1. Eeghe kụ reḍighi ghan iyaạr dị yira rologhoma ghan ibo?

 AZIHOVA rawạ mọ yira omhoọgh oḅaạl olhoghi. Yira ulhegheri iphẹn phọ loor esi dị ibo eḍighi aani ni pakirị eemhumha uwaloor iigbia phọ odị. (Gal. 5:22) Eḍighi bọ edị ibo edianhaan bọ buphẹ rongọ bọ epu buphẹ roboọr bọ, yira rologhoma ghan ni ibo mem dị yira ophinhom aani bin rukumuan aKristẹn phọ ayira, kụ oḅilhẹ olhoghonhaạn aani ḍighaạgh bumor phọ ayira ibadị areten.—Iiḍighi 20:35.

2-3. (a) Odaphạn Galetia 6:4, eeghe iyạl araraạr kụ kilhoghonhaạn iyira ḍighaạgh ophamhanhạm ibo siẹn arukumuan phọ aZihova? (b) Yira kooḅeghiọn eeghe siẹn emhuoghaạph phọ ephẹn phọ?

² Odaphạn Galetia 6:4, otelhedom mọ aPọl amạ iyạl araraạr dị kilhoghonhaạn iyira ḍighaạgh ophamhanhạm ibo phọ ayira. (Bạl) Eḅẹl phọ, aḍiigbu ayira eḍighi ongọ aZihova ipẹ yira kotue bọ. Eḍighi maạr dị yira rongọ ni nyodị ipẹ yira kotue bọ, pọ yira obo ni. (Mat. 22:36-38) Omhunhenhiom iyạl, yira oghel osighẹ aloor ayira otomaạm ghan abunhọn. Etue ni eḍighi edị omhoon aloor dị yira omhoọgh, itughemhị dị mutughemhị iyira, ḅilhẹ r’olhegheri iyaạr ayira mekọm idị yira moḍighi ipẹ yira kotue bọ, kuolọ ku/bula ongọ ghan aZihova ḍisẹph phọ. AZihova ḍiẹn kụ iyira ungọ bọ torobọ iyaạr dị yira omhoọgh? Ḍieriphọ aḍighaạgh phọ, eḍighi maạr dị abuniin osilor upu iyira iniin apakirị arukumuan phọ ayira, yira obo ghụn iduọn bidị osighẹ bọ ni olhegheri iyaạr phọ abidị rokumu kongọ aZihova, ḅilhẹ u/sighẹ bọ uḍighinhom owaạm asuọ abidị. Kparipẹ r’oopikian abidị, otuughaạny ghụn bidị.

³ Siẹn emhuoghaạph phọ ephẹn phọ, yira komiịn ipẹ yira kotue bọ okaran mem dị yira olhoghoma mọ yira u/tue mun uḍighi ipẹ yira oḍighi ghan bọ. Kụ yira oḅilhẹ ooḅeghiọn idị yira kotue osighẹ oḍighinhom torobọ inmo lọ yira  omhoọgh ḅilhẹ r’ilọ otuughaạny areḍeenhaan abunhọn.

4. Eeghe adọl kụ ketue ekọm oḅonyonhu ozuan? Ngọ eḍeenhaan.

⁴ Rekparanhaạn ghan ni buniin arebenhẹ aZihova ooḅenhion araraạr mem dị aḍikpọ r’e/moon resophoghom bidị. Ipẹ kụ idị emitenhaan Carol. Odị akumuan ghan ekpisi dị ewaạm mọ ebụgh. Mem mọ amuphẹ phọ, odị atughemhị ghan 35 awe Baibul aḅilhẹ alhoghonhaạn ḍighaạgh ibadị oḍiiny amuụm. Arukumuan phọ odị imhoọgh ni ekol! Kụ aloor emhiigh ooḅaghamhị odị, bịn eḍighi idị odị u/gbor ghan umite eru. ACarol aḅẹm mọ, “ii mị ulhegheri ni mọ loor e/moon phọ mị ka/tue akumuan aani idiphọ abueriphọ, kuolọ mị ulhoghoma ghan mọ omheeraam mọ amhị o/bụgh mun idiphọ opọ abidị. Ephẹn phọ elhebiri dị edi igbo ipẹ riphụ bọ imhị oḍighi r’ipẹ adọl phọ amhị edi bọ, kụ ikạr kụ ikparanhaạn imhị okparạm.” ACarol awạ ghan oḍighi oomo ipẹ odị katue bọ angọ aZihova. Kụ ipẹ phọ enighẹ ni! Yira okuphom ni owol mọ Enhaạn igbiririph phọ ayira asereghiạn ni oophugh phọ odị.

5. (a) Ewạ mọ ootughiạn eeghe eḍighi maạr dị yira oḅonyonhu ozuan loor idị yira u/tue mun ukumuan? (b) Odaphạn afoto phọ, ika kụ idị abumor phọ oghiọm ni ghisigh rongọ aZihova ipẹ bidị kotue bọ?

⁵ Eḍighi maạr dị nạ aḅonyonhu azuan loor araraạr dị nạ u/tue mun uḍighi, pọ puruan loor mọ, ‘Eeghe kụ edị aZihova akạr rawạ esi amhị?’ Ipẹ nạ arue bọ aḍighi mem mọ kụ edị aZihova rawạ. Ooḅeghiọn eḍeenhaan: Onyọ umaranhi dị mamhạn 80 asiạ, aḅonyonhu ni azuan loor idị odị u/tue mun ukumuan idiphọ amem mọ odị amhạn bọ 40 asiạ. Odị alhoghoma mọ ipẹ odị raḍighi bọ i/ḅeraạn aZihova. Kuolọ iduọn phọ ni ḍughụm? Tuutughiạn aphogh. Eḍighi maạr dị umaranhi phọ aḍighi ni ipẹ odị katue bọ mem mọ amhạn bọ 40 asiạ, kụ aghiọm ni ghisigh raḍighi ipẹ odị katue bọ siẹn odị mamhạn bọ 80, pọ odị ko/wilhẹ ongọ ipẹ odị katue bọ. Eḍighi maạr dị yira omhiigh olhoghoma mọ arukumuan phọ ayira i/kạr mun i/manhạm, pọ ewạ dị yira kootughianhạm siloor ayira mọ aZihova kụ alhegheri esi dị yira oḍighi osi kụ keḅeraạn nyodị, ka/yira. Esi iduọn phọ, eḍighi maạr dị yira oḍighi oomo ipẹ yira kotue bọ, pọ aZihova kaḅẹm ni mọ: ‘Meḍighi!’—Poghom Matiu 25:20-23.

6. Yira otuughạ eeghe esi eḍeenhaan phọ aMaria?

⁶ Ketue ni idughanhaan iyira omhoọgh ibo eḍighi maạr dị yira ogbon ipẹ yira kotue bọ oḍighi kparipẹ r’ogbon idị yira ko/tue. Ooḅeghiọn eḍeenhaan umaranhi dị oghol mọ Maria. Odị amhiinhọm ni esi ezẹgh dị esophoghom nyodị ogbor ghan omite epẹ erugh phọ. Eḅẹl amem mọ odị aḅonyonhu ni azuan aḅilhẹ alhoghoma mọ odị o/mhoọgh mun maạr oḍighinhom. Kuolọ odị aatughiạn ni ilọ oniin onyọ umaranhi siphẹ ookpomhoghan phọ abidị dị odi ghan emhinhạ e/moon, kụ odị asopha olhoghonhaạn odị ḍighaạgh. AMaria aḅẹm mọ, “mị umiteom ni iikolhobian dị iyạl ayoor kosighẹ fon r’ogẹ arinyạ ongoọm ghan ogbaanhaạn. “Torobọ amem dị iyạl ayoor oḅophoghạn okumuan, mị ratigheel ghan ni olhoghotu r’oḅaạl olhoghi ḅilhẹ r’ogbaanyạn iduọn mị raloghoma ghan bọ mọ mị malhoghonhaạn ḍighaạgh umaranhi amhị.” Yira kotue ni obughẹ aani ibo phọ ayira mem dị yira ogbon ghan ipẹ yira kotue bọ oḍighi, obilhẹ ipẹ yira ko/tue bọ. Kuolọ kokaạph ika eḍighi maạr dị yira kotue ni oḍighi obughẹ obobọ oḍighi agey iniin apakirị arukumuan phọ aZihova?

7. Eeghe oromha kụ edị otelhedom mọ aPita angọ Kristẹn?

⁷ Siphẹ aḍiḅẹl aḍinyạ phọ ephum bọ nyodị  ogẹ, otelhedom mọ aPita aromha bumor phọ oḍighinhom atorobọ inmo r’aḍighalhanyạ dị bidị omhoọgh olhọgh ophophe abumor r’abumaranhi phọ. Odị agẹ mọ: “Torobọ onyọ anyina amaạr ghan aphạm ruunmo aruwaloor lọ Enaạn engọ nyodị, kụ aḍighinom ghan idị kengọ suọ buerị phọ!” (1 Pit. 4:10) Yira ku/bilhẹ okuamhị oḍighinhom inmo dị yira omhoọgh loor oghiilhaan mọ eeni abunhọn kugbeghe iyira obobọ oḅonyonhu ozuan. Yira oḍighi iduọn phọ, pọ yira ro/ḍighi kongọ aZihova okạr ipẹ yira kotue bọ.

8. Odaphạn 1 Korịnt 4:6, 7, uḍighi ika kụ i/nighẹ bọ obaga ghan inmo lọ yira omhoọgh?

⁸ Ii ewạ ni mọ okuamhị oḍighinhom ghan inmo lọ yira omhoọgh, kuolọ ogona ni loor obobọ yira kobaga ghan bọ. (Bạl 1 Korịnt 4:6, 7.) Esi omaạm, eeni nạ amaạr agey omhiighom itughemhị aBaibul. Ka/bilhẹ oḍighinhom ghan inmo phọ ipẹ phọ! Olhọgh elhegh mọ oḍighinhom inmo egbatanhaạn ni r’oghol inmo obaga. Oḅẹm mọ nạ umite epẹ erugh phọ kụ amhoọgh ekol amhiigh otughemhị oye Baibul phọ. R’ikpukpụ nạ rawạ oghaạph oḅenhị opoghom egu phọ anyinha. Kụ nyinha reekpomhoghan bịn onyọ umaranhi amhiigh oghaạph idị odị amhoọgh ekol angọ oye ḍinyạ. Ii onyọ umaranhi phọ angọ oye ḍinyạ; kuolọ elọ anạ nạ amiigh otughemhị oye Baibul. Nạ kaḍighi ika? Olegheri ni mọ egu phọ kokạr kụ omooghọm suọ eḍeenhaan phọ anạ, kuolọ nạ atue ni aḅoton oghaạph ipẹ anạ obọ keḍime ghan bọ ibo phọ umaranhi phọ amhoọgh bọ ongọ aḍinyạ oye. Iduọn kụ idị ekpẹ oḍighi. Kuolọ u/bilhẹ ghan oghiọm aghisigh otughemhị ghan awe Baibul phọ. Ipẹ phọ inmo anạ—ḍighinhom ni!

9. Ika kụ idị ewạ mọ oḍighinhom inmo phọ ayira?

⁹ Olhegheri mọ torobọ inmo dị yira omhoọgh Enhaạn kụ ingọ iyira. Esi iduọn phọ, osighẹ inmo phọ ayira olhọgh ophopheom ookpomhoghan phọ, ka/loor ayira. (Fil. 2:3) Mem dị yira osighẹ inyaạm r’olhegheri iyaạr ayira oḍighinhom ogbi Enhaạn, yira komoọgh ni ibo—ka/loor idị yira rokparaghạ oḍighi opu abunhọn, kuolọ loor esi dị yira osighẹ inmo phọ ayira rooseenyom aZihova.

10. Eeghe kụ iḍighi kụ i/nighẹ bọ osighẹ aloor ayira otomaạm abunhọn?

¹⁰ Lọ yira u/gona loor, yira otue ni omeel oḍigh ḍiphil osighẹ idị yira kotue oḍighi otomaạm idị abunhọn ko/tue oḍighi. Esi omaạm, onyọ umor atue ni amoọgh inmo ongọ ghan oghaạph dị akuạ. Ipẹ phọ inmo odị. Odị atue ni aatughiạn m’onọ anighẹ apu onyọ umor dị rekparanhaạn ghan ongọ oghaạph. Kuolọ eeni onyọ umor phọ opọ phọ amaạr okọ igoni, ophạm ibạm anmụny odị, obobọ amoọgh  oophugh omite ghan epẹ erugh phọ. P’eeghe idị olhoghi ayira aḅaạl omhoọgh ibadị abumor r’abumaranhi dị osighẹ inmo phọ abidị rokumuom aZihova koḅilhẹ olhoghonhaạn ḍighaạgh bunhọn!

11. Uḍighi ika kụ ewạ bọ dị yira kolọgh inyaạm odạph eḍeenhaan phọ aZizọs?

¹¹ Ghalhamọ r’iduọn i/wạ bọ mọ otomaạm ghan loor ayira bunhọn, yira komooghọm ni suọ esi otuughaạny areḍeenhaan awe omheeraam. Esi omaạm, ooḅeghiọn ilọ aZizọs. Ghalhamọ r’iduọn odị aḍighi bọ oye dị amhunhughan, yira kotue ni otuughạ iyaạr esi imạ araagharạ phọ r’iiḍighi phọ odị. (1 Pit. 2:21) Mem dị yira oḍighi oomo ipẹ yira kotue bọ odạph igbaranuọm aruwol phọ odị, yira koḍighi ni bugey arebenhẹ aZihova oḅilhẹ omoọgh ekol epẹ arukumuan erugh phọ.

12-13. Eeghe kụ edị yira otuughạ esi Uw-emhạ phọ Devid?

¹² Areḍeenhaan alhephiri r’anmariịr dị okpẹ oḍuomolhoghi edi ni siphẹ aBaibul phọ dị yira kotue otuughaạny aani, etigheri e/munughan phọ abidị. (Hib. 6:12) Tuutughiạn Uw-emhạ phọ Devid, aZihova amhạgh bọ mọ “oye olhoghi amị,” onhọn aBaibul aḅẹm mọ, “odọ phọ oye phọ uḅeraạn bọ imhị.” (Iiḍighi 13:22) Ii, aDevid o/mhunhughan. Okạr oghaạph, odị aḍighi yogh ni igbogh ikarạph. Etigheri iphẹn phọ, odị aḍighi ni emạ eḍeenhaan esi ayira. Eeghe kụ iḍighi? Loor esi dị mem mọ oḅaạm bọ nyodị, odị o/wạ egbaạm. Kparipẹ ghụn, odị asighẹ ni maliọm mọ kụ akiriri esi ipẹ odị maḍighi bọ, bịn aZihova asạr ri awilhenhaạn nyodị.—Ps. 51:3, 4, 10-12.

¹³ Yira kotue ni otuughạ iyaạr ḍighaạgh aDevid esi opuruan aloor mọ: ‘Mị ramegheron ghan ika mem lọ uḅaạm imhị? Mị rameeraam ghan ni mọ mị apiomạn ni, obobọ mị ramoọgh ghan egbaạm? Mị rakem ghan kakpalhạm bunhọn ḍughụm? Mị rakparaghạ ghan ni dị mị ka/piomạn mun oniin phọ opiomạn phọ ḍughụm?’ Nạ atue kẹn apuruan iniin phọ asipuru phọ mem dị nạ rabạl ilọ areḍeenhaan abunhọn alhephiri r’anmariịr siphẹ aBaibul phọ. Bidị usoman aani ni iniin phọ ipaanhaạn phọ mị asoman bọ ḍughụm? Eeghe imạ araagharạ kụ idị bidị oḍeenhaan? Torobọ eḍeenhaan dị nạ aạl, puruan ni loor mọ: ‘Ika kụ idị mị katuughaạny aani rebenhẹ phọ abuẹn oḅạr bọ aZihova?’

14. Ika kụ idị yira kotue omooghọm suọ reḍeenhaan abumor r’abumaranhi phọ?

¹⁴ Yira kotue kẹn omooghọm suọ reḍeenhaan abumor r’abumaranhi phọ, iḍoọgh r’ikumor awe. Esi omaạm, nạ aatughiạn ni oye siphẹ ookpomhoghan phọ anyinha dị akpẹ ni  oḍuomolhoghi kụ rakparaghạm odẹgh ophogh—ikpaarioghọm iigbo, isophoghom eghunotu, obobọ e/moon? Nạ amiịn ni imạ araagharạ onyọ umor phọ dị nạ kawạ omhoọgh aani ḍughụm? Mem dị nạ aaḅeghiọn emạ eḍeenhaan phọ odị, eeni nạ katuughạ ni imạ areten orue okparaghạm odẹgh ophogh. P’eeghe idị eḍighi iyaạr aḍiḅeraạn omhoọgh awe imạ areḍeenhaan ḍio arodon—ekạr eḍighi iyaạr otuạn obo!—Hib. 13:7; Jems. 1:2, 3.

15. Eeghe oromha aPọl kụ kulhoghonhaạn iyira ḍighaạgh oghiọm aghisigh obo siẹn arukumuan phọ yira rongọ bọ aZihova?

¹⁵ Orue olhọgh ophophe eephọ r’amuḅọph siẹn ookpomhoghan phọ, ewạ mọ torobọ onyọ ayira aḍighi okạr ipẹ odị katue bọ. Ooḅeghiọn eḍeenhaan aKristẹn oḅẹl okuron asiạ phọ. Bidị umhoọgh kirokirọ inmo r’iiḍighi. (1 Kọr. 12:4, 7-11) Kuolọ iphẹn phọ i/lọgh iipikian r’amadia siphẹ igbo phọ abidị. APọl aromha torobọ onyọ abidị oḍighi ghan idị kelọgh ‘epophe buọ asiosị phọ aḍighi bọ loor phọ aKraist.’ APọl agẹ aghiọm buọ Efesọs mọ: “Mem dị ekpịgh kirokirọ phọ reḍighi ni oḍighi phọ odị, oomo phọ aloor phọ repophom ghan ni ephomoghiạn kemoọgh inyaạm.” (Efẹ. 4:1-3, 11, 12, 16) Buphẹ oḍighi bọ iphẹn aPọl aromha bọ ulhọgh ophophe eephọ r’amuḅọph—raagharạ dị yira romiịn ni siẹn arookpomhoghan phọ ḍio arodon.

16. Eeghe kụ idị yira kosopha oḍighi? (Hibru 6:10)

¹⁶ Sopha oghel otomaạm ghan aloor anạ bunhọn. Tuughạ esi aZizọs, kụ akparaghạ otuughaạny imạ araagharạ phọ odị. Mooghọm suọ reḍeenhaan awe omheeraam asimem aBaibul r’abuọ aḍio arodon. Iduọn nạ rakiọm bọ ghisigh kaḍighi ipẹ nạ katue bọ, kuphom ni owol mọ aZihova ‘k/oye dị kabula oḍighi phọ nạ raḍighi bọ.’ (Bạl Hibru 6:10.) Kiọm ghisigh abo esi arukumuan phọ nạ rangọ bọ aZihova, kụ akuphom owol mọ odị asereghiạn ni ikuph phọ nạ alhọgh bọ oḍighi idị eḅeraạn nyodị r’oomo ekpom.