị amhiinhọm eten phọ ephẹn kụ amhugh? Ooḅeghiọn iraạr ariphigh.

6. Uḍighi ika kụ ewạ bọ dị kokạn Zizọs loor oreeny?

⁶ Eḅẹl phọ, Iwạ mọ okạn Zizọs anyụ oreeny otagharanhạm aJu phọ esi adọl itulughian. (Gal. 3:10, 13) Bidị ughunyan odạph Olhogh phọ Enhaạn, kuolọ bidị u/tuụgh udaphạn. Idiphọ anmụny Adạm, bidị okpẹ omhuughu, kụ oḅilhẹ oḅarạm itulughian phọ iphẹn phọ. (Rom. 5:12) Olhogh phọ Enhaạn angọ bọ Izrạl aḅẹm mọ oghiigh ghan ni oye dị aḍighi ikarạph dị ephạm erugh aḍuugh. Eeni amem ukạn ghan ḍizu oye loor oreeny mem dị moghiigh. * (Deut. 21:22, 23; 27:26) Kụ iḍighi kụ iduọn okạn bọ Zizọs loor oreeny phọ, iḍighi idị edughanhaan eelhe aJu phọ oghel bọ nyodị, omhooghọm aani asuọ ekiạ phọ odị.

7. Eeghe kụ omhunhenhiom iyạl ephigh phọ Enhaạn atuạn bọ amheera mọ Oọny phọ odị amhiinhọm?

⁷ Omhunhenhiom iyạl ephigh phọ Enhaạn amheera bọ mọ Oọny phọ odị amhiinhọm pọ, Odị atughemhị ghan Zizọs ilọ oḍighi phọ odị amhoọgh bọ ghisigh idiphọ Uw-emhụ Opinyọn Rikiạ ayira. AZizọs amhiịn ni ipẹ ekpạr  bọ orọl eeḍiạn ogbagarạ odẹgh ophogh kụ onhaghanhạn Enhaạn. Ikpuuroghọm mọ iphughạn ni dị tutụ odị “aaḅereghị ghan ni alooghị amoghi” ilọ olhoghonhaạn aḍighaạgh. Okạr oghaạph, idiphọ aZizọs r’aloor masoman aani ghan bọ ni sidọl oḅonyonhu ozuan, odị anaghanhạn ni sidọl phọ ayira, kụ ‘katue ni uloghonaạn iyira ḍighaạgh’ mem lọ “odẹgh ophogh” usoorom iyira. P’eeghe idị yira rosẹph aZihova iduọn odị ungọ bọ iyira Uw-emhụ Opinyọn Rikiạ dị “aḍighi ni oye dị alegheri igbiririph mọ yira odugh ni”!—Hib. 2:17, 18; 4:14-16; 5:7-10.

8. Eeghe kụ omhunhenhiom iraạr ephigh phọ, aZihova amheera bọ mọ aZizọs asoman igbagarạ imhinhimhiịn?

⁸ Omhunhenhiom iraạr, aZihova amheera mọ aZizọs asoman igbagarạ imhinhimhiịn loor ophagharanhaạn ephigh aḍipuru dị eḅẹm mọ: Awe kotue ni oḍuomolhoghi Enhaạn mem dị osoman ogbarạ odẹgh ophogh ḍughụm? ASetan aḅẹm mọ oye ka/tue! Odị aghophora mọ awe rotuạn ghan raraạr dị Enhaạn kasephọm bidị kụ okumu nyodị. ASetan ameeraam mọ, idiphọ Adạm, awe u/pomhoghiạn aZihova. (Job 1:9-11; 2:4, 5) Loor esi iduọn aZihova aḍuom bọ olhoghi Oọny phọ odị, Odị amheera ni dị kodẹgh okparạm Oọny phọ odị opogh eten dị epelhom ilọ omhạr awe. AZizọs aphamhanhạm ni dọl aruukuan phọ odị, kụ amạ amiteom mọ aSetan ogbaạm okpẹ.

9. Eeghe eḍeenhaan kụ idị otelhedom mọ aJọn uphighinhaan iyira?

⁹ Itughemhị etagharạn pho mekparamhị ni omheeraam ibadị aKristẹn. Bidị mophamhanhạm ni oghaạph iiḅi iinhaghạn phọ etigheri isophoghom, oḅilhẹ okparaghạm odẹgh ophogh kirokirọ bịn tutụ okpoọm. Ooḅeghiọn eḍeenhaan otelhedom mọ Jọn. AJọn alhom bịn agheelhom oḍighi oghaạph ghan igey phọ ilọ aKraist r’ekiạ etagharạn phọ, dị eeni epel li 60 asiạ. Mem dị odị rakị omhạn 100 asiạ, Iikpọ Itooghị aRom mọ umhiịn nyodị idiphọ amulhọgh ḍien bịn ophorogh nyodị osighẹ oghị epẹ ekpu ogbo phọ aPatmos. Odị asoor eeghe olhogh? Odị aghaạph ghan “oghaạph phọ Enaạn r’ipẹ aJizọs Kraist agananami bọ.” (Ogan. 1:9) P’eeghe emạ eḍeenhaan omheeraam r’okparạm!

10. Ika kụ idị igẹ phọ aJọn eḍeenhaan mọ odị asereghiạn ni etagharạn phọ?

¹⁰ Igẹ iigbia phọ aJọn eḍeenhaan mọ odị aphomhoghiạn ni iboom Zizọs, aḅilhẹ asereghiạn ekiạ etagharạn phọ. Aḍinyạ phọ odị epamanhạm riisi dị repel li 100 dị eghaạph ilọ etagharạn phọ obobọ imạ araraạr dị ekiạ phọ meḍighi idị edugh oteẹny. Esi omaạm, aJọn agẹ mọ: “Olọ aḍighi ikarạph, yira omoọgh ni oye dị ameerạ enye ogbạ ophelọm ayira ghisigh Odẹ phọ. Ophọn phọ aJizọs Kraist, oye aghuḍuul phọ.” (1 Jọn 2:1, 2) Igẹ phọ aJọn eḅilhẹ kẹn ekaạph elọgh iiphaghamhiọm idị emhạn maạr oghaạph ghan “ipẹ aJizọs agananami bọ.” (Ogan. 19:10) Egananani mọ aJọn akạr kụ asereghiạn ekiạ etagharạn phọ. Ika kụ idị yira kotue oḍeenhaan mọ yira osereghiạn aani ni?

11. Eeghe kụ ketue ilhoghonhaạn iyira ḍighaạgh ogbagharạn odẹgh ophogh?

¹¹ Gbagharạn inyuughiom oḍighi ikarạph. Eḍighi maạr dị yira okaraghị ni osereghiạn etagharạn phọ, pọ yira koo/tughiạn mọ: ‘I/moghi okạr olhọgh inyaạm ogbagharạn ghan odẹgh ophogh oḍighi ikarạph. Mị katue ni aḍighi ikarạph kụ alọm osạr owilhenhaạn.’ Kparipẹ ghụn, mem dị yira osoman odẹgh ophogh oḍighi iyaạr dị i/nighẹ, oḅẹm mọ: ‘Eeye! Keḍighi ika kụ mị aḍighi iyaạr dị erọl idiphọ esi oomo phọ iphẹn aZihova r’aZizọs muḍighinhaan bọ imhị?’ Odaphạn iphẹn phọ, nạ katue ni alọm  aZihova inyaạm, aaḅereghiạn mọ: ‘Ka/meera mị amheel aḍighanaan odẹgh ophogh.’—Mat. 6:13.

12. Ika kụ idị yira kotue osighẹ oḍighinhom oroma phọ odi bọ siphẹ 1 Jọn 3:16-18?

¹² Pomhoghiạn bumor r’abumarani phọ anạ. Yira oḍeenhaan edọ ephomhoghiạn phọ ephẹn phọ, pọ yira romạ ghan komiteom mọ yira osereghiạn ni etagharạn phọ. Eeghe kụ iḍighi? Loor esi dị aZizọs o/ngọ ghuḍum mọ odị ogina ayira bịn, kuolọ eḅaramaạm aani ni bumor r’abumarani phọ ayira. Iduọn odị aghol aani bọ emhụ abidị amhugh, eḍeenhaan mọ bidị omạn ni maạr agey esi odị. (Bạl 1 Jọn 3:16-18.) Yira roḍeenhaan ghan ephomhoghiạn bumor r’abumarani phọ ayira esi eten phọ epẹ yira rozoọm ghan bọ bidị. (Efẹ. 4:29, 31–5:2) Esi omaạm, yira rologhonhaạn ghan ni bidị ḍighaạgh mem dị bidị u/moon, obobọ osoman ogbagarạ odẹgh ophogh, eḅaramaạm ekperenhom iiḅaghamhị eseereom. Kuolọ yira koḍighi ika mem dị onyọ umor obobọ umarani aḍighi obobọ aghaạph iyaạr dị repin esi ayira?

13. Eeghe kụ iḍighi kụ yira kosạr ghan bọ obilenhaạn?

¹³ Rekparanhaạn ghan ni nyinhạ eeni amem osạr owilhenhaạn onyọ umor dị apiomạn nyinhạ ḍughụm? (Lev. 19:18) Eḍighi idiphọ, pọ daphạn oroma phọ aḅẹm bọ mọ: “Iminoghọm ghan esạr ghan ewilenaạn ikarạph Iọ awe iḍighi inyina. lsạr ghan ewilenaạn bunọn, idiphọ Omoọgh-we phọ masạr bọ iwilenaạn inyina.” (Kol. 3:13) Torobọ amem dị yira osạr owilhenhaạn bumor r’abumarani phọ ayira, pọ yira roḅenhị ghan Odẹ k’akẹ phọ ayira mọ yira okạr ri osereghiạn etagharạn phọ. Ika kụ idị yira kotue okiọm ghisigh obughẹ osereghiạn phọ ayira ilọ inmo phọ Enhaạn iphẹn phọ?

14. Eghẹn kụ eniin eten dị yira kobughẹ osereghiạn phọ ayira ilọ etagharạn phọ?

¹⁴ Sẹph aZihova ilọ etagharạn phọ. Oniin onyọ umarani epẹ India, dị mamhạn 83 asiạ dị oghol mọ Joanna, aḅẹm mọ “mị aatughiạn mọ emạn ni maạr iboom oghol etagharạn phọ osẹph ghan aZihova siphẹ iiḅereghị phọ amhị ḍio ḍio ḍio.” Mem dị ogina anạ raaḅereghị, tuutughiạn sipiomạn dị nạ apiomạn emhụ aḍio phọ kụ alhọm aZihova osạr owilhenhaạn. Kuolọ eḍighi maạr dị nạ maḍighi igbogh ikarạph kemoghi ni dị nạ kateẹny ikumor awe phọ ilọ olhoghonhaạn aḍighaạgh. Bidị konhaghanhạn ni nyinhạ kụ osighẹ Ekpo Onhụ phọ Enhaạn oromaam nyinhạ. Bidị kooḅereghị ni r’anạ,  kụ olọm aZihova mọ asighẹ aḍighinhom ekiạ phọ aZizọs, obọ asiya phọ anạ r’aZihova eḅilhẹ emhoon.—Jems. 5:14-16.

15. Eeghe kụ iḍighi kụ yira kolọgh bọ mem aạl r’ogbirima ghan ilọ etagharạn phọ?

¹⁵ Gbirima ilọ etagharạn phọ. Oniin onyọ umarani dị mamhạn 73 asiạ dị oghol mọ Rajamani aḅẹm mọ: “Torobọ amem lọ mị aạl ilọ imhinhimhiịn phọ aZizọs, izin reelhelheghan ghan ni riḍien amhị.” Eeni ketir ri nyinhạ iboom mem dị nạ aatughiạn ilọ imhinhimhiịn Oọny phọ Enhaạn. Kuolọ amem dị nạ aghiọm ghisigh akuamhị ghan agbirima ilọ ekiạ phọ aZizọs aphighirọn bọ, kụ edị ephomhoghiạn phọ anạ esi odị r’Odẹ phọ odị kekuamhị ebụgh. Orue ogbirima ilọ etagharạn phọ, pọ sighẹ aḍighi emhuoghaạph ituughạ ogina anạ dị egbatanhaạn.

16. Ika kụ idị yira komooghọm suọ esi otughemhị aani abunhọn ilọ etagharạn phọ? (Miịn afoto oḅẹl opoḍi phọ.)

¹⁶ Tughemhị bunhọn ilọ etagharạn phọ. Yira oghaạph ghan ilọ etagharạn phọ oḅenhị aani bunhọn, osereghiạn phọ ayira kabụgh ni. Kụ yira omoọgh ni imạ araraạr otughemhiọm abunhọn ilọ ipẹ aZizọs atụ bọ kụ amhugh. Esi omaạm, yira kotue ni oḍighinhom esi ituughạ phọ 4 siphẹ abrosọ phọ Good News From God! Emhuoghaạph phọ eḅẹm bọ mọ “Who Is Jesus Christ?” Obobọ emhuoghaạph phọ 5 siphẹ aḍinyạ phọ, What Can the Bible Teach Us? Eḅẹm bọ mọ, “The Ransom—God’s Greatest Gift.” Torobọ alhạ yira rosereghiạn ghan ni etagharạn phọ esi oghị aani ghan aMemorial phọ, r’esi omhạgh aani ghan abunhọn r’oophugh mọ oru uḍighan aani iyira. P’eeghe eepoogh dị aZihova ungọ iyira, otughemhị aani abunhọn ilọ Oọny phọ odị!

17. Uḍighi ika kụ etagharạn phọ eḍighi bọ ikaraghị igbogh inmo dị Enhaạn engọ omhạr awe?

¹⁷ Iikia i/lo, yira omoọgh ni egey ephigh otuạn omhoọgh oḅilhẹ ophamhanhạm eegharạ osereghiạn ghan ekiạ etagharạn phọ. Etagharạn phọ meḍighi idị yira momhoọgh mugey amasian r’aZihova, etigheri e/munughan phọ. Eḅilhẹ eḍighi idị kopiemhi oomo iiḍighi phọ Eru. (1 Jọn 3:8) Ḅilhẹ kẹn, oḅẹl ogbi phọ aZihova ilọ ade phọ kamunughan. Ade phọ keḍighi paradaịs. Torobọ oye kapomoghiạn aḅilhẹ akumu ghan aZihova bịn. Torobọ aḍio, owạ ghan reten oḍeenhaan mọ yira osereghiạn ni etagharạn phọ—eḍighi bọ igbogh inmo dị Enhaạn engọ omhạr awe!