Dị eeph ni, mị romhạn ḍioph r’iraạr asiạ, bịn asiya phọ amhị r’aZihova eephoọm. Ighịgh mudị abuphẹ r’amhị oghị ghan bọ askul kụ umhoọgh eereẹgh, kụ mị awạ aani ghan edọ phọ eereẹgh phọ epẹ phọ. Mị ulhoghoma mọ iilhogh odẹ r’onhiin phọ amhị r’asiigbu aKristẹn phọ ighoroghị ni imhị, ḅilhẹ ooḅereghị Enhaạn akpạr apughạn. Mị ukuphom ni owol mọ Enhaạn edi ghan ni, kuolọ mị u/tuman mun nyodị.

Ghalhamọ r’iduọn phọ ni, mị u/wilhẹ rukumuan erugh phọ, kuolọ mị ungọ ghan iphurukpu awạ bịn. Mị uu/kolhobian ghan kụ aghị epẹ erugh phọ, kụ iḍighi kụ ikparanhaạn ghan imhị omhiighom oghaạph obobọ oghaạph obughẹ. Esi iduọn phọ, mị u/moọgh ghan oḅilhẹ oḅulha r’otughemhị aBaibul, ḅilhẹ mị u/kelhọm ghan rukumuan epẹ erugh phọ. Mị upuruan ghan loor mọ, ‘Kụ oye akị ghan oghaạph iiḅi iinhaghạn phọ wiki awiki, unwanyụ unwanyụ?’

Mị romhạn 17 asiạ bịn mị amhoọgh ḍiboom aḍiḅeraạn orọl aḍiạ amhị. Esi iduọn phọ, mị uukoroghian raraạr amhị bịn agheel Australia. Iiḅaghamhị ni odẹ r’onhiin amhị iboom mem mọ mị raḍuạ  bọ. Bidị umhoọgh ni ogbolhomaam, kuolọ bidị ugbi ghan mọ mị kapamanhạm ni iiseeny phọ amhị.

Epẹ Australia phọ, asiya phọ amhị r’aZihova ilhegheri bịn kụ elhoghorị. Mị uwilhẹ yogh ghan ituughạ. Mị uḍigh righirị r’oki amhị dị orọl aani iduọn amhị, okị ituughạ dulhe arodon, dulhe iḍue rokị apati ogherọgh iḅạ r’ophugholọgh amiim. Mị aaghiraan aphogh omhạn, mị ramiịn ghan mọ oniin owol amhị arọl ghan siẹn igey phọ, oniin epẹ aḅirinhi phọ, kụ ephẹn mị u/lo epẹ mị u/lo.

Iyạl asiạ reten bịn mị azuan onyọ umarani dị eten dị u/seere olhoghi, aḍighi idị mị aḅilhẹ aaghiraan aphogh ipẹ aghuḍum mọ amhị rakị bọ. Mị urọl ghan otu r’oogh abunhọn abumarani dị ilhom k/aạl, kụ yoor omheera mọ opoghom eghir phọ r’anhịr odị Tamara, orọl r’ayoor esi awiki. Mem dị olom mọ aphạm rukumuan ookpomhoghan phọ, aTamara aru ghan ni amhoore r’ayoor anmanyaạn phọ, aghaạph ghan amhilọgh r’ayoor. Ipẹ phọ iḅeraạn imhị agey! Odị amhoọgh orọph onhaghanhạn aḅilhẹ adugh oghaaphạn. Iḍighi ni iikia esi amhị, omhiịn dị oye dị akuọm loor rukumuan aZihova, kụ rakaaphạn kaḅilhẹ amhilọgh r’abunhọn.

ATamara amoọgh oophugh. Ephomhoghiạn phọ odị esi igey phọ, r’arukumuan omhạr phọ itir ghan ni bunhọn. Odị amhoọgh ḍiḅeraạn oḍighinhaan aZihova ipẹ odị katue bọ, kuolọ mị u/moọgh oḅaạl olhoghi loor esi dị mị rangọ ghan aZihova oọny enụm bịn. Imạ araagharạ phọ r’ogey oḅaạl olhoghi phọ odị itir ri dọl aghuḍum mọ amhị. Eḍeenhaan phọ odị iitughianhạm imhị ephigh igey aBaibul: Eḅeraạn aZihova dị oomo ayira kokumu nyodị “r’ibo” ḅilhẹ “r’asiolọ ibo.”—Ps. 100:2.

Mị uwạ ghan omhoọgh aani odọ phọ ibo phọ aTamara amhoọgh bọ, kuolọ iwạ mọ mị unme dọl aghuḍum mọ amhị orue omhoọgh aani idọ ibo phọ ipẹ phọ. Iraạr asiạ reten, bịn enụm enụm mị amhiigh ogbariọn aradạ. Mị amhiigh ookolhobian ghan kụ omite epẹ erugh phọ, men emhạn mem, mị aḅilhẹ ghan akọy eten ekulha amem. Iphẹn phọ ilhoghonhaạn ḍighaạgh oghome ooḅaghamhiạn aloor phọ amhị, ḅilhẹ r’okpoomhị oḅio amhị. Ogbor oḍighinhom aBaibul phọ epẹ erugh phọ  iḍighi idị mị amhiigh oghelhọm arukumuan phọ amhị. I/bia bịn mị amhiigh okọy ghan eten ekulha amem mọ torobọ unwanyụ.

Mị amhiigh oḍuraan otuman abunhọn awe dị odi siạ kirokirọ, dị roḍighi ni agey siẹn igey phọ ḅilhẹ rokelhọm rukumuan phọ bidị rokumu bọ kongọ aZihova. Igey areḍeenhaan phọ abidị ilhoghonhaạn imhị ḍighaạgh okiririom ophogh araraạr dị ekạr emhạn maạr esi amhị, ḅilhẹ r’omhiigh aạl ghan aBaibul phọ torobọ aḍio. Bịn mị amhiigh okạr oghelhọm arukumuan phọ amhị, esighẹ rekị bịn mị amhiigh okọy eten oomo amem mọ. K’asiạ phọ, epẹ kụ eḅẹl amem dị mị amhiigh oḅilhẹ omhoọgh oḅaạl olhoghi siphẹ ookpomhoghan phọ.

Alhạ reten bịn mị azuan Alex, oyoghoyoghọ oye dị akpẹ oḍuomolhoghi, dị aphomhoghiạn aZihova ḅilhẹ r’arukumuan phọ. Odị akumuan ghan idiphọ odị raloghonhaạn ghan ḍighaạgh ikumor awe phọ, ḅilhẹ makọy eten esi odiiny asiạ. Alex makumuan ghan ni eniin amem ekpisi dị ewaạm mọ ebụgh epẹ Malawi. Odị arolạn ni r’asimisonarị dị oḍighi emạ eḍeenhaan ongọ nyodị, oḅilhẹ oroma nyodị osighẹ arukumuan Omhạr phọ kụ oḍighi eḅẹl.

Lhạ phọ 2003, bịn Alex r’amhị aalhạn, kụ yoor odi ghan rukumuan oomo amem mọ k’asiạ phọ. Yoor motuughạ ni ibadị iikiạ araraạr, ḅilhẹ aZihova musẹph iyoor reten kirokirọ.

Lhạ phọ 2009, bịn umhạgh iyoor oghị okumuan idiphọ asimisonarị epẹ Timor-Leste, ebạm eelhe dị edi epẹ arukpu ogbo phọ Indonesia. Iḍigh ni ḍiigu, olhoghi ayoor aḅaạl, ḅilhẹ iḅio ayoor rekaph eniin phọ amem mọ. Oogh unwanyụ reten, bịn yoor osi Dili, egbogh emhạ phọ agadạ itooghị eelhe phọ odi bọ.

Adọl aghuḍum mọ ayoor inmia ni iboom epẹ phọ. Iwạ mọ yoor udaphạn emhoom eḍighinhom iyaạr, omhoom onhụ, eḍien, ḅilhẹ r’asidọl amarugh phọ. Epẹ erugh phọ, yoor ugbor ghan ozuan we dị omheel egbogh ekulhom, budị askul u/kị  ḅilhẹ r’abudị rokpuuroghọm. Yoor uḅilhẹ ghan kẹn ozuan ibadị awe dị araaghạm r’iigamaniạn melhoghoḍị dọl aagiạ. *

Arukumuan epẹ erugh phọ iḍighi ni ḍiigu! Esi omaạm, mị uzuan ni onyanhị 13 asiạ dị oghol mọ Maria. * Onhiin phọ amhugh iphurukpu asiạ epẹ omhạn, kụ kaakaạ kụ amiịn odẹ phọ. Kụ idiphọ abunhọn ibạm anmụny dị oḍighi aani oki odị, aMaria o/lhegheri idị adọl aghuḍum mọ odị kekị ghisigh. Mị aatughiạn ni eniin amem dị odị ramoghi kụ rakaạph ipẹ odị alhoghoma bọ. Kuolọ, mị u/naghanhạn ipẹ odị aghaạph ghan bọ, loor esi dị mị ko/kạr onhaghạn onhụ emhạ phọ abidị mem mọ amuphẹ phọ. Mị uuḅereghị ni aḅenhị aZihova mọ ulhoghonhaạn imhị ḍighaạgh mị utue ukparamhị nyodị, kụ mị amhiigh aalhanhaạn odị riisi aBaibul dị keedereghị nyodị. Iphurukpu asiạ reten, bịn mị amhiịn dị igey phọ renme nyodị. Odị amhiigh omhoọgh oḅaạl olhoghi. Iinmenian phọ r’adọl aghuḍum mọ aMaria enmia. Odị maḍiiny muụm, kụ nyiidiphọ odị ratughemhị aani bunhọn Baibul phọ. Rodon, aMaria mamhoọgh eghunotu aKristẹn aḅilhẹ aloghoma ephomhoghiạn.

AZihova rasẹph ni oḍighi oghaạph Omhạr phọ epẹ Timor-Leste phọ. Ibadị oḍiiny bọ muụm ke/mhạn ḍioph asiạ, kuolọ ibadị abidị rokumuan idiphọ abukọy eten, abudị rologhonhaạn ghan ḍighaạgh ikumor awe phọ, obobọ idiphọ ikumor awe. Abunhọn rokumuan aani ghan idiphọ abudị rogbạ ghan kotenheghi onhọn onhụ siphẹ atranslation ofịs phọ. Olhoghi amhị raḅaạl ghan ni onhaghạn mem dị bidị romoọr suọr mem dị oghị ituughạ, romilọgh, ḅilhẹ rokị ghisigh siẹn igey phọ.

Arukumuan phọ ayoor epẹ Timor-Leste igbatanhaạn ni r’ilọ amem mọ opọ yoor orọl ghan bọ Australia, mị u/gbiom mọ mị mutue ni amhoọgh oḅaạl olhoghi dị arọl iduọn siẹn aghuḍum mọ amhị. Eeni amem yoor utiirạn ghan obạm amoto r’abunhọn awe, r’igharaghạr ina, ḅilhẹ r’iikiriphạ dị rotighelhom ḍighi. Eeni aḍio, yoor utughemhị ghan we Baibul phọ otu dị aghom kụ olhoghi phọ rakologhọl, ude phọ aḍigh eenịr, ḅilhẹ r’asikenẹgh dị rekilighuan. Etigheri ipaanhaạn phọ, mị uutughiạn mọ, ‘Aghuḍum adụgh apughạn!’

Mị aatughiạn aḅulha omhạn, mị rasẹph ghan ni odẹ r’onhiin amhị iduọn bidị oḍighi bọ oomo ipẹ bidị kotue bọ otughemhị amhị ilọ aZihova, robakị ghan amhị ghalhamọ r’amem mọ asiya phọ amhị r’aZihova eephoọm bọ. Proverbs 22:6 akaạph ni inẹ odaphạn iphẹn imitenhaan bọ imhị. Odẹ r’onhiin amhị robagaam ni Alex r’amhị; olhoghi abidị aḅaạl li iduọn yoor rokumu bọ aZihova. Emhiigh k’alhạ phọ 2016, yoor rokumuan ghan idiphọ abupoghom eghir epẹ arokool olạ agadạ Australasia.

Ikparanhaạn imhị omheeraam mọ eniin amem mị malhoghoma ghan ni mọ oḍighi oghaạph iiḅi iinhaghạn phọ akpạr apughạn. Nyiidiphọ, mị apomhoghiạn oghaạph iiḅi iinhaghạn phọ! Mị mamhiịn mọ etigheri torobọ adọl aghuḍum dị yira osoman, igey ibo reḍuạ ghan esi okumu Enhaạn r’oomo ekpom kụ etu. Okạr agey, 18 asiạ phọ iphẹn Alex r’amhị mokumu bọ aZihova, kụ idị mị akạr amhoọgh oḅaạl olhoghi. Nyiidiphọ, mị manhaghanhạn ipẹ okọ suọr phọ Devid aghaạph bọ ilọ aZihova mọ: “Oomo abuphẹ osighẹ bọ nyinhạ kụ oḍighi esi oghoph komoọgh ni ibo; bidị kolọ ghan ḍiolọ ibo oomo amem. . . . Ḅilhẹ abuphẹ ophomhoghiạn bọ ḍien phọ anạ kobo ni esi anạ.”—Ps. 5:11.