EMHUOGHAẠPH ITUUGHẠ Phọ 17
Nạ Amạn Ni Maạr Esi AZihova!
“AZihova amoọgh ḍiḅeraạn awe phọ odị.”—PS. 149:4.
AḌUỌR PHỌ 108 God’s Loyal Love
OGHAẠPH OOKARAGH *
Odẹ k’akẹ phọ ayira “amoọgh ḍiḅeraạn” atu esi atorobọ onyọ ayira (Miịn ekpịgh phọ 1)
1. AZihova ramiịn ghan eeghe loor awe phọ odị?
AZIHOVA “amoọgh ḍiḅeraạn awe phọ odị.” (Ps. 149:4) P’eeghe imạ oghaạph! AZihova alọgh ni elhegh imạ araagharạ phọ ayira; odị amiịn ni odọ oye phọ yira oru bọ, kụ uḍur iyira aloghomạ. Eḍighi maạr dị yira orọl dọl dị ekpẹ oḍuomolhoghi, odị kaḍuraan ni utuman iyira k’agee-pọ!—Jọn 6:44.
2. Eeghe kụ iḍighi kụ ekparanhaạn bọ buniin ayira omheeraam mọ aZihova apomoghiạn ni bidị?
2 Abuniin ayira otue ni oḅẹm mọ, ‘mị alegheri ni mọ aZihova apomoghiạn ni oomo awe phọ odị, kuolọ ika nuụn kụ edị mị kakuphom bọ owol mọ aZihova uphomhoghiạn ni imhị r’aloor?’ Eeghe kụ rekọm ghan bọ iyaạr phọ abuniin ayira ropuru ghan bọ ḍipuru phọ aḍiẹn phọ? Umarani dị oghol mọ Oksana *, dị amhiinhọm agey eghoroghọr, aḅẹm mọ: “Olhoghi amhị aḅaạl agey mem mọ mị aḍiiny bọ muụm aḅilhẹ amhiigh okọy eten. Kuolọ 15 asiạ reten, bịn mị amhiigh ootughiạn yogh idị meten, iiḅaghamhị ni imhị iboom. Mị ukureri bịn mọ mị maroph kuuḅi aghisigh phọ aZihova ḅilhẹ mọ mị u/kpeanhaạn mun dị aZihova kaḍeenhaan ephomhoghiạn.” Umarani dị oghol mọ Yua, dị rakọy ghan eten dị amhiinhọm aani agey eghoroghọr, aḅẹm mọ: “Mị uḅọgh loor amhị angọ aZihova loor esi dị mị uwạ oḍighi idị olhoghi odị kaḅaạl. Kuolọ mị uutughiạn ghan mọ odị ka/tue uphomhoghiạn imhị.”
3. Yira kooḅeghiọn eeghe siẹn emhuoghaạph phọ ephẹn phọ?
3 Idiphọ abumarani phọ oghaạph bọ oghol, nạ apomoghiạn ni aZihova agey, kuolọ eeni nạ raakia ni mughumọ odị akạr ri aphomhoghiạn nyinhạ. Eeghe kụ iḍighi kụ ewạ bọ ni dị nạ kakuphom owol mọ aZihova raphogh ni nyinhạ? Kụ eeghe kụ ketue elhoghonhaạn nyinhạ ḍighaạgh okpạr opu aḍikarạph aḍiitughiạn? Uguạ ooḅeghiọn ophanyanhaạn asipuru phọ iphẹn phọ.
OOKIA EPHOMHOGHIẠN PHỌ AZIHOVA EḌIGHI NI OOTO R’OSOOROMINEEN
4. Uḍighi ika kụ ookia ephomhoghiạn phọ aZihova eḍighi bọ ooto r’osooromineen?
4 Ephomhoghiạn renyu ghan oye oḍighi iyaạr. Eḍighi maạr dị yira okuphom owol ephomhoghiạn phọ r’obakị phọ aZihova, k’inyu iyira okumu odị r’oomo ekpom etigheri ipaanhaạn dị yira osoman. Kuolọ, eḍighi maạr dị yira omhoọgh iikia mọ Enhaạn ruphogh ghan ni iyira, yira “kokạr ri odugh.” (Prov. 24:10) Yira ko/tue omerenyạn izuoghom mọ aSetan, eḍighi maạr dị yira oḅonyonhu ozuan ḅilhẹ omhoọgh iikia oghị esi ephomhoghiạn phọ Enhaạn.—Efẹ. 6:16.
5. Ika kụ idị ookia ephomhoghiạn phọ Enhaạn metir buniin?
5 Iikia medughe ni buniin abumor dị okpẹ oḍuomolhoghi siẹn amem mọ ayira. Oniin okumor oye ookpomhoghan aḅẹm mọ: “Ghalhamọ r’iduọn mị rakumuan ghan bọ Betẹl aḅilhẹ rakelhọm ghan omite epẹ erugh phọ r’ookpomhoghan dị roḅạ ghan ooruen onhụ, mị uukia ni mughumọ aZihova asighẹ ni rikiạ phọ amhị. Isi ni esi dị mị apuruan ghan mọ, aZihova akạr ri ranaghạn ghan iiḅereghị amhị ḍughụm.” Umarani dị odi aani rukumuan oomo amem mọ dị oghol mọ Eva, aḅẹm mọ: “Mị amiịn mọ ookia ephomhoghiạn phọ aZihova eḍighi ni ooto r’osooromineen, loor esi dị ketir rukumuan phọ ipẹ nạ rangọ bọ aZihova. Ketir kẹn eephuạ phọ r’ibo phọ nạ amhoọgh bọ okumu aZihova.” AMichael, okọy eten dị aḍighi okumor oye ookpomhoghan, aḅẹm mọ: “Eḍighi maạr dị nạ u/meeraam mọ Enhaạn raphogh ghan ni nyinhạ, pọ nạ kameel li aḍuạ.”
6. Yira koḍighi ika mem dị yira rookia ephomhoghiạn phọ Enhaạn?
6 Areḍeenhaan phọ iphẹn phọ emạ emiteom mọ eḍighi ni ooto r’osooromineen ootughiạn ghan mọ aZihova iyira u/phomhoghiạn. Kuolọ yira koḍighi ika eḍighi maạr dị yira omhiigh ookia ephomhoghiạn phọ Enhaạn? Kpor asighẹ ḍiitughiạn phọ aḍiphẹ phọ mem mem mọ! Lọm aZihova asighẹ ikarạph “iitughiạn” phọ ipẹ phọ, angọ nyinhạ eephọ phọ odị ‘keeko bọ iitughiạn r’ologhi phọ anạ.’ (Ps. 139:23; igẹ dị edi ude; Fil. 4:6, 7) Legheri mọ ko/gina anạ bịn. Abunhọn abumor r’abumarani dị okpẹ ni oḍuomolhoghi robeanhan aani ni idọ iitughiạn phọ iphẹn phọ. Ghalhamọ arebenhẹ Enhaạn iḍiodi phọ bịn usoman aani ni iniin phọ ipaanhaạn phọ. Ooḅeghiọn iyaạr dị yira kotuughạ esi eḍeenhaan otelhedom mọ Pọl.
IYAẠR DỊ YIRA KOTUUGHẠ ESI EḌEENHAAN PHỌ APỌL
7. APọl asoman eeghe iiḅaghamhị?
7 Nạ raloghoma ghan ni mọ nạ amoọgh iboom iiḍighi dị nạ u/tue uḍighi ḍughụm? Eḍighi idiphọ, pọ eḍeenhaan phọ aPọl kelhoghonhaạn ni nyinhạ ḍighaạgh. Odị aaḅaghamhiạn ghan loor ilọ “adool oḍighi asiosị phọ.” (2 Kọr. 11:23-28) Nạ amoọgh ni iiḅaghamhị e/moon dị resighẹ ghan ibo phọ anạ ḍughụm? Eeni “ooburom” mọ agim bọ Pọl aḍighi iiḅaghamhị e/moon, kụ awạ ghan dị keḍuạ. (2 Kọr. 12:7-10) Nạ aḅonyonhu ni azuan loor e/munughan phọ anạ ḍughụm? Eeni amem aPọl aḅonyonhu ghan ni azuan. Loor esi iduọn aPọl akparaghạ ghan bọ eenan e/munughan phọ, odị aḅẹm ni mọ “pọ eeghe aagiạ dị mị aḍigh.”—Rom. 7:21-24.
8. Eeghe kụ ilhoghonhaạn ḍighaạgh Pọl orue okaran iiḅaghamhị phọ odị?
8 Etigheri odẹgh ophogh kirokirọ r’asidọl dị ekọm oḅonyonhu ozuan, aPọl aghiọm ni ghisigh rukumuan phọ aZihova. Eeghe kụ ingọ bọ nyodị inyaạm oghiọm aghisigh? Ghalhamọ r’iduọn aPọl alhegheri bọ ni sidugh phọ odị, odị amhoọgh omheeraam dị amhiigh aghị esi etagharạn phọ. Odị alhegheri ni oguan phọ aZizọs aḅẹm bọ mọ “torobọ oye lọ ameeraam [Zizọs] ka/pe, kamoọgh ghụn ghuḍum k’agee-pọ.” (Jọn 3:16; Rom. 6:23) Okạr oghaạph, aPọl aḍighi aani oniin odị amhoọgh omheeraam esi etagharạn phọ. Odị akuphom ni owol mọ aZihova aakolhobian ni osạr owilhenhaạn ghalhamọ r’awe dị oḍighi igbogh ikarạph kụ okiton.—Ps. 86:5.
9. Yira otuughạ eeghe esi ikpo onhụ phọ aPọl ogẹ bọ siphẹ Galetia 2:20?
9 APọl amhoọgh kẹn omheeraam mọ Enhaạn epomhoghiạn ni nyodị loor ekiạ phọ aKraist. (Bạl Galetia 2:20.) Lọgh elhegh ikpo onhụ okparamhị phọ edi bọ eekunha ekpịgh phọ. APọl aḅẹm mọ: “Oọny phọ Enaạn . . . uphomoghiạn bọ imị kụ ughol bọ imị kụ amugh.” APọl o/lhoghoma mọ onọ abeeph asi esi dị Enhaạn ka/tue apomoghiạn, odị o/ḅẹm mọ ‘mị mamhiịn iyaạr phọ eḍighi bọ kụ aZihova aphomhoghiạn bọ bumor phọ amhị, kụ imhị u/phomhoghiạn aani bọ.’ APọl aḅenhị we aRom mọ: “AKraist ughol . . . iyira aphiemi ghuḍum mọ odị k’amem dị yira odi ni ekụ ikarạph.” (Rom. 5:8) Ephomhoghiạn phọ Enhaạn i/moọgh okụ!
10. Yira otuughạ eeghe siphẹ Rom 8:38, 39?
10 Bạl Rom 8:38, 39. APọl akạr kụ akuphom owol iikpọ phọ ephomhoghiạn phọ Enhaạn emhoọgh bọ. Odị agẹ mọ iyaạr “i/lo dị ketue igbariọn iyira siphẹ ephomoghiạn phọ Enaạn.” APọl alhegheri ni ipẹ aZihova akparaghạm ghan bọ eelhe phọ Izrạl. Odị aḅilhẹ kẹn alhọgh elhegh ipẹ aZihova anmạ bọ nyodị ighirigiir. Esi oomo phọ iphẹn, aPọl raḅẹm ghan mọ, ‘Eḍighi bọ edị aZihova u/lọgh bọ aakụ Moọny phọ odị loor emhụ amhị, ephigh otuạn ookia ephomhoghiạn phọ odị edi ni ḍughụm?’—Rom. 8:32.
Iyaạr dị emhạn maạr esi Enhaạn pọ ipẹ yira roḍighi bọ nyiidiphọ ḅilhẹ r’epẹ ghisigh, ki/gbaany asipiomạn phọ ayira (Miịn ekpịgh phọ 11) *
11. Ghalhamọ r’iduọn aPọl aḍighi bọ ikarạph phọ ogẹ bọ siphẹ 1 Timoti 1:12-15, uḍighi ika kụ odị akuphom bọ ni owol mọ Enhaạn apomhoghiạn ni nyodị?
11 Bạl 1 Timoti 1:12-15. Eeni amem olhoghi aPọl eeph ghan ni loor igbaany ikarạph phọ odị. Iikia i/lo, odị aḅẹm bọ m’onọ kụ oḍighinhom ikarạph dị ‘alhoghorị apu’! APọl agbi bọ olhegheri igey phọ, odị aḍuạ ghan emhạ agbạ emhạ omhiinhẹ aKristẹn phọ, r’osiphi okasaghiọm otu ikoli buniin ḅilhẹ r’olhọgh iiphaghamhiọm mozẹ bidị. (Iiḍighi 26:10, 11) Gbiom olhoghi ipẹ aPọl kaloghoma bọ eḍighi maạr dị odị azuan oḍoọgh onyọ aKristẹn dị odị amheeraam mọ oghiigh odẹ r’onhiin phọ. APọl alhoghoma ni saị, kuolọ odị alhegheri ni mọ onọ ka/tue anme ipẹ memite bọ. Odị amheeraam ni mọ aKraist aghol emhụ onọ kụ amhugh, r’akpọ oḅio odị agẹ mọ: “Kụ esi onmạ ighirigiir phọ Enaạn kụ mị odi bọ dọl phọ aḍiẹn mị odi bọ.” (1 Kọr. 15:3, 10) Yira otuughạ eeghe? Meeraam mọ aKraist aghol emhụ anạ kụ amhugh, oghughuronhaan anạ eten omhoọgh imạ asiya r’aZihova. (Iiḍighi 3:19) Iyaạr dị emhạn maạr esi Enhaạn pọ ipẹ yira roḍighi bọ nyiidiphọ ḅilhẹ r’epẹ ghisigh, ki/gbaany asipiomạn phọ ayira, mughumọ yira uḍighi ni Bugbaanhaạn AZihova mem mọ opọ phọ obobọ u/ḍighi.—Isa. 1:18.
12. Ika kụ idị 1 Jọn 3:19, 20 kilhoghonhaạn iyira ḍighaạgh mem dị yira olhoghoma mọ yira u/kpeanhaạn obobọ iyira u/phomhoghiạn?
12 Mem dị nạ aatughiạn ilọ ipẹ aZizọs amhugh bọ ookpereghi ikarạph phọ ayira, eeni nạ kaḅẹm ni mọ, ‘mị u/kpeanhaạn iphẹn phọ.’ Eeghe kụ iḍighi kụ nạ katue bọ ni aloghoma iduọn phọ? Ekpom mọ ayira i/munughan bọ etue ni iikeleghi iyira, esi ootughiạn ghan mọ yira u/kpeanhaạn ḅilhẹ mọ Enhaạn iyira u/phomhoghiạn mun. (Bạl 1 Jọn 3:19, 20.) Yira ootughiạn ghan mọ “Enaạn ebụgh ni epu iloghi phọ ayira.” Ephomhoghiạn r’osạr owilhenhaạn Odẹ phọ ayira ekpạr ri epu torobọ aḍikarạph aḍiitughiạn dị aaghiạn siphẹ ekpom mọ ayira. Ewạ mọ yira okuphom owol mọ Enhaạn uphomhoghiạn ni iyira. Orue okuphom owol, pọ ogbor ghan otuughạ Ekpo Onhụ phọ Enhaạn, ooḅereghị ghan egbạ gbạ amem, ḅilhẹ ogbor ghan ooḅughonhaan r’abuphẹ oḅạr bọ nyodị. Eeghe kụ iḍighi kụ emhạn bọ maạr oḍighi iphẹn phọ?
IDỊ ITUUGHẠ ABAIBUL, IIḄEREGHỊ, R’ARIGHIRỊ DỊ OḄẠR KOTUE OLOGHONHAẠN ḌIGHAẠGH
13. Ika kụ idị otuughạ Ekpo Onhụ phọ Enhaạn kilhoghonhaạn iyira ḍighaạgh? (Miịn igbe phọ “ IdỊ Ekpo Onhụ Enhaạn Elhoghonhaạn Bidị Ḍighaạgh.”)
13 Tuughạ Ekpo Onhụ phọ Enhaạn ḍio ḍio ḍio, bịn araagharạ phọ aZihova kekạr ri eegholhaan eten dị nạ kanaghanhạn. Nạ kaloghoma ni ephomhoghiạn phọ odị. Ogbirima ghan Ekpo Onhụ phọ Enhaạn torobọ aḍio ketue ni elhoghonhaạn nyinhạ ḍighaạgh ootughiạn ghan eten dị eegholhaan, “r’oolemiom ghan ilọ epiomạn” siphẹ ekpom mọ anạ. (2 Tim. 3:16) AKevin, okumor oye ookpomhoghan dị alhoghoma ghan mọ onọ o/kpeanhaạn, aḅẹm mọ: “Aạl ghan oḅilhẹ ogbirima Psalm 103 milhoghonhaạn imhị ḍighaạgh onhaghanhạn igbiighi phọ aZihova umhooghonhaạn bọ imhị.” Eva, oghaạph bọ oghol epẹ omhạn, aḅẹm mọ: “Tutụ aḍio phọ rekị omhunheen, mị ralọgh ghan ni mem kagbirima ilọ iitughiạn phọ aZihova. Ringọ ghan imhị eephọ ekpom keḅilhẹ ekparamhị omheeraam mọ amhị.”
14. Ika kụ idị iiḅereghị kilhoghonhaạn iyira ḍighaạgh?
14 Gbor ghan aaḅereghị. (1 Tẹs. 5:17) Asiya iyạl arighirị dị rogbor ghan koghaạph ipẹ bidị olhoghoma bọ rekpạr ghan agey. Iniin phọ kẹn kụ idị edi aani esi asiya arighirị phọ ayira r’aZihova. Yira oghaạph ghan olhoghoma phọ ayira, r’iitughiạn phọ, r’ogbolhomaam mọ ayira esi iiḅereghị, pọ yira roḍeenhaan ghan mọ yira oḍuom ni nyodị olhoghi, ḅilhẹ mọ odị uphomhoghiạn ni iyira. (Ps. 94:17-19; 1 Jọn 5:14, 15) AYua, oghaạph bọ oghol epẹ omhạn aḅẹm mọ: “Mem dị mị aaḅereghị, mị ra/kaạph ghan ogina ipẹ imitenhaan bọ imhị ḍio phọ bịn. Mị raḅarạm ghan oomo ipẹ mị alhoghoma bọ kaḅenhị nyodị. Enụm enụm bịn mị u/miịn mun aZihova idiphọ uw-emhụ otu oḍighi, kuolọ idiphọ Odẹ dị akạr aphomhoghiạn nmụny odị.”—Miịn igbe phọ “ Nạ M’aạl Li Ḍughụm?”
15. Ika kụ idị aZihova aḍeenhaan ogbolhomaam mọ odị esi ayira?
15 Ḍiiḍikuan ghan righirị dị oḅạr Enhaạn; bidị inmo k’aZihova. (Jems. 1:17) Odẹ k’akẹ phọ ayira raḍeenhaan ghan ogbolhomaam esi ongọ ayira bumor r’abumarani dị roḍeenhaan ghan “ephomhoghiạn oomo amem.” (Prov. 17:17) Siphẹ aḍinyạ phọ aPọl agẹ bọ aghiọm ookpomhoghan phọ aKolosị, odị aghol li buniin aKristẹn dị obakị nyodị, kụ aḅẹm mọ “bidị ruloghonaạn ni imị ḍighaạgh iboom.” (Kọl. 4:10, 11) Ghalhamọ aZizọs bịn awạ ni aḅilhẹ asereghiạn olhoghonhaạn aḍighaạgh arighirị, buọ epẹ k’akẹ r’isiẹn ade phọ.—Luk 22:28, 43.
16. Ika kụ idị arighirị dị oḅạr kulhoghonhaạn iyira ḍighaạgh oḍuraan otuman aZihova?
16 Nạ ramooghọm ni suọ inmo arighirị phọ aZihova angọ bọ ḍughụm? Oghaạph ghan ipẹ riiḅaghamhị bọ iyira oḅenhị okpokolo oyaghirị re/mạ ghan ḍidugh; kparipẹ ghụn k’ighoph iyira. AJames, oghaạph bọ oghol epẹ omhạn aḅẹm mọ: “Ophamhanhạm igey arighirị r’aKristẹn dị mosianhaan milhoghonhaạn ni imhị ḍighaạgh iboom. Mem dị ikarạph iitughiạn ikpoghotiom imhị, arighirị phọ abuẹn phọ rokparạm ghan ni kolher rurụ ungọ imhị, koḅilhẹ uutughianhạm imhị mọ bidị uphomhoghiạn ni imhị. Dị eego esi abidị, mị ramiịn ghan ni ephomhoghiạn phọ r’ogbolhomaam mọ aZihova esi amhị.” P’eeghe idị emhạn maạr dị yira kopamhanhạm siya dị ekpạr r’abumor r’abumarani phọ ayira!
TOLHỌM EPHOMHOGHIẠN PHỌ AZIHOVA
17-18. Anhiạn kụ edị nạ kanaghanhạn, kụ eeghe kụ iḍighi?
17 ASetan rawạ m’iphẹr iyira oḍighi ghan ipẹ enhighẹ bọ. Odị o/wạ mọ yira omhiịn mọ aZihova uphomhoghiạn ni iyira, ḅilhẹ mọ yira u/kpeanhaạn dị aZihova kapẹl. Kuolọ yira momhiịn mọ ipẹ phọ i/tu inẹ.
18 AZihova aphomhoghiạn ni nyinhạ. Nạ ephua dị emhạn maạr siphẹ ariḍien phọ odị. Eḍighi maạr dị nạ anhaghanhạn nyodị, nạ ‘katolọm ni ephomoghiạn phọ odị’ k’agee-pọ, idiphọ aZizọs. (Jọn 15:10) Kụ iḍighi kụ, ka/meera aSetan obobọ olhoghi anạ aḅenhị nyinhạ mọ aZihova nyinhạ o/phomhoghiạn. Kparipẹ ghụn, naghanhạn aZihova, opọ ramiịn ghan bọ imạ phọ ipẹ torobọ onyọ ayira raḍighi bọ. Kuphom owol mọ odị “amoọgh ḍiḅeraạn awe phọ odị,” ghalhamọ r’anạ kẹn!
AḌUỌR PHỌ 141 The Miracle of Life
^ par. 5 Ekparanhaạn ni buniin abumor r’abumarani omheeraam mọ aZihova katue ni apomoghiạn bidị. Siẹn emhuoghaạph phọ ephẹn phọ, yira kooḅeghiọn ipẹ eḍighi bọ kụ yira kotue bọ ni okuphom owol mọ aZihova apomoghiạn ni torobọ onyọ ayira. Yira koḅilhẹ kẹn ooḅeghiọn ilọ okpạr opu atorobọ iikia dị yira omhoọgh oghị esi ephomhoghiạn phọ aZihova amhoọgh bọ aru esi ayira.
^ par. 2 M’onme iniin asiḍien.
^ par. 67 ILỌ AFOTO: Epẹ omhạn, aPọl asiphi ni ibadị aKristẹn akasaghiọm ikoli. Mem mọ odị amheeraam bọ Zizọs, odị anmia ni kụ akparamhị bumor aKristẹn phọ odị, eeni abuniin abuẹn phọ asiya abuphẹ odị akpuuroghọm bọ.
