Ogbạ oghunya mọ, “oguan dị u/ḅarạm ephegh ilọ oḍighi omhunhenhi iyaạr, ibadị amem romạgh ghan Enhaạn . . . mọ amhiịn aani.” Eeni kogeeghiạn ni obobọ kokaạph onhụ bịn.

Abuniin otue ni ootughiạn mọ i/nighẹ oghunya iikunya, loor esi dị mọ aZizọs aḅẹm mọ: “Ke/kunya ghan mun mem Iọ nyina reguan oguan . . . Oghaạph anyina aḍighi ghan mọ ii, pọ ii, eeye, pọ eeye! Torobọ iyaạr Iọ epeI iphẹn, pọ iḍuạ esi Eru kụ emite.” (Mat. 5:33-37) Toroboiperolbọ, aZizọs alhegheri ni mọ Olhogh phọ aMozis apamanhạm ni riisi dị oghunya iikunya, ḅilhẹ mọ abugey arebenhẹ Enhaạn ughunya ghan ni. (Gen. 14:22, 23; Ex. 22:10, 11) Odị alhegheri ni mọ ghalhamọ r’aZihova bịn aghunyian ghan ni iikunya. (Hib. 6:13-17) Iphẹn phọ eḍeenhaan mọ aZizọs o/ḅẹm mọ oye ku/kunyian ghan r’oghunyian. Odị aḅẹm ghan ghụn mọ ku/kol raraạr dị i/kpẹ otuạn oghunyian bịn ukunyian. Olhegheri mọ oḍighi ghan ipẹ yira moghaạph bọ eḍighi dọl iigbia. Esi iduọn phọ, yira omoọgh oḍighi ghan ilọ yira oghaạph.

Nạ kaḍighi ika eḍighi maạr dị oḅenhị nyinhạ oghunyian? Miịn ni mọ nạ katue ni aḍighi iyaạr phọ nạ aghol bọ rakunyian. Eḍighi maạr dị nạ o/kạr olhegheri, pọ kenighẹ ghụn dị nạ ka/kunyian. Ekpo onhụ Enhaạn epụr rurụ mọ: “Enighẹ ghụn dị nạ u/kunyian kparipẹ r’oghunyian dị nạ u/ḍighi.” (Eccl. 5:5) Edị etum siphẹ, ḅeeḅeghiọn sinhị iilhogh aBaibul dị egbolhomaam iikunya phọ, kụ asighẹ ooruẹn olhoghi anạ aḍighinhom. Ighẹn kụ iniin asinhị iilhogh aBaibul phọ iphẹn phọ?

Iniin iikunya i/gbạgh iilhogh Enhaạn. Esi omaạm, Abugbaanhaạn AZihova rokunyan ghan ni mem apinien. Olom mọ r’anhịr phọ rokunya ghan ghisigh Enhaạn r’awe mọ oniin kapomoghiạn ni nyoniin, asereghiạn, aḅilhẹ alọgh eegu, ḅilhẹ mọ aḍuugh bịn kụ ketue egbariọn bidị. (Abunọn aburulom r’anmariịr ro/tuụgh ghan ikpo onhụ phọ koghaạph, kuolọ rokunyan ghan ni ghisigh Enhaạn.) Bịn bidị moḍighi olom r’anhịr, kụ apinien phọ abidị katọl bịn tutụ k’aḍuugh. (Gen. 2:24; 1 Kọr. 7:39) Ii, opọ phọ oghunyan phọ ni. Kụ ekpeanhaạn ni eḅilhẹ eḅọph r’ogbi phọ Enhaạn.

Iniin iikunya egbạgh itọ Enhaạn. Ogey onyọ aKristẹn ka/kunyan ophạm eenemạ oghị eenhaan eelhe odị eghạm obobọ akunyan mọ onọ kaa/ḅereghị mun Enhaạn. Ipẹ phọ egbạgh ni itọ phọ Enhaạn. AKristẹn “k/abuọ aḅirini phọ,” esi iduọn phọ yira ko/ḍighom aani iikonoghiạn r’araaghạm mọ abidị.—Jọn 15:19; Isa. 2:4; Jems. 1:27.

 Iniin iikunyan onyọ aKristẹn kaḍighinhom ooruẹn olhoghi odị. Eeni amem, tutụ yira kokunyan, rewạ ghan ni mọ ophụr omhaạr ooḅeghiọn ikpo onhụ phọ aZizọs eḅẹm bọ mọ “isogh ilọ aSiza engọ Siza esogh ilọ Enaạn engọ Enaạn.”—Luk 20:25.

Esi omaạm, oḅẹm mọ onyọ aKristẹn akị ogeeghiạn ilọ oghị enhọn eelhe, obobọ oḍighi aani olọ eelhe phọ, kụ emhoghi mọ aghunyan orọl ilọ eelhe phọ oḅẹm. Kụ eḍighi maạr dị iikunya phọ egbạgh iilhogh phọ Enhaạn, pọ odị kasighẹ ooruẹn olhoghi aBaibul phọ odị kụ aḍighinhom. Eeni kẹn itooghị phọ otue ni omeera mọ odị aaḅenhion ikpo onhụ phọ eten dị kee/ḅaghamhị ooruẹn olhoghi odị.

Iikunyan dị ooḅenhion etue ni eḅọph r’aḍinhị olhogh aBaibul phọ edi bọ Rom 13:1, eḅẹm bọ mọ: “Ekpẹ ni dị torobọ oye kanaghanạn ghan buphẹ rotooghị bọ itooghị phọ.” Esi iduọn phọ, onyọ aKristẹn atue ni asopha mọ i/beeph oghunyan oḍighi ilọ Enhaạn kụ aḅẹm ni moḍighi.

Ooruẹn olhoghi kalhoghonhaạn kẹn nyinhạ ḍighaạgh mem lọ oḅenhị nyinhạ oḍighinhom ekaanheẹn iyaạr obobọ enhọn eten mem lọ nạ rakunyan. Awe aRom r’abuọ areelhe dị eḅula omhạn iḍiodi phọ ughunyan ghan esi oghạl iikpọ emhụgh eghạm, oḍeenhaan mọ oye phọ akpẹ ni oḍuomolhoghi. Abuọ aGrik uphophe ghan ḍighaạgh anyụ mem lọ rokunyan. Iḍeenhaan ghan mọ bidị olọgh ni elhegh mọ Enhaạn iikpọ edi ni dị renaghạn ipẹ rokaạph bọ r’ipẹ roḍighi bọ, ḅilhẹ mọ kapạm ni igbiighian r’atorobọ oye.

Ii ebenhẹ aZihova ka/kunyan r’atorobọ iyaạr dị emerenyạn eelhe eḅilhẹ ekomọm ikarạph iiseẹny. Kokaạph ika eḍighi maạr dị oḅenhị nyinhạ oḅạm aḍighaạgh Baibul oghunyan otu iiruẹn? Nạ atue ni atuụgh aḍighi, loor esi dị aBaibul phọ akaạph ni ilọ awe omheeraam dị oḍighi ghan ni iyaạr mem dị rokunyan. (Gen. 24:2, 3, 9; 47:29-31) Ewạ ni mọ legheri mọ nạ rakunyan ghisigh Enhaạn ogbạ agey bịn. Emoghi ni dị nạ kaakolhobian ogbạ agey esi atorobọ aḍipuru lọ opuru nyinhạ.

Loor iduọn asiya phọ ayira r’aZihova emhạn bọ ni maạr, ooḅereghị ghan ni oḅilhẹ omhaạr ooḅeghiọn torobọ iikunya dị uḅenhị iyira oghunyan, mughumọ ooruẹn olhoghi ayira ku/gurọgh iyira ḅilhẹ m’i/gbạgh sinhị iilhogh aBaibul phọ. Nạ asopha oghunyan iikunya, pọ miịn ni mọ nạ atuụgh ni aḍighi.—1 Pit. 2:12.